Mataayo 15
15
ɄYeesu akhaana ɨmanyizyo zya Bhafalisaayo
(Maalʉko 7:1-13)
1Ɨshi, aBhafalisaayo bhamo na bhamanyizyi abhɨ ndajizyo zya Moose bhahɨnza hwa Yeesu afume hwi‑ibooma ɨlyɨ Yelusaleemu. Ɨpo bhahamʼmʉʉzya ʉYeesu bhahaga, 2“Yeenu abhasundwe bhaaho saga bhalondolezya amiiho ga bhagoosi bheetu ga bhahatileshɨɨye? Tiyanjile ɨsho, pɨpo bhalya ɨshalye sinta asamvye ɨnyoobhe zyabho shɨ‑ɨhwanziwa mu miiho geetu!” 3ɄYeesu ahabhaamula ahaga, “Hu nongwa wɨlɨ namwɨ saga mulondolezya ɨndajizyo zya Ngʉlʉbhɨ hu nongwa ya‑alondolezye amiiho geenyu? 4ɄNgʉlʉbhɨ ahajile, ‘Ʉnʼtinihaje ʉso nʉ bhɨɨnyu.’#Bhaazya Afume 20:12; ɨNyiizuho 5:16. Nantele ahajile, ‘Ʉmuntu wowonti wa‑ahunʼniga ʉyise waakwe awe ʉnyina waakwe, ɨhwanziwa huje afwanje.’#Bhaazya Afume 21:17; ɨMbombo ɨzya Bhalaawi 20:9. 5Leelo amwɨ mumanyizya muyiga, ‘Shinza lwene nkashele ʉmuntu ahumʼmʉʉzya ʉyise waakwe awe ʉnyina waakwe huje, “Ɨvintu ɨvi nɨnzaga huhwavwe, ɨmfumiizye hwa Ngʉlʉbhɨ.” ’ 6Ɨpo muyanga huje ʉmuntu saga ahwanziwa hunʼtinishe ʉyise waakwe awe ʉnyina waakwe. Ʉhwo hwa hwʉhwo muhuliliga izwi lya Ngʉlʉbhɨ hwi‑idala ɨlya‑alondolezye amiiho geenyu. 7Mwɨ bhagulugulu amwɨ! ɄNgʉlʉbhɨ ahayanjile lyoli ashilile hwa nʼkuwi waakwe ʉYesaaya hu nongwa yeenyu huje,
8‘Abhantu ɨbha bhahuntendeha anɨ mwi‑ilomu lwene,
lyoli amooyo gaabho gali hutali naanɨ.
9Bhahumpuuta anɨ lwene,
pɨpo ga bhamanyizya miiho ga bhantu, saga miiho ga Ngʉlʉbhɨ.’ ”#Bhaazya Yesaaya 29:13.
Ɨmbiibhi zyonti zifuma mu mwoyo
(Maalʉko 7:14-23)
10Ɨpo ʉYeesu ahabhʉngaanya ɨmpʉga ya bhantu, ahayibhʉʉzya ahaga, 11“Tejeelezyi shinza na muzyaganyaaje! Ɨvintu vya vitʉʉha mwi‑ilomu saga vya vihumʼmɨɨha ʉmuntu abhe mwavu. Lyoli, vya vifuma mwi‑ilomu lyakwe ɨvyo vya vihumʼmɨɨha ʉmuntu abhe mwavu.”
