Hechos 1

Nchi̱sóyuꞌú Jesús ya̱ kiji Ta̱chi̱ꞌ Ííꞌ Ndiosíꞌ

1Noꞌó Teófilo, tutuꞌ xíꞌnañúꞌún ntee ni̱ꞌ ví nɨꞌɨ ya̱ nsa̱ꞌá Jesús jín ya̱ nxi̱néꞌénꞌ re̱ꞌ, ne̱ sáá nka̱jiéꞌé re̱ꞌ nxi̱néꞌénꞌ re̱ꞌ, 2jín ne̱ ki̱vɨ̱ꞌ nna̱keꞌen Tátáꞌ re̱ꞌ maáréꞌ kua̱noꞌonꞌ re̱ꞌ súkún. Jee ne̱ ntiáꞌan kɨ̱naa re̱ꞌ súkún, jee nta̱túníꞌ re̱ꞌ jín Ta̱chi̱ꞌ Ííꞌ Ndiosíꞌ sáá saꞌá rá najiáꞌáꞌ re̱ꞌ ya̱ kúvi apóstol ya̱ nka̱ji re̱ꞌ jín ya̱ chuichí re̱ꞌ ráa. 3Ne̱ sáá ya̱ njia̱ꞌa ya̱ nnoꞌo re̱ꞌ jee ni̱ꞌi̱ꞌ re̱ꞌ, jee suni nstúvi tékúꞌ re̱ꞌ maáréꞌ nu̱u̱nꞌ ráa jee nstúvi kájí víꞌí re̱ꞌ nu̱u̱nꞌ ráa ya̱ máá naáꞌ nijia ya̱ tékúꞌ re̱ꞌ. Jee u̱vi̱xiko (40) ki̱vɨ̱ꞌ ka̱ꞌ niniꞌ ráa re̱ꞌ. Jee nkaꞌanꞌ re̱ꞌ jie̱ꞌe̱ꞌ ichi na̱ja tátúníꞌ Ndiosíꞌ nu̱u̱nꞌ ñɨvɨ. 4Sáá nééꞌ tútú re̱ꞌ jín ráa, nta̱túníꞌ re̱ꞌ nu̱u̱nꞌ ráa:

―Koto kéne rán ñuunꞌ káꞌnú Jerusalén. Kunetu rán ne̱ ni̱ꞌi̱nꞌ rán ya̱ nchi̱sóyuꞌú Tátáꞌ ni̱ꞌ, sánikua̱ꞌ nteso̱ꞌo rán ya̱ nkachiꞌ ni̱ꞌ nu̱u̱nꞌ rán. 5Chi Juan nsi̱kuánuté nijia re̱ꞌ jín nute, soo ntu kuéꞌeꞌ ka̱ꞌ ki̱vɨ̱ꞌ, ránoꞌó kuanuté jín Ta̱chi̱ꞌ Ííꞌ Ndiosíꞌ, jee kɨꞌɨ re̱ꞌ iniꞌ rán ―nkachiꞌ Jesús.

Nnaa Jesús súkún

(Marcos 16:19-20; Lucas 24:51-52)

6I̱ña̱jée sáá nku̱tútú ráa jín Jesús, jee ni̱ka̱tu̱ꞌún ráa re̱ꞌ:

―I̱toꞌoꞌ ránꞌ, ¿á tiempúꞌ vitan nakakɨnꞌ jiáá tuku país maáó Israel ya̱ tatúníꞌ tuku ñɨvɨ maáó?

7Jee nkachiꞌ Jesús nu̱u̱nꞌ ráa:

―Ntu̱né íyó kukáꞌnú iniꞌ ránú ni na̱ ki̱vɨ̱ꞌ ni nama ñani Tátáꞌ ni̱ꞌ maa. Maá Tááꞌ ni̱ꞌ ñani hora vá, chi nísotíñú re̱ꞌ. 8Soo ni̱ꞌi̱nꞌ rán fuersáꞌ ííꞌ sáá kenta Ta̱chi̱ꞌ Ííꞌ kɨꞌɨ re̱ꞌ iniꞌ rán. Jee kuvi rán ñɨvɨ, ya̱ istúvi rán ya̱ naáꞌ jie̱ꞌe̱ꞌ nuꞌuꞌ nu̱u̱nꞌ rá ñɨvɨ ñuunꞌ Jerusalén jín nu̱u̱nꞌ nɨꞌɨ rá sánitɨ́ɨn Judea jín Samaria, jín nu̱u̱nꞌ rá ñɨvɨ íyó rá ñuunꞌ íká ka̱ꞌ nu̱u̱nꞌ nɨ́ɨ́nkáꞌnú ñɨ̱vɨ́ ―nkachiꞌ Jesús.

