Marcos 2

Jesús xínúvi ɨɨn te̱e ya̱ ntu kúvi kantaꞌ

(Mateo 9:1-8; Lucas 5:17-26)

1Sáá njia̱ꞌa yakuꞌ ki̱vɨ̱ꞌ, Jesús nki̱vɨ tuku ñuunꞌ Capernaum. Jee nteso̱ꞌo ráa ya̱ nééꞌ re̱ꞌ veꞌi. 2Jee nnu̱tútú víꞌí ñɨvɨ ya̱ ya ntu̱ví ka̱ꞌ nu̱u̱nꞌ kuiñɨ ráa iniꞌ veꞌi, ni yuvéꞌí, jee káchíꞌ re̱ꞌ Tu̱ꞌun Ndiosíꞌ nu̱u̱nꞌ ráa. 3Jee nkiji rá ñɨvɨ jín ɨɨn ya̱ kúꞌvíꞌ ya̱ ntu kúvi kantaꞌ nu̱u̱nꞌ Jesús. Jee ku̱mi̱ꞌ te̱e nniso maa. 4Jee ntu kúvi kenta ráa jín re̱ꞌ nu̱u̱nꞌ Jesús, chi íñɨ́ víꞌí ñɨvɨ. Saáva nna̱neeꞌ ráa ntíꞌ xi̱ni̱ꞌ ve̱ꞌí nu̱u̱nꞌ íñɨ́ Jesús. Jee sáá nine yukuán, jee yukuán nsi̱kúun ráa tu̱nchi̱só yósóꞌ te̱e ntu kúvi kantaꞌ vá. 5Sáá niniꞌ Jesús ya̱ nku̱neí iniꞌ ráa re̱ꞌ, nkachiꞌ re̱ꞌ nu̱u̱nꞌ te̱e ya̱ ntu kúvi kantaꞌ vá:

―Se̱ꞌya, ya nne̱káꞌnú iniꞌ ni̱ꞌ noꞌó jie̱ꞌe̱ꞌ rá kua̱chi nú ―nkachiꞌ re̱ꞌ.

6Yukuán nééꞌ rá Mestrúꞌ káꞌvi ni ya̱ xínéꞌénꞌ ráa Tu̱ꞌun ya̱ nta̱túníꞌ Ndiosíꞌ, jee naní ráa escriba, jee nkaꞌvi iniꞌ ráa: 7“¿Na̱chi káꞌánꞌ te̱e yaꞌá sukuán? ¡Káꞌánꞌ re̱ꞌ tu̱níváꞌa néꞌyá re̱ꞌ Ndiosíꞌ rúja! Chi, ¿né ɨɨn vá kúvi kunekáꞌnú iniꞌ jie̱ꞌe̱ꞌ kua̱chi rá ñɨvɨ rúja? Chi métúꞌún xíníꞌ Ndiosíꞌ vá íyó kúvi kunekáꞌnú iniꞌ jie̱ꞌe̱ꞌ kua̱chi rá ñɨvɨ”, nkaꞌvi iniꞌ ráa.

8Jee kuísá niniꞌ máá Jesús ya̱ káꞌvi iniꞌ ráa sukuán, jee nkachiꞌ re̱ꞌ nu̱u̱nꞌ ráa:

―¿Na̱ kuvi chi jiáni iniꞌ ánímaꞌ rán sukuán rúja? 9¿Né ɨɨn vá ka̱ꞌá ka̱ꞌ kachiꞌ ni̱ꞌ rúja? ¿Á kachiꞌ ni̱ꞌ nu̱u̱nꞌ te̱e ntu kúvi kantaꞌ ya̱: “Nne̱káꞌnú iniꞌ ni̱ꞌ noꞌó jie̱ꞌe̱ꞌ rá kua̱chi nú?”, áxí, ¿á kachiꞌ ni̱ꞌ: “Nako̱o, nakeꞌen tu̱nchi̱só nú, jee kaka”, rúja? 10Soo nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, stúvi ni̱ꞌ nu̱u̱nꞌ rán sáva kukáꞌnú iniꞌ rán ya̱ nísotíñú ni̱ꞌ nu̱u̱nꞌ ñɨ̱vɨ́ yaꞌá sáva kunekáꞌnú iniꞌ ni̱ꞌ jie̱ꞌe̱ꞌ rá kua̱chi ñɨvɨ.

