Mateo 28

Nna̱tekuꞌ i̱i̱ꞌ Jesús nkene‑e nteñu rá ni̱yɨ

(Marcos 16:1-8; Lucas 24:1-12; Juan 20:1-10)

1Sáá njia̱ꞌa ki̱vɨ̱ꞌ nájiáví, sáá nku̱nijinꞌ ki̱vɨ̱ꞌ xíꞌnañúꞌún nka̱jiéꞌé semana, jee kua̱ꞌa̱nꞌ nne̱ꞌyá María, ñaꞌan ñuunꞌ Magdala, jín inka ka̱ꞌ María yaviꞌ veꞌi ni̱yɨ vá. 2Jee sa̱naanꞌ kuitɨꞌ, jee nkiji ñutáan níꞌin nasɨ́kuitɨꞌ, chi ɨɨn najiáꞌáꞌ ííꞌ I̱toꞌoꞌ‑ó Ndiosíꞌ nki̱kuun antivɨ́ súkún, jee ña̱kuyatin‑i yuꞌú yaviꞌ, jee nsi̱káka xíín‑i yu̱u̱ꞌ násɨ́ꞌ yuꞌú kava vá, jee ña̱kuneeꞌ‑e nu̱u̱nꞌ yu̱u̱ꞌ vá. 3Jee jiánu̱te̱ꞌ‑e kuéntáꞌ jiánu̱te̱ꞌ tajia, jee máá kuíjín kuéntáꞌ íyó yuꞌveꞌ víjin íyó saꞌma ñúꞌún‑u. 4Jee sáá niniꞌ rá soldado kúmí yukuán maa, jee ne̱ nkisɨ ráa máá nyu̱ꞌví nasɨ́kuitɨꞌ ráa, va̱ne̱ꞌ kuéntáꞌ níꞌiꞌ ráa. 5Saájee nkachiꞌ najiáꞌáꞌ ííꞌ vá nu̱u̱nꞌ rá ñaꞌan vá:

―Koto yúꞌví rán, chi jíníꞌ ni̱ꞌ ya̱ nánukú rán Jesús, ya̱ níꞌiꞌ‑i nu̱u̱nꞌ kurúsiꞌ. 6Ntu̱ví re̱ꞌ yaꞌá, chi ya̱ nna̱tekuꞌ i̱i̱ꞌ re̱ꞌ ya̱ nxi̱nákóo Ndiosíꞌ re̱ꞌ nkene re̱ꞌ nteñu rá ni̱yɨ, kuéntáꞌ ya̱ nkachiꞌ re̱ꞌ. Neꞌenꞌ rán jee kune̱ꞌyá rán nu̱u̱nꞌ ñakɨnꞌ ráa re̱ꞌ. 7Kuáꞌán rán ntañúꞌún kuitɨꞌ kikachiꞌ rán nu̱u̱nꞌ rá te̱e nsu̱kuáꞌa re̱ꞌ ráa: “Ya̱ ya nna̱tekuꞌ i̱i̱ꞌ re̱ꞌ nkene re̱ꞌ nteñu rá ni̱yɨ, jee xíꞌna re̱ꞌ ka̱ꞌ kɨ̱ꞌɨ̱nꞌ ichinúúnꞌ rán ne̱ ñuꞌun Galilea, jee yukuán kuniꞌ rán re̱ꞌ”, kachiꞌ rán nu̱u̱nꞌ ráa. ¡Teso̱ꞌo rán!, chi nkachitu̱ꞌún ni̱ꞌ maa nu̱u̱nꞌ rán ―nkachiꞌ najiáꞌáꞌ ííꞌ vá.

8Saájee kuísá ntañúꞌún kuitɨꞌ nkene ráña nu̱u̱nꞌ yaviꞌ veꞌi ni̱yɨ vá, jee kua̱ꞌa̱nꞌ ráña, jee yúꞌví ráña, jee suni kúsɨ́ɨꞌ ntántúníꞌ nasɨ́kuitɨꞌ iniꞌ ráña jínu ráña kua̱kachiꞌ ráña nu̱u̱nꞌ rá te̱e ya̱ nsu̱kuáꞌa Jesús ráa. 9Jee kune̱ꞌyá, ni kua̱ꞌa̱nꞌ ráña ichi, jee nna̱ketáꞌán Jesús ráña, jee nkachiꞌ re̱ꞌ:

―Kunaka ñaꞌán Ndiosíꞌ ránoꞌó.

Jee ña̱kuyatin ráña nu̱u̱nꞌ re̱ꞌ, jee ña̱kinumi ráña rá jie̱ꞌe̱ꞌ re̱ꞌ jee nneñu̱ꞌun ráña re̱ꞌ. 10Saájee nkachiꞌ re̱ꞌ nu̱u̱nꞌ ráña:

―Koto yúꞌví rán, jee kuáꞌán rán jee kachiꞌ rán nu̱u̱nꞌ rá ñaniꞌ ni̱ꞌ ya̱ kɨ̱ꞌɨ̱nꞌ ráa nu̱u̱nꞌ ñuꞌun Galilea, jee yukuán kuniꞌ ráa nuꞌuꞌ ―nkachiꞌ Jesús.

