KASA 9
9
Shawlu Myit Malai Wa Ai Lam
(Kas 22:6-16; 26:12-18)
1Dai aten ladaw hte yang Shawlu gaw Madu a hpang hkan nang ai ni hpe jahkrit shama ai hte sat kau na nga masin pawt bu nga ai. Shi gaw hkinjawng agyi kaw sa nhtawm, 2Yesu a lam hkan ai numsha lasha ni hpe rim la nna Yerusalem de dun wa lu hkra shi hpe ahkaw ahkang jaw sai lam Damasku mare na tara jawng ni hpe htet dat ai laika hpyi gun wu ai.
3Ya sa wa yang Damasku mare de shi ni wa magang ai rai nna akajawng sha lamu de na nhtoi shi a grup yin e htoi tu pru wa ai. 4Shi mung ga e kadawng taw mat ai hte, “Shawlu, Shawlu! Nang ngai hpe hpa rai zingri nga n ta?,” nga nna shi hpe tsun nga ai nsen langai mi na wu ai.
5Shaloi shi gaw, “Madu e nang kadai rai nga n ta?,” ngu nna san wu yang, dai nsen gaw “Nang zingri zingrat ai Yesu rai nga nngai. 6Rai ti mung, nang rawt u, mare de shang wa u. Nang galaw na lam dai kaw nang hpe tsun dan shangun na we ai,” nga nna tsun ai.
7Shi hte rau sa ai manang ni mung ga hkaw mi mung n shaga ai sha hkring tsap mat ma ai. Shanhte dai nsen hpe na ti mung kadai hpe mung n mu ma ai. 8Shaloi Shawlu ga kaw na rawt nna myi hpaw yu wu yang hpa hpe mung n mu lu wu ai. Dai rai nna, shi hpe lata hte dun let Damasku mare de woi shang wa mu ai. 9Ya shi gaw masum ya tup myi n mu nna dai laman hte hta hpa n lu n sha ai nga nga ai.
10Ya Damasku mare e Anani mying ai Hkristan langai mi nga ai. Shi gaw shingran langai mi mu wu ai. Dai shingran hta Madu gaw, “Anani e!,” ngu wu ai. Shi mung, “Madu e, nang e nga nga nngai,” ngu nna htan wu ai.
11Dai Madu bai tsun wu ai gaw, “Nang shajin la nhtawm Lam Ding ngu ai mare lam de sa nna Yuda ngu ai wa a nta e Tarshu mare na Shawlu ngu ai wa hpe sa tam su! Yu u, shi akyu hpyi nga ai rai nna, 12Anani mying ai wa shang sa nna shi myi bai hpaw u ga nga shi a ntsa e lata mara da ya ai hpe, shingran hta mu nu ai,” ngu wu ai.
13Anani gaw, “Madu e ndai masha wa Yerusalem mare e nga ai na a masha ni hpe hkrithpa n hkru ai hku galaw sai lam masha law law wa ngai hpe tsun dan masai. 14Dai hta n-ga, ya mung, nang hpe nawku daw jau ai ni yawng hpe rim la na matu hkinjawng agyi ni kaw na ahkang hte Damasku mare de du sa ra ai,” ngu nna htan wu ai.
15Rai ti mung Madu gaw, “She sa su, dai wa gaw maigan ni hte Hkawhkam ni a man e mung, Israela amyu masha ni a man e mung, nye a mying hpe hkaw tsun shana ya ai amu gun hpai na matu ngai lata la ai wa rai nga ai. 16Nye a mying majaw shi hkrum lu na ra ai matsan tsin-yam ni yawng hpe ngai nan shi e madun na we ai,” ngu wu ai.
17Dai majaw Anani sa nna Shawlu nga ai nta de shang nhtawm Shawlu a ntsa e lata mara let, “Hpu nau Shawlu e, nang myi bai mu lu nna Chyoi pra ai Wenyi hpring lit ga nga, nang sa wa ai lam e nang hpe shadan dan ai Yesu nan, ngai hpe shangun dat ni ai,” ngu wu ai. 18Dai shaloi jang Pawlu a myi hta na asep zawn re ai gaw hkrat mat nna shi a myi bai mu lu ai. Shaloi shi rawt nna hkalup hkam la wu ai. 19Dai hpang lu sha mung sha nna n-gun awai la wu ai.
Damasku Mare E Shawlu Hkaw Tsun Ai
Shawlu gaw Damasku mare e sape ni hte rau tawng marang mi nga nga ai. 20Shi gaw tara jawng ni de alawan sa du nna Yesu gaw Karai Kasang a Kasha rai nga ai lam hkaw dan nga ai.
21Shi a ga na ai ni nlang mau mahka let, “Ndai wa gaw Yerusalem mare e Yesu ngu ai wa hpe nawku ai ni nlang hte hpe sat nga ai wa n rai ni? Ya ndai de mung dai baw ni hpe gyit la nna hkinjawng agyi ni hpang de wa ap na maw ai hte sa du ai wa shi rai nga ai n rai ni?,” nga nna san shajang ma ai.
22Rai ti mung, Shawlu a hkaw tsun ai lam grau nna n-gun atsam rawng wa ai hte Yesu gaw Meshia rai nga ai lam sakse ni pra pra madun dan ai majaw Damasku e nga ai Yuda ni shi hpe ga bai n htan lu ma ai.
