ปร 3

ลอง ดูอี เซา วี แกน

1อู ซีแง อาเปตารู ฆาย อายอฮาน ฮาว ลึบ แคง โฮว เฌาพรา. ดอ ลึบ ฆาย, อึณ มูห อาคราว ซาคึร เฆ ดูอี อายูดา. อึณ มูห วาย โฮม โอย นารี. 2ดอ อัน ตี อึณ มึห ดูอี เซา อู วี. อู ซีณ ดอ ฆึอด อัน, เปลา อัน แฮะ ยัม. ดอน ซีแง เฆ แฮะ กาฆอด ตัห อัน ดี อาต มาโลห โฮว เฌาพรา, แตห อัน หมาณ ดี เฆ ดูอี อี ตัห ลึบ แคง โฮว เฌาพรา, แตห เฆ กาเว อัน, ดัว รึอน ดี อัน. มาโลห โดง กอย อัน ตี, อึณ จืร มาโลห ชีด. 3ดูอี ตี, ดอ ยึร อัน อาเปตารู ฆาย อายอฮาน ตัห ลึบ แคง โฮว เฌาพรา, อัน วี หมาณ, แตห ฆาย ดัว รึอน ดี อัน. 4อาเปตารู ฆาย อายอฮาน ยี ยอด ซีคยา อัน. อาเปตารู วี ต็อห, “แตห แม ยอด ยาย.” 5แฮะ ฮอต ต็อห ปาย ตี, ดูอี เซา วี ยอด ฆาย. อัน ทาง ฆาย ดี ดัว รึอน ดี อัน.

6อาเปตารู ยี ต็อห, “รึอน ฆาย ครีว โอว ตู มึห. แคะ ปี มึห โอว, โอว ยี ดัว ดี แม. เฌา เยซู, อี ตัห มืง นาซาเรต, อี มูห อัน เฌา ปี ร็อห ปี ตึย เฌาพรา แตห อัน คยอด ดูอี, โกบ ฆาว โอว ปวน เฌา เยซู ตี, แตห แม ยีต ฮาว.” 7อัน แฮะ ฮอต กาลาง โฆรห ตี, อัน มืร ปา แด อาอัห ดูอี เซา ตี, จอย อัน ยีต. ปัน ตี เปลา อัน บอ กาซ็อง เปลา อัน วี มึห โปลม อู เฌณ. 8อัน บอ ยีต ฮาว อู เฌณ. แฮะ ฮอต ปัน ตี อัน วี โดบ อาเปตารู ฮาว ลึบ แคง โฮว เฌาพรา. อัน บอ วีน ดี แล บอ โคย. อัน บอ อืบ เฌาพรา, กาลาง ลอง ปวน เฌาพรา. 9เฆ ดูอี กืน บอ ยึร อัน ฮาว บอ อืบ เฌาพรา. 10เฆ บอ โหลห อารึบ อัน บอ วี นับ, อัน มูห ดูอี อี ดึอม กอย ดี อาต โฮว เฌาพรา บาง มาโลห ชีด ตึอน, หมาณ รึอน ดี อี. ปัน ตี เฆ บอ อาม กาเซา ลอง อัน ตี.

ลอง อาเปตารู กาลาง โฆรห ดี ดูอี กืน

11ดูอี ตี กอย กาตัด อาเปตารู ฆาย อายอฮาน. เฆ ดูอี กืน มืร อาม กาเซา. เฆ บอกาเฆลียด วี ตัห กาฌูะ แคง เฌโรบ ตาง อี จืร เฌโรบ คูนดีคัม อาซาโลวโมว. 12ดอ วี ยึร อาเปตารู เฆ ดูอี กืน แฮะ ตัห, อัน วี กาลาง โฆรห ดี เฆ. อัน ต็อห, “เบ ดูอี อีซาเรลัะ, เหมา อึณ ปาย ปี อาม เบ อาตี? เหมา อึณ ปาย ปี ยอด เบ ดี ยาย? เบ ทาง อึณ มูห ปวน ยาย บอ นา บอด ยาย อี แฮะ ปีแกน ดูอี ตี. อาว มูห ปาย ตี. 13อึณ มูห เฌาพรา ปี กรึบ เฆ ฆูณ ดัง เอ อี มูห ดา อาบราฮัม, อาแซก บอ อาโกบ, อัน แฮะ บยัะ อาพูง ดังโคว เฌา เยซู ดี เบ. เฌา เยซู ยี มูห แดเจณ เฌาพรา. เฌา เยซู ตี เบ แฮะ อาบ ดี อาพีลาด ตึอน. อาพีลาด แฮะ ต็อห ดี เบลห อัน. เบ ยี ต็อห, เบ ตู โลว อัน. 14เบ แฮะ แวน ดูอี อี หมึอม อี ซีงา บอด, เบ แฮะ วี หมาณ, แตห อาพีลาด เบลห ดูอี ฮาย, ดูอี อี ดึอม ง็อห อาซาก อี. 15วาย อัน ตี เบ แฮะ วี ง็อห อาซาก ดูอี ตี, อี มูห อัน เฌา อี นับ ดี ดัว อาซาก ดี ดูอี ดอน อี. เฌาพรา ยี แฮะ แตห เฌา เยซู ตี วี ยีต วี อีม. ยาย มืร แฮะ ยึร โตต ลอง อัน ตี. 16ดูอี ปี ยึร เบ นี, เบ ดอน อี แฮะ นับ อาเซ อัน มูห. อัน แฮะ หณึม เฌา เยซู มึห ปวน. แฮะ ฮอต, เฌา เยซู แฮะ ปีแกน อัน, แตห เปลา อัน วี มึห โปลม. อึณ มูห ปวน เฌา เยซู บอ น็อห หณึม ปี ดัว เฌา เยซู ดี ดูอี นี, อึณ แฮะ แตห อัน แกน, แตห เบ ดอน อี ปึอน ดี ยึร.

