DZANDZA 5
5
Ananyase ne Safila
1Mutu we kumvu Ananyase, ne nwadzi wedzi Safila basumbise lipangu. 2Yedzi ekutise ne nwadzi wedzi ne ubata pesi ye bedolo. Ananyase aya ne pesi yoko ye bedolo, akaba ne betuma be Zezu. 3Ni Pyeli atanda nedzi ati: «Ananyase, yowe medzika Satan anyindzile we se unlima niyi? Ndzii ne ukuta ne Fudzu ye Umpende, wabata pesi ye bedolo bowe me sumbise lipangu. 4We ne ubanda sumbise langu, lipangu ledze kalowe, ne yowe emana sumbise langu, bedolo bedze kabowe ndika? Yowe me kuta dzamvu ndadzi se unlima nwowe niyi? Wake kuta besu batu, ni wowe me kuta ni Nzambi!» 5Ndili ye Ananyase eyuka me Pyeli etanda, wangu ananwen, awaa si wawu. Batu besi beyuka dzamvu dzadzu bayene bongo amene. 6Mewanzi maya kuta tsindzi, batumbidze tsindzi batse sodze.
7Metadzi mesatu masuta, ne nwadzi we Ananyase aya. Wangu eke yiba me suta. 8Ye Pyeli esunwule nedzi ati: «Tanda me, ali ni libu le bedolo be beyi beme sumbise lipangu?» Yedzi ekalule ati: «Ee, libu lebedolo si lalu.» 9Ye Pyeli etanda nedzi ati: «Ye bene unlumi wowe beme kuta yimvu ne usongo Fudzu ye Kunwu ni yi? Yuka me, bemetse sodze unlumi wowe, bedzi umbele nwen ndaku. Ne bangu babapele nowe tsanwen ne utse sodze we.» 10Ndili mene mbotu, nwadzi we Ananyase ananwen sina mekulu me tuma we Zezu awaa. Mewanzi menyindzile se ndaku bakobise wangu awaa. Bangu batumbidze tsindzi batse sodze wangu kone unlumi wedzi. 11Batu bemekidze Zezu ne batu boko beyuka me suta, bayene bongo amene.
Betuma be Zezu bapika mamvu me likimiyinda
12Betuma be Zezu bapika mamvu meyitsi me likimiyinda ne mendinvu tima ye batu. Batu bemekidze Zezu bedze ne ukukene masi mesi se lipangu le ndaku ye Nzambi, se mbanza ye Salomon. 13Nda bangu bedze ne bongo, batu boko beke vele mekidze ne utse kobise bangu. Ni batu bedze ne utanda mamvu meve kule bangu. 14Ni masi mesi baatu ne mebaka beya mekidze Kunwu Zezu ne ukobise bewika bemekidze Zezu. 15Batu baya ne mibedzu se mepeyi, ye bangu biyala mibedzu se bikala ne mepoyi, yayu ndili ye Pyeli isutele, sisinwu yedzi ye vungulele mutu motu, tima ye mibedzu. 16Mikuka mye batu miyinga membuka midzi kone Zeluzalemi, baya ne mibedzu ne batu be mimbiti minyokile, basaka batu babu besi.
Bakwata betuma be Zezu
17Ye kunwu we bekabi be bisemi bye Nzambi ne batu be yimvu ye Saduse, bedze ne uwunda bangu, ye bangu bekuta yimvu ne utse nyokile betuma be Zezu. 18Ye bangu bekwata betuma be Zezu, basomo bangu ungenenge. 19Ni ne pindzi, tuma motu we Kunwu adzuvile bikutse bye ndaku ye ungenenge. Wangu apusa betuma be Zezu, tuma we Nzambi ne bangu ati: 20«Tsekayi se ndaku ye Nzambi. Awawu tandayi ne batu besi misisili mye libiku le tsanwen.» 21Betuma be Zezu bamekidze. Ne suka kwen, ye bangu betse se ndaku ye Nzambi, ye bangu bebanda ne ulakise.
