Mataayo 21

Bhahumʼmwambɨɨlɨla ʉYeesu hu luseshelo hwi‑ibooma ɨlyɨ Yelusaleemu

(Maalʉko 11:1-11; Luuka 19:28-40; Yoohani 12:12-19)

1ɄYeesu na bhasundwe bhaakwe lwa bhapalamila afishe hwi‑ibooma ɨlyɨ Yelusaleemu, bhahafiha hu shipanga ɨshɨ Besifaage sha shahali pa pɨɨpɨ ni‑igamba ɨlyɨ Mizeyituuni.#21:1 Enya Maalʉko 11:1, ɨshifwani ɨshɨ mantongooni agɨ mizeyituuni mwi‑ikwi. Ɨpo ʉYeesu ahabhasonteelezya abhasundwe bhaakwe bhabhɨɨlɨ, ahabhabhʉʉzya ahaga, 2“Bhalaji mu shipanga sha shili pilongolela lyenyu. Lwa mutʉʉha lwene, munza huyaaje ɨndogobhi#21:2 ɨndogobhi ABhayahuudi bhahabhɨɨshɨle ɨndogobhi huje vibhe vyʉma vya‑anyeemule abhantu awe amazigo. Abhamwɨnɨ bhahapandaga mu ndogobhi lumo lwene. Abheene bhahapandaga mu falaasi ɨzyɨ lʉgʉ. Ɨpo ʉYeesu lwa‑ahapandile mu ndogobhi hu habhaazyo ɨho atʉʉha hu Yelusaleemu, ahali alolesya huje ʉmwene ahwɨnza hu tengaanu nanshi ʉmwɨnɨ ʉmwoloolo. nɨ nyaana yaakwe zikʉngwɨlwe. Ɨpo muzyawule na huzileete huliinɨ. 3Nkashele ʉmuntu wowonti ahubhabhʉzɨɨlɨzya hohonti, mugaje, ‘ɄMwɨnɨ ahuzyanza,’ wope anza hubhɨtɨshɨle ahwɨnze nazyo.” 4Ɨga gonti gahabhombɨɨshe ɨsho huje izwi liila lya lyahayangwilwe nʉ nʼkuwi wa Ngʉlʉbhɨ libhombeshe huje,

5“Bhabhʉʉzye abhantu abha hwi‑ibooma ɨlyɨ Sayuuni#21:5 Sayuuni Ɨli litaawa lyɨnjɨ ɨlyɨ Yelusaleemu. huje,

‘Enya, ʉMwɨnɨ weenyu ahwɨnza huliimwɨ, mwoloolo,

ahwɨnza lwa‑ali pa mwanya pa ndogobhi,

ɨndogobhi ɨyo nɨ nyaana yaakwe.’ ”#Bhaazya Zakaliya 9:9.

6Ɨshi abhasundwe bhaala bhahabhala, bhahabhomba nanshi ʉYeesu sha‑ahabhalajiziizye. 7Bhahanʼtwalila ʉYeesu ɨndogobhi ɨla peeka nɨ nyaana yaakwe, bhahaala amenda gaabho pa mwanya yaabho. Ɨpo ʉYeesu ahazʉbha, ahakhala pa mwanya, ahanda ashʉʉle.#21:7 Enya Luuka 19:35, ɨshifwani ɨsha Yeesu pa mwanya pa nyaana ndogobhi. 8Ɨmpʉga ɨngoosi tee ɨya bhantu yahaala amenda gaabho mwi‑idala, bhamo bhahatema ɨnsamba zyɨ makwi na hwale mwi‑idala alolesye ɨnshɨnshɨ hwa mwene. 9Abhantu bha bhahali hwitagaalila na bhaala bha bhahabhɨnjɨlɨlaga hwisinda lya Yeesu, bhonti bhahabwagaga ibwago bhahagaga,

“Amwamihwaje ʉMwana wa mwɨnɨ ʉDaudi!

Asayiiwe wa‑ahwɨnza hwi‑ikhone lya Mwɨnɨ ʉNgʉlʉbhɨ!#Bhaazya ɨNsalifyo 118:26.

Amwamihwaje#21:9 Amwamihwaje Mu njango ɨyɨ Shiyunaani ɨsimbwilwe huje, Hosaana hwa huje, tifyʉle. ʉNgʉlʉbhɨ ʉyo ali hu mwanya!”