12Ɨpo abhasundwe bhaakwe bhahamʼmalila ʉYeesu, bhahamʼmʉzɨɨlɨzya bhahaga, “Ʉmɨɨnye huje aBhafalisaayo lwa bhʉmvwa amazwi gaala ga wahayanjile, bhahavitiilwe tee?” 13ɄYeesu ahaamula ahaga, “ɄYise waanɨ ʉwa hu mwanya ahayihubhayazya abhamanyizyi bhonti ɨbho bhamanyizya ɨgo ʉmwene saga ahalajiziizye, nanshi ɨsho ʉmuntu aseenya ɨmbeyu ɨzyo ʉmwene saga ahatotile. 14Bhaleshi! Ɨbho bhalongozi bhantonko, nantele bhahubhalongozya abhantonko. Nkashele ʉnʼtonko ahunʼnongozya ʉnʼtonko ʉwamwabho, bhonti bhabhɨɨlɨ bhabhala‑adumbushile mwi‑ilɨndɨ!” 15Ɨshi ʉPeeteli ahamʼmʉʉzya ahaga, “Tilulile ɨshifwani hu nongwa yɨ vintu ɨvyo vihumʼmɨɨha ʉmuntu abhe mwavu.” 16ɄYeesu ahabhaamula ahaga, “Wɨlɨ, amwɨ saga muli nɨ njeele ɨzya hushimanye ɨshifwani shiila? 17Saga mumɨɨnye huje ɨshintu shiila sha shihunʼtʉʉha mwi‑ilomu, shitʉʉha mu vyanda vya muntu, ɨpo hu malishilo shifuma hwʉnzɨ? 18Leelo shiila sha shifuma mwi‑ilomu lya muntu, shifuma mu mwoyo gwakwe. Sha shɨɨsho shihumʼmɨɨha ʉmuntu abhe mwavu. 19Ɨnjanjile ɨsho, pɨpo muuhati mu mwoyo gwa muntu mwa mufuma ɨnsɨɨbho ɨmbiibhi, ʉgoji, ʉweegu, ʉbhembusu, ʉwiibha, ʉsimishizi ʉwi‑ilenga nɨ ndigo. 20Gonti ɨgo ga gɨɨgo gahumʼmɨɨha ʉmuntu abhe mwavu. Leelo alye ɨshalye sinta asamvye ɨnyoobhe saga huhumʼmɨɨha ʉmuntu abhe mwavu.”
Ʉlwɨtɨho ʉlwa nʼshɨ ʉmo wa saga Nʼnyahuudi
(Maalʉko 7:24-30)
21ɄYeesu ahasogola hu mukowa ʉgwɨ Galilaaya, ahabhala hu mbali ɨzya hu mabooma agɨ Tiilo nɨ Siidoni. 22Ɨpo ʉnʼshɨ ʉmo ʉNʼkananaayo ʉyo ahakhalaga ʉhwo, ahɨnza hwa Yeesu, ahanda hunʼkwizye hwi‑ikhone ahaga, “Wee Mwɨnɨ, Mwana wa Daudi, ndolele ɨnkʉmbʉ! Ʉmwalɨ waanɨ ayɨmba tee na mapepo.” 23Leelo ʉYeesu saga ahamʼmwamula izwi lyolyonti. Hu malishilo, abhasundwe bhaakwe bhahɨnza na hunʼnaabhe ʉYeesu, bhahaga, “Mʼmʉʉzye ʉnʼshɨ ʉnʉ asogole, pɨpo ajendeelela hutibwazye ibwago hwisinda lyetu.” 24Ahaamula ahaga, “ɄNgʉlʉbhɨ ahansonteleziizye hubhafyʉle aBhaizilaeeli bha bhali nanshi ɨngoole ɨzyo ziteejile.”
25Ʉnʼshɨ ʉyo ahasejeela, ahasugamila pitagaalila lya Yeesu, ahanʼnaabha ahaga, “Wee Mwɨnɨ, ɨhulaabha ʉnaavwe!” 26Ahamʼmwamula ahaga, “Saga shinza ahweje ɨshalye sha bhaana na‑aponyezye ɨmbwa.”#15:26 Alɨngaane na miiho ga Bhayahuudi, aBhayahuudi bhahahwilolaga huje, bhasangalusu ashile abhantu abhanjɨ ɨbho bhahabhalolaga huje, bhaavu nanshi ɨmbwa. Mu shifwani ɨshi, ʉYeesu ahubhakholanya aBhayahuudi na bhaana, nantele ahubhakholanya abhantu bha saga Bhayahuudi nɨ mbwa. 27Ʉnʼshɨ ʉla ahaga, “Lyoli Mwɨnɨ, leelo ɨmbwa zyope zisebheelezya ɨvyalye vya vilagala pa nsi afume pa meeza ɨzya bhagoosi bhaabho.”#15:27 Enya Maalʉko 7:28, ɨshifwani ɨshɨ mbwa ɨzyo zilya pa nsi pa meeza. 28ɄYeesu ahamʼmwamula ahaga, “Wee nʼshɨ, ʉli nʉ lwɨtɨho ʉlugoosi tee! ɄNgʉlʉbhɨ anza hubhombele nanshi shʉ‑ʉhwanza.” Nalinaali, ʉmwalɨ waakwe ʉla ahapona.
