Malk 1
1
Zambatisi ate ŋwanzu ati: «Dzikayi biku bibi.»
(Mat 3.1-12; Luk 3.1-18; Zan 1.19-28)
1Yene mebandu me misisili mive mye Zezu Kɨlisɨti, Ŋwana we Nzambi. 2Se Sanguvu ye Muutu we Nzambi Ezayi, batende ati:
«Me Nzambi, me tse luma tuma wami busu vowe,
ne uyebise we peyi.
3Beyuka dzuyi dze muutu ate ŋwazu se ikanye ati:
Yebisayi miyombo mye Kuŋwu,
yebisayi wangu mepeyi medze telee!»
4Zambatisi alaka nyulu se ikanye, ate ŋwazu ati: «Dzikayi bɨku bibi, bokayi meteme ne Nzambi aboloko mesumu me beyi.» 5Batu besi be ilongo dze Zudee ne be ngundu ye Zeluzalemi bedze ne utse kwele ye Zambatisi. Bangu bakombise mesumu me bangu bepika busu ve batu besi, ye Zambatisi ekaba bangu meteme se unsulu ŋwe Zulʉde.
6Zambatisi edze ne uswa ni ingoyi dze betunga ne mikʉnze mye bodzi yineni ye kumvu samo, akuta ne kwamba ye baanda ye nyama se uŋkuku. Wangu edze ne udza ni bidukaduka ne buyi ve se swaka. 7Wangu edze ne utanda ati: «Muutu we itakuse me singa aya mbisa yami, medzi kaka telee ne udondime ne unyangule mikodzi mye bekotoko bedzi. 8Me kaba beyi ni meteme me mangu, ni wangu, atse kaba beyi ni meteme me Fudzu ye Umpende.»
Meteme me Zezu
(Mat 3.13-17; Luk 3.21-22)
9Ndili yayu, Zezu ayinga Nazaleti, se mbuka mbotu ye Ngalilee, ye Zambatisi ekaba wangu meteme se unsulu ŋwe kumvu Zulʉde. 10Ndili ye Zezu epula se mangu, wangu ayene ikulu dzadzuve ye Fudzu ye Umpende ye sunda kule yedzi nda mbinga. 11Dzuyi dzayinga ikulu dzatanda nedzi ati: «We ni ŋwana wami itondo uyitsi, we ni itsisa dzami dzesi.»
Umbiti ŋwa maama Zezu se ikanye
12Yumana vavu, ye Fudzu ye Umpende ye luma Zezu se ikanye. 13Zezu adze masi meku menayi (40) se ikanye, ye Sata emaama wangu. Zezu edze ni bane benyama be swaka, betuma be Nzambi bedze ni bedzanzi bedzi.
Zezu atandaka misisli mive se Ngalilee
(Mat 4.12-22; Luk 4.14-15; 5.1-11)
14Bemana somo Zambatisi ungenenge, ye Zezu etse Ngalilee, ne utandaka misisili mive mye Nzambi. 15Yedzi edze ne utanda ati: «Ndili ye Nzambi ekutise ya dzanga, Ukani ve Nzambi vaya bakaka. Dzikayi bɨku bibi, mekidzayi misisili mive.»
Zezu abanga bebingi bewika
16Vʉsa votu, Zezu edze ne ulanda uŋkolo ŋwe dzanga dze Ngalilee. Wangu ayene belobi bole, Simo bane ŋwana mama wedzi Andeli. Bangu bedze ne uyisa bikoŋwo se dzanga ne ukwata beswi. 17Zezu atanda ne bangu ati: «Bingayi me, beyi bakɨtse dze ni bitandaka misisili mive ne batu.» 18Ye bangu bedzika bikoŋwo si wawu ne ubinga wangu. 19Zezu atse va ulayi, yedzi eyene Zaaki, ne Zan ŋwanzi ne uŋkulu baana be mama motu. Bangu ni baana be Zebedee. Bangu bedze se mbungu ne uyebise bikoŋwo. 20Ndili ye Zezu ebanga bangu, ye bangu bedzika tata we bangu Zebedee se mbungu bane bedzanzi, ye bangu bebinga Zezu.