10ɄYeesu lwa‑atʉʉha mwi‑ibooma ɨlyɨ Yelusaleemu, abhantu abha mwi‑ibooma bhahavwalangana tee. Ɨpo bhahanda abhʉzɨlɨzanye huje, “Ʉnʉ yʉ naanu?” 11Ɨmpʉga ɨya bhantu ɨla yahaga, “Ʉnʉ yʉ Yeesu, ʉnʼkuwi wa Ngʉlʉbhɨ wa‑afuma hwi‑ibooma ɨlyɨ Nazaleeti, hu mukowa ʉgwɨ Galilaaya.”

ɄYeesu ahubhashɨmbɨzya abhachuluuzi mu nyumba ɨmfinjile ɨya Ngʉlʉbhɨ

(Maalʉko 11:15-19; Luuka 19:45-48; Yoohani 2:13-22)

12Ɨpo ʉYeesu ahatʉʉha mu lubhaga lwɨ nyumba ɨmfinjile ɨya Ngʉlʉbhɨ. Ahanda hubhashɨmbɨzye hwʉnzɨ abhantu bhonti bha bhahakazyaga na bha bhahakalaga ɨvintu ʉmwo. Ahazipetulanya ɨmeeza ɨzya bhantu bha bhahavunzaga ɨmpɨɨya#21:12 bhahavunzaga ɨmpɨɨya Saga yahanziwaaga huje ɨmpɨɨya ɨzyɨ Shiluumi zibhombelwaje ɨmbombo mu nyumba ɨmfinjile ɨya Ngʉlʉbhɨ. Ɨshi, aBhayahuudi bhahavunzaga ɨmpɨɨya zyabho huje bhazyaje ɨmpɨɨya ɨzya‑abhombele ɨmbombo mu nyumba ɨmfinjile ɨya Ngʉlʉbhɨ. peeka na matengo ga bhantu bha bhahakazyaga ɨnkʉnda. 13ɄYeesu ahabhabhʉʉzya ahaga, “Ɨsimbwilwe mu Nsimbo ɨMfinjile huje, ʉNgʉlʉbhɨ ahayanjile huje, ‘Ɨnyumba yaanɨ yahayibha nyumba yɨ mpuuto.’#Bhaazya Yesaaya 56:7. Leelo amwɨ muyigalulɨɨnye abhe nanshi igwenya lya bhiibha.”#Bhaazya Yelemiya 7:11.

14ɄYeesu lwa‑ali mu lubhaga lwɨ nyumba ɨmfinjile ɨya Ngʉlʉbhɨ, abhantonko na bhalemazu bhahamʼmwɨnzɨla, wope ahabhaponia. 15Leelo abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhahaviitwa tee, lwa bhagalola amayele aga‑aswijizye ɨgo ʉYeesu ahabhombile, nantele lwa bhʉmvwa abhaana lwa bhaseshela mu lubhaga lwɨ nyumba ɨmfinjile ɨya Ngʉlʉbhɨ bhayiga, “Amwamihwaje ʉNgʉlʉbhɨ hu nongwa yɨ shikholo ɨsha mwɨnɨ ʉDaudi.” 16Bhahamʼmʉzɨɨlɨzya ʉYeesu bhahaga, “Wɨlɨ, ʉhwʉmvwa abhaana ɨbho sha bhayanga?” ɄYeesu ahabhaamula ahaga, “Ɨhwʉmvwa! Wɨlɨ, saga mubhaziizye amazwi ga gasimbwilwe mu Nsimbo ɨMfinjile? Gasimbwilwe huje,

‘Mu mazwi ga bhaana abhadoodo na mu bhacheeche,

ʉmwo mwa mwʉmwo ʉbhɨɨshɨle ɨnsalifyo.’ ”#Bhaazya ɨNsalifyo 8:2.

17ɄYeesu ahabhaleha abhantu bhaala, ahabhala agone hu shipanga ɨshɨ Besaniya.

