ปร 7

ลอง อาซาเทพาน โฮว ดารา

1วาย อัน ตี ดา ตาง อี อึบ โตต ดูอี อี หลู ดี เฌาพรา วี ดีหมอด อาซาเทพาน ต็อห, “อึณ หมาน, โฆรห ปี กาลาง เฆ?”

2อาซาเทพาน วี เวียะ โฆรห อัน ตี ต็อห, “อึย เบ ดา ตาง บอ เบ บีนอง โอว. เฌาพรา อี มึห อาพูง ดังโคว ตาง, อัน แฮะ ตัห กาปลูห ดี อาบราฮัม อี มูห ฆูณ ดัง เอ. เฌาพรา แฮะ กาปลูห ดี อัน ดอ ซี กอย อัน แคง มืง เมโซวโพวทาม, อาต ฮาว กอย อัน แคง มืง ฮาราน. 3เฌาพรา แฮะ ดึอม กาลาง ดี อาบราฮัม ต็อห, ‘แตห แม เลห แคง มืง โดง กอย วอแว แม, แตห แม ฮาว แคง มืง ปี ดี บยัะ โอว ดี แม.’

4อัน แฮะ ฮอต โทม โฆรห ปี กาลาง เฌาพรา ฌึร ตี, อัน วี เลห แคง มืง อัน อี มูห โดง กอย เฆ ดูอี อาโมยว กาลาเด, วี ฮาว กอย มืง ฮาราน. วาย อัน ตี ฆูณ อัน แฮะ ฮอต ยัม, เฌาพรา วี ตึย อัน ฮาว ฌัม มืง นี, อี มูห โดง กอย เอ ดอ ตี นี. 5แคง มืง ตี, เฌาพรา ยี ตู แตห อัน มึห โอ็ง กาง เฆ โอ็ง อี มูห โกรว อาราง อัน. อาดา อู โปละ มืร, อัน ตู มึห. เฌาพรา ยี ดัว กาดีก ซัดฌา ดี อัน ต็อห, ‘เฆ หลูกหลาน แม, อาบราฮัม, เฆ ดี ปึอน โตต มืง นี.’ ดอ กาลาง เฌาพรา โฆรห ตี, อาบราฮัม หณัม มึห ฆอน. อู วี มืร อัน ตู มึห. 6เฌาพรา ปี วี กาลาง ดี อัน ต็อห, ‘เฆ หลูกหลาน แม, เฆ ดี บอ กอย แคง มืง อี เฮา. เฆ อี เฮา ดี อึบ เฆ บอ แตห เฆ คัม ดูก ดอน โมยว. อาดา พวน มาย็อห ซีนัม เฆ โลว คัม ดูก ตี.’

7แฮะ ฮอต กาลาง โฆรห ตี, เฌาพรา วี ต็อห, ‘เฆ ดูอี อี ดัว ดูก ดี หลูกหลาน แม, เฆ ยี วี โลว คัม ดูก ปี ดัว โอว ดี เฆ. โอว ดี วี แตห เฆ คัม หมาบ เฆ, แตห เฆ แบน หมาย อี. แฮะ ฮอต ปัน ตี เฆ หลูกหลาน แม, เฆ ดี วี เลห แคง มืง ตี, วี ตัห ฌัม แคง มืง นี, แตห เฆ วี กรึบ โอว.’ 8เฌาพรา แฮะ ฮอต ดัว กาดีก ซัดฌา ดี อาบราฮัม, อัน วี จัร อาบราฮัม ซัวะ แวน ฮูน ลัะคานา อีมาย ดอน อี, แตห อึณ แบน ลักซานา ปี โพรม เฆ ดี เฌาพรา. วาย อัน ตี อาบราฮัม วี มึห ฆอน อีมาย อี จืร อาแซก. ดอ แฮะ โนะ อาแซก ดา ซีแง, อาบราฮัม วี ซัวะ แวน ฮูน ลัะคานา อัน. วาย อัน ตี อาแซก วี แบน ฆูณ อาโกบ. อาโกบ วี แบน ฆูณ เฆ ฆึร ดี อา วี, อี แฮะ วี แบน ฆูณ ดัง เอ ดูอี อาโมยว อีซาเรลัะ.

