DZANDZA 3
3
Pyeli alungise buka
1Ndili ye umbondu, Pyeli ne Zan batse se ndaku ye Nzambi ne ubondo. 2Ni kone umbele nwen ndaku ye Nzambi nwen kumvu «Unbele Umve», yedze ne mutu motu we bedziya buka, masi mesi ye bibapa wangu, ye bitedze wangu busu ve unbele mene, ne ubembe bedolo ne batu binyindzile se ndaku ye Nzambi. 3Ndili ye buka ye yene Pyeli ne Zan benyindzile se ndaku ye Nzambi, wangu adzuka bangu bedolo. 4Pyeli ne Zan bayikwene bawaya wangu too, Pyeli atanda nedzi ati: «Waya besu!» 5Mutu mene awaya bangu tsimii. Wangu etsimene nati: «Bangu bekabele wangu bedolo.» 6Ni Pyeli nedzi ati: «Me nde bedolo, me nde memanyan mengeyingeyi, ni me kabe we ni yami idzi ne yangu. Ne kumvu Zezu Klisti we Nazaleti, telime we landa!» 7Pyeli akwata wangu ne boko ye sangwe atelimise wangu. Palikise mekulu me buka ma singa. 8Atelime kutuku, alanda. Anyindzile bane Pyeli ne Zan se ndaku ye Nzambi, wangu alanda, apadzime, ayakwe mimvu me Nzambi. 9Batu besi bayene wangu alanda ne uyakwe mimvu me Nzambi. 10Batu besi bayimba wangu ati: «Mutu yu ka widze keke untsitsi umbele umve nwen ndaku ye Nzambi, ne ubembe batu bedolo. Ye bangu beyene bongo, bakima utsina ne mamvu me ya kule buka.
Pyeli alakise se ndaku ye Nzambi
11Nda buka mene ye nata Pyeli ne Zan, batu besi bakima kate kima amene, ye bangu betse ne mbangu kwele Pyeli ne Zan, se melebe me kumvu Salomon» . 12Ye Pyeli eyene vavu, yedzi etanda ne bangu ati: «Batu be Izayeli, ye beyi bikima ni yi? Ye beyi biwaya besu tu ni yi? Beyi betsimene nati, besu ni beme landise mutu yu, ne singa ye besu mene, ne besu bidzi telee busu ve Nzambi. Nyen. 13Nzambi we Ablaami, we Izaaki, ne we Zaakobi, Nzambi we bekoko be besu, akaba likuma le undzandzi we dzi Zezu. Beyi bakaba wangu se meboko me Pilati, beyi bayisa wangu busu ve Pilati. We Pilati biki lekise. 14Ni beyi bayisa wi dzi Umpende ne Telee, beyi batanda Pilati ne ulekise beyi umpita. 15Beyi babuuma kunwu we libiku, ni Nzambi anyusile wangu se liku, besu ni betotsi bedzi. 16Ni, beyi beyene mutu yu, beyi beyiba wangu. Kumvu ye Zezu ni ye me saka wangu. Utsina ne ivukidze dze besu bidzi ne dzangu kule Zezu, ni dze me saka mutu yu, wi dzi busu ve beyi. 17Yali yami, me yiba miti, beyi ne bekunwu be beyi bepika vavu, ni ne beyi nde yiba me beyi bipika. 18Ni Nzambi ame pika vavu, ni ne medzi etanda se undzumvu nwen Batu be Nzambi besi. Wangu etanda ati, Mesiya atse yene membaba. 19Dzikayi mamvu mebi, yikwenayi kwele ye Nzambi, yayu wangu abokolo beyi mamvu mebi. 20Yayu Kunwu atse kaba beyi ndili ye udzunda. Wangu atse luma beyi Zezu, wangu ni Mesiya. 21Ni tsanwen, umve Zezu adze ikulu, ndzii ne ndili ye Nzambi itse yebise mamvu mesi. Nzambi anyunwen ne uwowe dzangu ne midzumu mye Batu bedzi bemipende.» 22Ni Moyizi ati: «Kunwu Nzambi we beyi atse luma beyi Mutu we Nzambi nda me. Wangu atse luma mutu tima ye beyi, beyi betse yuka mesi medzi itse tanda beyi. 23Batu be nde yuka wangu ababu nde tse vele dze tima ye batu be Nzambi, bangu betse waa.» 24Batu be Nzambi bewowe, ndili ye Samyeli, ne bibinga wangu besi betanda mi ya ma. 25Batu be Nzambi betanda vavu ni ne beyi se. Nzambi ekuta umbatsi ve ndimvu ne bekoko be beyi, ne utanda ne Ablaami ati: «Batu besi be se sendze betse bomo meve utsina ne be imbisa dzowe. 26Nzambi ebanda luma undzandzi we dzi ni utsina ne beyi, Nzambi eluma wangu ni ne ukaba beyi meve, yayu beyi bedzika mamvu mebi.»
Currently Selected:
DZANDZA 3: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
