Luk 20

Ukani ve Zezu ve yinga niwi

1Vusa votu, Zezu edze ne lakise batu se ndaku ye Nzambi, ne utanda misisili mive mye Nzambi. bekunwu be bekabi be bisemi bye Nzambi, belakisi be bitsila, ne bibutu baya. 2Ye bangu besunwule Zezu ati: «Tanda besu, we pika mamvu mamu ni ne singa ye nza? Wangu we mekaba we singa yayu ni nza?» 3Zezu akalule ne bangu ati: «Nami mekaba beyi undzitsi, tandayi me, 4we luma Zanbatise ne ukaba batu meteme niza, Nzambi na batu?» 5Ni bangu bedze ne wowe tima ye bangu mene ati: « Bebe ti bayakwe ati: “Nzambi ni we me luma wangu.” Wangu asunwulele ati: “Ye beyi beke dze ne ivukidze ne Zan ni yi?” 6Ni bebe ti bakalule ati: “Yedzi ni batu beluma wangu.” Batu besi beyisidzele bebe memanya ne ubuuma bebe, ne bangu beyiba ati, Zambatisi edze ni Mutu we Nzambi.» 7Bangu ne Zezu ati: «Ne besu nde yiba we luma wangu ne ukaba meteme.» 8Zezu ne bangu ati: «Nami me nde tanda beyi nda mipika mamvu ma.»

Ngana ye bekuni be vinyi bidzi ne ma nvu mebi

9Yumana, Zezu ate batu ngana ati: «Mutu motu akuna kuba ye vinyi, adzika yangu ne bedzandzi bedzi, yedzi etse undzunga, anyunwen se ilongo dzadzu.» 10Ndili ye kalwe, yedzi eluma undzandzi wedzi motu kwele ye batu bibata vinyi, yayu bekaba wangu dzedzi ikavu dze mbulu ye vinyi. Ni bebati be vinyi, babuuma undzandzi luba, bavutise wangu meboko sanzile. 11Wangu avele luma moko undzandzi, ni bangu bavele buuma ne wayu luba, batukene, bavutise wangu meboko sanzile. 12Kunwu we vinyi, avele luma undzandzi we unsatu, ne wayu bangu balumaka mepindzi, bayisa wangu ituna. 13Ye kunwu we kuba ye vinyi etanda ati: «Me pike vi? Me luma bangu nwana wami, witondo, toko bangu betse kuuna wangu.» 14Ni ndili ye batu bibata vinyi beyene nwana, bangu batanda tima ye bangu ati: «Yene witse dze kunwu we vinyi. Bebuuma wangu, yayu vinyi ayikwe we bebe.» 15Ye bangu beyisa wangu ituna, ye bangu bebuuma wangu. Zezu asunwule ati: «Ye kunwu we kuba ye vinyi itse pika ni yi? 16Wangu atse ya, wangu atse buma bibata vinyi, wangu atse kaba vinyi ne batu boko.» Ye batu beyuka mamvu mamu, bangu batanda ati: «Uve ma nvu mamu nde ya.» 17Ye Zezu ewaya bangu, atanda ne bangu ati: «Ni me sanguvu ye Umpende itanda ni me nza?»

«Imanyan dze betungi be mendaku beyisa, dzayikwe imanya dzisuka ndaku.»

18Batu besi binawen kule imanya dzadzu betse vinyenge, ni imanya dzadzu ti dzanawen kule mutu, dzetse nyunga wangu.