9เฆ ฆูณ ดัง เอ ตี, เฆ ยี ตู อึง วา เฆ อี จืร อาโยว. เฆ วี ย็อง อัน, แตห อัน แบน หมาย อี เฮา, กอย แคง มืง แอฆึบ. เฌาพรา ยี กอย รึม โดบ อาโยว, 10แตห อัน วี เลห แคง ดูก ปี โลว คัม อัน ดอน โมยว. ดอ กอย อัน แคง มืง แอฆึบ, เฌาพรา วี ดัว อาโยว มึห อางยาน, แตห คูนดีคัม พาโรว กอ อึง อัน. คูนดีคัม พาโรว, วี แตห อาโยว แบน ดา กาณา อี อึบ มืง แอฆึบ บอ มืง, อึบ บอ แคง โฮว อัน ดอน โมยว.

11วาย อัน ตี บอ แคง มืง แอฆึบ บอ แคง มืง กานัณ ตึอน, อึณ ฌัม อาคราว เอต โบม. ดอ อัน ตี เฆ ฆูณ ดัง เอ, เฆ ดอน อี โลว คัม ดูก ตาง. เฆ ตู ปึอน ดี เหรต ปี ดี โฮม นา เหมา. 12แฮะ ฮอต, อาโกบ ตึอน บอ ยึร อี เฮา ต็อห, อึณ ซี มึห ปี ดี โฮม แคง มืง แอฆึบ. อัน วี จัร ฆอน อัน, อี มูห ฆูณ ดัง เอ, แตห เฆ ฮาว ฌัม มืง แอฆึบ อู จึบ. 13เฆ แฮะ ฮอต วี ตัห, ปี วี ฮาว ปอ อู จึบ. ดอ อัน ตี อาโยว ตึอน วี แตห อีกัด อัน นับ ลอง มูห อัน วา เฆ. บอ คูนดีคัม พาโรว กอ นับ ลอง เฆ อูกัด อูวา อาโยว.

14แฮะ ฮอต ปัน ตี อาโยว วี จัร เฆ, แตห เฆ แดะ ฆูณ อัน อี จืร อาโกบ บอ วอแว อัน ดอน อี, แตห เฆ ตัห ฌัม มืง แอฆึบ. เฆ วอแว อาโยว, เฆ บอกาเฆลียด กอย บู ฆึร ดี พัน วี. 15ปัน ตี อาโกบ วี โลง แคง มืง แอฆึบ. บอ อัน บอ ฆูณ ดัง เอ ดอน อี, เฆ กอย แคง มืง แอฆึบ, แตห เฆ ดอน อี กอ ยัม แคง มืง แอฆึบ ตี. 16โดว โบ็ง เฆ ยี ตู กอย เซเซ แคง มืง แอฆึบ. ดอ วี เลห เฆ ดูอี อีซาเรลัะ แคง มืง แอฆึบ, เฆ วี ดึห ฮาว โดว โบ็ง ฆูณ ดัง เอ, เบลห อูน เฆ แคง มืง เซเคม. อึณ มูห โดง กอย กาเดา บาเรว ปี ดึอม จึห ดา อาบราฮัม ดี เฆ ดูอี อี มูห ฆอน อาฮาโมว ตึอน.

17วาย อัน ตี อาคราว ปี ดึอม กาลาง เฌาพรา ดี อาบราฮัม แฮะ แกร ดี ฌัม. เฆ ดูอี อีซาเรลัะ แฮะ แกร ดี กืน กาเซา แคง มืง แอฆึบ. 18แฮะ ฮอต, อึณ วี มึห คูนดีคัม กามาย. อัน ยี ตู นับ มาเซ ลอง อาโยว ตึอน. 19คูนดีคัม กามาย ตี, อัน วี โบง นา ตู หมึอม ดี ดูอี อาโมยว เอ, แตห เฆ วี คัม ดูก ตาง, วี คาหนาบ เฆ, จัร อี เฮา ง็อห ยัม ฆอน อางัะ เฆ.

