ลก 10

ลอง เฌา เยซู จัร ดูอี บู ฆึร วี โบง ฆาน อัน

1วาย อัน ตี เฌา เยซู บอ ร็อห ดูอี บู ฆึร วี,#10:1 บับ ดอ โฆว มัง โมยว ต็อห 72 วี แตห เฆ ฮาว แบน ฆู แบน ฆู, แยต ดี อาต อัน, กาลาง ลอง เฌาพรา. อัน จัร เฆ ฮาว แคง เรา แคง มืง, โดง ดี วี โดบ อัน ดี ปัน เฆ ดอน นา ดอน โปละ. 2อัน บอ ต็อห ดี เฆ ลอง ฆาน ปี ดี โบง เฆ, “ดูอี อี ซี โทม ลอง เฌาพรา เฆ กืน. เฆ ปี มาน โหงว อี แฮะ ซีน, อี แฮะ โลว โซะ. เฆ ดูอี อี โซะ โหงว ตี ยี เปรต. โคว, แตห เบ หมาณ ดี เฌาพรา อี มูห ดา กาณา มาน โหงว ตี, แตห อัน ตึย ดูอี อี โบง ฆาน เฌาพรา, แตห เฆ ปี ดูอี โซะ โหงว. 3โดง ดี ฮาว เบ, อึณ ปาย นี. เบ ปี ฆอน มาบู อี ฮาว โดง กอย มาโซว แปร อี ซี ก็อะ ยัม มาบู. 4แกวะ แตห เบ แงะ ฮู, แกวะ แตห เบ โฆ็ง รึอน เฆ ครีว. แกวะ แตห เบ โฆ็ง คูดีณ กาปลูะ, ฮาว โดบ อึณเตณ. ดอ ฮาว เบ โดบ อึณเตณ, เซ เบ บอ กาตูณ ดูอี เฮา, แกวะ แตห เบ กามวน ดี อัน.

5เซ เบ ดี บอ ลึบ แคง กาง อี เฮา, อาต กาลาง เบ แบน โมยว แบน โมยว, เบ โลว ม็องการา แตห ดี เฆ ต็อห, ‘แตห เฌาพรา ดัว น็อห เฆียด ดี เบ ดอน อี อี กอย แคง กาง นี.’ 6เซ ดูอี อี กอย แคง กาง ตี บอ รับ ม็องการา ปี ดัว เบ, แตห อึณ บอ กอย รึม โดบ เฆ. เซ เฆ ยี ตู รับ ม็องการา ปี ดัว เบ, เบ โลว วี ดึห วีว ม็องการา ตี. 7เบ โลว กอย แคง กาง เฆ ดูอี อี รับ เบ ตี. แกวะ แตห เบ ฮาว กอย ปอ อู กาง. เบ บอ โลว โฮม ปี ดัว เฆ ดี เบ แคง กาง ตี. โคว, อาเซ โบง ฆาน, อัน แฮะ กาอาบ ปึอน รูห อัน.

8เซ เบ บอ ลึบ แคง มืง อู มืง, เซ เฆ ดูอี บอ รวห เบ, แตห เบ โฮม ปี ดัว เฆ ดี เบ. 9แคง มืง ตี, เบ โลว โบง แตห ดูอี เซา วี แกน. เบ บอ โลว กาลาง ดี ดูอี แคง มืง ตี, ‘เฌาพรา แฮะ กาตัด ดี ตัห อึบ กาดาย.’ 10เซ เบ บอ ลึบ แคง มืง อู มืง, เซ เฆ อี กอย แคง มืง ตี ตู รวห เบ, เบ โลว เลห นา เรต กาง, ฮาว ดี อึณเตณ ต็อห, 11‘กาปูห แคง มืง เบ อี ดึก ดี เปลา เย, เย ดี ดียึห อูน แตห อึณ บยัะ แคะ ตู หมึอม เบ. เบ ยี โลว โหลห, โลว นับ ซีคยา, เฌาพรา แฮะ กาตัด ดี ตัห อึบ กาดาย.’

12โอว ต็อห ดี เบ, เซ เฌาพรา ดี ซูงพยาด ดารา ดี ดูอี บอกาเฆลียด, เฆ ดูอี อี กอย แคง มืง โซวโดม, เฆ ดี โลว คัม หมาบ กืน. เฆ ยี ตู โลว คัม กืน แคะ ปี โลว คัม เฆ ดูอี อี กอย แคง มืง ตี.” ปาย ตี เฌา เยซู กาลาง ดี เฆ ดูอี บู ฆึร วี.

