ปร 8

ลอง เฆ ดูอี อี หณึม เฌา เยซู คัม ดูก

1ดอ ง็อห เฆ อาซาเทพาน บอ อาซอลู แฮะ กอย รึม โดบ เฆ. บอ อัน แฮะ โพรม แตห เฆ ง็อห อาซาก อาซาเทพาน.

อู ซีณ ซีแง อัน ตี, เฆ ดูอี แคง พึง เฌา เยซู, เฆ อี กอย แคง มืง เยรูซาแลม, เฆ โลว คัม ดูก ตาง แบน โมยว แบน โมยว. เฆ ดอน อี โลว กาย็อห, เลห แคง มืง เยรูซาแลม, ฮาว กอย แบน โปละ แบน โปละ แคง อืง ยูดา บอ แคง มืง ซามารี. อึณ ยี มึห มี เฆ ดูอี ปี ร็อห ปี ตึย เฌา เยซู, เฆ ซี กอย แคง มืง เยรูซาแลม. 2อึณ ยี มึห ดูอี อี หณึม อี โดบ อึณเตณ เฌาพรา, เฆ วี ดีบ โดว โบ็ง อาซาเทพาน. เฆ บอ กลึร กาเซา, วี ยาม ตาง โกบ ยัม อัน. 3อาซอลู ตึอน ยี รู กาเซา ดี เฆ ดูอี อี ลึบ แคง พึง เฌา เยซู ดอน อี. อัน บอ ฮาว แคง กาง ดอน กาง, ดืด เลห เฆ ดูอี อี หณึม เฌา เยซู, บอ อีมาย อีบึณ. อัน วี เหมต คร็อง เฆ แคง กาปึม.

4เฆ ดูอี อี ดึอม กาย็อห ฮาว ดอน โปละ, เฆ วี ฮาว ดอน นา ดอน โปละ แคง มืง บอ มืง. เฆ บอ ฌัม นา เหมา, เฆ วี กาลาง โฆรห เฌาพรา แตห อี โทม.

5อึณ ยี มูห อาพีลีบ ตึอน, อัน บอ ฮาว ฌัม อู โปละ แคง อืง ซามารี. อัน วี กาลาง โฆรห ลอง ดูอี ปี ร็อห ปี ตึย เฌาพรา แตห อัน คยอด ดูอี. 6ดอ ยึร เฆ ดูอี ซามารี โฆรห อัน ตี บอ นา หมึอม อาม กาเซา ปี โบง อัน, เฆ วี โทม ซีคยา โฆรห ปี กาลาง อัน. 7อึณ บอ มึห ดูอี กืน, อี มึห กานัม ฮาย กอย แคง โดว โบ็ง เฆ, เฆ วี ดัด ตาง, เลห แคง โดว โบ็ง ดูอี ตี. บอ ดูอี อี มึห เปลา เฆ แด อี แฮะ ยัม, บอ เฆ ดูอี เช วี แกน. 8ปาย ตี, เฆ ดูอี อี กอย แคง มืง ตึอน, เฆ บอ ดาคึย กาเซา.

ลอง ดูอี อี เฮียง กานัม

9แคง มืง ตึอน, อึณ บอ มึห ดูอี อู วี, อัน จืร อาซีโมน. อัน มูห ดา อี เฮียง กานัม. ปี โบง อัน, อึณ แตห เฆ ดูอี กืน แคง อืง ซามารี กอ อาม กาเซา. อัน ปีคึก อัน ต็อห, อัน มูห ดูอี บอด, ดูอี อี มึห ปวน ตาง. 10เฆ ดูอี บอกาเฆลียด, บอ เฆ อี เตียะ อี ตาง, เฆ วี โทม โฆรห อัน. เฆ วี ต็อห, “แฮะ มูห แฮะ หมาน, ดูอี ตี มึห ปวน ตาง ปี ดัว เฌาพรา ดี อัน.” 11โกบ แฮะ นับ อัน ดี โบง นา หมึอม อาม กาเซา ตี แฮะ เหลณ, เฆ โดบ อัน. 12เฆ ดูอี ฌึร ตี, เฆ วี โทม โฆรห ปี กาลาง อาพีลีบ ลอง เฌาพรา ดี อึบ กาดาย บอ ลอง เฌา เยซู คยอด ดูอี. เฆ แฮะ ฮอต โทม ลอง อัน ตี, เฆ วี หณึม. บอ เฆ อีมาย อีบึณ วี คัม ดี จึบ แคง อึม. 13บอ อาซีโมน ตึอน วี หณึม เฌา เยซู. แฮะ ฮอต, บอ อัน วี แตห อาพีลีบ จึบ อัน แคง อึม. อัน วี ฮาว โดบ อาพีลีบ, แตห อัน กอ ฮาว ฌัม ดอน นา ดอน โปละ โดง ฮาว ฌัม อาพีลีบ. อัน วี อาม กาเซา ดอ ยึร อัน นา หมึอม อาม กาเซา ปี โบง อาพีลีบ, อี บยัะ ปวน เฌาพรา.

