ยฮ 8

ลอง อีบึณ อู วี

1วาย อัน ตี เฌา เยซู โฮะ แดง นอน เฮ นามัน. 2ปา แคหณา, ซีณวัห เจว, อัน วี ฮาว ลึบ แคง แวง โฮว เฌาพรา. เฆ ดูอี กืน วี ตัห โดง กอย อัน. อัน วี ตูต ต็อห ดี มาโนว เฆ. 3เฆ ดา ซารา อี มาโนว ดารา ยูดา บอ เฆ ดูอี พึง พารีแซ, เฆ วี ดึห ตัห อีบึณ อู วี โดง กอย เฌา เยซู. เฆ แฮะ ยึร อีบึณ ตี ลาย อีมาย อี เฮา. เฆ วี จัร อัน กอย ดี อาต ดูอี กืน. 4เฆ วี ต็อห ดี เฌา เยซู, “แม ดา ซารา, เฆ อี เฮา แฮะ ยึร อีบึณ ตี ลาย อีมาย อี เฮา. 5เซ อึณ มูห ดารา อาโมวแซ, อึณ จัร เย ดึห มาว, วึณ อัน, แตห อัน กอ ยัม. เซ อึณ ยี มูห แม, มาเซ ปี ดี ต็อห แม?” 6เฆ ยี ดีหมอด เฌา เยซู ลอง อัน ตี, โกบ ซี เทว เฆ น็อห อัน, แตห เฆ ปึอน ดี วี พยาก อัน.

เฌา เยซู วี มูด, วี แดม ดี กาดาย, ตา กานู อัน. 7เฆ วี ดีหมอด อัน แบน เฌณ แบน เฌณ. แฮะ ฮอต, อัน วี งึห ยอด เฆ, วี ต็อห, “เซ อึณ มึห ดูอี อู วี กาแต เบ, อี ตู ดึอม โบง หมาบ ดอ เหมา, แตห อัน แบ แยต, ดึห มาว วึณ ดี อาต.” 8อัน แฮะ ฮอต กาลาง โฆรห ตี, อัน วี มูด วี แดม ดี กาดาย.

9ปัน ตี เฆ ดูอี อี โทม โฆรห ตี, เฆ แบน วี แบน วี โหลห หมาบ เฆ, วี เวณ. เฆ ดูอี กัด ฮาว ดี อาต. แฮะ ฮอต เฆ อี เฮา บอ โดบ. แฮะ วี ฆีด มี เฌา เยซู ฆาย อีบึณ ตึอน. 10เฌา เยซู วี งึห, วี ดีหมอด อีบึณ ต็อห, “เหมา เฆ? อึณ แหนน ตู มึห อาเซ อี ดัม หมาบ ดี แม.”

11อีบึณ วี ต็อห, “อาว มึห อาเซ.” เฌา เยซู วี ต็อห, “เซ อึณ ปาย ตี, บอ โอว ตู ดัม หมาบ ดี แม. ดอ ตี นี, แตห แม เวณ, แกวะ วี โบง หมาบ ปอ อึณปัว.”

ลอง เฌา เยซู แฮะ หมาน แฮะ มูห

12วาย อัน ตี ดอ วี กาลาง เฌา เยซู ดี ดูอี กืน, อัน ต็อห, “โอว ปี บลาง อี แตห อึณ บลาง แดง กาดาย. อาเซ โดบ โอว, อัน อาว ฮู โลว กอย แคง อับ ว็อง ดอ เหมา. อัน ดี มึห บลาง อี ดัว อาซาก กามาย ดี อี.”

13ปัน ตี เฆ ดูอี แคง พึง พารีแซ, เฆ วี ต็อห, “ดอ ตี นี แม กาลาง โฆรห ลอง โดว แม. อึณ ปี แม กาลาง ซักเซ ลอง อามู แม. อาว มึห ดีโคว.”

