Mataayo 14

ɄYoohani ʉMwozi adumulwa itwe

(Maalʉko 6:14-29; Luuka 9:7-9)

1Mu habhaazyo haala, ʉHeloode ʉAntipa ʉmwɨnɨ ʉwa hu mukowa ʉgwɨ Galilaaya ahʉmvwɨzye ɨgo ʉYeesu ahali abhomba. 2Ɨpo ahabhabhʉʉzya abhabhomvi bhaakwe ahaga, “Ʉyo yʉ Yoohani ʉMwozi wa‑azyʉshɨle afume hwa bhafwe. Sha shɨɨsho ali ni‑ikhone ɨlya‑abhombe amayele.”

3ɄHeloode ʉAntipa ahayanjile ɨsho, pɨpo ahali anʼkhɨɨte ʉYoohani na humʼpinye mu hoobhe ameezi mashe ga gashilile. Ahamʼpinyile hu nongwa ya nʼshɨ waakwe Helodiya, ʉyo hu wandilo ahali nʼshɨ wa mwanakwabho#14:3 mwanakwabho ɄHeloode ʉAntipa nʉ Filipo bhahali nʉ yise weeka, leelo shila muntu ahali nʉ nyina waakwe. ʉFilipo. 4ɄYoohani ahabhanga ahumʼmʉʉzya ʉHeloode huje, “Mwiho humʼmweje ʉnʼshɨ wa mwanakwenyu.”#Bhaazya ɨMbombo ɨzya Bhalaawi 18:16; 20:21. 5Ɨpo ʉHeloode ahanzaga idala ɨlya hunʼgoje ʉYoohani, leelo ahoogopa abhantu hu nongwa ya huje bhahamʼmwɨtɨɨshe ʉYoohani ʉMwozi huje nʼkuwi.

6Leelo lwa lyahafiha isiku ɨlyɨ shikulukulu ɨsha hwizushe apaapwe hwa Heloode, ʉmwalɨ wa Helodiya ahanjile pitagaalila lya bhaanwa. Ʉmwalɨ ʉyo ahagwɨzya tee ʉmwoyo gwakwe ʉHeloode. 7Ɨpo ʉHeloode ahalapa ɨndapo humʼpeele ʉnʼnɨndu ʉla hohonti ɨho ahanzaga hunʼnaabhe. 8Leelo ʉnyina waakwe ahasonsheziizye ʉmwalɨ waakwe ʉla alaabhe huje, “Mpeele ɨpa itwe lya Yoohani ʉMwozi mu bheeto.” 9Ʉmwɨnɨ ahazugumila tee, leelo hu nongwa yɨ nsoni zyɨ ndapo zya‑ahalapile pitagaalila lya bhaanwa bhaala, ahalajizya huje bhamʼpeele ʉnʼnɨndu ʉla itwe ɨlyo. 10Ɨpo ʉHeloode ahanʼsonteelezya ʉmuntu ʉmo ʉyo ahabhalile mu hoobhe muula, ahanʼdumula itwe ʉYoohani. 11Ʉmuntu ʉla ahɨnza ni‑itwe lya Yoohani mu bheeto na humʼpeele ʉmwalɨ ʉla, wope ahamʼpeela ʉnyina waakwe. 12Hu malishilo, abhasundwe bha Yoohani bhahabhala hugweje ʉmʼvimba na hugusyɨle. Ɨpo bhahabhala humʼmʉʉzye ʉYeesu gonti ɨgo gahabhombɨɨshe.

ɄYeesu ahubhaliisya abhantu ashile ɨelufu zisaanu

(Maalʉko 6:30-44; Luuka 9:10-17; Yoohani 6:1-14)

13Hu habhaazyo ɨho ʉYeesu lwa wʉmvwa gonti ɨgo, ahasogola paala nʉ waato na‑abhale hu mfiso. Leelo abhantu lwa bhʉmvwa, bhahanʼnondolezya ʉYeesu lwɨ manama afume mu mabooma. 14ɄYeesu lwa wiiha mu waato, ahayilola ɨmpʉga ɨngoosi ɨya bhantu. Ahayilolela ɨnkʉmbʉ na hubhaponie abhantu ʉbhinu waabho.

