YAWHAN 7

Yesu Hte Shi A Kanau Ni

1Dai hpang Yesu gaw Galile mung hkan hkawm sa nga ai. Ahkaw ahkang lu ai Yuda masha ni shi hpe sat kau na la nga ma ai majaw Yuda mung e n hkawm mayu wu ai. 2Yuda amyu masha ni a Sum Poi #7:2: Sum Poi: Yuda masha ni nshung shang wa mahka, sabyi sun mangai gawn na matu hpun lakung lakying ni la nna sum galaw da ma ai. Dai nsi naisi shu la ai mangai Sum Poi galaw ai aten ni wa ra ai.#Jaw 23:33-36,39-43; Trj 16:13-15; Jaw 23:29. 3Dai rai nna, shi a kanu ni gaw, “Nang galaw nga ai amu ni hpe na a sape ni mu lu mu ga, ndai shara na pru nhtawm, Yuda mung de sa wa su. 4Kajai gumhkawng na hpe ra ai wa kadai mung, shi galaw nga ai hpa amu hpe mung makoi magap di da ga ma ai n rai. Nang gaw ndai mauhpa amu ni hpe galaw nga nit dai majaw, na a lam mungkan ting hpe chye shangun u,” ngu nna shi hpe tsun mu ai. ( 5Shi a kanau ni pyi shi hpe n kam n sham ma ai.)

6Dai shaloi Yesu gaw shanhte hpe, “Nye a ahkying garai n du li ai; nanhte a ahkying chyawm gaw galoi mung hkrak nga malit dai. 7Mungkan ga gaw nanhte hpe n dawng n wawm rai lu ai n rai; rai ti mung ngai hpe gaw n dawng n wawm ma ai, hpa majaw nga yang, shanhte a n shawp ai lam ni hpe atsun nga nngai majaw rai nga ai. 8Dai poi de nanhte lung wa mu, ngai chyawm gaw nye a ahkying garai n du li ai majaw dai poi de garai n lung na nngai,” ngu nna tsun dat mu ai. 9Shing nga nna tsun ngut ai hpang, shi gaw Galile nawng e hti nga ai.

Sum Poi Hta Yesu Sa Lawm Ai

10Shi a kanau ni dai poi de lung mat wa ai hpang, Yesu mung dai de dan leng ai hku n re ai sha mayun mayoi ai hku sa lawm nga ai. 11Dai majaw Yuda masha ni gaw dai poi hta Yesu hpe tam nna, “Dai wa kanang rai nga a ta?,” nga ma ai.

12Shawa masha ni hta mung shi a lam gadum gahte nga ai lam grai law ai hte, nkau mi gaw, “Shi gaw masha kaja rai nga ai,” nga ma ai. Bai nkau mi gaw, “N rai, mung masha ni hpe lam shadam nga ai,” nga shajang ma ai. 13Rai ti mung shanhte gaw Yuda masha ni hpe hkrit ai majaw, kadai mung shi a lam leng leng n tsun ma ai.

14Ya dai poi galaw ai nhtoi ganoi ka-ang hkup rai wa jang, Yesu gaw Nawku Htingnu de lung nna sharin shaga nga ai. 15Ahkang aya lu ai Yuda masha ni gaw mau ai hte, “Ndai wa gaw hpa jawng mung n lung yu ai mi kaning rai ndai daram wa chye chyang ai kun?,” nga ma ai.

16Dai majaw Yesu gaw, “Ngai sharin shaga ai ga gaw, nye a ga n rai, ngai hpe shangun dat ai wa a ga rai nga ai. 17Dai Madu a myit ra ai lam hkan galaw mayu ai wa kadai mung, ngai sharin shaga ai ga gaw Karai Kasang kaw na re ai, shing n rai nye a myit hte sha tsun ai rai kun?, chye ginhka lu na wu ai. 18Tinang myit hte tsun ai wa gaw, tinang a arawng sadang tam ai wa rai nga ai. Rai ti mung shi hpe shangun dat ai wa a arawng sadang hpe tam ai wa chyawm gaw, teng man nga ai rai nna, shi hta n ding n man ai n rawng lu ai. 19Mawshe gaw nanhte hpe Jep Ai Tara jaw da manit dai n rai ni? Rai ti mung nanhte hta na kadai mung, dai Tara hpe n hkan myit dai. Ngai hpe sat kau na hpa rai tam nga myit ta?,” ngu nna shanhte hpe htan mu ai.