9Sáá nnɨꞌɨ nkachiꞌ re̱ꞌ tu̱ꞌun yaꞌá, ni néꞌyá ráa re̱ꞌ, jee nxi̱náa Ndiosíꞌ re̱ꞌ súkún. Jee nki̱vɨ re̱ꞌ nu̱u̱nꞌ vi̱ko̱ꞌ jee ntu ka̱ꞌ niniꞌ ráa maa. 10Jee ni nínta nchinúún ráa néꞌyá ráa súkún ni kua̱naa re̱ꞌ súkún, jee sa̱naanꞌ ntu̱vi u̱vi̱ꞌ te̱e ñúꞌún saꞌma kuíjín íñɨ́ jín ráa. #1:10 Ángeles 11Jee nkachiꞌ núvíꞌ rá te̱e vá nu̱u̱nꞌ ráa:

―Rá te̱e Galilea, ¿na̱ kuvi chi íñɨ́ rán néꞌyá rán súkún? Jesús yaꞌá, ya̱ nkene‑e nteñu rán jee nnaa‑a ne̱ súkún, nuún niji tuku‑u mákua niniꞌ rán maa kua̱ꞌa̱nꞌ‑a súkún ―nkachiꞌ núvíꞌ rá te̱e vá.

Nka̱ji ráa Matías sáva nakunasɨꞌ‑ɨ nu̱u̱nꞌ Judas

12Jee kuíre nkene rá apóstol yuku, naní Olivos, jee nni̱kó ráa ñuunꞌ Jerusalén. Yuku vá káá yatin ñuunꞌ Jerusalén, chi káá yuku vá ɨɨn kilómetro ya̱ ñúkúꞌvá sáá kúvi kaka rá ñɨvɨ Israel ki̱vɨ̱ꞌ nájiáví sáni íyó ñujiínꞌ ráa. 13Sáá nkenta ráa ñuunꞌ vá, jee nkaa ráa iniꞌ veꞌi yósóꞌ táꞌán nu̱u̱nꞌ nkino̱o ráa.

Ni̱yo Pedro,

jín Juan,

jín Jacobo,

jín Andrés,

jín Felipe,

jín Tomás,

jín Bartolomé,

jín Mateo,

jín Jacobo, ya̱ kúvi se̱ꞌya Alfeo,

jín Simón, ya̱ nyɨꞌɨ ñujiínꞌ Celote,

jín Judas ya̱ kúvi ñaniꞌ #1:13 Áxí: se̱ꞌya Jacobo.

14Jee nuún yɨ́tíñú ntáká ráa yaꞌá káꞌánꞌ ráa jín Ndiosíꞌ. Jee kútútú ráa jín rá ñaꞌan, jín María, ya̱ kúvi náánꞌ Jesús, jín rá ñaniꞌ re̱ꞌ sáva kaꞌanꞌ ráa jín Ndiosíꞌ.

15Rá ki̱vɨ̱ꞌ yukuán, nku̱tútú yatin sientúꞌ o̱ko̱ꞌ (120) ñɨvɨ yukuán. Jee nnakui̱ñɨ̱ꞌ nichiꞌ Pedro nteñu rá ñanitáꞌán vá, jee nkachiꞌ‑i nu̱u̱nꞌ ráa:

16―¡Ránoꞌó ñanitáꞌán! Ni̱yo ya̱ sikúnkuvi Ndiosíꞌ tu̱ꞌun jie̱ꞌe̱ꞌ Judas ya̱ njia̱ꞌa Ta̱chi̱ꞌ Ííꞌ Ndiosíꞌ nu̱u̱nꞌ David, ne̱ yanaꞌán, jee ntee re̱ꞌ maa nu̱u̱nꞌ Tutuꞌ níso Tu̱ꞌun Ndiosíꞌ. Jee Judas ví ya̱ nyosoꞌ nu̱u̱nꞌ rá te̱e ya̱ ntɨɨn ráa Jesús. 17Jee ɨɨn rá táꞌán ránꞌ nkuvi re̱ꞌ, jee nni̱ꞌi̱nꞌ re̱ꞌ tiñu yaꞌá saꞌá re̱ꞌ jín ránꞌ jie̱ꞌe̱ꞌ Tu̱ꞌun Ndiosíꞌ ―nkachiꞌ Pedro.