13เฌา เยซู วี กาลาง ลอง ดูอี อี ตู หณึม อัน. อัน ต็อห, “เบ ดูอี อี กอย แคง มืง โควราซีน บอ มืง เบดซีดา, เบ ดี ฌัม ดูก ตาง. อี หมึอม อาม กาเซา แปะ แฮะ โบง โอว แคง มืง เบ, โอว ตู มึห ดี โบง แคง มืง ทูโรว ฆาย มืง ซีโดน ตึอน. เซ โอว ยี โบง ฌึร ตี แคง มืง ทูโรว ฆาย มืง ซีโดน ตี, เฆ ดูอี อี กอย แคง มืง ตี, เฆ ดี บอ ชึบ ครึง จาน บอ กอย แคง เบรา เงา อู เฌณ, แตห อึณ บยัะ, เฆ แฮะ แวน น็อห บรีม, วี ดึห น็อห กามาย. 14เซ ฮี ฌัม ซีแง ดี ซูงพยาด เฌาพรา อามู ดูอี ดอน อี, เฆ ดูอี แคง มืง ทูโรว ฆาย มืง ซีโดน ตึอน, เฆ ตู โลว คัม หมาบ แคะ ปี โลว คัม เบ. 15เบ ดูอี อี กอย แคง มืง กาเปนารึม, เซ เบ ทาง เบ ดี ปึอน ดี โฮะ ฆางหราว, อึณ ตู หมาน. เบ ดี โลว โลง แคง มืง มารานัะ.”

16เฌา เยซู วี ต็อห ดี เฆ ดีแบ อัน, “อาเซ โทม โฆรห เบ, อัน ดี บอ โทม โฆรห โอว. อาเซ ยี ตู หณึม เบ, อัน ดี บอ ตู หณึม โอว. อาเซ ยี ตู หณึม โอว, อัน ดี บอ ตู หณึม บอ อัน เฌา อี ตึย โอว ตัห ฌัม ดี นี.”

17วาย อัน ตี เฆ ดูอี บู ฆึร วี ปี ร็อห เฌา เยซู ตึอน, เฆ วี ตัห ฌัม โดง กอย เฌา เยซู. น็อห เฆ บอ ดาคึย กาเซา. เฆ ต็อห, “อึย แม เฌา, ดอ ฆาว เย ปวน แม, จัร กานัม เลห แคง โดว โบ็ง อี, เฆ แฮะ โทม โดบ ปี ต็อห เย.”

18เฌา เยซู วี ต็อห ดี เฆ, “โอว แฮะ ยึร โบว กานัม โจห โลง แคง ฆางหราว ปี ปลัะ อึณเปลต. 19แตห เบ โทม. โอว แฮะ ดัว ปวน ดี เบ, แตห เบ ปึอน ดี แณต มาฮัณ เฆ มา แมงเงา, แตห เบ บอ มึห ปวน ดี อึบ กานัม อี ซี อึบ เบ ดอน โมยว. อึณ ยี ตู มึห มาเซ อี แป ดี โบง แตห อึณ แบน ดูก ดี เบ. 20แกวะ แตห เบ โคย โกบ โทม กานัม โฆรห เบ. แตห เบ ยี มึห น็อห ดาคึย โกบ แฮะ แดม อูน เฌาพรา จืร เบ แคง ฌาราง ดูอี ดี ปึอน ลึบ แคง มืง ฆางหราว.”

21ดอ อัน ตี น็อห พึอม เฌาพรา แตห เฌา เยซู แบน น็อห ดาคึย กาเซา. อัน บอ ต็อห, “อึย แม ฆูณ โอว, แม มูห ดา กาณา อี อึบ บอ ฆางหราว บอ กาดาย. โอว อืบ แม เฌา. ลอง ปี มาโนว โอว ฌึร ตี, แม ตู แตห อึณ ลึห ดี เฆ ดา ตาง บอ ดี เฆ ดูอี มึห อางยาน. อึณ ยี มูห เฆ ดูอี อี ปี ฆอน ดีแตด, เฆ นับ ซีคยา ลอง อัน ตี โกบ แฮะ บยัะ แม, แตห อึณ ลึห ดี น็อห เฆ. แม ฆูณ โอว, แม แฮะ อึง ดี โบง ปาย ตี. โคว, โอว อืบ แม.” แฮะ ฮอต อัน วี ต็อห ดี เฆ อี กอย โดบ อัน,

22“ฆูณ โอว แฮะ อาบ ดัว โตต ดอน โมยว ดี โอว, แตห โอว นับ โตต. อึณ มืร ตู มึห อาเซ อี นับ ฆอน เฌาพรา. อึณ มูห มี ฆูณ โอว อี นับ ฆอน อัน. อึณ มืร ตู มึห อาเซ อี นับ เฌาพรา อี มูห ฆูณ โอว. อึณ มูห มี ฆอน อัน อี นับ ฆูณ อัน. บอ เฆ ดูอี อี ปึอน ยึร โฆรห ปี กาลาง ฆอน เฌาพรา ลอง ฆูณ อัน, บอ เฆ ดี นับ เฌาพรา, อี มูห ฆูณ โอว.”

