ปร 4

ลอง เฆ ดา ตาง อี อึบ มืง

1อาเปตารู ฆาย อายอฮาน, ดอ กาลาง ฆาย โฆรห ดี ดูอี กืน, อึณ มึห เฆ ดูอี อี หลู ดี เฌาพรา บอ ดูอี อี อึบ เฆ ดูอี อี บัร โฮว เฌาพรา บอ เฆ ดูอี แคง พึง ซาดูแค มัง อี, เฆ แฮะ ตัห โดง กอย อาเปตารู ฆาย อายอฮาน ตึอน. 2เฆ แฮะ รู กาเซา ดี ฆาย. เฆ ตู อึง โฆรห ปี กาลาง ฆาย ดี ดูอี กืน ลอง เฌา เยซู แฮะ วี ยีต วี อีม. 3โคว อัน ตี เฆ วี เหมต ฆาย, คร็อง ฆาย แคง กาปึม. โกบ แฮะ ราม อับ, เฆ แตห ฆาย กอย หน็อะ แคง กาปึม, แตห อึณ ฌัม ปา แคหณา. 4อึณ ยี มึห ดูอี กืน, เฆ แฮะ ฮอต โทม โฆรห ปี กาลาง ฆาย, เฆ วี หณึม แคง น็อห. เฆ ดูอี หณึม ตี, เฆ อีมาย แฮะ มูห กาบัก พัน แหรณ วี.

5ปา แคหณา, เฆ ดูอี อึบ อืง ยูดา บอ เฆ ดา ตาง บอ เฆ ดา ซารา อี มาโนว ดารา ยูดา, เฆ แฮะ ตัห กาฌูะ แคง มืง เยรูซาแลม. 6บอ ดา ตาง อี อึบ โตต ดูอี อี หลู ดี เฌาพรา, อี จืร อานาด, บอ อากายพา เฆ อายอฮาน, อาเลซันดา, บอ เฆ อี มูห หลูกหลาน ดา ตาง อี อึบ โตต ดูอี อี หลู ดี เฌาพรา, เฆ บอกาเฆลียด แฮะ ตัห กาฌูะ. 7เฆ แฮะ วี แดะ อาเปตารู ฆาย อายอฮาน, แตห ฆาย ตัห ฌัม ดี อาต เฆ. เฆ วี ดีหมอด ฆาย ต็อห, “อาเซ แฮะ แตห บาย โบง ฌึร ตี? ปวน อาเซ บาย แฮะ ดึห โบง ฌึร ตี?”

8ปัน ตี น็อห พึอม เฌาพรา กอ โนะ แคง น็อห อาเปตารู. แฮะ ฮอต, อัน วี เวียะ โฆรห เฆ ตี. อัน ต็อห ดี เฆ, “อึย เบ ดูอี อี อึบ มืง บอ เบ ดา ตาง แคง มืง อีซาเรลัะ, 9อาตึร เบ แฮะ ต็อห ดี ดีหมอด ยาย ลอง แปะ แฮะ จอย ยาย ดี ดูอี เซา ตึอน. เบ แฮะ ต็อห, เบ ซี นับ, เหมา ยาย แฮะ ปาย ดี ปีแกน อัน. 10โคว อัน ตี โอว ดี วี กาลาง, แตห บอ เบ บอ เฆ ดูอี อีซาเรลัะ ดอน อี นับ ซีคยา, อึณ แฮะ มูห ปวน เฌา เยซู อี แฮะ แตห ดูอี ตี วี แกน, แตห อัน ปึอน ดี กอย ดี อาต เบ ดอ ตี นี. เฌา เยซู ตี มูห ดูอี ตัห มืง นาซาเรต. เบ มืร แฮะ ง็อห แวน อัน, โบง แตห อัน ยัม แดง ร็อง กาแวะ. แฮะ ฮอต, วาย ยัม อัน, เฌาพรา แฮะ แตห อัน วี ยีต วี อีม. เฌา เยซู ตี แฮะ แตห ดูอี เซา นี วี แกน. 11ลอง เฌา เยซู ตี แฮะ ดึอม กาลาง แคง บับ เฌาพรา ต็อห,

‘อัน ปี มาว อู โบ็ง. เฆ ดูอี ซัม กาง แฮะ แวน มาว ตี. เฌาพรา แยะ แฮะ วี ดึห มาว ตี, โบง แตห อัน แบน เจณ ร็อง.’

12อึณ บอ ปาย ตี. อึณ มึห มี เฌา เยซู อู กาดัง อี แป ดี คยอด ดูอี. อาว มึห อาเซ แดง กาดาย อี แป ดี คยอด ดูอี.”

