LUKA 16
16
Hpaji Chye Ai Kunhting Wa
1Yesu gaw sape ni hpe, “Kalang mi na sahti wa langai mi nga ai. Shi kaw shi a sut rai ni hpe yu hpajang ai shangun ma langai mi nga ai. Dai wa gaw, madu a gumhpraw ni hpe majoi jai shama kau nga ai lam, sahti wa hpe tsun dan mu ai. 2Dai majaw, sahti wa gaw, shi hpe shaga la nna, ‘Ngai na lu ai, na a lam gaw kaning re ai rai ta? Na a bungli hte seng nna, nye a sut rai ni hpe gara hku jai lang sai lam hkum tsup ai jahpan laika dan yu rit, hpa majaw nga yang, ya kaw nna hpareng amu nang galaw lu na nit dai n rai,’ ngu wu ai. 3Shangun ma wa gaw, ‘Nye a madu ngai hpe bungli kaw na jahkrat kau ni ai, ngai kaning rai na i? Ga htu, ga chye na mung ngai n-gun n rawng nna n di lu nngai, hpyi sha na mung ngai kaya nngai. 4Ngai bungli na hkrat mat ai hpang, masha ni ngai hpe shanhte ni a nta hta hkap la nna kanawn mazum kam hkra, ngai kaning di na gaw ya ngai chye se ai,’ nga nna shi a kraw hta myit la lu nu ai.
5Shing rai shi gaw, shi a madu kaw hka kap nga ai ni yawng hpe shaga la nhtawm, langai wa hpe, ‘Nye a madu kaw nang hka gade kap n ta?,’ ngu nna san wu ai. 6Dai wa gaw, ‘Sau joi latsa kap nga nngai,’ ngu wu ai. Shaloi hpareng wa gaw, ‘Na jahpan la nna, alawan dung let, manga shi ngu ka da u,’ ngu wu ai. 7Bai kaga wa hpe mung, ‘Nang jaw ra ai hka gade kap n ta?,’ ngu nna san wu yang, dai wa gaw, ‘Hkaulan mam dang hkying mi manga tsa kap nngai,’ ngu wu ai. Hpareng wa gaw, ‘Na a jahpan laika la nna, matsat tsa ngu nna ka da u,’ ngu wu ai.
8Ndai zawn, bawnu shachyai nna hpaji hte chye galaw ai majaw, madu gaw kunhting wa hpe shakawn wu ai, hpa majaw nga yang, ndai mungkan ga a kashu kasha ni gaw, shanhte a mungkan amu magam lam galaw gun hpai sa wa ai hta, nhtoi hte seng ai kashu kasha ni hta grau nna hpaji rawng nga ma ai.”
9Ngai nanhte hpe tsun made ga, tinang a matu n tara ai mungkan sutgan hte jinghku hku mu, shaloi she dai htum mat jang dinggrin anga nga ai nta hta, nanhte hpe hkap la na marin dai.#Mat 6:19. 10Amu kaji hta kangka re ai wa gaw, amu kaba ni hta mung kangka rai na ra ai. Amu kaji ni hta n ding n hpring ai wa gaw, amu kaba hta mung n ding n hpring nga ai. 11Mungkan hte seng ai sutgan hpe lang ai lam hta pyi, nanhte kangka n rai lu myit yang gaw, teng man ai sutgan majing hpe, nanhte hpe kaning di ap ya lu na i? 12Nanhte gaw masha wa madu ai sut rai ni hta, nanhte kangka n rai lu myit yang gaw, nanhte madu ang ai sut rai ni hpe, nanhte hpe kadai ni ap ya na rai ta?
13“Kadai shangun ma rai ti mung, madu lahkawng a mayam n tai lu ai; langai wa hpe shi n dawng nna, langai wa hpe shi tsaw ra na wu ai; langai wa hta sadi dung nna, langai wa hpe n kaw n law di na wu ai. Nanhte gaw Karai Kasang a magam amu hpe mung, gumhpraw tam ai amu hpe mung, kalang lata rau sha n gun hpai lu na myit dai,” ngu mu ai.#Mat 6:24.
Yesu Tsun Ai Ga Shadawn Ni
(Mat 11:12-13; 5:31-32; Mrk 10:11-12)
14Dai mahkra hpe Hparishe ni na ma yang, Yesu hpe asawng asang ngu mu ai, hpa majaw nga yang, shanhte gumhpraw marin ai ni rai nga ma ai. 15Yesu gaw, “Nanhte gaw masha ni a man e, tinang a hkum hpe teng man ai masha ni re ngu ai hku mu shangun nga myit dai; rai ti mung, Karai Kasang gaw myit masin ni hpe chye ya nga ai. Hpa majaw nga yang, masha e jahpu shareng nna shagrau ai arai ni gaw Karai Kasang a man e manu n rawng nga ai.
