Kumsada 27
27
Isak manda Esaú pa i fasil un gisadu
1Oca ku Isak beju ba ja, si uju bida sukuru, tok i ka pudi oja. I coma Esaú, si fiju mas beju, i falal: “Ña fiju.” Kila kudi i falal: “Alin li.”
2Isak falal: “Jubi gosi N beju. N ka sibi dia di ña mortu. 3Asin, toma bu arma ku sedu bu mansasa ku fleŝas, bu bai pa matu pa montia un limaria pa mi, 4bu kusñan un gisadu sabi ku N ta gosta, bu tisin el pa N kume, pa N pudi bensuau antis di N muri.”
5Rebeka na sukutaba oca Isak na papia ku si fiju Esaú. Esaú bai matu pa bai montia pa i pudi tisi kusa pa si pape.
Rebeka ku Jakó ngana Isak
6Rebeka fala si fiju Jakó: “Jubi, N obi bu pape i na papia ku bu ermon Esaú, i falal: 7‘Tisin un limaria, bu kusñan gisadu sabi pa N pudi kume; N ta bensuau na pursensa di SIÑOR antis di N muri.’ 8Asin, ña fiju, sukutan, bu fasi kil ku N mandau. 9Bai pa koral, bu tisin dus fiju di kabra gurdu, pa N pudi kusña gisadu sabi pa bu pape, suma ku el i ta misti. 10Bu ta lebal pa bu pape, pa i kume, pa i dau si benson antis di muri.”
11Jakó fala si mame Rebeka: “Jubi, ña ermon Esaú i omi ku ciu kabelu#Kap 25.25 na kurpu; ami N ka tene kabelu ciu. 12Ña pape i pudi palpan; N ta sedu nganadur na si uju. Asin, te pa N oja benson, N ta tisi maldison riba di ña kabesa.”
13Si mame falal: “Ña fiju, disa maldison pa i kai riba di mi; obi son ke ku N falau, bu bai tisin elis.”
14I bai toma elis, i leba pa si mame. Kila kusña un gisadu sabi suma ku si pape ta misti. 15Dipus Rebeka toma ropa mas bonitu di si fiju mas beju, Esaú, ki rakadalba na kasa, i bisti Jakó, si fiju mas pikininu. 16Tambi i kubri si mon ku parti di garganti ku ka tene kabelu ku kuru di kabra. 17I ntrega ki gisadu sabi, ku pon ki kumpu, na mon di si fiju Jakó.
18I bai pa si pape, i falal: “Papa.” I kudil, i falal: “Alin li, ña fiju. Abo i kin?”
19Jakó fala si pape: “I ami, Esaú, bu purmeru fiju. N fasi suma ku bu falan. Lanta, bu sinta, bu kume un bokadu di karni ku N montia, pa bu pudi bensuan.” 20Isak punta si fiju: “Kuma ku bu ojal dipresa asin, ña fiju?” El i ruspundil: “SIÑOR bu Deus ku mandal pa i bai kontra ku mi.”
21Isak fala Jakó: “Ciga li, ña fiju, pa N palpau, pa N pudi sibi si abo i ña fiju Esaú o nau.”
22Jakó ciga lungu di Isak si pape. Kila palpal, i falal: “Fála i suma di Jakó, ma mon i suma di Esaú.” 23Asin i ka raparal, pabia si mon teneba kabelu suma mon di si ermon Esaú. E ku manda i bensual, 24ma i puntal: “Na bardadi, abo i ña fiju Esaú?” Jakó falal: “Ami i el.”
25Isak falal: “Tisin ki karni ku bu montia, pa N pudi kume; dipus N ta dau benson.” I cigantal el, i kume; i lebal tambi biñu, i bibi.
26Si pape Isak falal: “Ciga li, ña fiju, bu dan beẑu.” 27Jakó bai pa el, i dal beẑu. Si pape sinti ceru di si ropa, i bensual, i falal:
“Ceru di ña fiju i suma ceru di un matu
ku SIÑOR bensua.
