Bemba 3
3
Ekata ya yonga
1Pyɛli na Za balwakasa bya Elongwɛ ya Zambe, o elɔmɔ ya membɔndu mya ikɔ 2Okate bayakasa abɛpɛ moto ajibwɛsɛ ekata, ba jikakasa ango minya mahajɛ o kunakuna na itulu ja Elongwɛ ya Zambe ja babanga te bongɔndɔ, ya jasa na moto ajibwɛsɛ eboka. Minyan mahajɛ, babɛpɛkɛsɛ ango na ijikaka ango usɛ. Ahimwakasa balɔlɔ na bakweyakasa o Elongwɛ ya Zambe. 3Ayɛnɛ Pyɛli na Za bakweyakasa o Elongwɛ ya Zambe ya ango ahimwa bango balɔlɔ. 4Pyɛli na Za, basɔzɛ ango ya Pyɛli asɔhɔ na neji te: «Taka bɛhɛ.» 5Moto wɛ te asɔzɛ bango obwɛji, atɔkɔsɔ te bewɛcɛ ango emba. 6Ya Pyɛli asɔhɔ na neji te: majetɛ hamama balɔlɔ, hamama lɔli, nde ya maji na yango, yango ya mewɛcɛ ɔbɛ, na jinɔ ja Zɛzi-Kilisitɛ wa Nazalɛti yemwaka na jongaka! 7Ya ango banda ango obɔ wa hangwɛ, inyamwaka ango iyemwaka. Ibujɛkɔ mako na mabɔngɔ ma ekata maya te obwɛji. 8Ango te ayemwa ya ango hula o bojongaka akweya te bango na batɔtu o Elongwɛ ya Zambe, na ojonga, adama na isomɛcɛ Zambe. 9Lupu ja hajɛ ja yɛnɛ ango ijongaka alwa somɛ Zambe. 10Usya bango bayembya ango te etɛ habe Moto anjija hinsi o itulu ja jinɔ te bongɔndɔ ja Elongwɛ ya Zambe o iyombi, bahajɛ te bayɛnɛ bɔngɔ na ngambala na emba yamuhulanga ango yɛ.
Pyɛli asɔhɔ o Elongwɛ ya Zambe
11Moto wɛ mupatwakasa minɛ na Pyɛli na Za. Lupu ja hajɛ jayecɛ ngambala ya bango basukwa bya bango baji bya epesa ya babangakasa te Salɛmɔ. 12Usya Pyɛli ayɛnɛsɛ nɛ, ya ango asɔhɔ na lupu te: bihi bato ba Izahɛli byayɛnɛ ngambala emba yamu yekana yɛ, ya byata bɛhɛ nɛ nde bya tɔkɔ te moto otɛ amujonga na tuma aho kate na pizo na ibukwɛ jaho na Zambe?. 13Zambe wa Abalami, wa Izaki, wa Zakɔbi, na batata baho, ewɛ kuma na njazi mweji Zɛzi. Wa bihi mɛnɛ, bamuwɛ o mabɔ bakombo na ifaka ango oboho bwa Pilati ipabaka ango, ahakakasa iyejɛcɛ ango. 14Bihi bacɛcɛ ejikala ajasa pu na hongololo, ya bya himwa te bayɛjɛcɛ bihi mbɔnwu. 15Bya boma kwa ndonga, nde Zambe eyomwɛ ango opanga bawewe, bɛhɛ bamukɔbɛ okate. 16Yɛ tuma ya jinɔ ja Zɛzi na ibukwɛ na neji, amuwɛ pizo na moto wa byayɛnɛ na iyembyaka otɛ, yɛ ibukwɛ ja jinɔ ja Zɛzi ja yonjɛ ango nda byayɛnɛ yɛ. 17«Bananyangwɛ amɛ, mayebe te bihi na bakapita ba bihi byamu beka na Zɛzi nɛ na bihi teka yeba. 18Nde Zambe ebekasa nɛ emba ya ango atandasa sondi ya ka na me ntɔci: atandasa te Kilisitɛ eyɛnɛcɛ mezoku. 19Hongɛcɛ bejɛmi, iyaka bya Zambe aji, bosina te ekungwaka mesɛmbɛ mya bihi, 20Usɛ Ku ewɛcɛ bihi elɔmɔ ya iyɔkɔ na ilomaka bihi Zɛzi-Kilisitɛ wa Zambe amubɔnɔ boho. 21Nde o elɔmɔ etɛ Zɛzi-Kilisitɛ ajace boho bya iko ngu na buya bwa bemba byɛ bya ejakasa o obwɛji, nda Zambe atandasa sondi yaka na mentɔci mya Pu: 22Moyizi asɔhɔ te: “Ku wa bihi Zambe, elomaka bihi Ntɔci mwa nda mɛ, ejaka moto wa buka bwa bihi byeyokaka bya ango etandaka bihi byahajɛ. 23Moto nde moto ejaka teka yoka Ntɔci mwɛ bejɛlɛ opanga lupu Zambe na ibomaka ango.” 24Mentɔci mya sɔhɔsɔ o sondi Samyɛli myahajɛ, mɔkɔ na mɔkɔ na bango ba sɔhɔkɔ jambo ja buya butɛ. 25Emba ya Zambe atandasa na mentɔci yaje ya bihi, byaje na ngabo oyonga ya Zambe asijɛsɛ na batata ba bihi usya ango asɔhɔsɔ na Abalami te: “Na buka bwɔbɛ mehowaka ipota ukwa buka bwa hehe bwa haja.” 26Na bosina bwa bihi Zambe alomasa njazi meji na basina bwa bihi alomasa ango iwɛcɛ ipota na ilumɛcɛ moto wahajɛ o bemba byeji bya ibebebe.»
Currently Selected:
Bemba 3: KOQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
