યોહાન 15
15
ખરા દારીકાના યેલ
1મા ખરા દારીકાના યેલ આહાવ અન માના બાહાસ સેતકરી આહા. 2જે અખે ડાખળે માને હારી જોડાયજેલ આહાત, અન ફળ નીહી દેત, તેલા તો કાપી ટાકહ, અન જે ડાખળી ફળ દેહે તેલા તો પકા ફળ યે તે સાટી ચોખલી ટાકહ. 3જે વચનના સીકસન મા તુમાલા દીનેલ તેકન તુમી શુદ હુયી ગેહેસ. 4તુમી માને હારી જોડાયજીની રહજા, જીસા ડાખળી યેલમા રહનાર નીહી ત ફળ નીહી દી સક, તીસા જ તુમી માનેમા રહલે વગર પદરને રીતે ફળ નીહી દી સકા, તેને ગત તુમી માનેમા નીહી રહા ત કાહી પન ચાંગલા કામ નીહી કરી સકા. 5મા દારીકાના યેલ આહાવ, અન તુમી ડાખળે આહાસ, જો કોની માને હારી એક હુયી જોડાયજી રહહ તેને હારી મા પન એક હુયી જોડાયજીની રહાહા, અન તો પકા ફળ લયહ, કાહાકા માને પાસુન દુર રહીની તુમી કાહી પન નીહી કરી સકા. 6જો કોની માને હારી એક હુયી જોડાયજીની નીહી રહ, ત તેલા કાપી ન ટાકી દીજહ. જદવ તે ડાખળે વાળી જાતેહે ત તેહાલા ગોળા કરીની પેટવી દેતાહા, અન તાહા તે પેટી જાતેહે. 7જો તુમી માનેમા એક હુયી જોડાયજીની રહતાહાસ, અન માના સીકસન તુમનેમા રહીલ ત તુમી જી કાહી માંગસે તી મા પુરા કરીન. 8માને બાહાસના મહિમા ઈસા કરી હુય, કા તુમી પકા ફળ દે, તાહા જ તુમી માના ખરા ચેલા બનસે. 9જીસા માના બાહાસ માવર માયા કરનાહા, તીસાજ મા તુમાવર માયા કરાહા, માને માયામા એક બની રહા. 10જો તુમી માની આજ્ઞા પાળશે, ત માને માયામા તુમી એક બની રહસે જીસા મા માને બાહાસની આજ્ઞા પાળનાહાવ, અન તેને માયામા એક બની રહનાહાવ. 11મા યે ગોઠી તુમાલા યે સાટી સાંગનાહાવ, કા તુમાલા પન તોજ આનંદ હુય જો માનેમા આહા, અન તુમના આનંદ ભરપુર હુય.
ચેલાસા એકદુસરે હારીના સબંદ
12“માની આજ્ઞા યી આહા, કા મા તુમાવર જીસા માયા કરાહા, તીસા જ તુમીહી એક દુસરેવર માયા કરા. 13કોના પાસી ઈસા દાખવુલા સાટી આહા કા, તો તેને દોસતાર સાહલા માયા કરહ, યે કરતા દુસરી મોઠી કની પદ્ધતિ નીહી આહા કા તો દોસતાર સાહલા બચવુલા સાટી મરી પન જાહા. 14જો તુમી માની આજ્ઞા સાહલા માનતાહાસ ત તુમી માના દોસતાર આહાસ. 15આતા મા તુમાલા ચાકર નીહી સાંગા, કાહાકા માલીક જી કરહ તી ચાકરલા માહીત નીહી રહ, પન મા તુમાલા દોસતાર સાંગનાહાવ, કાહાકા મા જે બેસ ગોઠ માને બાહાસ પાસુન આયકનાહાવ, તે અખે તુમાલા સાંગી દાખવનાહાવ. 16તુમી માલા પસંદ નીહી કરલા પન મા તુમાલા પસંદ કરનાહાવ અન તુમાલા નેમનાહાવ, કા તુમી જાયીની ફળ દે, અન તુમાલા કાયીમ ફળ યે, કા જી કાહી તુમી માને નાવકન માને બાહાસ પાસી માંગસેલ, તો તી તુમાલા દે. 17યે ગોઠીસી આજ્ઞા મા તુમાલા યે સાટી દેહે, કા તુમી એક દુસરેવર માયા કરા.”
દુને સહુન તરાસ
18“જો દુનેના લોકા તુમાવર દુશ્મની રાખતાહા, ત આઠવ રાખા, કા તેહી તુમને પુડ માને હારી પન દુશ્મની રાખલા. 19જો તુમી દુનેને લોકાસે ગત રહતાસ ત દુનેના લોકા તુમાલા પદરને લોકાસે ગત માયા કરતાત, પન યે દુનેને લોકાસે હારી તુમની સંગત નીહી આહા, કાહાકા મા તુમાલા દુનેને લોકા માસુન પસંદ કરી લીનાહાવ, તે સાટી યે દુનેના લોકા તુમાવર દુશ્મની રાખતાહા. 20જે ગોઠી મા તુમાલા સાંગનાહાવ, ચાકર તેને માલીકને કરતા મોઠા નીહી આહા, ઈસા આઠવ રાખા. જો તે માલા હયરેન કરનાત, ત તુમાલા હી હયરેન કરતીલ, જો તે માના સીકસન માનતાત ત તુમી સીકવસે તીહી પાળતીલ. 21પન તુમી માના ચેલા આહાસ તેના કારને યે લોકા તુમને હારી યી અખા જ કરતીલ, કાહાકા તે માલા દવાડનારલા નીહી વળખત. 22જો મા નીહી યેતાવ અન તેહને હારી યી ગોઠ નીહી કરતાવ, ત તે પાપી નીહી ગનાયતાત, પન આતા તેહને પાપલા દપાડુલા સાટી કાહી જ બાહાના નીહી આહા. 23જો કોની માને હારી દુશ્મની કરહ તો માને બાહાસને હારી પન દુશ્મની કરહ. 24જો મા તેહનેમા યે ચમત્કાર નીહી કરતાવ, ત યે પાપી નીહી ગનાયતાત, પન આતા ત તેહી માલા અન માને બાહાસ દોની સાહલા અન જી કાહી મા કરનાહાવ તી હેરનાહાત, તરી પન નકાર કરતાહા. 25અન જી નેમ સાસતરમા લીખેલ આહા તી યે ગોઠના પુરાવા દેહે. તી સાંગહ, ‘તે કારન વગર માલા નાકારતાહા.’ 26પન મા બાહાસ પાસુન તુમને સાટી એક સહાય કરનાર મતલબ સત્યના આત્માલા દવાડીન. તો યો આત્મા આહા જો બાહાસ સહુન યેહે અન જી સત્ય આહા તેલા પરગટ કરહ. જદવ તો યીલ, ત તો તુમાલા માને બારામા સાંગીલ. 27અન તુમીહી દુનેલા માને બારામા સાંગી દાખવસેલ, કાહાકા તુમી પુડ પાસુન માને હારીજ રહેલ આહાસ.”
Currently Selected:
યોહાન 15: DHNNT
Highlight
Share
Copy
Want to have your highlights saved across all your devices? Sign up or sign in
Dhanki Bible (ડાંગી) by The Love Fellowship is licensed under Creative Commons Attribution-ShareAlike 4.0 License.
