ยฮ 9

ลอง เฌา เยซู ปีแกน ดูอี งาย อับ

1ดอ ฮาว เฌา เยซู โดบ อึณเตณ, อัน ยึร ดูอี อู วี, งาย อัน อับ ซีณ ดอ ฆึอด อัน. 2เฆ ดีแบ อัน วี ดีหมอด อัน ต็อห, “แม ซารา, งาย อัน อับ โกบ มาเซ? อึณ อับ โกบ หมาบ อัน? อึณ อับ โกบ หมาบ ฆูณ มา อัน?”

3เฌา เยซู วี ต็อห, “อาว มูห งาย อัน อับ โกบ หมาบ ปี โบง อัน บอ หมาบ ฆูณ มา อัน. งาย ดูอี ตี แฮะ อับ แตห ดูอี ปึอน ดี ยึร แคะ ปี ดี โบง เฌาพรา ดี อัน. 4ดอ มึห บลาง ซีแง, เอ โลว โบง ฆาน เฌาพรา, อี แฮะ ตึย โอว ตัห ดี นี. อาว เหลณ อึณ ดี บอ ปี แปร อับ. ดอ อัน ตี อาว มึห อาเซ ปึอน ดี โบง ฆาน. 5ดอ กอย โอว แดง กาดาย, โอว ปี บลาง อี แตห อึณ บลาง แดง กาดาย.”

6เฌา เยซู แฮะ ฮอต กาลาง โฆรห ตี, อัน วี ปัต แดง กาดาย, วี โบง แตห อึณ แบน โณะ. แฮะ ฮอต, อัน วี ดึห โณะ ตี, พ็อห ดี งาย ดูอี ตึอน. 7เฌา เยซู วี ต็อห ดี อัน, “แตห แม ฮาว ดี อึม ดึง อี จืร อึม ซีโลวอาม, แตห แม บาย งาย แม แคง อึม ตี.” (ลอง ดาง โฆรห “ซีโลวอาม” ตี, อึณ เลห “ตึย”). ปัน ตี ดูอี งาย อับ ตึอน วี ฮาว บาย งาย อัน. ดอ วี ตัห อัน, งาย อัน แฮะ วี ปึอน ยึร.

8เฆ ดูอี อี กอย กาตัด กาง อัน บอ เฆ ดูอี อี ดึอม ยึร ดอ งาย อับ อัน, เฆ วี ลาย ดีหมอด ต็อห, “อาว มูห, ดูอี วี ตี มูห ดูอี อี กอย หมาณ รึอน ดี อี ตึอน?” 9มัง อี ต็อห, “แฮะ มูห. อัน มูห วี ตี.” มัง อี ยี ต็อห, “อาว มูห อัน. วี ตี, อัน แหนน ดูอี งาย อับ ตึอน.” อัน ยี วี ต็อห, “แฮะ มูห โอว.”

10เฆ วี ต็อห, “เซ อึณ หมาน แฮะ มูห แม, เหมา แม ปาย ดี ปึอน ดี ยึร?”

11อัน วี ต็อห, “ดูอี อี จืร อาเยซู, อัน แฮะ โบง โณะ อี แจก, วี พ็อห ดี งาย โอว. อัน วี จัร โอว ฮาว บาย งาย โอว ดี อึม ซีโลวอาม ตึอน, โอว มืร ฮาว. แฮะ ฮอต, โอว วี ปึอน ดี ยึร.”

12เฆ วี ดีหมอด อัน ต็อห, “ดูอี วี ตี, นา เหมา อัน กอย?” อัน วี ต็อห, “โอว ตู นับ.”

ลอง ดา ตาง ดีหมอด ดูอี อี ดึอม งาย อับ

13ปัน ตี เฆ ตึย ดูอี อี ดึอม งาย อับ ตึอน, แตห อัน ฮาว โดง กอย เฆ ดูอี แคง พึง พารีแซ. 14ซีแง โบง เฌา เยซู โณะ แตห งาย ดูอี ตึอน วี ยึร, อึณ มูห ซีแง ดีเหลา. 15โคว, เฆ ดูอี แคง พึง พารีแซ วี ดีหมอด อัน, เหมา อึณ ปาย ปี ปึอน ยึร อัน. อัน ต็อห, “ดูอี ตึอน, อัน แฮะ พ็อห โณะ ดี งาย โอว. แฮะ ฮอต, โอว วี ฮาว บาย, โอว วี ปึอน ยึร.”