ɄYeesu ahubhaponia abhabhinu abhinji
29ɄYeesu ahasogola paala, ahashila munshɨnjɨ yɨ nsʉmbi ɨyɨ Galilaaya. Ɨpo ahazʉbha hwi‑igamba na‑akhale huhuula. 30Ɨmpʉga ɨngoosi ɨya bhantu yahabhala hwa Yeesu. Ɨmpʉga ɨyo yahabhatwala abhantu bha saga bhajenda, abhantonko, abhalemazu, abhabwibwi na bhanjɨ abhinji, yahabhabhɨɨha pa manama ga Yeesu, wope ahabhaponia. 31Abhantu bhaala bhahaswiga tee lwa bhabhalola abhabwibwi bhayanga, abhalemazu bhapona, bha saga bhajenda bhajenda na bhantonko bhalola. Ɨpo bhahamʼmwamiha ʉNgʉlʉbhɨ ʉwa Bhaizilaeeli.
ɄYeesu ahubhaliisya abhantu ashile ɨelufu zinɨ
(Maalʉko 8:1-10)
32Ɨpo ʉYeesu ahabhakwizya abhasundwe bhaakwe, ahabhabhʉʉzya ahaga, “Abhantu ɨbha bhali peeka naatɨ ɨnsiku zitaatu, ɨhubhalolela ɨnkʉmbʉ hu nongwa ya huje saga bhali nɨ shalye. Ɨshi, saga ɨhwanza hubhalaje huje bhabhalaje mu mabooma gaabho lwa bhali nɨ nzala, pɨpo bhagaziliha mwi‑idala.”
33Abhasundwe bhaakwe bhahamʼmʉzɨɨlɨzya bhahaga, “Wɨlɨ, mu lʉʉgwa ʉmu tigazyaga hwoshi ɨntogito ɨnyinji ɨzya‑akwɨlane abhantu bhonti abhinji ɨbha?” 34ɄYeesu ahabhabhʉzɨɨlɨzya ahaga, “Muli nɨ ntogito zilɨnga?” Bhahamʼmwamula bhahaga, “Tili nɨ ntogito pʉnga (7) nɨ nswɨ nyishe.” 35Ɨpo ʉYeesu ahabhalajizya abhantu bhonti huje bhakhale pa nsi. 36Aheega ɨntogito ziila pʉnga (7) nɨ nswɨ, ahanʼsalifya ʉNgʉlʉbhɨ. Ahamensulanya, ahabhapeela abhasundwe bhaakwe, bhope abhasundwe bhahabhagabhila abhantu bhaala. 37Abhantu bhonti bhaala bhahalya, bhahanguta na‑asagazye. Abhasundwe bhahabhʉngaanya vya vyahasyalile, bhahamemya amaseje pʉnga (7). 38Abhantu bha bhahaliiye ɨshalye shiila bhahali abhalume ɨelufu zinɨ sinta abhaazye abhashɨ na bhaana. 39Ɨpo ʉYeesu ahabhalaga abhantu bhaala huje bhabhalaje. Ʉmwene ahatʉʉha mu waato, ahabhala hu mbali ɨzya hwi‑ibooma ɨlyɨ Magadaani.