20Shaloi shawa masha ni gaw, “Nang hta nat rawng nga ai, Nang hpe sat kau na kadai tam nga a ta?,” ngu nna htan mu ai.

21Yesu gaw, “Ngai lamik kumla langai mi galaw se ai rai nna, nanhte yawng mau manit dai. 22Mawshe gaw nanhte a shadang sha ni hpe matu gadoi na lam hkang da manit dai. Dai rai nna nanhte gaw Bansa Nhtoi hta nan matu gadoi ai lam galaw manit dai. (Kaja wa nga yang, matu gadoi ai lam hpang dat ai wa gaw Mawshe n rai, nanhte a nji nwa ni she rai ma ai.#Jaw 12:3. 23Mawshe a Tara n hten mat u ga matu, nanhte gaw la kasha langai mi hpe Bansa Nhtoi hta matu gadoi lam jaw myit dai mi, Bansa Nhtoi hta masha hkum ting hpe ngai shamai ya ai majaw, nanhte ngai hpe hpa rai masin pawt bu nga myit ta?#Yhn 5:8,9. 24Shinggan lam hku mu mada lu ai hpe sha yu nna hkum jeyang myit, ding hpring ai hku she jeyang mu,” ngu nna shanhte hpe htan mu ai.

Shi Gaw Meshia Rai Nga A Ni?

25Yerusalem mare na masha nkau mi gaw, “Sat kau na matu ahkang aya lu ai du salang ni tam nga ai wa gaw, ndai wa n rai ni? 26Yu mu, shi dan dan leng leng hkaw tsun nga ai hpe kadai mung hpa n ngu ma hka! Ndai wa nan Meshia rai nga ai hpe du ni kaja wa chye manu ai kun? 27Rai ti mung ndai wa kanang na du sa ai re ai gaw anhte yawng chye ga ai; Meshia du sa wa ai ten hta chyawm gaw, dai Madu kanang na du sa ai hpe kadai mung chye lu na n rai,” nga ma ai.

28Yesu gaw Nawku Htingnu e sharin shaga nga yang, “Nanhte ngai hpe kaja wa chye myit ni? Ngai kanang na re ai mung nanhte chye myit ni? Ngai gaw nye a myit hte du sa nngai n rai. Rai ti mung ngai hpe shangun dat ai wa gaw teng man nga ai. Nanhte shi hpe n chye myit dai. 29Rai ti mung ngai gaw shi kaw na du sa nngai majaw mung, shi gaw ngai hpe shangun dat ai majaw mung, ngai gaw shi hpe chye nngai,” ngu nna jahtau tsun wu ai.

30Shaloi shanhte gaw shi hpe rim la na maw ma ai, rai ti mung shi a ahkying garai n du lu ai majaw, gade e mung shi hpe n rim lu mu ai. 31Rai ti mung shawa masha ni hta na law law wa shi hpe kam sham wa ma ai rai nna, “Meshia du sa wa ai shaloi ndai wa galaw dan ai hta grau ai mauhpa lamik kumla ni hpe madun lu na a ni?,” nga nna tsun shajang ma ai.

Yesu Hpe Rim La Na Matu Htingnu Sin Ai Hpyenla Ni Hpe Shangun Dat Ai Lam

32Ndai Yesu a lam hpe shawa masha ni tsun garu nga ma ai hpe Hparishe ni na ma yang, hkinjawng agyi ni hte Hparishe ni gaw shi hpe rim la na matu hpyen la nkau mi hpe shangun dat ma ai. 33Yesu gaw, “Ngai nanhte hte rau tawng marang mi sha nga nhtawm ngai hpe shangun dat ai wa hpang de ngai wa mat na nngai. 34Shaloi nanhte ngai hpe tam na marin dai, rai ti mung nanhte ngai hpe mu na myit dai n rai, hpa majaw nga yang, ngai nga ai shara de nanhte n du lu na myit dai,” ngu mu ai.

35Ahkang aya lu ai Yuda masha ni gaw, “Anhte n mu hkra ndai wa gaw gade sa wa na ra ai i? Yuda masha ni nga bra hkawm nga ai Grik mare ni de sa nna Grik masha ni hpe hkaw tsun sharin shaga na ra ai kun? 36Shi gaw ‘Nanhte ngai hpe tam ti mung n mu na myit dai, ngai nga ai shara de mung nanhte n du lu na myit dai,’ nga ai ga gaw, hpa nga ai ga rai lu ai i?,” nga nna shada da tsun ma ai.