14เฌา เยซู วี ต็อห, “เซ อึณ บอ มูห ปาย ตี, เซ โอว วี กาลาง ซักเซ ลอง อามู โอว, อึณ แฮะ มึห ดีโคว. โคว, โอว แฮะ นับ, ดี เหมา โอว แฮะ ตัห. โอว มืร นับ ซีคยา โดง ดี ว็อะ โอว. ยี มูห เบ, เบ ตู นับ มาเซ ลอง โอว, ดี เหมา โอว ตัห, นา เหมา โอว ดี ว็อะ. 15ปี ซูงพยาด เบ, อึณ โดบ อางยาน ดูอี. โอว ยี ตู ซูงพยาด อามู อาเซ ราง โอว. 16เซ โอว ยี ซูงพยาด อามู อี, ปี ซูงพยาด โอว แฮะ หมาน. โคว, อึณ ตู มูห ปี ซูงพยาด โอว อู วี. อึณ มูห บอ โอว บอ ฆูณ โอว, อี ตึย โอว ตัห ดี นี. ยาย ลาย โพรม ปี ซูงพยาด ยาย. 17อึณ ปี ปี แดม อูน แคง บับ ดารา เบ. อึณ ต็อห, เซ อา วี กาลาง อู โมยว, ปี กาลาง ฆาย แฮะ หมาน. 18ปาย ตี, บอ โอว กาลาง ลอง โอว. ปอ อู วี อี กาลาง ลอง โอว, อึณ มูห ฆูณ โอว, อี แฮะ ตึย โอว ตัห ดี นี.”

19เฆ วี ดีหมอด อัน ต็อห, “ฆูณ แม กอย ดี เหมา?”

เฌา เยซู วี ต็อห, “บอ โอว บอ ฆูณ โอว เบ ตู นับ. เซ เบ นับ โอว, เบ ดี บอ นับ บอ ฆูณ โอว.”

20ดอ กาลาง เฌา เยซู โฆรห ตี, อัน กอย แคง แวง โฮว เฌาพรา อี กาตัด โดง เบลห เฆ ปี ดี หลู. อึณ ยี ตู มึห อาเซ เหมต อัน, โกบ หณัม แตห เฌาพรา เฆ โบง ปาย ตี.

21ปอ อู เฌณ เฌา เยซู วี ต็อห ดี เฆ, “โอว ดี เลห โดง กอย เบ นี. เบ ดี บอ วี เหรต โอว. เบ ดี บอ ยัม โกบ มึห เบ หมาบ. โดง ดี ฮาว โอว, เบ ยี ตู ปึอน โดบ.”

22โกบ กาลาง อัน โฆรห ตี, เฆ ดา ตาง ยูดา วี ลาย กาลาง ต็อห, “อึณ แหนน, อัน ต็อห ดี ง็อห โดว บรีม อัน. โคว อัน ตี อัน ต็อห, ‘โดง ดี ฮาว โอว เบ ตู ปึอน โดบ.’”

23เฌา เยซู วี ต็อห, “เบ แฮะ เลห ตัห นา ครึม นี. โอว แยะ แฮะ เลห ตัห นา แดง โลง. เบ แฮะ กอย แดง กาดาย นี เซเซ. โอว ยี ตู ดึอม กอย แดง กาดาย นี. 24โอว แฮะ ฮอต กาลาง, อาเซ โอว มูห. โอว มืร แฮะ ฮอต ต็อห, เซ เบ ตู หณึม, โอว มูห ดูอี ปี ต็อห โอว, เบ ดี บอ ยัม โกบ หมาบ เบ.”

25เฆ วี ดีหมอด ต็อห, “อาเซ แม มูห?” เฌา เยซู วี ต็อห, “โอว แฮะ ฮอต กาลาง ดี เบ แบน เฌณ แบน เฌณ, อาเซ โอว มูห. 26โอว แฮะ มึห กืน ปี ดัม หมาบ เบ. อัน เฌา อี ตึย โอว ตัห ดี นี, ปี กาลาง อัน แฮะ หมาน. แคะ ปี ยึร โอว โฆรห อัน, โอว ดี วี กาลาง แตห เฆ ดูอี อี กอย แดง กาดาย ปึอน ดี โทม.”

27เฆ อี โทม โฆรห ตี, เฆ ตู นับ, เฌา เยซู กาลาง โฆรห ตี ลอง เฌาพรา อี มูห ฆูณ อัน. 28เฌา เยซู วี ต็อห, “อึณ มูห โอว, อี แฮะ แบน ฆอน ดูอี. เบ ฮี ดึก โอว ดี ร็อง, เบ ดี บอ นับ, โอว มูห วี ปี ต็อห โอว. ดอ อัน ตี เบ ดี บอ นับ, โอว ตู กาลาง มาเซ อี เลห อางยาน โอว. โอว กาลาง มี แคะ ปี มาโนว ฆูณ โอว ดี โอว. 29อัน เฌา อี แฮะ ตึย โอว ตัห ดี นี, อัน มืร แฮะ กอย รึม โดบ โอว. อัน ตู แวน แตห โอว กอย โอว อู วี โกบ โบง โอว อี ล็อะ น็อห อัน เซเซ.” 30ดอ กาลาง อัน โฆรห ตี, อึณ มึห ดูอี กืน, อี หณึม อัน.

