LUKA 18

Gaida Jan Hte Tara Agyi A Ga Shadawn

1Dai hpang Yesu gaw, tut nawng akyu ahpyi nga mu ga hte myit n hten malu ga, sape ni hpe ga shadawn langai mi hte sharin shaga mu ai. 2“Mare langai mi hta, Karai Kasang hpe mung n hkrit, masha hpe mung myi man n tam, n agam ai tara agyi langai mi nga ai. 3Bai dai mare hta gaida jan langai mi mung nga ai. Shi gaw tara agyi wa kaw matut manoi sa nna, ‘Ngai hte amu rawng ai wa hpe mara hte maren tai ya rit, nga nna shi lu ang ai ahkaw ahkang a matu hpyi lajin wu ai!’ 4Rai ti mung tawng marang wa mi na hkra, shi n jeyang ya hkraw ai, timung jahtum e shi gaw, ‘Ngai Karai Kasang hpe mung n hkrit, masha hpe mung n agam nngai. 5Rai ti mung gaida jan ndai ngai hpe sharu shatsang nga ai majaw, shi a ahkaw ahkang ni lu la hkra, shi a amu hpe ngai jeyang lajang ya na nngai. Dai n rai yang, shi sa sa rai nna, jahtum e ngai hpe hkiba shangun na ra ai,’” nga nna shi a kraw hta myit la wu ai.

6Madu gaw, “N ding n man ai tara agyi wa tsun ai ga hpe madat yu mu. 7Karai Kasang gaw, shi hpe shani shana karum la na matu hpyi jahtau nga ai, shi a lata la ai amyu masha ni a maga de, tara n dara ya ai nga na wu ni?#Shr 6:10. 8Nanhte hpe ngai tsun made ga, shanhte hpang maga alawan tara dara ya na mu ai. Rai ti mung Masha Kasha du sa ai nhtoi hta, ndai mungkan ntsa e makam masham nga nga ai hpe mu lu na a kun?,” ngu mu ai.

Hparishe Hte Kang Hta Ai Wa A Ga Shadawn

9Tinang hkum hpe kaja dum nna masha kaga kadai hpe mung hpa n nawn ai masha nkau mi hpe, ndai ga shadawn hte mung shi tsun mu ai. 10“Kalang mi na masha lahkawng akyu hpyi na nga, Nawku Htingnu de lung wa ma ai; langai wa gaw Hparishe rai nna, langai mi gaw kang hta ai wa, rai nga ai.

11“Hparishe wa gaw shi hkrai kaga hkran rai tsap nna, ‘Karai Kasang e, ngai gaw hpya lu hpya sha ai, nammak lawhpa ai, n ding n man ai, num shut num shaw re ai masha gale ni hte n bung nngai majaw, ngai nang hpe chyeju dum nngai. Wora kang hta ai wa zawn mung n rai nngai majaw nang hpe chyeju dum nngai.#Shk 135:2; Esa 1:15; 58:2; Shr 3:17. 12Bat mi hta lahkawng ya lusha gam nngai; ngai lu la ai yawng hta na htam shi hta na htam mi alu jaw nngai,’ nga nna hpyi nga ai.

13“Rai ti mung kang hta ai wa gaw, tsawmra tsan ai kaw tsap nna, lamu de pyi n wam mada ai, shi a sinda adup let, ‘Karai Kasang e, ndai yubak kap ai wa langai mi rai nga ai ngai hpe matsan dum la rit law!,’ ngu nna hpyi wu ai. 14Ngai nanhte hpe tsun made ga, Hparishe n re ai sha kang hta ai wa gaw Karai Kasang a man e, jaw ai hku galaw nna nta de wa lu nu ai. Hpa majaw nga yang, tinang hkum hpe shagrau ai wa kadai mung shagrit kau ai hkrum nna, tinang hkum hpe shagrit ai chyawm gaw shagrau ai hkrum na ra ai,” ngu mu ai.#Yob 22:29; Mat 23:12; Yak 4:6; 1Pe 5:5-6.

Yesu Ma Kaji Ni Hpe Shaman Ya Ai

(Mat 19:13-15; Mrk 10:13-16)

15Masha nkau mi shanhte a ma kaji ni hpe Yesu ta mara ya mi ga nga nna, shi hpang de woi sa ma ai. Sape ni gaw dai hpe mu jang hkap daru kau mu ai. 16Rai ti mung, Yesu gaw ma kaji ni hpe shaga let, “Ma ni hpe ngai hpang de sa shangun maru, shanhte hpe hkum shadang myit, hpa majaw nga yang, Karai Kasang a Mungdan gaw dai zawn re ai ni a mungdan rai nga ai. 17Kadai rai ti mung Karai Kasang a Mungdan hpe ma kaji zawn n hkap la ai wa gaw, dai hta e kaja wa n shang lu na ra ai,” ngu mu ai. Dai hpe adum nga mu.

Sahti Wa A Lam

(Mat 19:16-30; Mrk 10:17-31)

18Yuda amyu masha hta na ningbaw langai mi gaw, “Mai kaja ai Sara e, n htum n wai asak hkam la lu hkra ngai hpa mi galaw na rai ta?,” ngu nna Yesu hpe san wu ai.

