Esima 13
13
Oduduma Santi swoli Baranabase ŋa Soole
1Nca Okuga wo Antiyoce kiigi ŋa antuma Njyami bila ayizigi ba mbari a Njyami: Barenabase, Simiyon wo acwoli ma Nizere, ŋa Lisiyuse wo Sirene, Manayene buga le janja wo obuzu wo Erode wo kiigi mfumu a Ngalile, ŋa Soole. 2Cugu lemon, bo akiigi bwono Mfumu ŋa ma kaka oyiila njala. Oduduma Santi dugi ndi: «Leyaga Barenabase bila Soole be le suuza ma janja le ecwoli mi bo ma lo.» 3Ŋaa bo amana eyiila e njala bila kabwono, bo alegi njiala yila bo ŋa anyini bo ayeni.
Barenabase ŋa Soole ka Cipre
4Ŋaa Oduduma Santi tumi bo, Barenabase ŋa Soole ayeni kangundu ka Seleyusi. Kaŋaa, bo akumi yila vaari ma kaje katiŋa ka Cipre. 5Bo ato Salamine, bo ampi mbari a Njyami nca ebiri ba abwono aZife. Zan Mareke li bila bo ŋa ma kayamba bo. 6Bo ataagi katiŋa kaso tii katogi bo Pafose. Kaŋaa, bo abazigi ngaa mpiini omon Bare-Zezi, ntuma wo oca wo aZife. 7Wo kiigi bila nguvrenere wo katiŋa, Sereziyuse Poluse, kiigi balaga lemon ŋa oyeri. Nde si kaya Barenabase ŋa Soole, kabila nde kiigi ŋa njala ma kayuga mbari a Njyami. 8Ŋaa Elimase wo ngaa mpiini, yia kamaka a nde ma ngreke, bizi maami a bo ŋa asaga tasa lila le nguvrenere. 9Ŋaa Soole ba acwolo nde ma Poole se, Oduduma Santi kiigi ma alwula nca njuru a nde, kesi nde pii. 10Ŋa nde ndi: «Balaga eli otuma ma alwula ma kura bila maami obi, mwana jyabiri, we onyuo ma eso etele! Janja eli Mfumu asa lo ti janja le tele. Ŋaa we, we avura saga tasa janja leeve li? 11Ŋaa yiga yuga Mfumu abere we, we miizi ma abuluga. Ma ntini mon we aka ma mono kafii ka muyi ŋi.» Kancinci ŋaa, Elimase miizi adimi nde yiga kamono lempiibi. Nde kiigi jeneŋe ma ebiri eso ma kasaga mbuuru wo akuara nde ma kwogo ma kaje bila nde. 12Nguvrenere kamono ma ayi, eyizigi e Mfumu kiigi ema kolo nde. Ŋaa nde yaligi Zezi.
Poole ŋa Baranabase ka Antiyoce ma Pisidi
13Amana, Poole ŋa Barenabase ŋa baari ba akiigi je ojya bila nde, bo akumi ma kanyunuŋa nca vaari ma kacyege kangundu ka Pafose. Bo anyuri lemere, bo ba kaje Pereje, nca kasi ka Pamfili. Kaŋaa, Zan Mareke cyegi bila bo, nde vurugi Zerizaleme. 14Bo acyezi kangundu ka Pereje kia , bo atoyi Antiyoce nca kasi ka Pisidi. Ma cugu le ba awuuma, bo anyuniŋi nca njo ye abwono aZife, bo avi manci. 15Amana lira abuku ma angiri bila ma antuma Njyami, amfumu ba aZife ba baabwono adugi bo ndi: «Adumu a bizi, be aka ŋa mbari ye kampa Okuga kawasi, ŋaa yiga be lebuna kalyele.» 16Poole sarigi si njiimi ma kwogo ŋa nde ndi: «Be baari ba Ezerayele ŋa be ba lenyima Njyami, leyuga mi! 17Njyami wo baari a Ezerayele ma aswolo ankaaga a bizi a be. Nde kuuzi baari baa ma ntini ye baaka bo ma kasi ka ojya, ka Ezipite, amana nde cuzugi bo ma kasi kia bila mpari a kwogo ka nde. 18Kiigi yiga enkuumu ba esibi ena nde kyeli bo nca ncege. 19Amana nde biizi esi ncaami nca kasi ka Kanaan ŋa nde mpi kasi ŋa baari a nde, bo yiga aki angaa yo. 20Lebigi lia leso kiigi e ba akama ena ŋa e ba esibi etaani (450 ans).
«Amana bwa, Njyami mpi ma ankaaga a bizi ankani tii ntini ye ntuma Samuyele. 21Ŋaa baari apizi mfumu omon. Njyami mpi bo Sawule wo mwana Kise, wo mpabigi Bezame, wo kiigi ma omfumu tii enkuumu ba esibi ena. 22Njyami cuti Sawule, nde swoli Davide ma omfumu. Nde wobi ma nde ndi: “Mi mi baga balaga lejii otuma mi, Davide wo mwana Zese. Nde asa eso be ejyi mi.”» 23Nca nkwono Davide, Njyami si kacwuga balaga lemon ma kavuzuga baari ba Ezerayele, mva kampi nde ndagi. Balaga lia, kamaka Zezi. 24Ntini yia Zezi kiigi kini ya ŋi, Zan mpi mbari ma kalyele baari aso a Ezerayele ma ka kaala eku ŋa ma kayaga ateemi. 25Ma ntini eli janja le Zan yiga leje ma kacu ka kasyele, nde alyele ŋa baari ndi: «Ma be, be ni mi na? Mi ka mbuuru wo be wo le njila ni. Ŋaa leyuga nde aya amana mi, ŋa mi kibuna se kacyeze endi ba akorogo a nde ŋi.»