13ดอ กาลาง อาเปตารู โฆรห ตี, เฆ ดา ตาง วี ยึร, บอ อัน บอ อายอฮาน แฮะ ยัะ ดี กาลาง โฆรห ซืร ดี เฆ. เฆ บอ อาม กาเซา. เฆ ยี นับ, ดูอี ฆาย ตี ตู ดึอม เฮน แปะ แคง โฌง. ฆาย มูห ดูอี ตู นับ มาเซ. ฆาย ยี ยัะ ดี กาลาง โฆรห ดี เฆ. เฆ ยี วี โหลห, ฆาย แฮะ ดึอม กอย รึม โดบ อาเยซู ตึอน. 14โกบ ยึร เฆ ดูอี แปะ แฮะ ปีแกน อาเปตารู ฆาย อายอฮาน แฮะ กอย รึม โดบ ฆาย, เฆ ตู ปึอน กาลาง ต็อห, อาว หมาน, อัน ตู แกน. 15ปัน ตี เฆ ดา ตาง วี จัร อาเปตารู ฆาย อายอฮาน, แตห ฆาย เลห ตัะ โดง กอย เฆ. แฮะ ฮอต, เฆ วี ลาย ซังคยาง ลอง อัน ตี. 16เฆ ต็อห, “มาเซ ปี โลว โบง เอ ดี ดูอี อา วี นี? เฆ ดอน อี, อี กอย มืง เยรูซาแลม, เฆ มืร แฮะ นับ ลอง ฆาย แฮะ โบง นา หมึอม อาม กาเซา. เอ มืร ตู ปึอน กาลาง ต็อห, อาว หมาน, อาว มูห. 17เอ ยี ตู ซี แตห เฆ ดูอี อีซาเรลัะ ดอน อี นับ ลอง อัน ตี. โคว, เอ โลว กาลาง โฆรห กาโบยว ดี ฆาย, แตห ฆาย วี มึห น็อห โยว. ปอ อู จึบ, แกวะ ฮู แตห ฆาย ฆาว ปวน อาเยซู ตี, วี กาลาง ดี อี เฮา.”

18เฆ แฮะ ฮอต กาลาง ปาย ตี, เฆ วี แดะ อาเปตารู ฆาย อายอฮาน, แตห ฆาย วี ตัห โดง กอย เฆ. เฆ วี จัร ฆาย, แกวะ ฮู แตห ฆาย วี ดึห ปวน อาเยซู ตี, วี กาลาง ดี อี เฮา, แกวะ ฮู แตห ฆาย วี มาโนว มาเซ ลอง อาเยซู ตี. 19อาเปตารู ฆาย อายอฮาน ยี วี ต็อห, “เบ โลว เฌณฌา ราง เบ, เซ ยาย แวน โฆรห เฌาพรา, วี โทม โดบ โฆรห เบ. อึณ หมาน, ตู หมาน. 20อี มูห ยาย, ยาย ตู ปึอน กอย ปีเยณ, ตู ปึอน กอย ซีต็อง ตู โฆรห. แคะ ปี ยึร งาย ยาย, แคะ ปี โทม โหยะ ยาย, ยาย โลว วี กาลาง, แตห อี นับ.”

21ฆาย แฮะ ฮอต กาลาง ปาย ตี, เฆ ดา ตาง วี กาลาง โฆรห หมึอม โยว ดี ฆาย. แฮะ ฮอต เฆ วี แตห ฆาย เลห ฮาว โดง กอย เฆ. เฆ ยี ตู นับ เหมา ดี ปาย ดี ดัม หมาบ ดี ฆาย. โกบ วี อืบ เฆ ดูอี กืน เฌาพรา ลอง แปะ แฮะ โบง ฆาย, เฆ ดา ตาง ตู วี ยัะ โบง มาเซ ดี ฆาย. 22ดูอี อี แฮะ แกน ตึอน, อาซาก อัน แฮะ โนะ พวน ฆึร โลย.

ลอง เฆ ดูอี อี หณึม เฌา เยซู ซาคึร ดี เฌาพรา

23เฆ แฮะ ฮอต เบลห อาเปตารู ฆาย อายอฮาน, แตห ฆาย เวณ โดง กอย ฆาย. ฆาย มืร ฮาว ซืร ดี ดูอี แคง พึง ฆาย. ฆาย วี แค โตต ดอน โมยว ปี กาลาง เฆ ดา ตาง อี อึบ มืง บอ เฆ ดา ตาง อี แยต เฆ ดูอี อี หลู ดี เฌาพรา. 24เฆ ดูอี แคง พึง เฌา เยซู เฆ แฮะ ฮอต โทม โฆรห ปี แค ฆาย, เฆ วี แบน อู น็อห, วี จูห ดี ซาคึร, กาลาง โฆรห ดี เฌาพรา. เฆ ต็อห, “อึย แม เฌาพรา, แม มูห เฌาพรา อี อึบ โตต. แม มืร แฮะ พาน เบลห บอ ฆางหราว บอ กาดาย. แม แฮะ พาน เบลห บอ อึม นัมมูกซารา. แคะ บอ มึห อี กอย แดง กาดาย นี, แม เฌาพรา แฮะ โบง โตต. 25แม มืร แฮะ ดึอม ดัว น็อห พึอม แม ดี คูนดีคัม อาดาวีด อี มูห แดเจณ แม. อัน บอ มูห ฆูณ ดัง เย. แม แฮะ แตห อัน ต็อห,