Currently Selected:
Mataayo 15: SBK
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
Mataayo 15
15
ɄYeesu akhaana ɨmanyizyo zya Bhafalisaayo
(Maalʉko 7:1-13)
1Ɨshi, aBhafalisaayo bhamo na bhamanyizyi abhɨ ndajizyo zya Moose bhahɨnza hwa Yeesu afume hwi‑ibooma ɨlyɨ Yelusaleemu. Ɨpo bhahamʼmʉʉzya ʉYeesu bhahaga, 2“Yeenu abhasundwe bhaaho saga bhalondolezya amiiho ga bhagoosi bheetu ga bhahatileshɨɨye? Tiyanjile ɨsho, pɨpo bhalya ɨshalye sinta asamvye ɨnyoobhe zyabho shɨ‑ɨhwanziwa mu miiho geetu!” 3ɄYeesu ahabhaamula ahaga, “Hu nongwa wɨlɨ namwɨ saga mulondolezya ɨndajizyo zya Ngʉlʉbhɨ hu nongwa ya‑alondolezye amiiho geenyu? 4ɄNgʉlʉbhɨ ahajile, ‘Ʉnʼtinihaje ʉso nʉ bhɨɨnyu.’#Bhaazya Afume 20:12; ɨNyiizuho 5:16. Nantele ahajile, ‘Ʉmuntu wowonti wa‑ahunʼniga ʉyise waakwe awe ʉnyina waakwe, ɨhwanziwa huje afwanje.’#Bhaazya Afume 21:17; ɨMbombo ɨzya Bhalaawi 20:9. 5Leelo amwɨ mumanyizya muyiga, ‘Shinza lwene nkashele ʉmuntu ahumʼmʉʉzya ʉyise waakwe awe ʉnyina waakwe huje, “Ɨvintu ɨvi nɨnzaga huhwavwe, ɨmfumiizye hwa Ngʉlʉbhɨ.” ’ 6Ɨpo muyanga huje ʉmuntu saga ahwanziwa hunʼtinishe ʉyise waakwe awe ʉnyina waakwe. Ʉhwo hwa hwʉhwo muhuliliga izwi lya Ngʉlʉbhɨ hwi‑idala ɨlya‑alondolezye amiiho geenyu. 7Mwɨ bhagulugulu amwɨ! ɄNgʉlʉbhɨ ahayanjile lyoli ashilile hwa nʼkuwi waakwe ʉYesaaya hu nongwa yeenyu huje,
8‘Abhantu ɨbha bhahuntendeha anɨ mwi‑ilomu lwene,
lyoli amooyo gaabho gali hutali naanɨ.
9Bhahumpuuta anɨ lwene,
pɨpo ga bhamanyizya miiho ga bhantu, saga miiho ga Ngʉlʉbhɨ.’ ”#Bhaazya Yesaaya 29:13.
Ɨmbiibhi zyonti zifuma mu mwoyo
(Maalʉko 7:14-23)
10Ɨpo ʉYeesu ahabhʉngaanya ɨmpʉga ya bhantu, ahayibhʉʉzya ahaga, 11“Tejeelezyi shinza na muzyaganyaaje! Ɨvintu vya vitʉʉha mwi‑ilomu saga vya vihumʼmɨɨha ʉmuntu abhe mwavu. Lyoli, vya vifuma mwi‑ilomu lyakwe ɨvyo vya vihumʼmɨɨha ʉmuntu abhe mwavu.”
