KASA 4
4
Petru Hte Yawhan Kongsi Hpawng Hta San Jep Hkrum Ai Lam
1Petru yan Yawhan shawa masha ni hpe naw shaga nga ma yang, hkinjawng agyi ni, Nawku Htingnu sin ai ni a du wa hte Saduke nkau mi sa du ma ai. 2Kasa yan gaw Yesu si ai kaw na bai hkrung rawt wa sai lam hkaw tsun nga ma ai majaw Saduke ni pawt bu nga ma ai. Hpa majaw nga yang Madu Yesu hkrung rawt wa ai lam gaw, si mat ai ni bai hkrung rawt wa na mara ai ngu ai lam teng nga ai hpe sakse madun nga ai. 3Dai rai nna Kasa yan hpe rim la nhtawm, shana rai wa sai majaw, jahpawt du hkra htawng hta bang da mu ai. 4Rai ti mung, mungga na la ai ni law law wa kam sham ma ai rai nna, kam sham ai la sha yawng hkying manga daram jat wa ai.
5Hpang shani e Yuda du agyi ni, salang ni, Tara sara ni, Yerusalem mare hta hpawng nga ma ai. 6Hkinjawng Agyi Kaba Anna hte hpawn Kayahpa, Yawhan, Alexandru hte Hkinjawng Agyi Kaba a dinghku hta lawm ai kaga masha ni hpawng nga ma ai. 7Shanhte gaw kasa yan hpe shanhte a man e shatsap tawn da nna, “Taw nan gaw, hpa atsam, gade a mying hte ndai amu galaw myit ta?,” ngu nna san mu ai.
8Dai shaloi Petru gaw Chyoi Pra ai Wenyi hpring let shanhte hpe tsun mu ai gaw, “Mung masha ni a du agyi salang ni e, 9Ndai lagaw hten ai wa hpe galaw ai chyeju lam, shi kaning rai mai tsai wa ai lam hte seng nna dai ni an san deng hkrum na rai yang gaw, 10nanhte nlang hte Israela amyu masha yawng chye ang myit dai, nanhte wudang hta jen sat kau nna Karai Kasang e jasi ni kaw na jahkrung sharawt la ai, Nazaret wa Yesu Hkristu a mying nsang hta ndai wa hkrak sha mai tsai mat nna nang kaw nanhte a man e tsap nga ai. 11Dai Chyum Laika hta tsun da ai,
‘Nanhte nta gap ai ni lata kau ai nlung rai ti mung,
ningjut jahtum na nlung bai tai wa sai,’ nga ai ga gaw Yesu hpe lakap nna tsun ai rai nga ai. #Shk 118:22; Esa 28:16; Mat 21:42.
12Shi hta shaje hkye hkrang la ai lam n nga sai. Anhte hkye hkrang la ai kaw du lu na matu sumsing lamu a npu shinggyim masha ni hta jaw ya ai mying nsang shaje kanang mung n nga sai,” ngu nna htan wu ai.
13Kongsi hta lawm ai salang ni gaw hpaji n chye ai yu maya masha yan rai nga ai Petru yan Yawhan gade daram nden ja ai myit rawng ai hpe mu ma ai majaw mau mahka mat ma ai. Rai ti mung shawng de Yesu a manaw manang ni tai lai wa sai hpe shanhte dum chye ma ai. 14Dai hta kaga mai tsai mat sai masha wa mung shan hte rau tsap nga ai hpe, shanhte mu ma ai rai nna ndang shara hpa mi n mu mu ai. 15Dai rai nna shan hpe dai kongsi hpawng gawk na pru mat wa shangun nhtawm shanhte shada bawng ban ma ai gaw, 16“Ndai yan hpe anhte kaning di na rai ta? Shan a lata hte dan hkung ai ndai lamik kumla byin wa sai gaw, Yerusalem e nga ai ni nlang ni a man e dan dan pra pra rai wa sai rai nna anhte mung n lu ningdang sagaw ai. 17Rai ti mung, dai lam mung masha ni hta grau nna n bra n gara wa u ga, ya kaw nna dai Yesu a mying gang nna kadai hpe mung n tsun dan na hku shan hpe daru jet sadi jaw kau ga,” nga ma ai.
