Luc 8

Begetu bendange ne Sesu

1Sige vane, Sesu yendange mu yadi ne mu mimbu. Mbure tsyotsu akwene nenzange musamu wuboti wu bulongu bu Nyambi. Digumi di bebingitsi ne bebingitsi bebeye be yandi sale, bendange nandi. 2Gubange gwandi begetu bebelusu mbili mibelu, besanzu menyuni mabi ne Sesu. Gube Mari yi Magedale, wubange ne menyuni mabi mane gumereru me Sesu sanze. 3Gube gwandi Sane mugatsi Susa yibange mutu wu bandekenange meboti me kanangu Erode, Susane ne begetu be mosi bamusange Sesu ne bebingitsi bandi ne meboti mawu.

Kugu yi muvaritsi

4Wisi mosi, mbili batu berambugile mu mbili mimbu besebengune ve mbeke Sesu, gusegulu mambu me yandi yambilange. Neguvere kugu yiyi: 5«Gube muvaritsi wende gu gyambe gwelage milunde mi bukulu#8.5 Dusebonge «bukulu» tumbe gumbu be Sif «blé».. Ve yandi lagilange, milunde mimosi mikubonduge mu nzile. Batu be vyogilange mu nzile bekumitsarilange. Nyoni gwandi tsikuse dode milunde myotsu. 6Milunde mimosi gwandi, mikubonduge ve digunge. Vemipakile bendile, mikumuge mbare gusabe mutambe dede. 7Milunde mimosi mikubonduge vegari kengetsi. Bukulu ne kengetsi bekubendange mbure mosi. Kengetsi tsi kuboke bukulu. 8Milunde mimosi mi bukulu mikebonduge ve mutambe wuboti vemikubugile, gyambe gyotsu gibase ne bukulu. Sesu negumane vere kugu yine, ayamuge gugwambile bumongu. Yulwanu dikengi dyambu dinyarondi nwambile.»

Dibandu di Sesu ga gwambili ne kugu

9Mwepesu kwe, bebingitsi bandi bemwivule: «A kugu yiyi yagwambili retsye?» 10Sesu yagule re «Nyambi senuvege gyesi giguyabe mambu mesweme me bulongu bu Nyambi. Tumbe batu be sandi bebingitsi bami, nyabambili mu kugu nonge

“batu bagengisi, tumbe besagulabe.

Bagulu mambu, tumbe besagulu dibandu di dyambu#8.10 Esayi 6.9.”»

Sesu kayabisi kugu yi muvaritsi

11Sesu negwambile re, «Mulunde, musamu Nyambi. 12Milunde misebonduge mu nzile, mimunongu mosi ne batu bagulu musamu Nyambi. Tumbe mbeni garugi gusegusule musamu wune mu mirime mi awu. Nonge betsatsegube ne gitu, bekole gobulu ne Nyambi. 13Milunde misebonduge ve digunge, munongu mosi ne batu bagulu musamu Nyambi, bamusingi ne mugangu tumbe musamu wusagwingeni gumirime mi awu. Begabi ne gitu mu gigumbi, varugili meguge besakundegube ne gitu. 14Milunde misebonduge vegari kengetsi, batu bagulu musamu Nyambi, tumbe gigumbi neguvyoge, pikile tsibi, mugangu busine, mugangu monyu boti, migangu myotsu mine myabakigi musamu Nyambi gu mirime mi awu. 15Milunde misebonduge ve mutambe boti, mi munongumosi ne batu bagulu musamu Nyambi ne murime sigeme. Bamubandekeni mu mirime mi awu. Bemunongu mosi ne bivaru byaburi mbili milunde miboti. Mutsageninu wawu, wu wuboti ve wusu Nyambi.»

Kugu yi lambi

16«Gusandi mutu wabangisi lambi ne guyiswege gutsye mulumbu, vo akuyisunze gutsye tangi. Tumbe bayikobigi gu yulu mu dusongu, nonge batu bagwingeni gu ndagu bekulabe giyalele. 17Mambu motsu mabandekenu, mesweme nekyawu meguyabisu vegiyalele. Musamu wusweme, wuguyabegenu mbure yandi wotsu. 18Yulu anu dikengi me nyanwambili, botsu besegulu musamu ami, Nyambi gukunde bevege duyabu. Tumbe mutu wusagulu, Nyambi gumudumbe nesi di yandi beni gayabi re dinandi.»