Lipo le biwuta Sezali

19Belakisi be bitsila ne bekunwu be bekabi be bisemi bye Nzambi, befumba kwata Zezu. Bangu beyiba nati, wangu ete ngana yayu ni utsina ne bangu, ni bangu bedze ne bongo ve batu. 20Ye bangu bedze ne ulumba Zezu. Ye bangu beluma batu kwele yedzi. Batu babu befumba laka ati, bangu bedzi ni batu betelee. Bangu befumba ni dendise Zezu unlamvu, ne undzutsi nwotu. Yayu bangu bekaba wangu se meboko me lipatima. 21Bangu bakaba wangu undzutsi ati: «Kunwu, besu beyiba mowe itanda ne mowe ilakise, medzi ni telee. We nde pama ne ukani ve batu, ni we lakise ni mamvu me umbu amene me Nzambi etanda batu ne upika. 22Yayu tanda besu, se bitsila bye Moyizi, besu betuka wuta lipo le Sezali? Na besu nde wuta?» 23Ni Zezu ayiba umpyeli nwen bangu, wangu ne bangu ati: 24«Lakayi me dolo. Se dolo wayu, yedzi ne busu ve mutu ne kumvu, wangu ni nza?» Bangu bakalule ati: «Ye Sezali.» 25Ye Zezu etanda ne bangu ati: «Ee umve, ni bye Nzambi vutisayi ne Nzambi, bye Sezali vutisayi ne Sezali.» 26Belakisi bebitsila ne bekunwu be bekabi be bisemi bye Nzambi, beke tuka kwise wangu unkwaka, ne medzi edze ne utanda busu ve batu. Bangu bakima medzi edze ne utanda, ye bangu bedzuba midzumvu.

Bewaa betse nyuse

27Va batu be yimvu ye Izayeli baya kone ne Zezu. Bangu ni be nde yakwe ati, bewaa betse nyuse. Bangu basunwule Zezu ati: 28«Kunwu, Moyizi ekaba besu tsila.» Atende ati: «Ti mutu motu abalive, wangu eke dziya, wangu ti awa, umve nwandzi wedzi abala unkwili ne udziya unkulu wedzi we waa bana.» 29Ni yedze ne bana bemama motu untsami be mebaka. We wika abalive, awaa eke dziya. 30We unyole abala unkwili, nedzi awaa nde dzika bana. 31Ne we unsatu si vavu. Untsami nwensi nwawaa nde dzika bana. 32Yumana ne nwadzi se awaa. 33Vusa ve bewaa bitse nyuse, wangu atse dze ni nwadzi we nza? Ni bangu besi untsami bedze ni belumi bedzi. 34Zezu akalule ne bangu ati: «Mebaka ne baatu be ilongo dzi bebalive. 35Ni mebaka ne baatu be bepama telee, betse nyuse time ye bewaa, ne udze se ilongo dzitse ya, Bangu ndetse vele balive. 36Bangu nde tuka vele waa, bangu betse dze ni nda betuma be Nzambi. Bangu ni bana be Nzambi, Nzambi atse nyusile bangu se liku.» 37Moyizi alaka ati, bewaa betse nyuse. Ye Moyizi ewowe ne kaka ye nwunya, wangu abanga Kunwu ni Nzambi we Ablaami, we Isaaki, ne we Zaakobi. 38Zezu avele tanda ati: «Nzambi adzi kaka Nzambi we bewaa, ni Nzambi adzi ni we bemongo, batu besi bebika ni nedzi.» 39Va belakisi boko be bitsila bawowe ne Zezu ati: «Kunwu we me wowe umve.» 40Ni bangu nde tuka vele kaba wangu midzutsi myoko.

Klis tine Davidi

41Zezu ne bangu ati: «Batu betanda ati, Klisti we Nzambi etobo, ni nwana we Davidi. Ni ye bangu bitanda vavu ni yi?» 42Ni Davidi atanda wangu mene se sanguvu ye Pisome ati:

«Kunwu Nzambi atanda ne Kunwu wami ati,

Yaka sunda kwele ye boko yami ye sangwe,

43metse dzika biwunda we sina mekulu mowe.»

44Ne Davidi abanga wangu ni Kunwu. Ni Klisti atuka dze nwana we Davidi ni vi?

Beyi nde pika nda belakisi be bitsila

45Ndili ye batu besi bedze ne yuka wangu, Zezu atanda ne bebingi bedzi ati: 46«Pikayi kebe, beyi nde pika nda belakisi be bitsila. Bangu betondo dzunga ne mikanda mineni. Bangu betondo nati benyulise bangu se bibuma bye mikuka. Bangu betobo bibuma bye busu se mendaku me umbondu, ne bibuma bye busu se metsinda. 47Bangu bipinule mikwili bila byesi, ni umbondu nwen bangu nwen laawe ne ulaka ati, bangu batakwe boko umve. Utsina ne vavu, Nzambi atse pama bangu ubi amene.»

Currently Selected:

Luk 20: WUM

Highlight

Copy