17อึย เบ บีนอง โอว, โอว แฮะ นับ, บอ เบ บอ ดา ตาง เบ, ดอ แวน เบ เฌา เยซู, เบ ตู นับ อาเซ อัน มูห. 18ปาย ตี, เฌาพรา ยี แฮะ แตห อึณ แบน โตต ดอน โมยว ปี ดึอม กาลาง อัน ดี ดูอี อี บยาน โฆรห เฌาพรา. เฌาพรา แฮะ ดึอม กาลาง ดี เฆ ดอน อี ลอง ดูอี ปี ร็อห ปี ตึย เฌาพรา แตห อัน คยอด ดูอี. อัน โลว คัม ดูก แบน โมยว แบน โมยว. 19โคว อัน ตี ดอ ตี นี, เบ โลว แวน น็อห บรีม เบ, ดึห น็อห กามาย ปี ดัว เฌาพรา ดี เบ, แตห เฌาพรา ฆ็อห แวน หมาบ เบ, แตห อัน วี ดัว อาคราว ดี มึห เบ น็อห ดาคึย. 20แฮะ ฮอต, แตห ดูอี ปี ร็อห ปี ตึย เฌาพรา ตัห ดี เบ, แตห อัน คยอด บอ เบ. ดูอี ตี แฮะ มูห เฌา เยซู, วี ปี จัร เฌาพรา แตห อัน คยอด เบ. 21ดอ ตี นี, เฌา เยซู กอย แคง มืง ฆางหราว, แตห อึณ กอ ฌัม อาคราว ดี อึณปราย เฌาพรา แตห ดอน โมยว วี ซีคยา ปี บรีม, ปี ดอ มึอน. ปาย ตี, อึณ ดี แบน ปี ปี ดึอม กาลาง เฌาพรา ดี ดูอี อี บยาน โฆรห อัน คา อาต ดอ แฮะ เหลณ กาเซา.

22ดา ซารา อาโมวแซ ตึอน มืร แฮะ ดึอม ต็อห, ‘เฌาพรา อี มูห เฌาพรา ปี กรึบ เบ, อัน ดี วี ตึย ดูอี อี บยาน โฆรห เฌาพรา อู วี ดี เบ. อัน ดี แบน ปี โอว. อัน ดี ตัห กาแต เบ บอ มูห ดูอี อาโมยว เบ. เบ โลว โทม โตต โฆรห ปี กาลาง อัน ดี เบ ดอน โมยว. 23อาเซ ยี ตู โทม โดบ โฆรห ปี กาลาง อัน, โอว ดี แวน อัน, แกวะ ฮู แตห อัน กอย กาแต ดูอี อาโมยว อัน.’

24อู ซีณ ดอ กอย อาซามูเอน ตึอน, เฆ ดูอี อี บยาน โฆรห เฌาพรา ดอน อี, เฆ มืร แฮะ กาลาง ลอง อาคราว ตี อี แฮะ ฌัม ดอ ตี นี. 25โฆรห ปี กาลาง เฌาพรา ดี เฆ ดา ตาง เบ ดอ มึอน, อึณ มูห โฆรห ปี กาลาง เฌาพรา บอ ดี เบ ดอ ตี นี. บอ กาดีก ซัดฌา ปี ดึอม ดัว เฌาพรา ดี ฆูณ ดัง เบ, อึณ มูห กาดีก ซัดฌา ปี ดัว เฌาพรา บอ ดี เบ. เฌาพรา แฮะ ดึอม กาลาง โฆรห ดี ดา อาบราฮัม ตึอน. อัน แฮะ ต็อห, ‘อึณ ดี มึห หลูกหลาน แม อู วี, อัน ดี ม็องการา แตห ดี ดูอี ดอน โมยว แดง กาดาย.’ 26ดอ ตึย เฌาพรา ฆอน อัน, แตห อัน ตัห ฌัม แดง กาดาย นี, เฌาพรา แฮะ แตห อัน ฌัม โดง กอย เบ ดี อาต, แตห อัน ม็องการา ดัว ดี เบ, แตห เบ ดอน อี บอ แวน นา ตู หมึอม ปี โบง เบ.” แคะ ตี อาเปตารู กาลาง โฆรห ดี เฆ ดูอี กืน อี กอย แคง โฮว เฌาพรา.

Currently Selected:

ปร 3: pce

Highlight

Copy