14เฆ ดูอี ปี ร็อห ปี ตึย เฌา เยซู อี กอย แคง มืง เยรูซาแลม, เฆ บอ นับ ลอง ดูอี อาโมยว ซามารี แฮะ แตห โฆรห เฌาพรา ลึบ แคง น็อห เฆ, เฆ วี ตึย อาเปตารู ฆาย อายอฮาน ตึอน, แตห ฆาย ฮาว ฌัม โดง กอย เฆ ดูอี อี หณึม เฌาพรา แคง อืง ซามารี. 15-16ฆาย แฮะ ฮอต ฌัม, ฆาย บอ นับ, โกบ หณึม เฆ เฌา เยซู, เฆ แฮะ ฮอต คัม ดี จึบ แคง อึม. น็อห พึอม เฌาพรา ยี หณัม ลึบ แคง น็อห เฆ. โคว, ฆาย วี ซาคึร แตห เฌาพรา ดัว น็อห พึอม อัน ลึบ บอ แคง น็อห เฆ. 17ฆาย แฮะ ฮอต ซาคึร, ฆาย วี ดาง แด ฆาย แดง ฆีณ เฆ. ปัน ตี น็อห พึอม เฌาพรา บอ ลึบ แคง น็อห เฆ.

18อาซีโมน ตึอน, อัน ยี ยึร น็อห พึอม เฌาพรา ลึบ แคง น็อห ดูอี ดอ ดาง อาเปตารู ฆาย อายอฮาน แด ฆาย แดง ฆีณ ดูอี ตึอน, อัน วี ต็อห ดี ดัว รึอน ดี ฆาย. 19อัน วี ต็อห, “แตห บาย ดัว ปวน ตี บอ ดี โอว. แตห บอ โอว ปึอน ดี ดาง แด โอว แดง ฆีณ ดูอี, แตห น็อห พึอม เฌาพรา ลึบ แคง น็อห เฆ.”

20อาเปตารู ต็อห ดี อัน, “บอ แม บอ รึอน แม, แตห อึณ ชึม. แม แฮะ ทาง แม ปึอน จึห ปี ดัว เฌาพรา ดี อี ตา รึอน. อาว มูห ปาย ตี. 21น็อห แม อาว หมึอม, อาว หมาน ดี อาต เฌาพรา. โคว, แม ตู ปึอน โบง ปี โบง ยาย. 22แตห แม แวน นา ตู หมึอม แคง น็อห แม, แตห แม ซาคึร เฌาพรา. เซ อึณ บอ ปึอน, แตห เฌาพรา ฆ็อห แวน น็อห ซี ปึอน แม ปวน ตี. 23โอว แฮะ นับ, น็อห แม อาว อัห บอ โบง หมาบ เซเซ.”

24อาเปตารู แฮะ ฮอต กาลาง โฆรห ตี, อาซีโมน ตึอน วี ต็อห, “แตห แม ซาคึร เฌาพรา ดาง โอว, แกวะ แตห อึณ แบน ปี กาลาง แม.”

25วาย อัน ตี อาเปตารู ฆาย อายอฮาน ตึอน, ฆาย แฮะ ฮอต กาลาง ลอง เฌา เยซู, แฮะ ฮอต กาลาง ดี ดูอี กืน ลอง โฆรห เฌาพรา, ฆาย วี วีว มืง เยรูซาแลม. ดอ ฮาว ฆาย โดบ อึณเตณ, ฆาย วี โฮว ดารา ลอง เฌาพรา คยอด ดูอี, แตห เฆ ดูอี ซามารี แบน เรา แบน เรา ปึอน ดี โทม.

ลอง อาพีลีบ มาโนว ดูอี อี ตัห มืง เอทีโอบ

26อาพีลีบ ตึอน, ดอ กอย อัน แคง อืง ซามารี, อึณ ยี มึห อามู อามาด เฌาพรา อู กาดัง ตัห กาปลูห ดี อัน ต็อห, “แม เลห โลง นา เตต, วี ฮาว แตห แม ฌัม ดี อึณเตณ อี ตัห มืง เยรูซาแลม, วี ฮาว มืง ฆาซา อี มูห อึณเตณ อี กาโลห โดง กาฮ็อห.”

27อามู อามาด เฌาพรา แฮะ ฮอต กาลาง โฆรห ตี, อาพีลีบ มืร ยีต ฮาว แตห อัน ฌัม ดี อึณเตณ ตึอน. อัน วี กาตูณ ดูอี อู วี อี ตัห มืง เอทีโอบ. อัน มูห อีมาย ซัห อี บัร โกรวกราม นาง ฮอคัม แคง มืง เอทีโอบ. นาง ฮอคัม ตี, อัน จืร กันดาเซ. ดูอี ตี, อัน แฮะ ฮอต ฮาว มืง เยรูซาแลม, แตห อัน กรึบ เฌาพรา. 28ดอ อัน ตี อัน วี วีว มืง อัน. อัน กอย แคง ลักเลา อัน, ตีห ทัม. บับ ปี ตีห อัน, อึณ มูห บับ ปี แดม ดูอี อี บยาน โฆรห เฌาพรา อี จืร อาอีซายัะ. 29น็อห พึอม เฌาพรา วี ต็อห ดี อาพีลีบ, “แตห แม ฮาว เครียะ ลักเลา ตี บอ ฮาว รึม โดบ อัน.”