ลอง หลูกหลาน ดา อาบราฮัม

31เฌา เยซู ยี กาลาง ดี เฆ ดูอี อายูดา อี แฮะ หณึม อัน ต็อห, “เซ เบ โดบ ปี มาโนว โอว, เบ มูห ดีแบ โอว อาคัร หมาน. 32ปาย ตี เบ ดี นับ ซีคยา นา หมาน. นา หมาน ตี วี แตห เบ กอย ทังฮาง.”

33เฆ ต็อห ดี อัน, “เย มูห หลูกหลาน ดา อาบราฮัม ตึอน. เย ตู ดึอม แบน หมาย อี. เหมา อึณ ปาย ปี ต็อห แม, เย ตู กอย ทังฮาง?”

34เฌา เยซู วี ต็อห, “โอว ต็อห อาคัร ดี เบ. อาเซ โบง หมาบ, อัน วี แบน หมาย หมาบ, แตห หมาบ อึบ อัน. 35เซ อึณ มูห หมาย, อัน ตู ปึอน กอย แคง อึณโฮม ดา กาณา อัน เซเซ. เซ อึณ ยี มูห ฆอน ดา กาณา ตึอน, อัน ปึอน ดี กอย แคง อึณโฮม ดา กาณา อัน เซเซ. 36โคว, โอว ต็อห, เซ ฆอน เฌาพรา แตห เบ ลอด, ดา กาณา ตึอน อาว ฮู ปึอน ดี วี อึบ เบ. 37โอว นับ, เบ มูห หลูกหลาน ดา อาบราฮัม ตึอน. เบ ยี ต็อห ดี ง็อห แวน โอว โกบ ตู แตห เบ โฆรห โอว ลึบ แคง น็อห เบ. 38โอว กาลาง ดี เบ ลอง แปะ แฮะ ยึร โอว ดอ กอย รึม โอว โดบ ฆูณ โอว. เบ มืร โทม โบง โดบ โฆรห ฆูณ เบ.”

39เฆ วี ต็อห, “ดา อาบราฮัม ตึอน มูห ฆูณ ดัง เย.”

เฌา เยซู วี ต็อห, “เซ อึณ หมาน, มูห เบ หลูกหลาน ดา อาบราฮัม, เบ ดี บอ โบง แคะ ปี ดึอม โบง อัน. 40อึณ ยี ลึห ซีคยา, เบ ซี ง็อห อาซาก โอว. โอว ยี มูห ดูอี อี แฮะ กาลาง ดี เบ ลอง นา หมาน แปะ แฮะ กาลาง เฌาพรา ดี โอว. ดา อาบราฮัม ตู ดึอม โบง ปี ปี ซี โบง เบ. 41เบ โบง แคะ ปี โบง ฆูณ เบ, อี ตู มูห ดา อาบราฮัม.”

เฆ วี ต็อห, “เย ตู มูห ฆอน ยา มาลัม. เย มึห ฆูณ มี อู กาดัง อี มูห เฌาพรา.”

ลอง ฆอน โบว กานัม

42ปัน ตี เฌา เยซู วี ต็อห, “เซ อึณ หมาน, เฌาพรา มูห ฆูณ เบ, เบ ดี บอ ร็อก บอ โอว. โคว, ดอ ตี นี โอว แฮะ เลห โดง กอย อัน, วี ตัห ฌัม ดี นี. โอว ตู ตัห โกบ โบง โอว ปี อึง โอว. เฌาพรา แฮะ ตึย โอว. 43เหมา อึณ ปาย ปี ตู นับ เบ โฆรห โอว? อึณ มูห โกบ ตู ซี โทม เบ โฆรห โอว. 44ฆูณ เบ มูห โบว กานัม, เบ มืร มึห น็อห ซี โบง ปี อึง ฆูณ เบ ตี. อู ซีณ ดอ โฆว อัน, โบว กานัม ตี แยะ แฮะ ง็อห อาซาก อี. อัน มืร ตู ดึอม โบง นา หมาน ดอ เหมา โกบ ตู มึห นา หมาน มาเซ แคง น็อห อัน. เซ อัน กาลาง โฆรห โมยว เหมา, อึณ เลห แคง น็อห อัน. โคว, อัน ซีมา กาโลว. อัน บอ มูห ฆูณ เฆ ดูอี อี ซีมา กาโลว ดอน อี. 45อึณ ยี มูห โอว, เบ ยี ตู หณึม โกบ กาลาง โอว นา หมาน ดี เบ. 46อาว มึห อาเซ อี นับ ดี บยัะ หมาบ ปี ดึอม โบง โอว. อึณ มูห โอว, โอว กาลาง นา หมาน ดี เบ. เหมา อึณ ปาย ปี ตู หณึม เบ โฆรห โอว? 47อาเซ มูห อาโมยว เฌาพรา, อัน นับ ดี โทม โฆรห เฌาพรา. เบ ยี ตู มูห อาโมยว เฌาพรา. โคว, เบ ตู นับ ดี โทม โฆรห อัน.”