Asak Hka Hpawk

37Shaloi dai poi a jahtum shani ngu ai ahkyak dik ai nhtoi kaba hta Yesu gaw tsap da nna, “Hpang gara ai wa kadai mung ngai hpang de sa lu rit.#Jaw 23:36. 38Chyum laika hta tsun ai hte maren, ngai hpe kam sham ai wa a kraw lawang kaw nna asak hkrung ai ntsin hka hpawk ni lwi pru na ra ai,” ngu nna nsen kaba hte jahtau tsun wu ai.#Eze 47:1; Zeh 14:8. 39Yesu gaw, shi hpe kam sham ai ni hkam la lu na rai nga ai Wenyi a lam hpe sha-ang nna ndai lam tsun nga ai. Hpa majaw nga yang, Yesu gaw shi a hpung shingkang garai n dan hkung ai majaw, shi hpe kam sham ai ni hpe dai Wenyi garai n jaw wu ai.

Shawa Masha Ni Hta Myit Shai Hkat Ai

40Shi shing nga tsun ai ga na ma yang, shawa masha ni hta na nkau mi gaw, “Ndai wa gaw kaja wa myihtoi rai nga ai,” nga ma ai.

41Bai nkau mi gaw, “Ndai wa gaw Hkristu nan rai nga ai,” nga ma ai.

Rai ti mung nkau mi gaw, “Ataw, Hkristu wa mi Galile mung na pru wa a ni? 42Meshia gaw, Dawi a amyu lakung kaw na rai na ra ai, nga nna mung Dawi nga lai wa ai Betlehem mare kaw na she paw pru na ra ai, nga nna mung, Chyum Laika hta tsun nga ai n rai ni?,” nga nna tsun hkat ma ai. #2Sa 7:12; Mik 5:2. 43Dai rai nna, Yesu a majaw, hpawng nga ai shawa masha ni hta myit masa shai hkat nna bra wa shara rawng wa malu ai. 44Shanhte hta na nkau mi gaw shi hpe rim la mayu ma ti mung, kadai wa mung shi hpe n rim la lu mu ai.

Ahkaw Ahkang Lu Ai Yuda Masha Ni A N Kam N Sham Ai Lam

45Sin ai hpyenla ni, hkinjawng agyi ni hte Hparishe ni hpang de bai du wa ma yang, shanhte gaw, “Dai wa hpe hpa rai n rim woi wa myit ta?,” ngu nna hkap san mu ai.

46Hpyenla ni gaw, “Ndai masha wa zawn nga nna sharin shaga ai kadai mung n nga yu ai,” ngu nna htan mu ai.

47Shaloi Hparishe ni gaw, “Nanhte wa mung dai wa e gunglau mana kau ai hkrum manit hka i? 48Anhte a ningbaw ningla ni hte Hparishe ni hta na langai mi dai wa hpe kam sham na kadai nga ma ni? 49Ndai shawa masha ni gaw, Mawshe a tara hpe n chye ma ai majaw, Karai Kasang a dagam dala hkrum sha ai ni rai nga ma ai,” ngu nna shanhte hpe tsun mu ai.

50Hparishe ni hta na shawng de Yesu kaw sa ai Nikodi mung lawm nga ai.#Yhn 3:2. 51Dai wa gaw, “Anhte a Tara hte maren nga yang, anhte gaw masha langai mi hpe, shi hpa baw tara tawt lai ai lam n jep n san, shi hkum nan hpe tinang mara n lu ai lam tsun makawp maga na ahkaw ahkang n jaw ai, n mai daw dan ga ai,” ngu nna tsun mu ai.

52Shaloi shanhte gaw, “Nang mung Galile mung na masha rai nga n ni? Chyum Laika hpe sawk hti yu u, shaloi Galile mung kaw nna kadai myihtoi mung n paw pru yu ai hpe nang mu na rin dai,” ngu nna shi hpe htan mu ai. 53(Shaloi shanhte langai hte langai tinang nang a nta de wa mat ma ai.)

Currently Selected:

YAWHAN 7: JCLB

Highlight

Copy