19Yesu gaw, “Ngai hpe mai kaja ai, hpa rai nga n ta? Karai Kasang hta kaga mai kaja ai gaw kadai mung n nga ai. 20Jep ai Tara hta, masha num hkum shaw, masha hkum sat, hkum lagu, n teng n man ai sakse hkum hkam, nnu yan nwa hpe hkungga lara di u, nga ai ga hpe nang chye nga ndai,” ngu nna shi hpe htan wu ai.#Pru 20:12,16; Trj 5:16; Rom 13:9; Ehp 6:2; Kol 3:20.

21Dai wa gaw, “Dai ni yawng mayawng hpe ngai naw kaji ai ten kaw nna hkan se ai,” ngu wu ai.

22Yesu gaw dai ga na jang, “Lam langai mi nang naw galaw ra nga ndai, nang lu malu dut kau nna matsan mayan ni hpe garan jaw u; shing rai jang she sumsing lamu ntsa e nang sutgan lu na rin dai, dai hpang ngai kaw hkan nang rit,” ngu nna shi hpe tsun wu ai. 23Rai ti mung, dai wa gaw dai ga na jang myit hta nachying yawn mat nu ai, hpa majaw nga yang, shi gaw grai lu su ai wa rai nga ai.

24Yesu gaw dai wa myit yawn mat ai hpe mu jang, “Sut su ai ni gaw Karai Kasang a Mungdan hta shang na grai yak la nga a hka! 25Lu su ai wa Karai Kasang a Mungdan de shang na hta, gawla-uk langai mi samyit na hku gale na mahtang grau loi nga ai,” ngu wu ai.

26Dai ga na ai ni gaw, “Dai rai yang gaw kadai wa mi hkye hkrang la ai kaw du lu na rai ta?,” ngu nna san mu ai.

27Yesu gaw, “Masha n dang di lu ai lam ni hpe Karai Kasang dang di nga ai,” ngu nna htan mu ai.

28Dai hpang Petru gaw, “Yu u! nang kaw hkan nang na matu anhte a dum nta ni hpe tawn kau da saga ai,” ngu nna tsun wu ai.

29Yesu gaw, “Rai sa, ngai nanhte hpe tsun made ga, Karai Kasang a Mungdan majaw, tinang nta, madu jan, kahpu kanau ni, kanu kawa ni, shing n rai kashu kasha ni hpe kau da ai wa kadai mung, 30ndai prat hta htam law law akyu hkam sha lu na hta n ga, htawm hpang e mung nhtum nwai asak lu la na ra ai,” ngu nna shanhte hpe tsun mu ai.

Si Hkam Na Lam Masum Lang Ngu Na Yesu Bai Tsun Ai

(Mat 20:17-19; Mrk 10:32-34)

31Yesu gaw sape shi lahkawng hte hpe shaga la nna, “Madat mu! Anhte Yerusalem mare de lung wa nga ga ai; Masha Kasha a lam myihtoi ni ka da mada gaw, dai kaw dik wa na ra ai. 32Shi gaw maigan amyu ni a lata de ap kau ai hkrum nna, asawng asang di ai, aroi arip di ai, mayan mahtaw bun ai hkrum na ra ai. 33Shi hpe anu kayat nhtawm, sat kau na maru ai, rai ti mung, masum ya nhtoi hta bai hkrung rawt wa na ra ai,” ngu nna shanhte hpe tsun mu ai.

34Rai ti mung, dai lam langai mi hpe mung sape ni n chye na ma ai. Dai ga ni a lachyum, shanhte a man e makoi magap nga ai rai nna, shanhte gaw Yesu hpa baw a lam tsun nga ai ngu ai hpe n chye na ma ai.

Myi N mu Ai Hpyi Sha Ai Wa Hpe Yesu Shamai Ya Ai

(Mat 20:29-34; Mrk 10:46-52)

35Ya Yesu gaw Yerihko mare de du magang yang, myi kyaw ai masha langai mi gaw lam makau e dung nga nna hpyi sha nga ai. 36Masha wunawng wuwa lai sa wa ai hpe na jang, dai kaning re ai rai nga ai hpe san yu wu ai.

37“Shaloi hkan nang ai ni gaw, Nazaret mare na Yesu lai sa wa nga ai,” ngu nna shi hpe tsun dan mu ai.

38Dai na jang shi gaw, “Dawi a Kasha Yesu e, ngai hpe matsan dum la e law!,” ngu nna hpyi jahtau wu ai. 39Shawng e sa wa nga ai masha ni gaw, atsin sha nga na matu dai wa hpe jet kau mu ai. Rai ti mung, shi mahtang, “Dawi a kasha e, ngai hpe matsan dum la e law,” ngu nna grau jahtau shaja wu ai.

40Dai rai nna Yesu gaw hkring tsap nga da nna, dai myi n mu ai wa hpe shi hpang de woi sa na hkang da wu ai. Myi kyaw ai wa shi a makau de du jang Yesu gaw, 41“Ngai nang hpe hpa di ya na, nang ra n ta?,” ngu nna shi hpe san wu yang, dai wa gaw,

“Madu e, ngai myi bai mu mayu nngai,” ngu wu ai.

42Yesu gaw, “Mu sanu! Na a kam sham ai gaw nang hpe shamai ya nit dai,” ngu nna shi hpe tsun wu ai.

43Dai wa gaw shaloi jang myi mu lu nna, Karai Kasang hpe shagrau sha-a let, Yesu kaw hkan nang wu ai. Dai byin ai lam hpe mu ai ni yawng, Karai Kasang hpe shakawn kungdawn nga ma ai.

Currently Selected:

LUKA 18: JCLB

Highlight

Copy