20ดอ อัน ตี อาโมวแซ วี ฆึอด. ดอ ฆึอด อัน ตี, อัน แฮะ ชีด กาเซา. อาดา โอย มาเฆียน เฆ ปึอน ดี เฮียง อัน แคง กาง ฆูณ อัน. 21แฮะ ฮอต, เฆ วี โลว แวน อัน. อึณ ยี มึห ฆอน อีบึณ คูนดีคัม พาโรว, อัน วี กาดูห อาโมวแซ, วี เฮียง, แตห อัน แบน ฆอน อัน, กอย แคง โฮว คูนดีคัม พาโรว. 22ดอ อัน ตี อาโมวแซ วี เฮน โตต ดอน โมยว อี มูห อางยาน เฆ ดูอี แอฆึบ. บอ โฆรห ปี กาลาง อัน, บอ ปี โบง อัน ดอน โมยว, อึณ บยัะ อัน มึห ปวน ตาง.

23ดอ โนะ อาซาก อัน พวน ฆึร ซีนัม, อัน วี ต็อห ดี ฮาว ยอด โดง กอย เฆ ดูอี อีซาเรลัะ, อี มูห วอแว อัน. 24อัน วี ยึร ดูอี แอฆึบ อู วี มัห ดูอี อีซาเรลัะ อู วี. อัน วี จอย ดูอี ตี, ง็อห ยัม ดูอี แอฆึบ ตึอน. 25อาโมวแซ ทาง, อึณ ดี ลึห ดี น็อห เฆ ดูอี อีซาเรลัะ, ลอง เฌาพรา แฮะ ตึย อัน, แตห อัน จอย เฆ เลห แคง ดูก ตาง เฆ. อึณ ยี ตู ลึห มาเซ แคง น็อห เฆ. 26ปา แคหณา อาโมวแซ ปี วี ฮาว โดง กอย เฆ, ปี วี ยึร ดูอี อาโมยว อีซาเรลัะ อา วี แฮะ ลาย กาลูต. อัน วี เทว ดี แคร ฆาย, แตห ฆาย วี ลาย ดาคึย. อัน ต็อห, ‘อึย, บาย มูห อู บีนอง. เหมา อึณ ปาย ปี ลาย กาลูต บาย?’

27ดูอี อี มัห ปอ วี, อัน ยี ฆีห แวน อาโมวแซ วี ต็อห, ‘อาเซ แฮะ แตห แม แบน ดา กาณา อี อึบ เย, ซูงพยาด อามู เย? 28แม ซี ง็อห แวน โอว, แตห อึณ ปี แม ง็อห แวน ดูอี แอฆึบ ดอ ตัห แม อาหมึร?’

29อาโมวแซ แฮะ ฮอต โทม โฆรห ดูอี ตี, อัน วี เตา เลห แคง มืง แอฆึบ, วี ฮาว กอย รึม โดบ เฆ ดูอี อาโมยว มีดีอาน, แบน แคต แคง มืง ตี. ดอ กอย อัน แคง มืง มีดีอาน, อัน วี มึห ฆอน อีมาย อา วี.

30วาย อัน ตี อึณ บอ โนะ พวน ฆึร ซีนัม. อู ซีแง, อาโมวแซ กอย โดง กาฮ็อห อู โปละ, อี กอย กาตัด นอน ซีนาย. อัน วี ยึร อามู อามาด เฌาพรา อู กาดัง กาปลูห ดี อัน, กอย แคง ยวน อี มึห เงา. 31อาโมวแซ แฮะ ยึร อาตี, อัน วี อาม กาเซา. อัน วี ฮาว เครียะ, แตห อัน ยอด ซีคยา. อัน วี ยึร โฆรห เฌาพรา ต็อห ดี อัน, 32‘โอว มูห เฌาพรา ปี กรึบ เฆ ฆูณ ดัง แม. โอว มูห เฌาพรา ปี กรึบ อาบราฮัม บอ อาแซก บอ อาโกบ ตึอน.’ ดอ ยึร อาโมวแซ โฆรห ตี, อัน ดีเยณ, ตู ยัะ ยอด ปอ อู เฌณ.

