YAWHAN 2

Hkana Mare Na Hkungran Poi

1Dai hpang lahkawng ya na ai shani e, Galile mung na Hkana kahtawng e hkungran poi langai mi galaw ma ai. Yesu a kanu gaw dai hkungran poi hta lawm nga ai. 2Yesu hte sape ni hpe mung, dai poi de shaga da mu ai. 3Sabyi ma mat jang, Yesu a kanu gaw, “Shanhte sabyi n lu masai,” ngu nna shi hpe tsun wu ai.

4Shaloi Yesu gaw, “Hpa amu galaw na lam ngai hpe hkum tsun et, nye a ahkying garai n du li ai,” ngu nna shi hpe htan wu ai.

5Rai ti mung shi a kanu gaw, “Shi nanhte hpe tsun matsun galaw mu,” ngu nna shangun ma ni hpe tsun da mu ai.

6Dai yang e, Yuda masha ni a jasan jaseng ai lam galaw na matu tawn da ai galan 20 hte 30 shang ram re ai hka bang ai nlung yam kru shadun tawn nga malu ai. 7Yesu gaw, “Ndai yam ni hta ntsin ja bang jahpring mu,” ngu nna shangun ma ni hpe tsun mu ai. Dai rai nna shanhte gaw, yam nten dem rai hkra ja bang jahpring mu ai. 8Dai hpang Yesu gaw, “Ya ntsin loi mi kamai la nna poi up wa hpe wa jaw mu,” ngu nna shanhte hpe tsun wu yang, shanhte wa jaw ma ai. 9Poi up wa gaw ntsin kaw nna galai byin wa ai sabyi hpe chyim yu wu ai. Shangun ma ni gaw dai sabyi kanang na lu ai re ai hpe chye ma ti mung, poi up wa gaw n chye wu ai. Dai rai nna poi up wa gaw la nnan wa hpe shaga la nna, 10“Masha kadai mung kaja dik ai sabyi machyan shawng jaw ga ma ai; dai hpe lu law ma jang she, sabyi jabu daw na hpe jaw ma ai. Nang gaw kaja dik ai sabyi machyan hpe ya du hkra kyem da ndai!,” ngu wu ai.

11Shing rai Yesu gaw, Galile mung Hkana mare e ndai shawng nnan na lamik kumla hpe madun dan ai hte, dai yang e shi a hpung shingkang shadan dan wu ai rai nna, shi a sape ni mung, shi hpe kam sham ma ai.

12Dai hpang Yesu gaw, shi a kanu, kanau ni hte sape ni hte rau Kaperna-um mare de yu wa nna, dai yang e nhtoi mali manga ya hkring nga ma ai.#Mat 12:46.

Yesu Nawku Htingnu De Sa Ai

(Mat 21:12-13; Mrk 11:15-17; Luk 19:45-46)

13Yuda masha ni a Shalai wa ai Poi du wa ra ai rai nna, Yesu gaw Yerusalem mare de lung wa ai.#Yhn 2:23; Pru 12:14; Trj 1:16. 14Shaloi Nawku Htingnu e dumsu, sagu, hkrudu ni dut ai ni hte gumhpraw byan sha ai ni dung nga ma ai hpe shi mu wu ai. 15Dai majaw shi gaw, sumri hte lasik galaw la nhtawm, sagu, dumsu hte dusat ni yawng hte hpe Nawku Htingnu kata na gawt shale kau nna, gumhpraw byan sha ai ni a ku ni hpe mung kanawng kadawng nna gumhpraw ni hpe agat ayai kau ya mu ai. 16Hkrudu dut ai ni hpe mung, “Ndai ni hpe ndai kaw na la pru mat wa mu! Nye Wa a nta e gat dut shara hkum shatai mu,” ngu nna tsun mu ai. 17Dai shaloi shi a sape ni gaw, “Na a nta hta manoi ai nye a n ja n hpra myit gaw, nye a kraw lawang kata e wan zawn hkru nga ai,” nga nna ka da ai ga hpe dum ma ai.#Shk 69:9.

18Ahkang aya lu ai Yuda masha ni gaw, “Nang ndai amu hpe ning rai galaw na ahkang lu ai wa re ai lam hpa lamik kumla galaw nna anhte hpe madun dan na n ta?,” ngu nna ga san hte shi hpe htan mu ai.

19Yesu gaw, “Ndai Nawku Htingnu hpe hpya kau u, masum ya laman e, ngai dai hpe bai sharawt na we ai,” ngu nna shanhte hpe htan mu ai. #Mat 26:61; 27:40.

20Shaloi Yuda masha ni gaw, “Ndai Nawku Htingnu hpe mali shi kru ning tup galaw ai re, nang chyawm gaw masum ya laman bai gaw gap lu na n ni?,” ngu mu ai.

21Rai ti mung Yesu tsun nga ai htingnu gaw, shi a hkum hkrang ngu ai htingnu hpe sha-ang nna tsun ai rai nga ai. 22Dai re ai majaw si ai kaw na shi hpe bai hkrung sharawt la ai hkrum wu ai shaloi, sape ni gaw shi shing nga tsun ai ga hpe dum ma ai rai nna, Chyum Laika hpe mung, Yesu tsun dan ai ga hpe mung, kam sham ma ai.

Masha A Lam Hpe Yesu Chye Ai

23Dai Shalai wa ai Poi nhtoi ni a laman e Yerusalem mare hta shi naw nga nga yang, shi madun ai lamik kumla ni hpe mu lu ma ai majaw masha law law wa shi hpe kam sham wa ma ai. 24Rai ti mung Yesu gaw, masha yawng mayawng a lam chye da wu ai majaw, shanhte hpe n kam da mu ai. 25Madu shi nan masha kraw lawang na myit masin a maw mawn ai lam ni hpe chye ya nga ai majaw, shanhte a lam masha gade e me shi hpe tsun dan ra ai n rai.

Currently Selected:

YAWHAN 2: JCLB

Highlight

Copy