23Ya nhtoi tsawmra wa na wa jang Yuda ni hkrum nna Shawlu hpe sat kau na bawng ma ai.#Kas 23:12; 25:3; 2Ko 11:23. 24Rai ti mung shanhte a maw ai lam hpe Shawlu chye kau ya mu ai. Shi hpe sat kau lu na matu shanhte shani shana mare chyinghka ni hta hkap nga ma ai. 25Shawlu a sape ni chyawm gaw shi hpe woi la nna ka hta bang nhtawm mare bunghku hta hpaw mahka nga ai hku langai mi kaw nna ga de shaya jahkrat dat mu ai.
Yerusalem Mare De Shawlu Bai Du Wa Ai Lam
26Shawlu gaw Yerusalem mare de du wa jang sape ni hte kanawn na shakut wu ai rai ti mung, shi sape langai mi rai sai hpe shanhte n kam ma ai majaw, shanhte yawng shi hpe hkrit da mu ai. 27Dai shaloi Barnaba gaw shi hpe kasa ni hpang de woi wa nna, Shawlu shi dai Madu hte lam e kaning rai mu hkrum nna dai Madu e shi hpe tsun ai ga na lu ai mung, Damasku mare hta Yesu a mying gang nna nden marai hte gara hku hkaw tsun dan ai lam mung shanhte hpe hkai dan mu ai. 28Shing rai shi shanhte hte rau nga nga nna Yerusalem mare hta pru pru shang shang shamu shamawt let dai Madu a mying nsang gang nna nden ja ai myit hte hkaw tsun nga ai. 29Shi gaw Grik ga shaga ai Yuda ni hte mung tsun shaga ndang hkat nga ai rai nna shanhte gaw shi hpe sat kau na maw ma ai. 30Dai lam kam sham ai hpu nau ni chye jang shi hpe Kesare de sa dat nna Tarshu de shangun dat mu ai. 31Dai majaw dai aten hte yang Yuda mung Galile mung hte Samari mung shara magup hkan e nga ai hpung gaw zingri zingrat n hkrum ai angwi apyaw sha nga lu nga ma ai. Dai hpung gaw Karai Kasang hpe hkrit hkungga ai myit hte asak hkrung shamu shamawt nna Chyoi pra ai Wenyi a karum madi shadaw ai hte ngang kang grin nga ai rai nna hpung masha ni law htam wa ma ai.
Luda Hte Yopa Mare Ni Hta Petru Du Hkawm Ai Lam
32Petru gaw shara magup hkan e kawan hkawm nga ai. Kalang mi na Luda mare e nga ai Karai Kasang a masha ni kaw sa du ai. 33Dai yang e katsing si nna matsat ning tup yup ra na n rawt lu ai Ainea mying ai masha langai mi hpe mu hkrup wu ai. 34Petru gaw dai wa hpe “Ainea e, Yesu Hkristu nang hpe shamai ya nit dai: rawt u, na a hpun panep lajang u,” ngu tsun wu ai shaloi jang shi rawt wa lu ai. 35Luda hte Sharon mare e nga ai masha nlang hte mung shi hpe mu nna Madu hpang de kayin bang wa ma ai.
36Ya, Yopa mare hta Tabihta mying ai kam sham ai; numsha langai mi nga ai. (Shi a mying hpe Grik ga hku Dorka ngu ai rai nna de a lachyum “Chyahkyi” ngu ai re.) Shi gaw shi a aten hpe kaja ai amu bungli galaw nna matsan mayan ni hpe karum madi shadaw alu jaw ai lam hta jai lang nga ai. 37Dai hte yang shi machyi nna si mat wa sai, shi a hkum tsawp hpe kashin nna, ntsa gawk e sharawn da ma ai. 38Yopa mare gaw Luda mare hte nau wa n tsan nga ai rai nna, Petru dai yang e nga nga ai lam kam sham ai ni na ma yang shanhte masha marai lahkawng hpe, “Anhte hpang de alawan sa wa rit,” ngu nna Petru hpe sa tsun na matu dat dat mu ai. 39Shaloi Petru rawt nna dai yan hte rau hkan sa wa ai. Shi du ai shaloi ntsa gawk de woi shawn mu ai. Dai yang e gaida jan ni nlang Petru a makau e tsap gum bawm nna naw hkring nga yang, Dorka chywi ai kata palawng ni ntsa palawng ni hpe madun dan let, hkrap nga ma ai. 40Petru chyawm gaw shanhte yawng hpe gawk kaw nna shapraw kau nhtawm hput di let kyu hpyi nga ai. Dai hpang dai mang maga de kayin nna, “Tabihta e rawt u!,” ngu wu ai. Tabihta mung myi hpaw nna Petru hpe mu jang, rawt dung nga ai. 41Petru mung lata ladawn nna gang sharawt la wu ai. Dai hpang gaida jan ni hte kam sham ai hpung masha ni yawng hpe shaga la nna asak bai hkrung wa ai Dorka hpe ap ya mu ai. 42Dai lam shiga Yopa ginwang ting gumhkawng chyam bra wa ai rai nna masha law law wa dai Madu hpe kam sham ma ai. 43Shing rai Petru gaw, Simun ngu ai shanhpyi sama wa hte rau nhtoi tsawmra na hkra Yopa mare hta nga nga ai.#Kas 10:6.
Currently Selected:
KASA 9: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