Nguye ne bane be nguye be Sesu

19Nguye ne bane be nguye be Sesu, beserungule dukesene nandi mbare gube mbile batu bemutsyenge. 20Mutu amwambile re «Nguye agu ne bane be nguye tsi agu begu kane barondikwene.» 21Tumbe Sesu negwambile batu botsu re «Botsu bagulu musamu Nyambi, bavagi motsu neve Nyambi gagwambilili, re be nguye tsi ami ne bane be nguye tsi ami.»

Sesu lelige mukunge

22Wisi mosi, Sesu ne bebingitsi bandi, bekekwine gu bwatu. Negubambile re «Gwendi anu gu disimu dine di gidibe.» Bende. 23Ve betabulile gidibe ne bwatu, Sesu neguningile. Vane ne vane, mukunge neguvuge gu gidibe. Mambe negwingene gu bwatu, beli gubase ne mambe, beke ve leleke. 24Bemurambuse, bemwambile re «Fumu, Fumu dukafu.» Sesu negurambuge gyelu, neguretseme, negukenine mukunge ne mambe me gibemange. Mukunge negusikeme, mambe gwandi negusigeme. 25Vane, negubambile re «A gitu gi enu gigu?» Negugangu ne wome, bekumamange. Bekwambesenange yawu ne yawu re «A mutu nye wuwu wagobisu nesi ne mukunge ne mambe.»

Sesu beluse mutu wube ne menyuni mabi

26Ne guduke bwatu ve gisyeni gi musyengi yi Geraseni yi disimu dine di gidibe gengeseni ne musyengi Galile. 27Ve Sesu sundile gu bwatu, gukuruge mutu guse mubengusene. Mutu wune ayibange ne mbili menyuni mabi gu gari andi. Mbere amatsinge ke negunangange peni asetsagenange gu ndagu ke gupesi. 28Mutu negulabe Sesu, abambeme nandi, negwamuge, negukuteme ve wusu andi ne gumwambile re «Sesu, nzisi kindikindi. Ndyayu wu mwane Nyambi Yulu. Nyakulembigi wuyakengise.» 29Sesu mbere amavege dinyuni dibi dignyange di guvuduge mu mutu wune. Mbare mbili nyongu agondungu ne dinyuni dibi. Gu gumubandekene, batu bekumutunge mekake ne pange, bekumugomine bivangu mu byeru. Tumbe menyuni mabi mekumuvegange ngudu tsi gutabule pange ne gurubule bivangu dinyuni dibi diku mubegisange kagwe netsagene vike. 30Sesu negumwivule re «Dine di agu nye?» Dinyuni dibi ne gwagule re «Nyanengu re Gigondu.» Ayambile nane mbare abegisungu ne mbili menyuni mabi. 31Menyuni mabi melembige Sesu nonge akolebetinde gu nzugu yi menyuni mabi ya nengure dubile. 32Gube vane mugambe ngulu wuyange bivaru gu mukongu. Menyuni mabi mane melembige Sesu gere asebesanze gu gari mutu wune, abetindi gu gari ngulu tsine, Sesu negube singisile. 33Avane, menyuni mabi mevuduge gu gari mutu wune, mingene gu mugambe ngulu. Mugambe wotsu wu ngulu, wende mbangu wusunde mukongu, wende gweputeme gu gidibe, wotsu wufu gu mambe. 34Batu bebandekenange ngulu tsine, negulabene dyambu dise vage Sesu, bende mbangu gwenegwambile batu botsu mu yadi ne mimbu dibeselabe. 35Vane, batu bulu gilombi gine, bende gwelabe yawu beni nevu disevyogile. Neguvuduge gu Sesu, beragesenu mutu wutsibange ne menyuni mabi metsagele ve mbeke Sesu, negulungu ndongi tsi andi. Amadware bidwaru biboti, dinyuni dya sigeme, amabeluge. Batu negulabe gimage gine bekulu wome. 36Mbeyi tsi labe mambu mane, tsyambile bembatsi neve Sesu segobulile mutu wutsibange ne menyuni mabi.