ลอง เฌา เยซู กาลาง อาเซ อัน มูห

48เฆ ดา ตาง ยูดา วี ต็อห, “แฮะ หมาน ปี ดึอม ต็อห เย. แม มูห ดูอี อาโมยว ซามารี. แม มึห บอ กานัม กอย แคง โดว โบ็ง แม.”

49เฌา เยซู วี ต็อห, “โอว ตู มึห กานัม แคง โดว โอว. โอว โรวเซ ฆูณ โอว. เบ ยี ตู โรวเซ โอว. 50โอว ตู โลว อี โรวเซ โอว. อึณ ยี มึห อัน เฌา อี ซี แตห อี เฮา โรวเซ โอว. อัน เฌา ตี อี ดี ซูงพยาด อาฆยาง เบ. 51โอว ต็อห อาคัร ดี เบ. อาเซ โทม โดบ โฆรห ปี กาลาง โอว, อัน ตู ยัม ดอ เหมา.”

52ดอ กาลาง อัน โฆรห ตี, เฆ ดา ตาง ยูดา วี ต็อห, “ดอ ตี นี, เย นับ ซีคยา, แฮะ มึห กานัม กอย แคง โดว แม. ดา อาบราฮัม ตึอน แฮะ ยัม. บอ เฆ ดูอี อี บยาน โฆรห เฌาพรา แฮะ ยัม. แม ยี ต็อห, เซ ดูอี อู วี ดี โดบ ซีคยา โฆรห ปี กาลาง แม, อัน ตู ยัม ดอ เหมา. 53แม ทาง, แม แฮะ ตาง หลึอม ดา อาบราฮัม อี มูห ฆูณ ดัง เย? ดา อาบราฮัม ยี แฮะ ฮอต ยัม. บอ เฆ ดูอี อี บยาน โฆรห เฌาพรา แฮะ ฮอต ยัม. แม ทาง อาเซ แม มูห?” 54เฌา เยซู วี ต็อห, “เซ โอว ปีพูง โอว, อาว มึห ดีโคว. อึณ มูห ฆูณ โอว, เบ ต็อห อัน มูห เฌาพรา ปี กรึบ เบ, อัน แฮะ ดัว อาพูง ดังโคว ดี โอว. 55เบ ตู นับ อัน. โอว ยี นับ อัน. เซ โอว ต็อห, ‘โอว ตู นับ เฌาพรา,’ โอว ดี บอ กาโลว ปี เบ. โอว ยี นับ ซีคยา อัน. โอว บอ โทม โดบ โฆรห ปี กาลาง อัน ดี โอว. 56บอ ฆูณ ดัง เบ อี จืร ดา อาบราฮัม, อัน โคย กาเซา ดอ นับ อัน ดี อาต ลอง ดี ตัห โอว แดง กาดาย นี. แฮะ ฮอต, ดอ วี ยึร อัน ลอง แฮะ ตัห โอว ดี นี, อัน วี แบน น็อห ดาคึย.”

57เฌา เยซู แฮะ ฮอต กาลาง โฆรห ตี, เฆ ดา ตาง ยูดา วี ต็อห ดี อัน, “แม หณัม โนะ พัน ฆึร ซีนัม. แม ยี ต็อห, แม แฮะ ยึร ดา อาบราฮัม ตึอน.”

58เฌา เยซู วี ต็อห, “โอว ต็อห อาคัร ดี เบ. โอว แฮะ มึห ซีณ อาต ฆึอด ดา อาบราฮัม.”

59ดอ กาลาง อัน โฆรห ตี, เฆ ดึห มาว, ต็อห ดี วึณ อัน, แตห อัน ยัม. เฌา เยซู ยี เครียง โดว อัน, วี เลห แคง แวง โฮว เฌาพรา, แกวะ แตห อี ยึร อัน.

Currently Selected:

ยฮ 8: pce

Highlight

Copy