Luk 17
17
Mendondzi me Zezu
1Zezu ne bebingi bedzi ati: «Yetse dze si ne mamvu miluma mutu ne upika dzamvu dzibi. Ndoko ne mutu wiluma boko ne upika mamvu mebi. 2Wuku bakuta wangu imanyan dzi neni se tsungu, bayisa wangu se nzali ye metsimba. Toko wangu 3Pikayi kebe.
Ti nwana mama apika we dzamvu dzibi, wawowe nedzi, wangu ti amekidze ati, apika we dzamvu dzibi, boloko wangu.» 4Ti nwana mama apika mamvu mebi bidzuku untsami ne vusa, ti wangu aya vutse bidzuku untsami nowe ati: «Ma yene ubi ne mamvu mami me pika we, unve wa boloko wangu.»
Ivukidze
5Betuma be Zezu nedzi ati: «Kunwu velise ivukidze dze besu.» 6Kunwu akalule ne bangu ati: «Beyi ti bedzi ne ivukidze nda limbulu lite le nwili nwen kumvu mutadi, beyi betuka tanda ne nwili nwu, wundze tseke kunive se nzala ye metsimba, ye nwangu wikuuna beyi.»
7«Ti tima ye beyi yedzi ne mutu, widzi ne undzandzi wifunda sendze, ti ya wata vavu wibata bibodzi. Ye undzandzi iyinga mekuba.» Wangu atuka tanda nedzi ati: «Sunda untsitsi wedza bila?» 8Nyen, wangu atandele nedzi ati: «Lamba me bila, swa mikanda mye tselele, we ya kaba me bila. Ndili yami imanele dza ne unoto, nowe wadza wanoto. 9We nde tangwe undzandzi wowe ne sadzi yowe meluma wangu pika.» 10Ne beyi se, ndili ye beyi bipika mesi me beme luma beyi pika, tandayi witi: «Besu bedzi ni bedzandzi bende yulu. Besu beme pika si me besu biki pika.»
Zezu asaka batu iku bedze ne fima
11Ye Zezu edze netse kwele ye Zeluzalemi, wangu asuta tima ye undilu nwen ngundu ye Samali ne Galile. 12Ndili yedzi ewasa nyidzile se mbuka mbotu, batu iku bedze ne fima, bangu baya kwanye nedzi, badze ulayi nedzi. 13Ye bangu bewula unsima ati: «Zezu, Kunwu, yene besu tsesi.» 14Zezu ayene bangu, wangu ne bangu ati: «Tsekayi laka nyulu ne bekabi bye bisemi bye Nzambi.» Ye bangu bedze ne utse, bangu balunga. 15Motu tima ye bangu, ayene ati, wangu alunga, aye vutse mbisa, ne ukumise Nzambi yanga, yanga. 16Wangu ananwen sina mekulu me Zezu, panza se sendze, avutise wangu live. Mutu wayu edze ni we Samali. 17Ye Zezu etanda ati: «Be iku besi bake lunga? Boko betanyi ne benayi bawayi? 18Mutu tine motu ake yivile ne uya vutise Nzambi live, mbisa ye unzenze nwun?» 19Zezu nedzi ati: «Telime wetse, ivukidze dzowe dzalungise we.»
Ukani ve Nzambi va yawa
20Batu be Falizi basunwule ne Zezu ati: «Ukani ve Nzambi vetse ya ni ndili yowi?» Wangu akalule ne bangu ati: «Ukani ve Nzambi nde ya nda yila ye biyene.» 21Ndetse tanda ati: «Vangu vu wa, na vangu vu wu, ni Ukani ve Nzambi vedzi ni tima ye beyi.»
22Ye Zezu etanda ne bebingi bedzi ati: «Ndili yetse ya ye beyi bitse fumba yene we yikwene Mutu, dzakene vusa votu, ni beyi ndetse yene wangu.» 23Batu betse tanda beyi ati: «Wangu ayawa, wangu adzi wu, beyi nde tanga ne utse wawu.» 24Nda ikulu dziwelime kwalala ayi kwele ndzii ne kwele mboko, yetse dze ni vavu, vusa ve we yikwene Mutu itse ya. 25Ni umve we yikwene Mutu abanda yene membaba meyitsi, ne batu belolo betse lewe wangu. 26Mesuta ndili ye Nowe, ni mitse suta ndili ye we yikwene Mutu, metse ya si vavu. 27Batu bedze ne udza ne unoto, bedze ne ubalive, ndzii ne vusa ve Nowe enyidzile se lindzi yineni. Ndili ye Nowe enyidzile se lindzi mvula we uneni anon, batu besi bawaa. 28Yetse dze ni nda ndili ye Lote. Batu bedze ne udza ne unoto, bedze ne usumba bila ne usumbise, bedze ne ukuna mekuba ne utunga mendaku, 29ndzii ne vusa ve Lote eteme Sodom. Ndili yedzi enangwe Sodome, Nzambi aluma nwunyan ne fla nda mvula iyinga ikulu ne ukwa kule ye batu, bangu besi bawaa. 30Yetse dze ni vavu, vusa ve we yikwene Mutu itse ya. 31Vusa vavu, witse dze kule nwanza nwen ndaku, ndetse tuka vele sunda, ne uboko bila bidzi se ndaku, ne witse dze se kuba, ndetse vele vutse ndaku. 32Yivelekayi, nwadzi we Lote! 33Witse fumba bata libiku ledzi, atse fiya langu, ni witse fiya libiku ledzi atse bata langa. 34Metanda beyi: «Pindzi yayu, batu bole betse dze se ilaka dzotu, betse boko mutu motu, moko avuka. 35Batu bole betse dze ne sika nzaka unsamba, betse boko motu, moko avuka. 36Mebaka mole metse dze se kuba, betse boko dzotu, dzoko dzavuka.» 37Bebingi bedzi basunwunle wangu ati: «Kunwu ma nvu mamu metse suta ni wi?» Wangu akalule ne bangu ati: «Buma yidzi ne tsindzi ne menyungu metse kukene si wayu.»
Currently Selected:
Luk 17: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