Jee nkachiꞌ re̱ꞌ nu̱u̱nꞌ te̱e ntu kúvi kantaꞌ:

11―Nu̱u̱nꞌ nú káchíꞌ ni̱ꞌ: Nako̱o, nakeꞌen tu̱nchi̱só nú jee kuánoꞌonꞌ veꞌi nú ―nkachiꞌ re̱ꞌ nu̱u̱nꞌ‑u.

12I̱ña̱jée nnako̱o te̱e vá, jee nna̱keꞌen‑e tu̱nchi̱só‑o, jee nkene‑e ichinúúnꞌ nɨꞌɨ ráa. Saáva nɨꞌɨ ráa nti̱vɨ́ xíniꞌ ráa, jee nna̱kuetúꞌún ráa Ndiosíꞌ, jee káchíꞌ ráa:

―Ntiáné kuniꞌ‑ó tiñu suꞌva ―nkachiꞌ ráa.

Kána Jesús Leví

(Mateo 9:9-13; Lucas 5:27-32)

13Jee kua̱ꞌa̱nꞌ tuku Jesús yuꞌú nteñúꞌún. Jee nku̱yatin rá ñɨvɨ nu̱u̱nꞌ re̱ꞌ, jee nxi̱néꞌénꞌ re̱ꞌ ráa Tu̱ꞌun Ndiosíꞌ. 14Sáá kua̱jia̱ꞌa re̱ꞌ, jee niniꞌ re̱ꞌ ɨɨn te̱e naní Leví, se̱ꞌya Alfeo, nééꞌ‑e vetíñú nu̱u̱nꞌ tɨ́ɨn‑ɨ xu̱ꞌún náneeꞌ ñuunꞌ Roma. Jee nkachiꞌ Jesús nu̱u̱nꞌ re̱ꞌ:

―Kunikɨnꞌ nuꞌuꞌ.

I̱ña̱jée nna̱kuiñɨꞌ Leví jee nchi̱nikɨnꞌ‑ɨ Jesús kua̱ꞌa̱nꞌ‑a jín re̱ꞌ.

15Jee sukuán nkuvi ni nééꞌ Jesús yájíꞌ‑i iniꞌ veꞌi Leví. Jee yukuán nééꞌ kue̱ꞌe̱ꞌ víꞌí rá te̱e tɨ́ɨn xu̱ꞌún náneeꞌ ñuunꞌ Roma jee suni nééꞌ kue̱ꞌe̱ꞌ rá ñɨvɨ kua̱chi. Jee nééꞌ ráa yájíꞌ nkáá ráa jín Jesús jín rá te̱e súkuáꞌa re̱ꞌ ráa, chi kue̱ꞌe̱ꞌ víꞌí ráa níkɨ́nꞌ maa. 16Rá te̱e xínéꞌénꞌ tu̱ꞌun tátúníꞌ Ndiosíꞌ ya̱ ntee Moisés, ya̱ naní ráa escriba, jín rá te̱e yɨ́ꞌɨ́ ñujiínꞌ fariseo, jee sáá niniꞌ ráa ya̱ yájíꞌ Jesús jín rá te̱e ntu síkúnkuvi va̱ꞌa tu̱ꞌun tátúníꞌ Ndiosíꞌ jín rá te̱e tɨ́ɨn xu̱ꞌún náneeꞌ ñuunꞌ Roma, jee nkachiꞌ ráa nu̱u̱nꞌ rá te̱e súkuáꞌa re̱ꞌ ráa:

―¿Na̱ kuvi chi yájíꞌ mestrúꞌ rán jín rá te̱e tíꞌñá tɨ́ɨn xu̱ꞌún náneeꞌ ñuunꞌ Roma jín rá te̱e sáꞌá kua̱chi?