Zezu asaka muutu wedze ne umbiti
(Luk 4.31-37)
21Zezu ne bebingi bedzi batse se ngundu ye Kapenayumi. Vʉsa ve idzundu, Zezu anyidzile se ndaku ye umbondu yedzi ebanda ne ulakɨse. 22Bedze ne uyuka wangu bakima kate kima amene ne bilakisɨli byedzi, nedzi nde lakɨse nda belakɨsi be bitsɨla, ni wangu alakɨse ne singa ye Nzambi ekaba wangu. 23Ni se ndaku ye umbondu yayu yedze ne muutu wedze ne umpiti. Yedzi ewula unsima ati: 24«Zezu we Nazaleti, yowe ifumba ne besu niyi? We meya ni ne utsala besu? Me yiba we, we ni Umpende ŋwe Nzambi meluma.» 25Ni Zezu awowe ne umbiti ubi ati: «Dzuba uŋdzumvu, pula se nyulu ye muutu yu.» 26Ye umbiti ŋwe nyingise muutu mene ne singa ye ŋwangu ŋwe pula se nyulu ye muutu mene ŋwa wula usima uneni. 27Batu besi bakima, ye bangu bewowe tima ye bangu ati: «Adzi ni iza? Abi ni bilakisɨli bye tsaŋwe bye bilakɨse ne singa! Muutu yu atanda ne mimbiti ne upula, ye myangu mikuuna wangu!» 28Nde ne nyuŋwe ye batu besi bedze ne uwowe ne mamvu me Zezu edze ne upika se ilongo dze Ngalilee dzesi.
Zezu asaka mibedzu miyitsi
(Mat 8.14-17; Luk 4.38-41)
29Zezu apula se ndaku ye umbondu, yedzi etse ndaku ye Simo ne Andeli, ye Zaaki ne Zan besukɨdze wangu. 30Utsulu ve Simo ve ŋwatu edze bembula kule ilaka, nedzi edze ne uŋwaku. Ndili ye Zezu edzanga, batanda wangu dze utsulu ve Simo. 31Zezu atsindene konedzi, akwata wangu boko, atelɨmise wangu, ne uŋwaku va siya. Yumana ye utsulu ve Simo ekaba bangu bila.
32Ne ikolo, itadzi dza mana kwa, batu baya Zezu ne mibedzu myesi ne batu besi bidzi ne mimbiti se me nyulu. 33Batu besi be ngundu bakukene busu ve umbele ŋwe ndaku. 34Zezu asaka mibedzu miyitsi, wangu apanza ne mimbiti miyitsi. Zezu nde dzika mimbiti mya wowe, ne myangu miyiba wangu.
Zezu ateme Kapenayumi ne utandaka misisili mive
(Luk 4.42-44)
35Ne suka kwee, vʉsa vasa nde seŋwe, Zezu anyuse apula se ndaku. Atse se buma ye ikanye ne ubondo. 36Simo ne bedze banedzi batse ne ufumba wangu. 37Ndili ye bangu bekobise wangu, ye bangu betanda nedzi ati: «Batu besi befumba we.» 38Ni, Zezu akalule ne bangu ati: «Yakayi betse kwele isusu, se membuka midzi kone bebe, uve ma tse ne utandaka misisili mive awayu se. Ni me ya ni utsɨna ne vavu.» 39Ye Zezu etse se Ngalilee wesi, ne utandaka misisili mive se mendaku me umbondu, apanzaka ne mimbiti.
Zezu asaka muutu wedze ne fima
(Mat 8.1-4; Luk 5.12-16)
40Muutu motu wedze ne fima atsindene kone Zezu. Avʉna mebongo busu vedzi abondoko wangu ati: «Ti wa tondo we tuka saka me.» 41Zezu ayene wangu tsesi, asimvɨle boko, yedzi ebetime ne muutu mene, atanda nedzi ati: «Me tondo, lunga.» 42Palɨkise, fima ya teme kule muutu mene, yedzi elunga. 43Ye Zezu ewowe nedzi ubi, yedzi evʉtise wangu mesadzi ne utse. 44Wangu atanda nedzi ati: «Pika kebe, we nde tanda dzangu ne muutu tine motu, ni tseke laka nyulu ne bekabi be bisemi bye Nzambi, bapa ne semi ye Moyizi etanda, yayu batu besi beyiba ati wa lunga.» 45Muutu mene atse, ni wangu atse ne utandaka se bibuma byesi mesuta kule nyulu yedzi. Utsɨna ne vavu, Zezu eke vele tuka laka nyulu se ngundu tine yotu, wangu edze ne udze yasi ulayi ne batu, se bibuma bye ikanye. Ni batu bedze ne uyinga me kwele mesi ne uye pesi yedzi.
Currently Selected:
Malk 1: WUM
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
