ดอ โฆว 12
12
ลอง เฌาพรา แดะ อาบราม
1เฌาพรา ยี กาลาง โฆรห ดี อาบราม ตึอน. อัน ต็อห, “แม เลห ฮาว แคง กาง ฆูณ แม, เลห ตัะ วอแว แม บอ เลห แคง มืง แม, วี ฮาว แตห แม ฌัม แคง มืง ปอ มืง ปี ดี แหน โอว ดี แม.
2โอว ดี แตห หลูกหลาน แม แบร กืน, แตห อึณ แบน ดูอี อาโมยว ตาง. โอว ดี ม็องการา ดัว ดี แม, แตห ดอน อี นับ ลอง แม. โอว มืร ดี แตห แม ม็องการา ดัว ดี อี เฮา.
3อาเซ ม็องการา แตห ดี แม, โอว ดี ม็องการา แตห บอ ดี อัน. อาเซ ดืง แม, โอว เฌาพรา มืร ดี วี ดืง อัน. โกบ แม ตี, โอว ดี บอ ม็องการา แตห บอ ดี เฆ ดูอี ดอน โมยว อี กอย แดง กาดาย.”
4ปัน ตี อาบราม ตึอน เลห ฮาว โดง กอย อัน, โบง ปี กาลาง เฌาพรา ดี อัน. บอ อาโลด ฮาว รึม โดบ อัน. ดอ เลห อัน แคง มืง ฮาราน อี มูห มืง บรีม อัน, อาซาก อัน แฮะ โนะ บู ฆึร ดี พัน ซีนัม. 5อาบราม บอ แดะ อีบึณ อัน, อี จืร นาง ซาราย, บอ อาโลด, อี มูห ฆอน วา อัน, แตห ฆาย โดบ อัน. บอ โกรวกราม เฆ ดอน โมยว บอ หมาย แปะ แฮะ ปึอน เฆ แคง มืง ฮาราน ตึอน, อัน ดึห โตต, เลห ฮาว แคง มืง กานัณ. เฆ บอ ฮาว ฌัม แคง มืง กานัณ ตึอน.
6แฮะ ฮอต ฌัม, อาบราม วี วีน ดี แล แคง มืง ตาง ตี บอ มืง, แตห อัน กอ ฌัม มืง เซเคม อี มูห โดง กอย เฮ บอด ปี กรึบ อี. ดอ อัน ตี ยี มึห เฆ ดูอี อาโมยว กานัณ อี กอย แคง มืง ตี. 7ดอ กอย อัน โดง ตี, เฌาพรา มืร กาปลูห ดี อัน ต็อห, “มืง ตาง ตี, โอว ดี ดัว ดี หลูกหลาน แม.” ปัน ตี อาบราม วี โบง กาโช็ง หลู ดี อัน เฌา อี แฮะ กาปลูห บอ กาลาง โฆรห ดี อัน.
8ปัน ตี อาบราม ตึอน วี ฮาว กาโลห มืง เบดาเอน บลาก นา เลห ซีแง, ฮาว ฌัม โดง มึห นอน, วี ซัม ทึบ บีก อัน ดี ตี. โดง คยัะ อัน ตี, อึณ กอย ดี กาแต มืง อา มืง. มืง เบดาเอน กอย นา เฆต ซีแง. มืง อายี บอ กอย นา เลห ซีแง. โดง กอย อัน ตี, อัน วี โบง กาโช็ง โดง ดี กรึบ อัน เฌาพรา.
9วาย อัน ตี อาบราม บอ กาโทะ ฮาว แบน โปละ แบน โปละ, แตห อัน แกร ดี ฌัม นา เตต.
ลอง อาบราม กอย แคง มืง แอฆึบ
10ปัน ตี อึณ บอ ฌัม อาคราว เอต ปี ดี โฮม แคง มืง โดง กอย อาบราม ตึอน. ดอ อัน ตี อาบราม วี โลง มืง แอฆึบ, แตห อัน แบน แคต แคง มืง แอฆึบ ตึอน. อาคราว เอต ปี ดี โฮม แฮะ แบน ดูก ตาง ดี อี. 11ดอ ฮาว อัน โดบ อึณเตณ, แฮะ เครียะ ดี ฌัม แคง มืง แอฆึบ, อัน วี กาลาง โฆรห ดี อีบึณ อัน อี จืร นาง ซาราย. อัน ต็อห, “โอว แฮะ นับ, แม มูห อีบึณ ชีด กาเซา. 12เซ เฆ ดูอี แคง มืง แอฆึบ ฮี ยึร แม, เซ เฆ นับ แม มูห อีบึณ โอว, เฆ ดี บอ ง็อห ยัม โอว. เฆ ดี ดึห แม, กอย โดบ เฆ. 13โคว, แตห แม ต็อห, โอว มูห อีกัด แม. เซ อึณ ปาย ตี แม ดี จอย โอว แกวะ แตห โอว ฌัม ดูก, แตห โอว ลอด ยัม.”
14ดอ ฌัม อัน แคง มืง แอฆึบ, เฆ ดูอี แคง มืง แอฆึบ บอ ยึร อีบึณ อัน ตึอน แฮะ ชีด กาเซา. 15บอ เฆ อามู อามาด คูนดีคัม แฮะ ยึร อัน, เฆ วี กาลาง ดี คูนดีคัม แคะ ชีด อัน. ปัน ตี เฆ วี ตึย อัน ฮาว แคง โฮว คูนดีคัม. 16คูนดีคัม ยี แตห อาบราม กอย ดาคึย โกบ มูห อัน วอแว นาง ซาราย. คูนดีคัม มืร ดัว ดี อัน แบน โมยว แบน โมยว. บอ มาบู, มามัก บอ มาลา บอ หมาย อีบึณ อีมาย, บอ มาลา อาหยาง, บอ มังปร็อง กาฮาต, อัน ดัว โตต ดี อาบราม.
17เฌาพรา ยี ดัว ดูก แบน โมยว แบน โมยว ดี คูนดีคัม บอ ดี ดูอี แคง อึณโฮม อัน โกบ แฮะ ดึห อัน นาง ซาราย อี มูห อีบึณ อาบราม ตึอน, แตห อัน กอย รึม โดบ อัน. 18คูนดีคัม บอ นับ ลอง อัน ตี, อัน วี แดะ อาบราม, ต็อห ดี อัน, “มาเซ ปี โบง แม ดี โอว? เหมา อึณ ปาย ปี ตู กาลาง แม ดี โอว, แตห โอว นับ, อีบึณ ตี มูห อีบึณ แม? 19เหมา อึณปาย ปี ต็อห แม ดี โอว ‘อีบึณ ตี แฮะ มูห วา โอว,’ เหมา อึณ ปาย แม ปี ควาง แตห โอว แดะ อัน แบน อีบึณ โอว? นี, แตห แม ดึห ฮาว อีบึณ แม ดอ ตี นี.” 20คูนดีคัม วี จัร แดเจณ อัน, แตห เฆ ตึย อาบราม บอ โกรวกราม อัน โตต ดอน โมยว, แตห อัน เลห แคง มืง แอฆึบ.
Currently Selected:
ดอ โฆว 12: pce
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