ɄYeesu ahuliguna ikwi ɨlyɨ makʉ

(Maalʉko 11:12-14, 20-24)

18Shampwi yaakwe hu habhaazyo ɨho ʉYeesu lwa‑aweela hu Yelusaleemu, ɨnzala yahanʼnumile. 19Ɨpo ahalilola ikʉ lyeka panshɨnjɨ pi‑idala, ahasejeela pa pɨɨpɨ, ahalyaga saga lili na makʉ gogonti, lyoli lijejile ga matʉndʉ geene. Ɨpo ahalibhʉʉzya ikwi liila ahaga, “Afume sanyʉʉnʉ na wiila saga ʉnza hwezyaje amantongooni dumu!”#21:19 ɄYeesu lwa‑ahaligunaga ikwi ɨlyɨ makʉ, ahakuwaaga huje, ʉNgʉlʉbhɨ ahayihubhalonga aBhayahuudi, pɨpo saga bhali na mantongooni agɨ njendo ɨnyinza. Pɨnɨɨpo, ikwi liila lyahʉʉma lyonti. 20Abhasundwe bha Yeesu lwa bhagalola ɨgo, bhahaswiga tee, bhahamʼmʉzɨɨlɨzya bhahaga, “Wee Mwɨnɨ, yeenu ikwi ɨlyo lyʉmɨle nalinaali?” 21ɄYeesu ahabhaamula ahaga, “Lyoli ɨhubhabhʉʉzya, nkashele muli nʉ lwɨtɨho sinta nsyoho, namwɨ mubhajiiye abhombe nanshi ɨgo ga gabhombeha hwi‑ikʉ. Nantele saga munza‑abhombe ɨga geene, lyoli nkashele muhulibhʉʉzya igamba ɨli huje, ‘Kumpuha, ʉyeepe ɨpa pʉ‑ʉhwɨli, ʉhwitaaje mu nsʉmbi,’ gope ganza‑abhombeshe. 22Nkashele muli nʉ lwɨtɨho, hohonti ɨho mulaabha hwa Ngʉlʉbhɨ mu mpuuto, munza hwambɨɨlɨle.”

Ikhone lya Yeesu libhʉzɨlɨzɨwa

(Maalʉko 11:27-33; Luuka 20:1-8)

23ɄYeesu ahatʉʉshɨle nantele mu lubhaga lwɨ nyumba ɨmfinjile ɨya Ngʉlʉbhɨ. Ɨpo hu habhaazyo lwa‑amanyizya, abhalongozi bha bhasayi bha Ngʉlʉbhɨ na bhagoosi bha Bhayahuudi bhahamʼmalila, bhahamʼmʉzɨɨlɨzya bhahaga, “Gaala gʉ‑ʉbhomba, ʉbhomba hwi‑ikhone lya naanu?#21:23 ʉbhomba hwi‑ikhone lya naanu Bhahamʼmʉzɨɨlɨzya ɨsho hu nongwa yɨ mbombo zya Yeesu zya‑ahabhombile nanshi atʉʉshe hu Yelusaleemu hu luseshelo, ashɨmbɨzye abhantu mu nyumba ɨmfinjile ɨya Ngʉlʉbhɨ, amanyizye abhantu na ganjɨ aminji. Yʉ naanu ya‑aʼpiiye ikhone ɨlyo?” 24ɄYeesu ahabhaamula ahaga, “Nanɨ ɨnza hubhabhʉzɨɨlɨzye izwi limo. Ɨshi nkashele mwanaamula, nanɨ ɨnza hubhabhʉʉzye huje ɨgo ɨbhomba, ɨbhomba hwi‑ikhone lya naanu. 25Wɨlɨ, ʉYoohani ahalyajile hwi, ikhone ɨlya hwozye abhantu? Lyahafumile hwa Ngʉlʉbhɨ awe lyahafumile hwa bhantu?” Ɨpo bhahajeehana bheene huje, “Nkashele tiyiga, ‘Lyahafumile hwa Ngʉlʉbhɨ,’ anza hutibhʉzɨɨlɨzye atɨ huje, ‘Yeenu mwahasintile humʼmwɨtɨshe?’ 26Leelo nkashele tiyiga, ‘Lyahafumile hwa bhantu,’ tihwogopa ɨmpʉga ɨya bhantu ɨnɨ, pɨpo bhonti bhali nʉ simishizi huje ʉYoohani ahali nʼkuwi.” 27Ɨpo bhahamʼmwamula bhahaga, “Saga timɨɨnye.” Wope ʉYeesu ahabhabhʉʉzya ahaga, “Nanɨ saga ɨmbala hubhabhʉʉzye lwonti huje ɨgo ɨbhomba hwi‑ikhone lya naanu.”

