Luke 21

Okwulu omon mpi ovuzigi

1Zezi kakese bu, nde moni angaa kabaga ba ayalege ovezigi nca mbele ye Njo Njyami. 2Nde se moni okaazi omon wo okwulu kiigi ofuga woonini, olegi ye edidoro jyele. 3Zezi ndi: «Jaajaa! Mi elyele be ni, ka miizi a Njyami, okaazi wo ofuga wua ma ampa ovezigi woovuli we abuga ba asiili. 4Okorogo baa ampi baamon baa ŋaa, ampi ampara mali kalogo ma kasa kali. Ŋaa okwulu wua wooli se kanca ofuga o nde, eli kiigi se kalogo kamon kali, ompi ampara ma siili kayila nde.»

Zezi alyele ma ecaligi e Njo Njyami

5Emana baari ba kalyele ma owali ba amisa Njo Njyami, ŋaa bo ba kalyele ndi: «Ii, ii yo ŋa owali ei ei! Le mamono akele maave, mamata ngeri ngeri ku, ŋa biibi ba ampa Njyami.» Zezi kaali ŋa bo ndi: 6«Be ŋa lemono njo yi? Ecugu be ya eli be leka mamono se kele lemon yila buga lekele ŋi. Eso be calaga.»

Maami maanini mama ya ka efi ba okiri

7Bo apizi ŋa Zezi ndi: «Mfumu, maami ma alyele we maa, ma ntini ma mon maya? Kaliimi ka maami maa, keka kama» 8Zezi kaali ŋa bo ndi: «Lesa oyeri! Lebiza ka nyina baari akuri be, okorogo kuna le baari leya ma nkuumu a mi, ŋaa bo alyele ndi: ''Bo mi!'' Kristi ntuma Njyami. Ŋaa bo baavura alyele ndi: Ntini emi to. Be lebizi bo ka lwono. 9Be leyuga ba alyele ma eta bila baari ba asaraga kanca kasi, be lebizi bwogo kamono. Maami ma aso maaya, ŋaa efi ba okiri ka parabu ŋaa ŋi.» 10Ŋaa Zezi avura alyele ŋa bo ndi: «Kasi kamon ka esaraga, ka ba jwana bila ŋa kasi kakima. Ŋaa emfumu ŋa emfumu beesaraga ejuana bila ŋa emfumu ba esi ekima.» 11Kanca ebiri be kukuna ba okiri, ncie ye nyiga enyigi beenini, ŋa angaa maanini, ŋa njala yeenini ye ya ma ebiri eso. Baari baamono maami ma osizi kanca yulu, ŋaa bo baamono bwogo boonini.

Lesa mpana ma kabaga omuon ba obu-obu

12Ŋaa Zezi alyele ndi: «Lemono maami ma ncomi mama baana ya, ba akwara be, ŋaa baampa be mpasi. Ba abira be kanca anjo a be ma ma abwono Njyami, ŋaa baalege be ma ongeneŋe. Ba abira be ka miizi ma amfumu ba esi bila ekunji ba abungu, kayila ocu a mi. 13Yia biri, eli be lebaga mbari ma kalyele maami aso ma yayi be ma mi. 14Ntini ye ya maami maa, be lebizi kabaana kacimiŋa maami ma akaala be, ma buni ampa be mpieme. 15Okorogo, meankulu mbuuru wo empa be ncimi bila ambila ma ntini ye lyele be, ma buni anyon a be kimabuna ka kaala be ŋi. 16Se ataara a be, angwugu a be, andumu, ankwono, andigi a be, ba acoro be, ŋaa bo baabuma kuna le baari kanca be. 17Baari aso baabele be ma nkuumu a mi. 18Ŋaa se lemfu lemon le ocu a be kibuna kanyuoŋo ŋi. 19Lesa mpana, lia lemigi le avuuga be.»

Anyon ba kanaŋa Zerizaleme

20«Be lemono aworo baakiele kangundu ka Zerizaleme, ba ajeneŋe ko, ŋaa be leyaa ni yiga tuga acala kangundu kia. 21Ma ntini yia, ba baaka nca bungu le Zide ave adumi yila ekuru beenini. Baali nca kangundu ka Zerizaleme ave ayeni lala, ba baaka nca angwunu kivura ya nyunuŋa nca kangundu ŋi. 22Bia ecugu ba Njyami ba kaasa opami. Ma buni maami maateende nca okanda Njyami maa, ma ayaa. 23Ma yia ntini akaazi ba angaa ayimi bila avaligi baamono mpasi yeenini. Baari ba kasi kia baamono mpasi ye kukuna. Ŋaa baari baa bamono esisi be esisa Njyami bo. 24Ŋaa ba abuma ake bila ompara woonini, ba ayaga ake ma oyiga, abira bo ma esi ŋa esi. Ŋaa baari baali ka aZife ŋi , ba acala Zerizaleme wuori, tii ntini eli ana a bo maawa.»

Eyi e Mwana Mbwuru

25«Be lemono eliimi ba osizi be eya nca tari, ŋa nca ngondo bila anyari. Ŋaa baari aso a ncie ba baraga kuna, ŋaa bo ba baga bwogo ma lesugu leenini le epugu ba lemere. 26Baari baakpa ma bwogo, ntini ye baraga bo maami aso mama ya yila ncie. Okorogo mpari eso e yulu ye nyiga. 27Ŋaa baamono kaya Mwana Mbwuru kanca kaduba, bila mpari a nde eso ŋa lekuma le nde leso. 28Ntini ye baana maami ma aso kaya, lesa mpari, be lebaga lila kabila Njyami yiga tuga ma kavuzuga be.»

Zezi ata ngana ye ofingye bila ŋa abuga ba eti

29Ŋaa Zezi ayaga lemigi ma ofingye bila eti beemon, ndi: «Lemono eyizigi ba empa oti wo ofingye bila ŋa abuga be eti eso, bizi a be. 30Ntini yeemono be ncwuzu a bo yiga ye baana kamene, be leyayi ni, ovu wo mvula yiga tuga kaya. 31Ma lemigi loankulu lia, be se, ntini yeemono be maami ma dugi mi be, mayaa, ave be leyayi ni omfumu o Njyami yiga tuga oya. 32Jaajaa, mi elyele be, baari baali muon lubu ba, kibuna kpa aso, eli maami maa akiniya ŋi. 33Maami a yulu bila a ncie ma je kawa, okorogo mbari a mi ki buna kajima ŋi.»

Ecugu e Zezi embiza

34«Lesa oyeri ma be-ankulu! Ma buni ncanke ŋa njala kaja kuna, ŋa njala ka nyua kuna bila mpasi ayila ncie ekoli be. Sikali, cugu le opami a Njyami leyi asizigi. 35Cugu lia leka mva okia baba kura ancu, ŋaa bo bo ofuga ncie eso mva oyeri, okorogo ma cugu lia leeka jaa le asizigi ma baari aso. 36Ma bwa be lebizi tolo kapwo, leselege bwono. Ma buni cugu le eya mpasi yia, be lebagi okiini ma kacwuga nca maami maa aso. Ma kaka tele ka miizi a Mwana Mbwuru eli we kimono okuru ŋi.»

37Ecugu eso nca ecugu encaami, Zezi kayiziga nca Njo Njyami kamuyi, ŋaa lempiibi leto nde yeni ca tolo yila ka kakuru ka baacwolo ma kakuru ke elivye. 38Ka nkara enciere, baari aso ayi Njo Njyami, ŋaa bo aki kapaana Zezi ma kayuzuga nde.

Currently Selected:

Luke 21: teg

Highlight

Copy