18Shing rai shan hpe bai shaga la nna Yesu a mying gang let hpa mung n tsun, n sharin lu na hku hkang da ma ai. 19Rai ti mung Petru yan Yawhan chyawm gaw, “Karai Kasang a ga madat na hta, nanhte a ga madat yang, Karai Kasang a man e mai n mai gaw, nanhte she daw dan yu mu. 20An chyawm gaw, anhte nan lala mu la na la sai lam ni hpe n tsun ai n nga lu ga ai,” ngu nna shanhte hpe bai htan mu ai. 21Shaloi salang kongsi gaw shan hpe shawng na hta grau ja ai hku sadi jaw daru jet nna dat dat mu ai. Shanhte gaw shan hpe ari jaw na lam n mai byin ai hpe mu chye ma ai. Hpa majaw nga yang dai byin ai amu a majaw, masha n lang Karai Kasang hpe shagrau sha-a ma ai. 22Dai lamik kum la hte shamai hkrum ai masha wa gaw, asak mali shi ning jan sai rai nga ai.
Kam Sham Ai Ni Gaw Nden Marai Rawng Na Matu Akyu Hpyi Ma Ai
23Petru yan Yawhan gaw raw dat hkrum ai hte rau tinang a hpung manang ni hpang de wa nna hkinjawng agyi ni hte salang ni kaning rai nna tsun ahkrim ai ga mahkra tsun dan mu ai. 24Dai na jang shanhte gaw myit langai sha hte Karai Kasang kaw, “Sumsing lamu hte ginding aga, panglai hte dai hte hta nga manga hpe hpan tawn da ai Madu e, #2Hk 19:15. 25Nang gaw na a shangun ma wa anhte ji wa Dawi a n-gup hku nna Chyoi Pra ai Wenyi hte tsun da ndai gaw,
‘Maigan amyu ni hpa majaw n-yun bu nna;
masha amyu ni hpa majaw kaman lila makoi magap maw mawn nga ma ta?
26Mungkan Hkawhkam ni gaw, Karai Kasang hpe gumlau na matu shanhte dai shanhte hkyen lajang nga ma ai,
Madu hte Madu dat dat ai Meshia hpe nhtan shai,
tai ninghkap na matu du salang ni rau hpawng nga ma ai,’ nga ai.
27Dai hte maren kaja wa teng teng Herod yan Pontu Pilat gaw maigan masha ni, Israela amyu masha ni hte rau Madu a Chyoi pra ai shangun ma rai nga ai, nang Meshia shatai sai Yesu hpe tai ninghkap na matu ndai mare e jawm hpawng nga ma ai.#Mat 26:3; Luk 4:18; 22:2; Yhn 10:36. 28Shing rai shanhte hpawng de ai lam gaw Madu a n-gun atsam hte myit ra ai lam hku nna daw dan sai hte maren byin wa u ga matu rai nga ai. 29Madu e ya yang shanhte a jahkrit shama ahkrim ai lam ni hpe mu mada ya mi, Madu a shangun ma ni hpe nden ja ai myit hte tsun dan lu hkra karum ya mi law. 30Machyi makaw mai tsi hkra na a lata ladawn nna, na a chyoi pra ai Shangun Ma Yesu a mying hte lamik kum la hte mau hpa amu ni hpe byin shangun u law,” nga nna akyu hpyi ma ai.
31Shing rai akyu hpyi ngut jang, shanhte hpawng nga ai shara gaw gari ashun wa nna shanhte nlang hte hta Chyoi Pra ai Wenyi hpring wa ai hte Karai Kasang a mungga hpe nden ja ai myit hte tsun dan hpang wa ma ai.
Lu Ai Arung Arai Ni Hpe Jawm Lang Ma Ai Lam
32Dai kam sham ai shawa hpawng ting gaw myit mang langai sha rai nga ma ai. Kadai mung tinang lu ai arai hpe nye a n nga ai sha shanhte yawng gaw lu ai arai hpa hpe rai tim shada da jawm garan lang ma ai.#Kas 2:44; 5:12; 2Ko 13:11; 1Pe 3:8. 33Kasa ni mung, dai Madu Yesu a bai hkrung rawt wa ai lam hpe atsam kaba hte sakse hkam ma ai rai nna, Karai Kasang gaw shanhte mahkra a ntsa e shaman chyeju nhpaw n-ya ru jaw bun ya mu ai. 34Shanhte hta ra kadawn ai masha langai mi muk n nga ma ai. Hpa majaw nga yang sun hkauna lamu ga lu ai ni, nta lu ai ni kadai mung, dai dut nna lu ai gumhpraw hpe 35kasa ni kaw sa ap ma ai rai nna, ra kadawn ai kadai hpe mung rap shara nna karan jaw karan ya mu ai.
36Dai shaloi Kupru mung na Lewi masha Yosep ngu ai wa nga ai. Shi hpe kasa ni e Barnaba ngu nna mying hkawt shamying mu ai. (De a lachyum gaw shalan shabran n-gun jaw ai wa ngu ai re) 37Dai wa gaw shi lu ai ga dachyawk dut nna lu ai gumhpraw hpe kasa ni a lata de sa ap ya wu ai.
Currently Selected:
KASA 4: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