12Ɨpo abhasundwe bhaakwe bhahamʼmalila ʉYeesu, bhahamʼmʉzɨɨlɨzya bhahaga, “Ʉmɨɨnye huje aBhafalisaayo lwa bhʉmvwa amazwi gaala ga wahayanjile, bhahavitiilwe tee?” 13ɄYeesu ahaamula ahaga, “ɄYise waanɨ ʉwa hu mwanya ahayihubhayazya abhamanyizyi bhonti ɨbho bhamanyizya ɨgo ʉmwene saga ahalajiziizye, nanshi ɨsho ʉmuntu aseenya ɨmbeyu ɨzyo ʉmwene saga ahatotile. 14Bhaleshi! Ɨbho bhalongozi bhantonko, nantele bhahubhalongozya abhantonko. Nkashele ʉnʼtonko ahunʼnongozya ʉnʼtonko ʉwamwabho, bhonti bhabhɨɨlɨ bhabhala‑adumbushile mwi‑ilɨndɨ!” 15Ɨshi ʉPeeteli ahamʼmʉʉzya ahaga, “Tilulile ɨshifwani hu nongwa yɨ vintu ɨvyo vihumʼmɨɨha ʉmuntu abhe mwavu.” 16ɄYeesu ahabhaamula ahaga, “Wɨlɨ, amwɨ saga muli nɨ njeele ɨzya hushimanye ɨshifwani shiila? 17Saga mumɨɨnye huje ɨshintu shiila sha shihunʼtʉʉha mwi‑ilomu, shitʉʉha mu vyanda vya muntu, ɨpo hu malishilo shifuma hwʉnzɨ? 18Leelo shiila sha shifuma mwi‑ilomu lya muntu, shifuma mu mwoyo gwakwe. Sha shɨɨsho shihumʼmɨɨha ʉmuntu abhe mwavu. 19Ɨnjanjile ɨsho, pɨpo muuhati mu mwoyo gwa muntu mwa mufuma ɨnsɨɨbho ɨmbiibhi, ʉgoji, ʉweegu, ʉbhembusu, ʉwiibha, ʉsimishizi ʉwi‑ilenga nɨ ndigo. 20Gonti ɨgo ga gɨɨgo gahumʼmɨɨha ʉmuntu abhe mwavu. Leelo alye ɨshalye sinta asamvye ɨnyoobhe saga huhumʼmɨɨha ʉmuntu abhe mwavu.”
Ʉlwɨtɨho ʉlwa nʼshɨ ʉmo wa saga Nʼnyahuudi
(Maalʉko 7:24-30)
21ɄYeesu ahasogola hu mukowa ʉgwɨ Galilaaya, ahabhala hu mbali ɨzya hu mabooma agɨ Tiilo nɨ Siidoni. 22Ɨpo ʉnʼshɨ ʉmo ʉNʼkananaayo ʉyo ahakhalaga ʉhwo, ahɨnza hwa Yeesu, ahanda hunʼkwizye hwi‑ikhone ahaga, “Wee Mwɨnɨ, Mwana wa Daudi, ndolele ɨnkʉmbʉ! Ʉmwalɨ waanɨ ayɨmba tee na mapepo.” 23Leelo ʉYeesu saga ahamʼmwamula izwi lyolyonti. Hu malishilo, abhasundwe bhaakwe bhahɨnza na hunʼnaabhe ʉYeesu, bhahaga, “Mʼmʉʉzye ʉnʼshɨ ʉnʉ asogole, pɨpo ajendeelela hutibwazye ibwago hwisinda lyetu.” 24Ahaamula ahaga, “ɄNgʉlʉbhɨ ahansonteleziizye hubhafyʉle aBhaizilaeeli bha bhali nanshi ɨngoole ɨzyo ziteejile.”