16เฆ ดูอี แคง พึง พารีแซ มัง อี, เฆ ต็อห, “เฌาพรา ตู ตึย ดูอี ตี ตัห ดี นี. โคว, อัน ตู กัม ซีแง ดีเหลา.”

เฆ อี เฮา มัง อี ยี ดีหมอด, “เซ อัน มูห ดูอี อี มึห หมาบ, เหมา อัน ปาย ดี โบง นา หมึอม อาม กาเซา ฌึร ตี?” ปาย ตี เฆ ตู ลาย โพรม.

17แฮะ ฮอต, เฆ วี ต็อห ดี ดูอี ตึอน, “มาเซ ปี ดี ต็อห แม ลอง ดูอี ตี, อี แฮะ แตห งาย แม ยึร?”

ดูอี ตึอน วี ต็อห, “อัน มูห ดูอี อี บยาน โฆรห เฌาพรา.”

18เฆ ดา ตาง ยูดา หณัม หณึม, ดูอี ตี แฮะ ดึอม มูห ดูอี งาย อับ อี แฮะ วี แกน. เฆ วี แดะ ฆูณ มา อัน ตัห โดง กอย เฆ. 19เฆ วี ดีหมอด ฆาย ต็อห, “ดูอี ตี มูห ฆอน บาย? แฮะ หมาน, ปี ต็อห บาย, งาย อัน แฮะ ดึอม อับ ซีณ ฆึอด อัน? เหมา อัน ปาย ดี ปึอน ยึร ดอ ตี นี?”

20ฆูณ มา อัน วี ต็อห, “ยาย นับ, อัน มูห ฆอน ยาย. ยาย บอ นับ, งาย อัน แฮะ ดึอม อับ ซีณ ฆึอด อัน. 21อึณ ปาย เหมา ปี ปึอน ยึร อัน ดอ ตี นี บอ, ลอง อาเซ แฮะ แตห อัน ยึร, ยาย ตู นับ. แตห เบ ดีหมอด อัน. อัน แฮะ ตาง. อัน แฮะ นับ ดี กาลาง ราง อัน.” 22ฆูณ มา อัน วี ต็อห ฌึร ตี โกบ โยว ฆาย เฆ ดา ตาง ยูดา. เฆ ดา ตาง แฮะ ฮอต ซูงพยาด ต็อห, “อาเซ กาลาง ลอง อาเยซู ตึอน, อัน มูห ดูอี ปี ร็อห ปี ตึย เฌาพรา แตห อัน คยอด ดูอี, ดูอี ตี อาว ฮู ปึอน ลึบ แคง โฌง กรึบ เฆ ดูอี อายูดา เฌาพรา.” 23โคว อัน ตี ฆูณ มา ดูอี ตึอน แฮะ ต็อห, “อัน แฮะ ตาง. แตห เบ ดีหมอด อัน.”

24เฆ วี แดะ ดูอี อี ดึอม มึห งาย อับ, แตห อัน ตัห โดง กอย เฆ ปอ อู เฌณ. เฆ ต็อห ดี อัน, “แตห แม อืบ มยูก เฌาพรา. เย แฮะ นับ, ดูอี ตึอน มูห ดูอี ตู หมึอม.”

25อัน วี ต็อห, “โยว อัน หมึอม ตู หมึอม, โอว ตู นับ. อู โมยว โอว ยี นับ. คา อาต งาย โอว แฮะ อับ. ดอ ตี นี โอว แฮะ ปึอน ดี ยึร.”

26ปัน ตี เฆ วี ดีหมอด ต็อห, “มาเซ ปี โบง อัน ดี แม? เหมา อัน ปาย ดี ปีแกน แม?”

27อัน วี ต็อห, “โอว แฮะ ฮอต แค ดี เบ ลอง อัน ตี. เบ ยี ตู โทม. เหมา อึณ ปาย ปี ซี โทม เบ ปอ อู เฌณ? เบ มืร ซี แบน ดีแบ อัน?”