Nákúꞌva rá soldado tu̱ꞌun nu̱u̱nꞌ rá su̱tu̱ꞌ kúñáꞌnú

11Jee ni kua̱ꞌa̱nꞌ ráña, jee sava rá soldado ya̱ kúmí ráa yuꞌú kava vá, kua̱ꞌa̱nꞌ ráa ñuunꞌ, jee njia̱ꞌa ráa tu̱ꞌun nu̱u̱nꞌ rá su̱tu̱ꞌ kúñáꞌnú ka̱ꞌ nɨꞌɨ ya̱ nkuvi. 12Jee kuíre nnu̱tútú rá su̱tu̱ꞌ kúñáꞌnú vá jín rá te̱e ñáꞌnú nu̱u̱nꞌ ñuunꞌ jee nna̱túꞌún ráa, jee njia̱ꞌa ráa xu̱ꞌún kue̱ꞌe̱ꞌ nu̱u̱nꞌ rá soldado vá. 13Jee nkachiꞌ ráa nu̱u̱nꞌ rává:

―Íyó kachiꞌ rán ya̱ rá te̱e ya̱ nsu̱kuáꞌa vá nkiji ráa yakuááꞌ jee nsa̱ꞌá kuíꞌná ráa ñunéꞌyúꞌ re̱ꞌ sáá nkixiꞌ rán, kachiꞌ rán. 14Jee retú kenta tu̱ꞌun yaꞌá nu̱u̱nꞌ te̱e nísotíñú, ya̱ kúvi gobernador, jee ránuꞌuꞌ kɨ̱kaꞌanꞌ ránꞌ jín re̱ꞌ kɨ̱sijínúꞌ ránꞌ iniꞌ re̱ꞌ, sáva nama ránꞌ ránoꞌó nu̱u̱nꞌ tu̱nóꞌó xinóꞌo re̱ꞌ ránoꞌó ―nkachiꞌ ráa.

15Jee rá soldado vá ntɨɨn ráa xu̱ꞌún vá, jee nsa̱ꞌá ráa sánikua̱ꞌ nkachiꞌ rává nu̱u̱nꞌ ráa. Jee ne̱ tiempúꞌ vitan íyó i̱i̱ꞌ rá tu̱ꞌun yaꞌá tékútu̱ꞌún i̱i̱ꞌ‑i nteñu rá ñɨvɨ ñuunꞌ Israel.

Tiñu tétíñú Jesús rá ñɨvɨ re̱ꞌ

(Marcos 16:14-18; Lucas 24:36-49; Juan 20:19-23)

16Jee ni ujíꞌ ɨɨn (11) rá te̱e ya̱ nsu̱kuáꞌa Jesús vá kua̱ꞌa̱nꞌ ráa ñuꞌun Galilea, yuku nu̱u̱nꞌ nkachiꞌ Jesús nu̱u̱nꞌ ráa kɨ̱ꞌɨ̱nꞌ ráa. 17Jee sáá niniꞌ ráa re̱ꞌ, jee nneñu̱ꞌun ráa re̱ꞌ, soo sava ráa íyó tu̱ꞌun jiáni iniꞌ ráa néꞌyá ráa re̱ꞌ. 18Saájee ña̱kuyatin Jesús nu̱u̱nꞌ ráa, jee nkachiꞌ re̱ꞌ nu̱u̱nꞌ ráa:

―Ntaji Tátáꞌ ni̱ꞌ Ndiosíꞌ ntáká tiñu ñáꞌnú kunisotíñú ni̱ꞌ antivɨ́ súkún jín iniꞌ ñɨ̱vɨ́ yaꞌá. 19Saáva kuáꞌán rán xinéꞌénꞌ rán tu̱ꞌun váꞌa ni̱ꞌ nu̱u̱nꞌ ñɨvɨ ntáká rá ñuunꞌ sáva kuneí iniꞌ ráa nuꞌuꞌ jee ki̱vɨ ráa xi̱ntíín ni̱ꞌ ya̱ sukuáꞌa ráa tu̱ꞌun ni̱ꞌ, jee sikuánuté rán ráa nu̱u̱nꞌ súví Tátáꞌ‑ó Ndiosíꞌ jín Se̱ꞌya re̱ꞌ, jín Ta̱chi̱ꞌ Ííꞌ re̱ꞌ. 20Jee xinéꞌénꞌ rán ráa ya̱ kaníjiá ráa ntáká ya̱ nta̱túníꞌ ni̱ꞌ nu̱u̱nꞌ rán, jee nuꞌuꞌ koo ni̱ꞌ jín rán ntáká ki̱vɨ̱ꞌ ne̱kua̱ꞌ kenta ji̱nu tiempúꞌ nu̱u̱nꞌ nɨ́ꞌɨ. Sukuán koo.

Currently Selected:

Mateo 28: meh

Highlight

Copy