16“Mawshe a jep ai Tara hte myihtoi ni a laika ni gaw Hkalup Sara Yawhan a lakhtak du hkra ngang kang ai hte grin nga ai. Dai kaw nna gaw Karai Kasang a Mungdan a Kabu Gara Shiga ni hpe hkaw tsun nga ai rai nna, masha shagu gaw Karai Kasang a Mungdan hta anin katut shang wa ma ai.#Luk 7:29; Mat 4:17; 11:12-13. 17Rai ti mung, jep ai Tara kaw na kaji dik ai madin langai mi hten mat loi ai hta, lamu hte aga hten nna lai mat wa na gaw grau loi nga ai.#Shk 102:26-27; Esa 40:8; Mat 5:18.
18“Tinang a madu jan hpe jahka kau nna, num kaga la ai wa kadai mung, num shaw ai rai nga ai, madu wa jahka kau ai num hpe la ai wa mung, num shaw ai rai nga ai.#Mat 5:32; Mrk 10:11; 1Ko 7:10-11.
Sahti Wa Hte Lazaru A Lam
19“Kalang mi na sahti wa langai mi nga ai. Shi gaw, hpu ging dik ai, hpun palawng bu hpun nna shani shagu pyaw pyaw ning ngai nga ai. 20Hkum ting kahpraw hpye ai, Lazaru mying ai matsan masha langai mi mung nga ai, 21Dai wa hpe, sahti wa a sha ku na hkrat ai ahkyep alep ni hpe hta sha u ga nga nna myit mada let, shi a chyinghka makau e sa tawn da da di mu ai, gwi ni mung shi a nma ni hpe sa mata ya ma ai.
22“Shaloi dai matsan wa si mat wa nna, lamu kasa ni shi hpe sumsing lamu na lusha poi hta Abraham a makau e dung nga na matu woi bang da mu ai, sahti wa mung si wa nna lup makoi hkrum nu ai. 23Shing rai katsan ga e nni nkri hkrum let sharawt mada dat yu yang, tsan tsan e Abraham hpe mung, shi a makau e dung nga ai Lazaru hpe mung, mu wu ai. 24Shaloi shi gaw, ‘Wa Abraham e, ngai hpe matsan dum la e law! Ngai gaw ndai wan grung ai hta nji nmu machyi hkrum nga nngai majaw, Lazaru gaw shi a lata ndung hte ntsin loi mi hta kapruk sa nna, nye a shinglet madit katsi ya lit ga, ngai hpang de shangun dat ru law,’ ngu nna hpyi jahtau wu ai.
25“Shaloi Abraham gaw, Sha e, nang gaw naw hkrung nga ai aten hte yang, na a ngamu ngamai ai yawng hkam la lu nit dai hpe mung, Lazaru gaw dai ten hte yang, tsin-yam tsindam hkrum nga ai mung, dum nga u; ya gaw shi nang e pyaw pyaw ningngai nga nu ai, nang mahtang gaw nji nmu hkrum nga lit dai. 26Dai lam ni yawng hta kaga, ndai yang nna nanhte hpang de rap sa mayu ai ni n rap lu mu ga mung, dai yang nna anhte hpang de kadai n rap wa lu mu ga mung, anhte hte nanhte a lapran e, sung la ai krung sinwa din nga ai,’ ngu nna htan wu ai. 27Bai sahti wa gaw, ‘Wa Abraham e, dai rai yang gaw, ngai nang hpe hpyi de ga, nye wa a nta de Lazaru hpe shangun dat ya rit. 28Ngai nau ni manga naw nga ma ai majaw, shanhte mung ndai nni nkri hkrum ai shara de n du mu ga, shanhte hpe wa shadum jahprang sadi jaw shangun ya rit law,’ ngu nna hpyi wu ai.
29Abraham gaw, ‘Na nnau ni kaw, Mawshe hte myihtoi ni nga ma ai, dai ni a ga madat mu ga,’ ngu wu ai.#Esa 8:20; Yhn 5:39,45; Kas 15:21. 30Sahti wa gaw, ‘Dai hte sha n ram ai, Wa Abraham e, si ai kaw na langai ngai hkrung rawt nna shanhte kaw sa yang gaw, shanhte a yubak mara ni kaw na myit malai kayin wa na ma ai,’ ngu nna bai htan wu ai. 31Rai ti mung Abraham gaw, ‘Mawshe hte myihtoi ni a ga shanhte n madat ma yang gaw, si ai ni hta na langai mi bai hkrung rawt wa timung, shanhte madat kam na ma ai n rai,’ ngu nna tsun wu ai,” nga nna Yesu tsun sharin shaga ai.
Currently Selected:
LUKA 16: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