30ปัน ตี อาพีลีบ วี ฮาว เครียะ ลักเลา ตึอน. อัน วี ยึร ดูอี ตึอน ตีห ทัม แคง บับ ปี แดม ดา ซารา อาอีซายัะ, อี มูห ดูอี อี บยาน โฆรห เฌาพรา. ปัน ตี อาพีลีบ ดีหมอด อัน ต็อห, “อึย ดา, แม นับ ลอง ดาง โฆรห ปี ตีห แม ตี?”

31ดูอี อี ตัห มืง เอทีโอบ ตึอน, อัน วี เวียะ โฆรห ตี ต็อห, “เหมา โอว ดี ปาย ดี นับ โฆรห อัน ตี, เซ อาว มึห ดูอี มาโนว โอว?” อัน แฮะ ฮอต ต็อห ปาย ตี, อัน วี แดะ อาพีลีบ ตัห โฮะ แดง ลักเลา อัน, แตห ฆาย กอย รึม.

32คาน ทัม ปี ตีห อัน, อึณ ยี ฮาว ปาย นี ต็อห,

“อัน เฌา ปี มาบู ปี ง็อห ยัม เฆ ดูอี.

อัน บอ ปี ฆอน มาบู. ดอ กับ เฆ ฮึก อัน, อัน ตู ต็อห มาเซ. ปาย ตี อัน เฌา บอ กอย ซีต็อง ตู ต็อห มาเซ,

33อัน แฮะ ปีหนีม อัน, แตห เฆ พยาก อัน. แฮะ ฮอต, เฆ บอ ง็อห แวน อาซาก อัน. โคว, อัน มืร ตู มึห หลูกหลาน.” ปาย ตี แฮะ แดม อูน แคง บับ ปี ตีห อัน.

34ดูอี ตัห มืง เอทีโอบ ตึอน, อัน ดีหมอด อาพีลีบ ต็อห, “แตห แม กาลาง ดี โอว, แตห โอว นับ. ดูอี อี บยาน โฆรห เฌาพรา ตี, อัน กาลาง โฆรห ตี ลอง อาเซ? อัน กาลาง ลอง โดว อัน, อัน กาลาง ลอง ดูอี ปอ อู วี?” 35อัน แฮะ ฮอต กาลาง โฆรห ตี, อาพีลีบ วี จูห ดี กาลาง ลอง คาน ปี ตีห ฆาย แคง บับ เฌาพรา, แตห อัน กอ นับ ลอง เฌา เยซู.

36ดอ ฮาว ฆาย โดบ อึณเตณ ตึอน, ฆาย วี ฮา ฌัม โดง มึห แบลง อึม. ดูอี อี ตัห มืง เอทีโอบ วี ต็อห, “นี, อึณ มึห อึม. อึณ ปึอน จึบ โอว แคง อึม นี ดอ ตี นี?”

37อาพีลีบ วี ต็อห, “เซ แม หณึม ซีคยา เฌา เยซู แคง น็อห, แฮะ ปึอน.” อัน วี ต็อห, “โอว แฮะ หณึม, เฌา เยซู มูห ฆอน เฌาพรา.”

38ปัน ตี อัน วี จัร ลักเลา ฆืด. แฮะ ฮอต, ฆาย วี เลห แคง ลักเลา. ดูอี อี ตัห มืง เอทีโอบ ตึอน วี แตห อาพีลีบ จึบ อัน แคง อึม. 39แฮะ ฮอต ปัน ตี ดอ เลห ฆาย แคง อึม ตึอน, อึณ วี มึห น็อห พึอม เฌาพรา ตัห ดึห อาพีลีบ อู เฌณ, แตห อัน กอ หราย ดี อาต ดูอี อี ตัห มืง เอทีโอบ, อาว ฮู แตห อัน ยึร อาพีลีบ. อัน ยี วี ฮาว โดบ อึณเตณ ปี โลว ฮาว อัน. น็อห อัน บอ ดาคึย กาเซา. 40อึณ ยี มูห อาพีลีบ, อัน แฮะ วี ฌัม มืง อาโซวทู อู เฌณ. อัน วี ฮาว กาลาง ลอง เฌาพรา อี คยอด ดูอี แคง มืง ดอน มืง, แตห อัน กอ ฌัม บอ มืง เกซาเร.

Currently Selected:

ปร 8: pce

Highlight

Copy