17Sáá nteso̱ꞌo Jesús yaꞌá, jee nkachiꞌ‑i nu̱u̱nꞌ ráa:

―Rá ñɨvɨ íyó váꞌa ntu jíniñúꞌún ráa te̱e sátátán ta̱ta̱nꞌ stíláꞌ, chisaꞌ rá ñɨvɨ kúꞌvíꞌ ví ya̱ jíniñúꞌún ráa maa. Nsáꞌ váji ni̱ꞌ kana ni̱ꞌ rá ñɨvɨ na̱a̱ꞌ ki̱vɨ nu̱u̱nꞌ Ndiosíꞌ, chisaꞌ va̱ji ni̱ꞌ kana ni̱ꞌ rá ñɨvɨ íyó kua̱chi [sáva nakani iniꞌ ráa jee ki̱vɨ ráa naꞌá Ndiosíꞌ] ―nkachiꞌ Jesús.

Ni̱ka̱tu̱ꞌún ráa Jesús jie̱ꞌe̱ꞌ ya̱ kuneeꞌ niteꞌ

18Jee nééꞌ niteꞌ rá te̱e súkuáꞌa Juan ráa jín rá te̱e súkuáꞌa rá fariseo, sáva kuneñu̱ꞌun ráa Ndiosíꞌ. Jee nkenta rá ñɨvɨ nkachiꞌ ráa nu̱u̱nꞌ Jesús:

―Rá te̱e kútáꞌán jín Juan ya̱ súkuáꞌa re̱ꞌ ráa jín rá te̱e kútáꞌán jín rá fariseo súkuáꞌa ráa jee nééꞌ niteꞌ ráa, soo ¿na̱ kuvi chi rá te̱e kútáꞌán jín nú ya̱ súkuáꞌa nú ráa ntu̱ví nééꞌ niteꞌ ráa? ―nkachiꞌ rá ñɨvɨ vá.

19Nkachiꞌ Jesús nu̱u̱nꞌ ráa:

―¿Á kuvi kuneeꞌ niteꞌ rá ñɨvɨ kútáꞌán jín te̱e sukuán tánáꞌá ni nééꞌ re̱ꞌ jín ráa rúja? Ntu̱ví, chi ni nééꞌ re̱ꞌ jín ráa, jee ntu kúvi koo niteꞌ ráa. 20Soo kenta rá ki̱vɨ̱ꞌ jee siíyo rá inka ñɨvɨ te̱e sukuán tana̱ꞌá vá nu̱u̱nꞌ ráa, saájee kuneeꞌ niteꞌ ráa rá ki̱vɨ̱ꞌ yukuán. 21Ni ɨɨn ñɨvɨ ntu náchuꞌun kúté saꞌma jiáá ya̱ ntiáꞌan naniyɨ nu̱u̱nꞌ ɨɨn saꞌma túꞌú ntéꞌneꞌ nakoto‑o vá. Chi naniyɨ saꞌma jiáá vá jee nátáꞌ‑a ka̱ꞌ vá, jee kukáꞌnú ka̱ꞌ nu̱u̱nꞌ téꞌné saꞌma túꞌú vá. 22Jee ni ɨɨn ñɨvɨ ntu chúꞌun nixiꞌ uva jiáá iniꞌ rá ñɨɨn xlaúꞌ túꞌú, [chi ntu kúvi ka̱a̱ꞌ‑a ka̱ꞌ]. Chi kítɨ́ꞌ tiu̱u̱nꞌ nixiꞌ uva jee ste̱ꞌnéꞌ nixiꞌ uva rá ñɨɨn xlaúꞌ túꞌú vá. Jee kɨ̱naanꞌ nixiꞌ uva jín ñɨɨn xlaúꞌ vá. Saáva va̱ꞌa ka̱ꞌ chúꞌun ráa nixiꞌ uva jiáá iniꞌ rá ñɨɨn xlaúꞌ jiáá ―nkachiꞌ Jesús.