25Ʉnʼshɨ ʉyo ahasejeela, ahasugamila pitagaalila lya Yeesu, ahanʼnaabha ahaga, “Wee Mwɨnɨ, ɨhulaabha ʉnaavwe!” 26Ahamʼmwamula ahaga, “Saga shinza ahweje ɨshalye sha bhaana na‑aponyezye ɨmbwa.”#15:26 Alɨngaane na miiho ga Bhayahuudi, aBhayahuudi bhahahwilolaga huje, bhasangalusu ashile abhantu abhanjɨ ɨbho bhahabhalolaga huje, bhaavu nanshi ɨmbwa. Mu shifwani ɨshi, ʉYeesu ahubhakholanya aBhayahuudi na bhaana, nantele ahubhakholanya abhantu bha saga Bhayahuudi nɨ mbwa. 27Ʉnʼshɨ ʉla ahaga, “Lyoli Mwɨnɨ, leelo ɨmbwa zyope zisebheelezya ɨvyalye vya vilagala pa nsi afume pa meeza ɨzya bhagoosi bhaabho.”#15:27 Enya Maalʉko 7:28, ɨshifwani ɨshɨ mbwa ɨzyo zilya pa nsi pa meeza. 28ɄYeesu ahamʼmwamula ahaga, “Wee nʼshɨ, ʉli nʉ lwɨtɨho ʉlugoosi tee! ɄNgʉlʉbhɨ anza hubhombele nanshi shʉ‑ʉhwanza.” Nalinaali, ʉmwalɨ waakwe ʉla ahapona.
ɄYeesu ahubhaponia abhabhinu abhinji
29ɄYeesu ahasogola paala, ahashila munshɨnjɨ yɨ nsʉmbi ɨyɨ Galilaaya. Ɨpo ahazʉbha hwi‑igamba na‑akhale huhuula. 30Ɨmpʉga ɨngoosi ɨya bhantu yahabhala hwa Yeesu. Ɨmpʉga ɨyo yahabhatwala abhantu bha saga bhajenda, abhantonko, abhalemazu, abhabwibwi na bhanjɨ abhinji, yahabhabhɨɨha pa manama ga Yeesu, wope ahabhaponia. 31Abhantu bhaala bhahaswiga tee lwa bhabhalola abhabwibwi bhayanga, abhalemazu bhapona, bha saga bhajenda bhajenda na bhantonko bhalola. Ɨpo bhahamʼmwamiha ʉNgʉlʉbhɨ ʉwa Bhaizilaeeli.
ɄYeesu ahubhaliisya abhantu ashile ɨelufu zinɨ
(Maalʉko 8:1-10)
32Ɨpo ʉYeesu ahabhakwizya abhasundwe bhaakwe, ahabhabhʉʉzya ahaga, “Abhantu ɨbha bhali peeka naatɨ ɨnsiku zitaatu, ɨhubhalolela ɨnkʉmbʉ hu nongwa ya huje saga bhali nɨ shalye. Ɨshi, saga ɨhwanza hubhalaje huje bhabhalaje mu mabooma gaabho lwa bhali nɨ nzala, pɨpo bhagaziliha mwi‑idala.”
33Abhasundwe bhaakwe bhahamʼmʉzɨɨlɨzya bhahaga, “Wɨlɨ, mu lʉʉgwa ʉmu tigazyaga hwoshi ɨntogito ɨnyinji ɨzya‑akwɨlane abhantu bhonti abhinji ɨbha?” 34ɄYeesu ahabhabhʉzɨɨlɨzya ahaga, “Muli nɨ ntogito zilɨnga?” Bhahamʼmwamula bhahaga, “Tili nɨ ntogito pʉnga (7) nɨ nswɨ nyishe.” 35Ɨpo ʉYeesu ahabhalajizya abhantu bhonti huje bhakhale pa nsi. 36Aheega ɨntogito ziila pʉnga (7) nɨ nswɨ, ahanʼsalifya ʉNgʉlʉbhɨ. Ahamensulanya, ahabhapeela abhasundwe bhaakwe, bhope abhasundwe bhahabhagabhila abhantu bhaala. 37Abhantu bhonti bhaala bhahalya, bhahanguta na‑asagazye. Abhasundwe bhahabhʉngaanya vya vyahasyalile, bhahamemya amaseje pʉnga (7). 38Abhantu bha bhahaliiye ɨshalye shiila bhahali abhalume ɨelufu zinɨ sinta abhaazye abhashɨ na bhaana. 39Ɨpo ʉYeesu ahabhalaga abhantu bhaala huje bhabhalaje. Ʉmwene ahatʉʉha mu waato, ahabhala hu mbali ɨzya hwi‑ibooma ɨlyɨ Magadaani.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.