Ndili mene yayu, ye kunwu we bekabi be bisemi bye Nzambi ne bidzi banedzi, bakukise bibutu bye batu be bezwife bidzi se yimvu ye bepami be bezwife. Ye bangu beluma ne utse boko betuma be Zezu ungenenge. 22Ni ndili ye batu bibata ndaku ye Nzambi bedzanga ungenenge, bangu beke kobise betuma be Zezu se ungenenge. Bangu bavutse kwele ye bepami be bezwife batanda me bangu beyene. 23Bangu batanda ati: «Besu bakobise ungenenge pii, ne batu bibata ndaku ye ungenenge umbele, ni ye besu beme dzuvule ndaku, besu bake yene mutu se kati.» 24Ndili ye kunwu we bekabi be bisemi bye Nzambi, ne bekunwu be ndaku ye Nzambi, beyu kavavu, ye bangu bekima kata kima amene, ati, dzangu dze mesuta ni vi? 25Ni mutu aya tanda ne bangu ati: «Batu be beyi beme somo ungenenge, bedzi se ndaku ye Nzambi, belakise batu.» 26Ye kunwu we batu bibata ndaku ye Nzambi etse bane bewolo bedzi. Bangu baye vutse ne betuma be Zezu, ni bangu beke betime ne bangu. Ne bangu bedze ne bongo ve batu, toko bayisidze bangu memanyan.
27Yumana vavu, batu bibata ndaku ye Nzambi, babapa bangu busu ve bepami be bezwife. Kunwu we bekabi be bisemi bye Nzambi, asunwule bangu. 28Wangu ne bangu ati: «Besu bemana simba beyi, ne ulakise ne kumvu ye mutu yu, ni beyi belakise iwowe dzedzi ne batu besi be Zeluzalemi beyi befumba ni pita besu ati, besu ni bebuuma wangu!»
29Pyeli ne betuma be Zezu boko, bakalule ati: «Uve bakuuna Nzambi, ni kaka batu. 30Nzambi we bekoko be besu ni we nyusile Zezu se liku, we beyi bebuuma ne ukomidze kule koko ye beliningise. 31Zezu yu, Nzambi atumbidze wangu asundise wangu se boko yedzi ye sangwe. Akaba wangu Ukunwu ne Unlungisi si wangu, yayu batu be Izayeli bedzika mamvu mebi, ne Nzambi aboloko bangu ma nvu mebi. 32Besu ni betotsi be mamvu mamu, besu ne Fudzu ye Umpende ye Nzambi ekaba ne batu bikuuna wangu.»
33Ndili ye bepami be bezwife, beyuka me bangu betanda, bakanve bafumba buuma bangu. 34Ni mutu we Falizi we kumvu Gamaleyele. Wangu ni unlakisi we bitsila bye Nzambi, ne batu besi bekuuna wangu. Atelime busu ve bangu, atanda ati, kepusayi bangu. 35Wangu ne bangu ati: «Batu be Izayeli, dzayi ne utsengu, ne me beyi bipikele bangu. 36Ye sande nyunwen, yivilayi, mutu we kumvu Teyudase. Edze ne utanda ati, wangu ni mutu we uneni, meku me batu menayi medze ne ivukidze nedzi. Ni babuuma wangu, ne besi bedze nedzi batsalive tine motu eke vuka. 37Yumana, Zuda mutu we Galile, batu beyitsi babinga wangu. Yedze ni ndili ye kani we uneni eluma untalu nwen batu se ilongo. Ne Zuda awaa, ne besi bedze ne ivukidze nedzi batsalive. 38Ni, me tanda beyi, dzikayi vele binga mamvu me batu ba, dzikayi bangu betse, ni me bangu bipika ma, ti mayinga ne batu ndetse nyunwen. 39Ni ti yadze si Nzambi me luma bangu, beyi ndetse tuka sumba bangu. Beyi nde banda balwana ne Nzambi!» 40Bepami be bezwifi bamekidze medzi etanda. Babanga betuma be Zezu, baluma ne udamaka bangu, basumba bangu ne umvele wowe ne Kumvu ye Zezu, ye belekise bangu. 41Betuma be Zezu bateme bepami be bezwife ne itsisa dzesi ne Nzambi eyene ati bangu ni batu bebi tuka nyokile utsina ne kumvu ye Zezu. 42Masi mesi, se ndaku ye Nzambi, ne se mendaku, bangu bedze si ne ulakise ne utandaka misisili mive ati: «Zezu ni Mesiya.»
Currently Selected:
DZANDZA 5: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