15Lwa hwabha lyabheela, abhasundwe bhaakwe bhahamʼmalila na humʼmʉʉzye ʉYeesu bhahaga, “Ɨpa tili pi‑igona pa pali peene lwene, ʉsiku wufishile. Ɨshi, bhabhʉʉzye abhantu ɨbha huje bhasogolaje, bhabhale akale ɨvyalye mu vipanga.” 16Leelo ʉYeesu ahabhabhʉʉzya ahaga, “Saga bhahwanziwa asogole. Bhapeeli mwɨmwɨ ɨvyalye.” 17Bhope bhahamʼmwamula bhahaga, “Atɨ saga tili na hantu, lyoli tili nɨ ntogito zisaanu lwene nɨ nswɨ zibhɨɨlɨ.” 18ɄYeesu ahabhabhʉʉzya ahaga, “Leeti huliinɨ ɨpa.” 19Ɨpo ahabhalajizya abhantu bhaala huje bhakhale pa nsi mu sole. Aheega ɨntogito zisaanu nɨ nswɨ zibhɨɨlɨ ziila, aheenya hu mwanya, ahanʼsalifya ʉNgʉlʉbhɨ. Ɨpo ahamensulanya, ahabhapeela abhasundwe bhaakwe, bhope bhahabhagabhila abhantu. 20Abhantu bhonti bhahalya na‑angute. Ɨpo abhasundwe bhaakwe bhahabhʉngaanya vya vyahasyalile na‑amemye ɨviseje ishʉmi na vibhɨɨlɨ. 21Abhantu ɨbho bhahaliiye ɨshalye shiila, bhahali abhalume ɨelufu zisaanu sinta abhaazye abhashɨ na bhaana.

ɄYeesu ajenda pa mwanya pa mɨnzɨ agɨ nsʉmbi

(Maalʉko 6:45-52; Yoohani 6:16-21)

22Hu habhaazyo hɨnɨɨho, ʉYeesu ahabhalajizya abhasundwe bhaakwe huje, “Tʉʉshi mu waato, mutagaalile alobhoshe ɨnsʉmbi lwɨ‑ɨlagana na bhantu ɨbha.” 23Lwa wayilaga ɨmpʉga ɨla ɨya bhantu, ʉYeesu ahazʉbha mwene hwi‑igamba huula hu mfiso huje apuute. Lwa hwabha bhʉbhɨɨla, ahali asɨɨle ali hwi‑igamba mwene. 24Hu habhaazyo ɨho, ʉwaato wahali wufishile paahati yɨ nsʉmbi, leelo amabhilingwa gahali gahuwukhoma, pɨpo ɨnkʉngʉ yahali ɨvugula na huwubunshile ʉwaato. 25Lwa huhwanda ashe, ʉYeesu ahabhabhalila abhasundwe bhaakwe sha‑ajenda pa mwanya pa mɨnzɨ. 26Leelo hu habhaazyo abhasundwe bhaakwe lwa bhanʼnola ajenda pa mwanya pa mɨnzɨ, bhahoogopa tee, bhahagaga, “Nʼzimu!” Bhahabwaga ibwago hu nongwa yɨ wooga. 27Nalinaali ʉYeesu ahabhabhʉʉzya ahaga, “Leshi ahwogope lwonti, amooyo geenyu gagwɨlaje, nɨɨnɨ!” 28ɄPeeteli ahamʼmwamula ahaga, “Wee Mwɨnɨ, nkashele weewe lyoli, ndajizye huje ɨnɨnze ɨpo ʉli, shɨ‑ɨjenda pa mwanya pa mɨnzɨ.” 29ɄYeesu ahamʼmwamula ahaga, “Ɨnza.” Ɨpo ʉPeeteli ahiiha mu waato wuula, ahanda ajende pa mwanya pa mɨnzɨ abhale hwa Yeesu. 30Leelo ʉmwene ʉPeeteli lwa waalola ʉkhali wɨ nkʉngʉ yɨ‑ɨvugula, ahoogopa tee. Pɨɨpo ahanda adwine mu mɨnzɨ na‑abwaje ibwago ahaga, “Wee Mwɨnɨ, mfyʉle!”

31Nalinaali, ʉYeesu ahagolosya ʉnʼkhono gwakwe, ahanʼkhata, ahamʼmʉʉzya ahaga, “Wee wʉ‑ʉli nʉ lwɨtɨho ʉludoodo, yeenu ʉbha nɨ nsyoho?” 32ɄYeesu nʉ Peeteli lwa bhatʉʉha mu waato, ɨnkʉngʉ ɨla yahapʉʉma. 33Ɨpo abhasundwe ɨbho bhahali mu waato, bhahamʼpuuta ʉYeesu bhahaga, “Lyoli, aawe ʉli Mwana wa Ngʉlʉbhɨ!”

ɄYeesu ahubhaponia abhabhinu hu Genesaleeti

(Maalʉko 6:53-56)

34ɄYeesu na bhasundwe bhaakwe lwa bhafwɨmɨɨla, bhahafiha hwi‑isyɨla mu nsi ɨyɨ Genesaleeti. 35Abhantu abha mu nsi ɨla lwa bhaamanya huje yʉ Yeesu, bhahanyampaanya ɨnongwa zyakwe ɨmbali zyonti. Ɨpo abhantu bhahabhaleeta abhabhinu bhonti hwa Yeesu. 36Bhope bhahanʼnamba ʉYeesu huje abhɨtɨshɨle abhabhinu huje bhapalamansye nka lupinto lwɨ mwenda gwakwe. Bhonti bha bhahapalamansiizye, bhahaponile ʉbhinu waabho.

Currently Selected:

Mataayo 14: SBK

Highlight

Copy