18(Judas vá nkeꞌen re̱ꞌ ɨɨn ñuꞌun jín xu̱ꞌún ya̱ nníꞌinꞌ re̱ꞌ, jie̱ꞌe̱ꞌ ya̱ ni̱váꞌa nsa̱ꞌá re̱ꞌ. Jee yukuán nkininkava nei re̱ꞌ, jee nka̱ꞌnɨ̱ꞌ chi̱ji re̱ꞌ, jee nkene nɨꞌɨ itɨꞌ re̱ꞌ. 19Jee nkenta nku̱káꞌnú iniꞌ nɨꞌɨ rá ñɨvɨ ya̱ nneeꞌ ñuunꞌ káꞌnú Jerusalén. Saáva nsi̱kúnání ráa ñuꞌun vá Acéldama jín tu̱ꞌun káꞌánꞌ maáráa, ya̱ kuíni káchíꞌ Ñuꞌun Ni̱ñɨ̱ꞌ.)

20Jee suni nkachiꞌ Pedro nu̱u̱nꞌ ráa:

―Chi káchíꞌ nu̱u̱nꞌ Tutuꞌ Ííꞌ naní Salmo:

Íyó koo saɨn veꞌi re̱ꞌ.

Jee koto ni ɨɨn nééꞌ iniꞌ‑i.

Jee suni káchíꞌ‑i:

Íyó nakui̱ñɨ̱ꞌ inka ka̱ꞌ nu̱u̱nꞌ tiñu níso re̱ꞌ.

Sukuán káchíꞌ Tutuꞌ Ííꞌ.

21’Saáva íyó ka̱ji‑ó ɨɨn rá te̱e, ya̱ nku̱táꞌán‑a jín ránꞌ nɨꞌɨ tiempúꞌ sáá ni̱kónúun I̱toꞌoꞌ‑ó Jesús nteñu‑ó, 22ne̱ sáá nsi̱kuánuté Juan Jesús jín ne̱ ki̱vɨ̱ꞌ nxi̱nóo Jesús maáó jee nnaa‑a súkún. Jee te̱e vá íyó kuiñɨ re̱ꞌ jín ránꞌ, sáva istúvi re̱ꞌ ya̱ naáꞌ nu̱u̱nꞌ rá ñɨvɨ, ya̱ Jesús nna̱tekuꞌ i̱i̱ꞌ‑i jee nnako̱o ñunéꞌyúꞌ‑u nteñu rá níꞌiꞌ ―nkachiꞌ Pedro.

23Jee nka̱ji ráa u̱vi̱ꞌ te̱e ya̱ kúvi ráa: José jín Matías. José yaꞌá naní re̱ꞌ Barsabás jee suni naní re̱ꞌ Justo. 24Jee nkaꞌanꞌ ráa jín Ndiosíꞌ, jee nkachiꞌ ráa:

―I̱toꞌoꞌ‑ó, suvinú vá, nijin iniꞌ nú na̱sa kúvi ánímaꞌ ntáká ñɨvɨ. Stúvi nú nu̱u̱nꞌ ránꞌ, né ɨɨn núvíꞌ rá yaꞌá vá nka̱ji nú, 25sáva nakeꞌen re̱ꞌ tiñu yaꞌá jee kuvi re̱ꞌ apóstol ya̱ chuichí nú. Tiñu vá nxi̱nóo Judas, jee kua̱ꞌa̱nꞌ re̱ꞌ nu̱u̱nꞌ kúníꞌ re̱ꞌ nu̱u̱nꞌ níꞌinꞌ re̱ꞌ maa ―ni̱ka̱nꞌ táꞌvíꞌ ráa.

26Jee ntavaꞌ ráa suertéꞌ, sáva ka̱ji ráa ɨɨn rá te̱e vá. Jee nkakɨ̱ꞌɨ suertéꞌ Matías. Jee kuísá ntɨɨn kuéntáꞌ ráa ya̱ nákuíñɨꞌ re̱ꞌ jín ni u̱ji̱ꞌ ɨɨn tán rá najiáꞌáꞌ Jesús ya̱ kúvi apóstol.

Currently Selected:

Hechos 1: meh

Highlight

Copy