37Vane, batu botsu be musyengi Gerase begangu ne mune wome, bambile Sesu re «Yusuge gumbu gi etu.» Sesu negunangeme gu bwatu ne bebingitsi bandi ayene gabuge. 38Mutu wobulu menyuni mabi ne Sesu amulembige: «Nibenze gwende nagu?» Tumbe Sesu negubuse amwambile re 39«Gabuge gu gifumbe gi agu, yende gwebambile motsu me Nyambi sekuvage.» Mutu wune ayende gwenegwambile batu botsu mu yadi motsu me Sesu tsemuvage.

Sesu beluse mugetu ne gugabuse mwane Sayiros monyu

40Batu botsu bevingilange Sesu disimu dine di gidibe. Neguruge batu bemusambegene ne mugangu. 41Vane, gube mutu wa nengure Sayiros abange givunde gi ndagu ndembu, akuruge gusekutemine Sesu nonge akwende gu ndagu andi. 42Mbare abange ne mwane andi dikike wu mugetu. Mbere akene gindande gi digumi di mipume ne mipume mi beyi, abelange beli gufu. Ve Sesu yendilange gu mbu Sayiros, akubakigungu ne mbili batu. 43Vane, vegari batu bane, gube mugetu wubange ne nzime tsungi yisekamugange mu digumi dimipume ne mipume mi beyi. Amane doli ne meboti mandi motsu negwene bugu, tumbe gusabe mutu wu mubeluse. 44Negubambeme gu nzime Sesu, abembe gutsweminine mbeke gidwaru gi andi, vane ne vane, nzime tsungi negukamuge abeluge. 45Vane, Sesu negwivule batu bemutsyengage: «Nye sembembe?» Yawu botsu negwambile re «Sa yetu.» Pyere negwambile re «Fumu, mbili batu bakubakigi mu tsyelu tsyotsu a gye wakundi gwyvulile?» 46Tumbe Sesu negwambile re «Nyayabi re gu mutu sembembe mba ndure du belusu yavuduge mu nyuru tsi ami.» 47Mugetu wune neguyabe re amayabegenu neguruge ne wome, neguregeme gusekutemine Sesu. Negwambile ve misu me batu botsu re «Nzebelange re dibandu nzemubembile, vane ne vane nibeluge.» 48Sesu negumwambile re «Mwane ami, neve wusepagile gitu, wabeluge. Yende pembi ne polu.»

49Sesu mbere kyagwambili ne mugetu wune, reve rugile gilumbi girambugile gu ndagu Sayiros. Negusemwambile re «Mwane agu mafu. Wuyakunde tsugise Mulonzi re ayendi gu ndagu agu.» 50Tumbe Sesu negulu nevu gilumbi yambililange Sayiros, negumwabile re «Wuyadede nyuru, bange ke ne gitu re nigumubeluse.» 51Sesu ne batu bendange nandi konge neguvuduge gu ndagu Sayiros, Sesu seronde re mbili batu bingini gu ndagu yibange mwane wubelange vengu ke Pyere, San, Sake, taye ne nguye mwane. 52Batu botsu babe vane bekelilange bekenyongange. Nesi begwingene gu ndagu, Sesu negubambile re «Nuyalile, volanu, mwane asafu ayigyelu.» 53Batu botsu beyabange re mwane amafu. Redibandu bedokilange Sesu. 54Tumbe Sesu negubambeme ne mwane, negumugange ve dikake, negwamuge re «Mwane, rambuge.» 55Dinyuni di andi negumugabugile, neguvefume. Vane ne vane negutsagene. Sesu neguvege biburu bi mwane dinyange digu muvege biguye. 56Biburu bi mwane bekumame. Sesu negubambile re «Nuyagwambile mutu dyambu di nuselabe.»

Currently Selected:

Luc 8: SWJ

Highlight

Copy