Ɨshifwani ɨsha mwana wa‑ahwɨtɨha nʉ wa‑akhaana

28ɄYeesu ahabhabhʉʉzya nantele ahaga, “Amwɨ mulola wɨlɨ ɨshifwani ɨshi? Ahalɨɨho ʉmuntu ʉmo wa‑ahali na bhaana abhasahaala bhabhɨɨlɨ. Ahabhalile hwa mwana ʉwa hwande, ahamʼmʉʉzya ahaga, ‘Wee mwana waanɨ, bhala ʉbhombe ɨmbombo mu nʼgʉnda ʉgwɨ zabiibu sanyʉʉnʉ.’ 29Ʉmwana ʉla ahamʼmwamula ahaga, ‘Saga ɨmbala.’ Leelo pamandɨ ahasɨɨbha, ahabhala abhombe. 30Ɨpo ʉyise waakwe ahabhala hwa mwana waakwe ʉwa bhɨɨlɨ na humʼmʉʉzye nanshi ʉwamwabho ʉla. Wope ahamʼmwamula ahaga, ‘Ɨnza‑abhale daada.’ Leelo saga ahabhala. 31Wɨlɨ, mu bhaala bhabhɨɨlɨ, weenu wa‑ahabhombile sha‑ahanzaga ʉyise waabho?” Abhalongozi bha bhasayi bha Ngʉlʉbhɨ na bhagoosi bha Bhayahuudi bhaala bhahamʼmwamula bhahaga, “Ya yʉʉla ʉwa hwande.” Ɨpo ʉYeesu ahabhabhʉʉzya ahaga, “Lyoli ɨhubhabhʉʉzya, abhasomvya sonko na bheegu bhahayihubhatagaalila atʉʉshe hu wumwɨnɨ ʉwa Ngʉlʉbhɨ. 32ɄYoohani ahɨnzɨle huliimwɨ huje abhalanje idala ɨlyɨ lyoli, namwɨ saga mwahamʼmwɨtɨɨshe. Leelo abhasomvya sonko na bheegu bhahamʼmwɨtɨɨshe. Hwope ɨsho amwɨ lwa mwagalola gonti ɨgo, saga mwahalambile hu mbiibhi zyenyu na humʼmwɨtɨshe.”

Ɨshifwani ɨsha bhalimi abhabhiibhi

(Maalʉko 12:1-12; Luuka 20:9-19)

33ɄYeesu ahajendeelela ayanje ahaga, “Tejeelezyi ɨshifwani ɨshamwabho. Hwahali nʉ muntu ʉmo wa‑ahalimile ʉnʼgʉnda gwakwe na‑avyale ɨzabiibu. Ahazyʉngʉʉzya ʉlubhaga munshɨnjɨ, ahabana ilɨndɨ ɨlya‑asʉʉyɨle ɨzabiibu ziila. Ahazenga ɨshidunku ɨshitali#21:33 Ɨshidunku ɨshitali shahali shiwulunga sha bhahazenjɨɨye amawe, ʉtali waakwe wahali nyaayo 4.5, ʉwaazi wahali nyaayo 2. Pahali nɨ sheegu sha bhahatimiiye isole. Ʉnʼnɨndɨɨlɨli ahakhalaga pa nzunda atandɨɨle abhiibha, ɨhanu nɨ nyonyi. ɨsha hwenyeelezye mu nʼgʉnda.#21:33 Enya Maalʉko 12:1, ɨshifwani ɨshɨ nʼgʉnda ʉgwɨ zabiibu gwa guli nɨ shidunku ambali mwanya. Ahapasya#21:33 Ahapasya Apasye hwa Bhayahuudi saga hulɨngaana na‑apasye hwa Bhasafwa. Abheene nkashele ʉmuntu apasiizye ʉnʼgʉnda, abhalimi ɨbho bhahagabhanaga nʉ mwanɨɨsho nʼgʉnda ɨviyabho vya bhahalimile afume mu nʼgʉnda guula. hwa bhalimi huje bhalɨndɨlɨlaje na hwenyeelezye ɨzabiibu ziila aje nkashele zyela, bhahagabhanaje. Ʉmwene ahashʉʉla, ahabhala hu nsi ɨyɨnjɨ ɨya hutali.