33เฌาพรา วี ต็อห ดี อัน, ‘แตห แม บูต คูดีณ แม. โดง กอย แม ตี, อึณ มูห โดง บอด. 34โอว แฮะ ฮอต ยอด ซีคยา ดูอี โอว. โอว แฮะ ฮอต ยึร ดูก ตาง ปี คัม เฆ. โอว แฮะ ยึร แคะ ดีอีห เฆ น็อห เฆ. ดอ ตี นี, โอว แฮะ โลง, แตห โอว คยอด เฆ. แม อาโมวแซ, แตห แม ตัห กาตัด โอว. โอว ดี ตึย แม วี วีว แคง มืง แอฆึบ.’

35อาโมวแซ ตี เฆ ดูอี อีซาเรลัะ แฮะ ฮอต แวน. เฆ แฮะ ฮอต ต็อห, ‘อาเซ แฮะ แตห แม อึบ เย, ซูงพยาด อามู เย?’ วาย อัน ตี เฌาพรา แฮะ วี แดะ อัน, วี แตห อัน แบน ดา ตาง อี อึบ เฆ, แตห อัน ซูงพยาด อามู เฆ. แคะ ตี อามู อามาด เฌาพรา แฮะ จัร อาโมวแซ โบง ดอ กาปลูห อัน แคง ยวน ดี อาต อาโมวแซ. 36วาย อัน ตี อาโมวแซ วี ตึย เฆ ดูอี อีซาเรลัะ เลห แคง มืง แอฆึบ. อาต เลห เฆ, อัน แฮะ โบง นา หมึอม อาม กาเซา แตห อึณ บยัะ ปวน เฌาพรา. แฮะ ฮอต, อัน วี ตึย เฆ, แตห เฆ ฮาว กาโลห อึม โหนง เรณ, แตห เฆ วี ฮาว แคง โดง กาฮ็อห อาดา พวน ฆึร ซีนัม.

37อึณ บอ มูห อาโมวแซ ตี, อัน แฮะ ดึอม ต็อห ดี ดูอี อีซาเรลัะ, ‘เฌาพรา ดี ตึย ดูอี อี บยาน โฆรห เฌาพรา อู วี. อัน ดี ตัห กาแต เบ. ดา ซารา ตี, อัน บอ ปี โอว.’ 38อาโมวแซ ตี บอ กอย รึม โดบ ดูอี อาโมยว เอ ดอ กอย เฆ แคง โดง กาฮ็อห. อัน มืร แฮะ กอย กาตัด อามู อามาด เฌาพรา ดอ กาลาง อามู อามาด เฌาพรา โฆรห ดี อัน ดอ กอย อัน แดง นอน ซีนาย. อาโมวแซ มืร ยึร โฆรห เฌาพรา, แตห อัน วี กาลาง แตห เอ โทม. โฆรห ตี, อึณ มูห โฆรห อี ปึอน ดัว อาซาก ดี ดูอี.

39เฆ ฆูณ ดัง เอ, เฆ ยี ตู อึง ดี โทม โดบ โฆรห อาโมวแซ. แคง น็อห เฆ เฆ แวน โฆรห อัน, แตห อึณ แบน น็อห ซี วี เวณ มืง แอฆึบ ตึอน. 40ปัน ตี เฆ วี ต็อห ดี อาโรน ตึอน, ‘แตห แม โบง อารึบ เฌาพรา ดัว ดี เย. แตห เฌาพรา แยต ดี อาต เอ. อาโมวแซ อี แฮะ แยต เอ เลห แคง มืง แอฆึบ, เอ ตู นับ นา เหมา อัน กอย. เอ ตู นับ ปี ปาย อัน แดง นอน เนณ.’ 41เฆ แฮะ ฮอต กาลาง โฆรห ตี, เฆ โบง อารึบ มัก, ต็อห อึณ มูห เฌาพรา. เฆ วี หลู ดี มามัก ตี, โบง บลอย กรึบ มามัก ตี อี มูห เฌาพรา ปี โบง เฆ ตา แด เฆ. 42เฌาพรา ยี ตู อึง ปี โบง เฆ. อัน วี เบลห แวน เฆ, แตห เฆ วี กรึบ ซีมัณ อี กอย แคง เบลณ. ปี โบง เฆ ฌึร ตี, อึณ บอ ปี ปี แดม อูน เฆ ดูอี อี บยาน โฆรห เฌาพรา. เฆ แฮะ ดึอม ต็อห,

‘อึย เบ ดูอี อีซาเรลัะ, ดอ กอย เบ แคง โดง กาฮ็อห อาดา พวน ฆึร ซีนัม, เบ แฮะ ง็อห ยัม โดว ซัดดาวา, ต็อห ดี หลู. เบ ยี ตู ดึอม หลู ดี โอว, อี มูห เฌาพรา.