28Pa Deus dau serenu#Lei 33.13,28 di seu,
pa i pui bu terenu pa i gurdu,
pa bu tene manga di trigu, ku biñu fresku.
29Pa utru jinti sirbiu;
nasons pa e mpina bu dianti;
pa bu sedu siñor riba di bu ermons;
fijus di bu mame pa e mpina bu dianti.
Kilis ku ta maldisuau, pa e sedu maldisuadu;#Kap 12.3
kilis ku ta bensuau, pa e sedu bensuadu.”
30Dipus di Isak bensua Jakó, kila kaba sai son dianti di si pape, si ermon Esaú ciga di montia. 31El tambi i kusña un gisadu sabi, i lebal pa si pape, i falal: “Papa, lanta, bu kume un bokadu di karni ku N montia, pa bu pudi dan bu benson.”
32Si pape Isak puntal: “Abo i kin?” I falal: “Ami i Esaú, bu fiju mas beju.”
33Isak tirmi ku forsa, i punta: “Nta kin ku montia, i tisin karni? N kumel antis di bu yentra, N dal ña benson. Ki benson ka pudi maina.”
34Oca Esaú obi palabra di si pape, si korson findil, i pupa#Kap 27.38 ku forsa, i fala: “Papa, bensuan tambi!”
35Isak falal: “Bu ermon bin ku nganu, i toma bu benson.”
36Esaú falal: “Nomi di Jakó#Kap 25.26; 32.28 i justal! Es fasi dus bias ki nganan. I toma ña diritu di sedu purmeru fiju; gosi i toma ña benson!” Dipus i punta: “Bu ka guarda nin un benson pa mi?”
37Isak ruspundi i fala Esaú: “N pul pa i sedu siñor riba#Kap 25.23 di bo. N dal tudu si ermons pa e sedu si servus. N dal trigu ku biñu nobu pa e sustental. Ke gora ku N pudi fasi pa bo, ña fiju?”
38Esaú fala si pape: “Nta bu tene son un benson, Papa? Bensuan tambi, Papa.” Dipus i kumsa na cora#Eb 12.17 risu.
39Si pape Isak ruspundi i falal:
“Bu na mora lunju di terenu gurdu,
lunju di serenu di seu.
40Bu na vivi ku spada na mon;
bu na sirbi bu ermon,#Kap 27.37; 2 Sam 8.14; 1 Kron 18.11-13
ma tempu na ciga ku bu na sedu rebeldi,
bu na sakudi si korenti#2 Re 8.20-22; 2 Kron 21.8 na bu garganti.”
41Esaú sinti rankor kontra Jakó pabia di ki benson ku si pape dalba. I fala na si sintidu: “Dias di cur di ña pape i pertu. Dipus N na mata ña ermon Jakó.”
42Oca Rebeka kontadu ke ku si purmeru fiju Esaú falaba, i manda coma si fiju mas nobu, Jakó, i falal: “Bu ermon Esaú na konsola ku planu pa matau. 43Gosi, ña fiju, fasi ke ku N na falau. Lanta bu kuri pa Labon, ña ermon na Aran. 44Mora ku el un bokadu#Kap 31.38 tok raiba di bu ermon pasa. 45Ora ku ki raiba ki ten pa bo bin kaba, i diskisi ke ku bu fasil, N na manda rekadu pa bu riba. Pabia di ke ku N na pirdi bos dus na un dia?”
46Rebeka fala Isak: “N sta disgostadu di ña vida pabia de minjeris eteu. Si Jakó kasa ku un minjer de tera, un fiju di Et#Kap 26.35 suma esis li, ke ku ña vida na bali?”
Currently Selected:
Kumsada 27: povB
Highlight
Share
Copy
Want to have your highlights saved across all your devices? Sign up or sign in
© 1993-2020, Instituto de Tradução e Alfabetização