Rá te̱e súkuáꞌa jín Jesús túꞌun ráa ɨɨn u̱vi̱ꞌ yoko trigúꞌ ki̱vɨ̱ꞌ nájiáví

23Jee suꞌva nkuvi ɨɨn ki̱vɨ̱ꞌ nájiáví. Kua̱jia̱ꞌa Jesús nteñu rá tataꞌ trigúꞌ. Jee ni kua̱jia̱ꞌa rá te̱e súkuáꞌa re̱ꞌ ráa nka̱jiéꞌé ráa túꞌun ráa yoko trigúꞌ. #2:23 Ley Ndiosíꞌ ya̱ ntee Moisés káchíꞌ‑i ya̱ ɨɨn ñɨvɨ kúvi tuꞌun‑u yoko sáva kajiꞌ‑i, ni kua̱jia̱ꞌa‑a nu̱u̱nꞌ ñu̱ꞌún inka ñɨvɨ retú jíso̱ko‑o. Soo ntu kúvi nakeꞌen‑e ya̱ noꞌonꞌ jín‑i. 24Jee rá fariseo nkachiꞌ nu̱u̱nꞌ re̱ꞌ:

―¡Kune̱ꞌyá! ¿Na̱kui chi sáꞌá rá te̱e súkuáꞌa nú tiñu ya̱ ntu yɨ́netuꞌ ya̱ satíñú ráa sukuán ki̱vɨ̱ꞌ nájiáví?

25Soo nkachiꞌ re̱ꞌ nu̱u̱nꞌ ráa:

―¿Á ni ntiáné kaꞌvi rán nu̱u̱nꞌ Tutuꞌ níso Tu̱ꞌun Ndiosíꞌ, ná nsa̱ꞌá David yanaꞌán víꞌí, sáá nkumaniꞌ nu̱u̱nꞌ re̱ꞌ ya̱ kajiꞌ re̱ꞌ, jee niso̱ko re̱ꞌ jín rá te̱e nku̱táꞌán jín re̱ꞌ rúja? 26Saáva nki̱vɨ re̱ꞌ iniꞌ veꞌi ííꞌ Ndiosíꞌ, rá ki̱vɨ̱ꞌ nkuvi Abiatar su̱tu̱ꞌ ñáꞌnú. Jee nyajiꞌ re̱ꞌ i̱xta̱tíláꞌ ííꞌ, yósóꞌ nu̱u̱nꞌ íyó xika maá Ndiosíꞌ. Soo ntu yɨ́netuꞌ kajiꞌ na̱ni ñɨvɨ maa, chisaꞌ kua̱chi rá su̱tu̱ꞌ vá íyó kuvi kajiꞌ maa. Jee suni njia̱ꞌa re̱ꞌ maa nu̱u̱nꞌ rá te̱e kútáꞌán jín re̱ꞌ.

27Jee nkachiꞌ Jesús nu̱u̱nꞌ ráa:

―Nsa̱ꞌá Ndiosíꞌ ki̱vɨ̱ꞌ nájiáví sáva kuvi ya̱ váꞌa nu̱u̱nꞌ rá ñɨvɨ. Soo nsáꞌ nsa̱ꞌá re̱ꞌ rá ñɨvɨ sáva yɨ́ñúꞌún ráa ki̱vɨ̱ꞌ nájiáví vá ne̱ kunoꞌo ráa. 28Saáva nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kúvi ni̱ꞌ I̱toꞌoꞌ rá ki̱vɨ̱ꞌ nájiáví, ya̱ kuvi tatúníꞌ ni̱ꞌ ná kúvi ya̱ saꞌá ñɨvɨ ki̱vɨ̱ꞌ vá ―nkachiꞌ re̱ꞌ.

Currently Selected:

Marcos 2: meh

Highlight

Copy