43เบ แฮะ กรึบ อารึบ เฌา โมวโลห ต็อห อึณ มูห เฌาพรา. เบ มืร แฮะ กรึบ ซีมัณ, อี มูห อารึบ เฌา อาเรพาน. เบ แฮะ โบง อารึบ เฆ ตี, แตห เบ วี กรึบ.

โคว อัน ตี โอว เฌาพรา ดี วี ซูต เบ เลห แคง มืง เบ, แตห เบ ฮาว กอย โต็ง, กอย มืง บาแบ.’ เฆ ดูอี อี บยาน โฆรห เฌาพรา, เฆ แฮะ ต็อห ปาย ตี.

44โอว ยี ต็อห ดี เบ, ดอ กอย ฆูณ ดัง เอ แคง โดง กาฮ็อห, เฆ แฮะ มึห ทึบ อี มูห โดง กอย เฌาพรา. เฆ แฮะ โบง ทึบ ตี, แตห อึณ ปี ปี บยัะ เฌาพรา ดี อาโมวแซ. เฌาพรา แฮะ แตห อัน ยึร อารึบ ทึบ ตี ดี อาต, แตห อัน นับ ดี โบง. แฮะ ฮอต, เฆ แฮะ ดึห ฆอด ทึบ ตี แยต ดี อาต เฆ ฮาว โดง ฌัม เฆ ดอน โปละ.

45เฌาพรา แฮะ ฮอต ดัว ทึบ ตี ดี เฆ. ดอ วี อึบ อายอซู เฆ ดูอี อาโมยว เอ, เฆ วี ดึห ทึบ ตี ตึย ฌัม แคง มืง กานัณ, อี มูห โดง กอย เอ ดอ ตี นี. ดอ ลึบ เฆ แคง มืง กานัณ, เฌาพรา มืร แวน เฆ ดูอี อาโมยว เฮา, แตห เฆ ดูอี อาโมยว เอ วี กอย แคง มืง ตี. ทึบ เฌาพรา ตี ยี กอย แคง มืง ตี กอ วี ฌัม อาคราว วี แบน อาดาวีด คูนดีคัม, วี อึบ มืง เอ. 46เฌาพรา ยี โวว อาดาวีด. โคว, อาดาวีด วี หมาณ แตห เฌาพรา ควาง อัน ซัม โฮว ตาง, แตห อึณ แบน โดง กอย เฌาพรา ปี กรึบ อาโกบ. 47อึณ ยี มูห คูนดีคัม อาซาโลวโมว อี แฮะ วี ซัม โฮว เฌาพรา.

48เฌาพรา อี มูห เฌาพรา อี ตาง หลึอม โตต, อัน ยี ตู กอย แคง กาง ปี โบง ดูอี ตา แด เฆ. อึณ ปี ปี ดึอม กาลาง ดูอี อี บยาน โฆรห เฌาพรา อี แฮะ แดม อูน โฆรห เฌาพรา ต็อห,

49‘ฆางหราว แฮะ มูห โดง กอย โอว. กาดาย ปี อึณบาง โดง เบลห โอว เปลา โอว. เซ อึณ ปาย ตี, กาง โมยว เหมา เบ ซี โบง, แตห โอว กอย นา แคง?’ เฌาพรา มืร ต็อห, ‘โดง เหมา เบ ทาง โอว ปึอน ดีเหลา?

50เบ แฮะ ปีว, อึณ มูห โอว, อี แฮะ โบง โตต ดอน โมยว, แตห อึณ แบน, แตห อึณ มึห.’ เฆ ดูอี อี บยาน โฆรห เฌาพรา, เฆ แฮะ ต็อห ปาย ตี.