‘เหมา อึณ ปาย ปี รู กาเซา เฆ ดูอี อาโมยว เฮา? เหมา อึณ ปาย ปี ลาย ซังคยาง เฆ นา ตู หมึอม อี ตู มึห ดีโคว? 26เฆ คูนดีคัม แดง กาดาย แฮะ ตัห, บอ เฆ ดา กาณา อี อึบ กาดาย นี, เฆ แฮะ กาฌูะ, แตห เฆ กาโฆห ดี เฌาพรา, แตห เฆ กาโฆห บอ ดี ดูอี ปี ร็อห ปี ตึย เฌาพรา แตห อัน คยอด ดูอี.’

27ดอ ตี นี, อึณ แฮะ วี แบน ปาย ตี. คูนดีคัม อาเฮโรด บอ อาโพนที พีลาด, บอ เฆ ดูอี อาโมยว เฮา, บอ เฆ ดูอี อีซาเรลัะ แคง มืง นี, เฆ แฮะ ตัห กาฌูะ, แตห เฆ โบง นา ตู หมึอม ดี เฌา เยซู, อี มูห แดเจณ แม, อี แฮะ บอด กาเซา, วี ปี ร็อห แม แตห อัน คยอด ดูอี. 28แปะ แฮะ โบง เฆ, อึณ ปี ปี ดึอม กาลาง แม คา อาต ปี ดึอม ควาง แม เฌาพรา แตห อึณ แบน. 29ดอ ตี นี, แม เฌาพรา, แตห แม วี ยอด แคะ ปี โบง เฆ, แม วี โทม โฆรห กาโบยว เฆ. เย แดเจณ แม, เย หมาณ ดี แม เฌาพรา, แตห แม วี ดัว เย มึห น็อห ยัะ ดี วี กาลาง โฆรห แม ดี ดูอี เฮา. แกวะ แตห เย มึห น็อห โยว. 30แตห แม เฌาพรา มืร บยัะ ปวน แม, แตห ดูอี เซา วี แกน, แตห เย ปึอน ดี ดึห ปวน เฌา เยซู, โบง นา หมึอม อาม แบน โมยว แบน โมยว, แตห อี นับ ลอง เฌา เยซู อี มูห แดเจณ บอด ปี ตึย แม.”

31ดอ หมาณ เฆ ปาย ตี, โดง กอย เฆ ตึอน, อึณ บอ ดีเยณ อู เฌณ. น็อห พึอม เฌาพรา มืร ตัห ลึบ โนะ แคง น็อห เฆ ดอน อี. เฆ วี จูห ดี กาลาง โฆรห เฌาพรา, อาว ฮู มึห น็อห โยว มาเซ.

ลอง เฆ ดูอี อี หณึม เฌา เยซู กอย รึม

32เฆ ดูอี อี หณึม เฌา เยซู, เฆ บอกาเฆลียด กอย รึม. เฆ แบน อู น็อห. แคะ มึห เฆ โกรวกราม, เฆ วี ลาย กาซาง ดี เฆ ดอน อี. อึณ มืร ตู มึห อาเซ อี มาด อึณ มูห โกรวกราม โดว บรีม อัน. 33เฆ ดูอี ปี ร็อห ปี ตึย เฌา เยซู, เฆ มืร กาลาง โฆรห อี มึห ปวน ตาง ดี ดูอี เฮา. เฆ กาลาง แคะ ปี ดึอม ยึร เฆ ลอง เฌา เยซู แฮะ วี ยีต วี อีม. เฌาพรา มืร กาเว เฆ, จอย เฆ ดอน อี. 34กาแต เฆ ดูอี อี หณึม เฌา เยซู, อาว มึห ดูอี ฆีน. อาเซ มึห กาง บอ มาน, อัน ย็อง โตต. 35แคะ ปึอน อัน รึอน, อัน วี ดัว ดี ดูอี ปี ร็อห ปี ตึย เฌา เยซู, แตห เฆ วี กาซาง แคะ ปี โลว ดอน อี.

36อึณ บอ มึห อาโยวแซบ, เฆ ดูอี ปี ร็อห ปี ตึย เฌา เยซู, เฆ มืร แตห อัน จืร บอ อาบานาบัะ. (ซีเพา จืร ตี, อึณ มูห “ฆอน อี นับ ดี เหลา น็อห อี เฮา”). ดูอี ตี, อัน มูห ครึร อาเลวี อู วี. มืง บรีม อัน มูห ฆูน อึม อี จืร คูโพรว. 37บอ อัน ย็อง มาน อัน, ดัว รึอน ปี ปึอน อัน ดี ดูอี ปี ร็อห ปี ตึย เฌา เยซู.

Currently Selected:

ปร 4: pce

Highlight

Copy