26«Adumu a mi be ba ampabigi ba Abarayame ŋa be ba le nyima Njyami, ma bizi a be aso Njyami tumi mbari yia ma kavuzuga bizi a be. 27Okorogo baari a Zerizaleme bila amfumu a bo akimaya ndi Zezi na ŋi, ŋa bo akiyuga se mbari ye antuma Njyami ye aliri cugu ŋa cugu le ba awuuma ŋi. Ŋaa bo yiga asi mbari yia ma ka kata Zezi. 28Yemiŋi eli bo aki baga pyeme se mon ma ka kata nde eli abuma nde ŋi, bo apizi Pilate ma kabuma le nde. 29Bo amana sa maami aso ma adugu mbari a Njyami ma nkuumu a Zezi, bo acyezi nde ma lemaanji ŋa bo aswuzi nde nca mwuma. 30Ŋaa Njyami nyusu nde nca baari baakpakpa. 31Ŋa nde mvyeri njuru a nde ma ecugu ba ekukuna, ma baakiigi kuma bila nde ka Ngalile tii Zerizaleme, bo ba eli yiga atemi a nde ka miizi a baari ba Ezerayele. 32Bizi ankulu lempa be mbari yeemve yia: ye Njyami ka kalegi ndagi ma ankaaga a bizi a be, 33nde si bwa ma bizi a be, ba leeli ampabigi a bo, ma kanyusa Zezi ma leku. Okorogo amaateende nca Pisome ye oywele ndi:
“We mwana mi,
ma ebaani e lubu, mi Taara we.”
34Njyami nyusu nde kanca baakpakpa, eli ni njuru a nde eki ma mbolo ŋi. Ntini ye kala Njyami kiigi dugi lo, nde ndi:
“Mi empa be puga le cece ŋa le syele
ni mi mpi ndagi ma Davide.”
35Ba alira se nca mbari kima:
“We aka nyina mwana we ocece kabolo nca mwuma ŋi.”
36Davide janji ma e nde ntini maami ma lemigi le Njyami, amana nde kpi, ajiigi nde mpaani a ankaaga a nde ŋa nde boli. 37Ŋaa nde wooli Njyami nyusu ki mbolo ŋi 38Ŋaa adumu a mi, Ave bizi a be leyayi ni ma nde adugi ŋa be ndi Njyami abologo maami maabi. 39Ŋaa ma nde mpini mbuuru wo ayalaga ami cyeze amaami maabi aso, eli angiri a Moyize ma kampi kibuna kavuzuga be ŋi. 40Ŋaa lesa oyeri, ma buni ncanke maami ma adugi antuma Njyami ayi ma be:
41“Baari akamba, lekese!
Kamaaŋi keesa be, ŋa le cyege!
Kabila mi, wo Mfumu mi esa ma ntini ye be jaa eli be leeka yalaga aka mbuuru aya lyele be lo ŋi!”»
42Ntini ye Poole bila Barenabase kacwugi nca njo aZife ye baabwono, adugi ŋa bo ma kaya vuruga ma cugu lekima le ba awuuma ma kalyele ma jaa lia. 43Amana avunuŋa, bege le aZife bila baari baali ka aZife ŋi ba ayaligi Njyami aZife bila ba abwoni alwoni Poole bila Barenabase. Baa bwa awobi bila bo ŋa ampi bo kawasi ma kaka tele ma puga le Njyami.
Poole ŋa Baranabase ayaligi mpila baali ka aZife ŋi
44Cugu lekima le ba awuuma, kaali baari aso ba kangundu avuniŋi ma kayuga mbari a Mfumu. 45Ntini ye emoni aZife lembuuru lia bo amoni mfunuŋa muon, bo yiga ba alyele adaga akima ma Poole, bo ba katuga nde. 46Poole bila Barenabase adugi ŋa bo bila lila ndi: «Kiigi ave asi baana mpa be mbari a Njyami. Ŋaa be ti le mbiza yo, ŋa be le ka cimiŋa ni yemiŋi ma kabaga omwon ba obu-obu ŋi, ŋaa bizi yiga le kalaga ma kacu ka baali ka aZife ŋi. 47Lemono maami ma Mfumu ma kadugi bizi a be ndi:
“Mi ma aswuza we mva kafii ka esi,
ma buni we je lyele ŋa baari tii ancwo a ncie aso
lemigi le mi le vuzuga bo!”»
48Baali ka aZife ŋi ayuga bwa, amoni kase ka ekuna kuna. Bo ampi Mfumu leve ma mbari a nde. Aso a Njyami ba kaswolo ma kabaga omuon ba obu-obu ayaligi. 49Mbari Mfumu eyeni ma abungu aso. 50Ŋaa aZife yiga ba kacyeze akaazi baali ŋa etomi kanca bo baakiigi bwono Njyami bila ankwuru ba kangundu. Bo apisi kaduma ma Poole bila Barenabase, ŋaa bo acuri bo ma kasi ka bo. 51Abalaga abwele se akubigi owuru wo kiigi ma ntaami a bo, ŋa ayeni kangundu ka Ikoniyume. 52Ŋaa ato ma alwoni ka Antiyoce, bo kiigi amaalwula ma kase ŋa ma Oduduma Santi.
Currently Selected:
Esima 13: teg
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