51โอว ยี ต็อห ดี เบ, น็อห เบ แฮะ ดืร กาเซา. เบ ตู แวน นา ตู หมึอม แคง น็อห เบ. บอ นา ตู หมึอม อี ดึก ดี โหยะ เบ, เบ ตู แวน มาเซ. เบ ปี ฆูณ เบ, อี กอย คา อาต. เบ ตู อึง ดี โทม โดบ ปี บยัะ น็อห พึอม เฌาพรา ดี เบ. 52บอ ฆูณ ดัง เบ อี กอย คา อาต แฮะ ดึอม ดัว ดูก ดี ดูอี อี บยาน โฆรห เฌาพรา. อาว มึห ดา ซารา คอ อู วี, อี ตู กาดูห ดูก ดี ฆูณ ดัง เบ. อึณ แฮะ มึห เฆ ดูอี อี บยาน โฆรห เฌาพรา, เฆ แฮะ ดึอม กาลาง ลอง ดูอี หมึอม ปี ดี ตึย เฌาพรา. แฮะ ฮอต, ฆูณ ดัง เบ อี กอย คา อาต เฆ แฮะ แวน ดา ซารา เฆ ตี. ดอ ตี นี, ดูอี หมึอม ปี ตึย เฌาพรา, อัน แฮะ ฮอต ตัห. เบ ยี แฮะ อาบ อัน ดี ดา ตาง, ง็อห แวน บอ อัน. 53อึณ มูห เบ. เบ แฮะ ปึอน ดารา บอด. เฌาพรา แฮะ จัร เฆ อามู อามาด อัน ดัว ดารา อัน ดี เบ. เบ ยี ตู โดบ ดารา ตี.”

54อาซาเทพาน แฮะ ฮอต กาลาง โฆรห ตี, เฆ ดา ตาง อี ซูงพยาด ดารา, เฆ บอ รู กาเซา. เฆ ซีฆีด หราง เฆ โกบ รู เฆ. 55อาซาเทพาน ยี ยอด ฆางหราว. น็อห พึอม เฌาพรา แฮะ โนะ แคง น็อห อัน. อัน ซากึห ยอด นา แดง บอ ยึร อาโรง บลาง เฌาพรา. บอ เฌา เยซู กอย บลาก อาอัห เฌาพรา. 56ดอ อัน ตี อัน วี ต็อห, “แตห เบ ยอด. โอว แฮะ ยึร มาโลห ฆางหราว แฮะ อึณวึห. บอ อัน เฌา อี แฮะ ดึอม แบน ฆอน ดูอี แฮะ กอย บลาก อาอัห เฌาพรา.”

57ดอ กาลาง อัน โฆรห ตี, เฆ วี กาบีด โหยะ เฆ, วี ดัด เรียง. เฆ วี ฮาว กาโรบ อัน, 58วี ดึห อัน เลห ตัะ มืง. แฮะ ฮอต, เฆ วี ดึห มาว วึณ ดี อัน แตห อัน กอ ยัม. ดอ โบง เฆ ปาย ตี, เฆ ดูอี ตึอน, อี แฮะ กาโลว ดี กาลาง นา ตู หมึอม ลอง อาซาเทพาน, เฆ แฮะ บูต ครึง เฆ, เบลห แดง กาดาย. อึณ ยี มึห กาโณม อู วี, อัน จืร อาซอลู. อัน วี บัร ครึง เฆ ตี.

59ดอ วึณ เฆ มาว ดี อาซาเทพาน, อัน วี ซาคึร เฌาพรา ต็อห, “อึย แม เฌา เยซู, แตห แม รวห น็อห พึอม โอว.” 60แฮะ ฮอต ปัน ตี อัน วี ครึบเครา, วี ดัด ตาง ต็อห, “อึย แม เฌาพรา, แกวะ แตห เฆ คัม หมาบ ปี โบง เฆ ตี.” อัน แฮะ ฮอต ต็อห ปาย ตี, พึอม อัน บอ โตต.

Currently Selected:

ปร 7: pce

Highlight

Copy