34Ahabhaazyo lwa haafiha aha‑atʉngʉle ɨzabiibu, ahabhasonteelezya abhabhomvi bhaakwe hwa bhalimi bhaala huje bhabhale, bhamʼpeele ɨzabiibu ɨzya mwene afume mu nʼgʉnda gwakwe. 35Leelo abhalimi bhaala bhahabhakhata abhabhomvi bhaala, weeka bhahanʼkhoma, ʉwamwabho bhahanʼgoga nʉ wamwabho bhahanʼkhoma na mawe. 36Ʉmwanɨɨsho nʼgʉnda ahabhasonteelezya nantele abhabhomvi abhanjɨ ɨbho bhahali bhinji ashile bhaala ɨbho ahabhasonteleziizye hu wandilo. Abhalimi bhaala bhahabhabhombɨɨye shibhiibhi abhabhomvi bhaala nanshi ɨsho bhahabhabhombɨɨye abha hwande. 37Hu malishilo, ahanʼsonteelezya ʉmwana waakwe, ahaga, ‘Ʉnʉ mwana waanɨ, ʉmwene bhanza‑abhe nɨ nshɨnshɨ.’ 38Leelo abhabhomvi bhaala lwa bhanʼnola ʉmwana ʉla, bhahajeehana bheene bhahaga, ‘Ʉnʉ yʉ nʼgaali wɨ nʼgʉnda ʉgu. Ɨshi, ɨnzaji tinʼgoje huje ɨngaali zyakwe ɨzyɨ nʼgʉnda ʉgu nka zibhe zyetu.’ 39Ɨpo bhahanʼkhata, bhahamʼfumya hwʉnzɨ yɨ nʼgʉnda, bhahanʼgoga. 40Ɨshi ʉmwanɨɨsho nʼgʉnda ʉyo lwa waweela afume hwa‑ahashʉʉlɨle, ahayihubhabhomba yeenu abhalimi bhaala?” 41Abheene bhahamʼmwamula bhahaga, “Ahayihubhagoga shibhiibhi abhabhiibhi bhaala, gwope ʉnʼgʉnda gwakwe ahayihubhapasya abhalimi abhanjɨ ɨbho bhahayihunʼsomba amantongooni gaakwe hu habhaazyo ha hahwanziwa.”

42Ɨpo ʉYeesu ahabhabhʉzɨɨlɨzya nantele ahaga, “Wɨlɨ, saga mubhaziizye ɨgo gasimbwilwe mu Nsimbo ɨMfinjile? Gasimbwilwe huje,

‘Iwe lya bhahalikhɨɨne abhazenji abhɨ nyumba,#21:42 Iwe lya bhahalikhɨɨne abhazenji abhɨ nyumba Iwe ɨli yʉ Yeesu yʉʉyo.

lyɨlyo lya lyabha liwe linza ɨlya pa mpɨnga#21:42 Enya Luuka 20:17, ɨshifwani ɨshi‑iwe ɨlya pa mpɨnga.

lya linyʉmʉʉye ɨnyumba yonti.

ɄMwɨnɨ ʉNgʉlʉbhɨ ya yʉʉyo agabhombile ɨga,

gope gaswijizya huliitɨ.’#Bhaazya ɨNsalifyo 118:22-23.

43Ɨshi, hu nongwa ɨyo anɨ ɨhubhabhʉʉzya huje ʉNgʉlʉbhɨ ahayeefwa ʉwumwɨnɨ waakwe huliimwɨ na hubhapeele abhantu abha mu nsi ɨzyɨnjɨ, ɨbho bhabhajiiye abhombe shinza mu nʼgʉnda gwakwe huje bheezye amantongooni. 44Ʉmuntu wowonti nkashele wagwɨla pi‑iwe ɨlyo, anza‑abuduuhane tee na‑abhe tinyatinya. Nantele ʉmuntu wowonti nkashele iwe ɨlyo lyanʼgwɨla, lɨnza hunʼtinzanye tee.”

45ABhafalisaayo na bhalongozi bha bhasayi bha Ngʉlʉbhɨ lwa bhʉmvwa ɨvifwani vya Yeesu, bhahamanya huje vihubhayanga bhɨɨbho. 46Ɨpo bhahanda ahwanze idala ɨlya hunʼkhate, leelo bhahoogopa ɨmpʉga ya bhantu, pɨpo abhantu ɨbho bhahamɨɨnye huje ʉYeesu nʼkuwi.

Currently Selected:

Mataayo 21: SBK

Highlight

Copy