28ปัน ตี เฆ กาลาง โฆรห จีจีว ดี อัน. เฆ วี ต็อห, “แม มูห ดีแบ ดูอี ตี. เย ยี มูห ดีแบ ดา ซารา อาโมวแซ. 29เย นับ, เฌาพรา แฮะ ดึอม กาลาง โฆรห ดี ดา อาโมวแซ ตึอน. เซ อึณ ยี มูห ดูอี ตี, เย ตู นับ นา เหมา อัน ตัห.”

30ดูอี ตึอน วี ต็อห, “อาตี แฮะ หมึอม อาม กาเซา. เบ ตู นับ นา เหมา อัน ตัห. อัน แยะ แฮะ โบง แตห งาย โอว ยึร. 31เอ นับ, เฌาพรา ตู โทม ปี ซาคึร เฆ ดูอี อี โบง หมาบ. อัน โทม ปี ซาคึร เฆ ดูอี บอด อี โบง ปี อึง อัน. 32เอ ตู ดึอม ยึร ลอง อาเซ อี นับ ดี โบง แตห งาย ดูอี วี ยึร, เซ งาย อัน แฮะ อับ ซีณ ดอ ฆึอด อัน. 33เซ เฌาพรา ตู ตึย ดูอี ตี, อัน ตู ปึอน โบง มาเซ.”

34ปัน ตี เฆ ดา ตาง ยูดา วี ต็อห, “แม มึห หมาบ กืน กาเซา ซีณ ดอ ฆึอด แม. ดอ ตี นี แม แฮะ ยัะ วี มาโนว เย.” แฮะ ฮอต, เฆ วี ซูต อัน เลห.

ลอง อับ ว็อง แคง น็อห ดูอี

35เฌา เยซู แฮะ ยึร ลอง เฆ ดา ตาง แฮะ ซูต ดูอี ตึอน เลห โดง กอย เฆ, เฌา เยซู วี เหรต อัน. เฌา เยซู แฮะ วี กาตูณ อัน, วี ดีหมอด อัน ต็อห, “แม หณึม ดูอี อี แฮะ แบน ฆอน ดูอี?”

36ดูอี ตึอน วี ต็อห, “อาเซ อัน มูห? แตห แม กาลาง ดี โอว ลอง ดูอี ตี, แตห โอว ปึอน ดี หณึม อัน.”

37เฌา เยซู วี ต็อห, “แม แฮะ ดึอม ยึร อัน. ดอ ตี นี อัน กาลาง โฆรห ดี แม.”

38ปัน ตี อัน วี ต็อห, “แม เฌา, โอว แฮะ หณึม.” แฮะ ฮอต, อัน บอ กรึบ เฌา เยซู.

39เฌา เยซู วี ต็อห, “โอว แฮะ ตัห ฌัม แดง กาดาย นี, แตห โอว ดัม หมาบ ดี อี. โอว ดี แตห ดูอี งาย อับ วี ยึร, โอว ดี บอ แตห ดูอี งาย บลาง วี ปี ดูอี งาย อับ, แกวะ แตห เฆ ปึอน ดี ยึร บลาง, ปี ฮับ เฌาพรา แคง น็อห ดูอี.”

40อึณ ยี มึห ดูอี แคง พึง พารีแซ มัง อี, เฆ กอย รึม โดบ เฌา เยซู ดอ กาลาง อัน โฆรห ตี. เฆ แฮะ ยึร โฆรห ตี, เฆ วี ต็อห, “เซ แม ต็อห ปาย ตี, อึณ ปี บอ เย แฮะ งาย อับ.”

41เฌา เยซู วี ต็อห ดี เฆ, “เซ งาย เบ แฮะ อับ อาคาคัร, ปี โบง เบ ตู แบน หมาบ ดี เบ. ดอ ตี นี, เบ ยี ต็อห, เบ ปึอน ยึร. โคว, หมาบ เบ กอย โดบ เบ.”

Currently Selected:

ยฮ 9: pce

Highlight

Copy