23แฮะ ฮอต ปัน ตี เฌา เยซู ยอด เฆ ดีแบ อัน. อัน บอ ต็อห ดี เฆ ดอ ตู มึห อี เฮา โทม, “อาเซ แฮะ ปึอน ยึร ดอน โมยว แปะ แฮะ ยึร เบ, อัน แฮะ แบน น็อห ดาคึย. 24โอว ต็อห ดี เบ, อึณ ดึอม มึห เฆ ดูอี อี บยาน โฆรห เฌาพรา บอ เฆ คูนดีคัม แบน กาดัง แบน กาดัง, เฆ แฮะ ซี ยึร ปี ยึร เบ ดอน โมยว. เฆ ยี ตู ปึอน ดี ยึร. เฆ บอ ซี โทม แปะ แฮะ ปึอน เบ ดี โทม, เฆ ยี ตู ปึอน ดี โทม.”

ลอง ดูอี อาโมยว ซามารี

25ดอ อัน ตี อึณ มึห ดูอี อู วี, อัน มาโนว ดารา เฌาพรา. อัน ตัห เทว เฌา เยซู. อัน บอ ต็อห, “อึย แม ดา ซารา, มาเซ ปี โลว โอว โบง, แตห โอว ปึอน ดี กอย รึม โดบ เฌาพรา เซเซ?”

26อัน แฮะ ฮอต ต็อห ปาย ตี, เฌา เยซู วี ต็อห ดี อัน, “มาเซ ปี มาโนว บับ ดารา เฌาพรา ดี แม? เซ แม ตีห บับ เฌาพรา, อึณ กาหลูห ปาย เหมา ดี แม?”

27ดูอี ตึอน วี ต็อห, “แคง บับ เฌาพรา อึณ ต็อห ปาย นี, ‘อัน เฌา มูห เฌาพรา อี อึบ เบ. เบ โลว ร็อก อัน เฌา ตี, แตห บอ น็อห บอ โตต ร็อก อัน. แคะ ปึอน เบ ร็อก แคง น็อห, แคะ มึห เบ อางยาน, แคะ มึห เบ โปลม, ฌึร ตี ดอน โมยว เบ โลว ดึห โตต, วี ร็อก อัน เฌา. เบ บอ โลว ร็อก อี เฮา แตห อึณ ปี เบ ร็อก โดว บรีม เบ.’ โอว ตีห แคง บับ เฌาพรา ปาย ตี.”

28เฌา เยซู วี ต็อห ดี อัน, “แฮะ มูห ปี ต็อห แม ตี. เซ แม มืร โบง ปาย ตี, แม ดี บอ ปึอน ดี กอย รึม โดบ เฌาพรา เซเซ.”

29ดูอี ตึอน ยี ตู ซี แตห ซาเร อัน ชึม. อัน วี ดีหมอด ลอง อัน ตี ต็อห, “อี เฮา ตี, อัน มูห อาเซ?”

30เฌา เยซู วี ต็อห ดี อัน, “ดอ มึอน, อึณ มึห ดูอี อาโมยว ยูดา อู วี. อัน เลห มืง เยรูซาแลม, ฮาว โลง ดี มืง เยรีโคว. ดอ ฮาว อัน โดบ อึณเตณ, อัน กาตูณ ดา โฌน. ดา โฌน ตี บอ ดึห ฮาว ครึง ตา อัน บอ มัห อัน, แตห อัน กอ ยัม ปีว. แฮะ ฮอต, ดา โฌน ตี วี เบลห แวน อัน ดี ตี. 31ดอ อัน ตี อึณ บอ มึห ดูอี อี หลู ดี เฌาพรา อู วี, อี มูห อาโมยว ยูดา. อัน ฮาว โดบ อึณเตณ ตึอน. อัน บอ ยึร ดูอี ฌัม ดูก ตึอน, อัน วี วัห ฮาว โดบ อึณเตณ ปอ บลาก, บอ กาโลห ปวน อัน. 32ปาย ตี, อึณ บอ มึห ดูอี ปอ อู วี อี โบง ฆาน แคง โฮว เฌาพรา. อัน มืร ฮาว โดบ อึณเตณ ตึอน. ดอ ตา ยึร อัน ดูอี เซา ตึอน, อัน วี ฮาว ปอ อู บลาก, กาโลห ปวน อัน. 33ปัน ตี อึณ วี มึห ดูอี อาโมยว ซามารี อู วี. เฆ ดูอี อาโมยว ยูดา บอ เฆ ดูอี อาโมยว ซามารี, เฆ ตู ลาย กาล็อะ. ดูอี อาโมยว ซามารี ตี มืร ตา ฮาว โดบ อึณเตณ ตึอน. ดอ ตัห ยึร อัน ดูอี เซา ตี, อัน มืร กาเว อู เฌณ. 34อัน บอ ฮาว โดง กอย ดูอี เซา ตี บอ บาย ดีม อัน ตา ป็อห อึม มางูน. อัน บอ ดึห นามัน, พ็อห โดง ดีม ตี. อัน วี ดึห ดูอี เซา ตึอน, ป็อะ มาลา อัน. อัน บอ ตัห ฌัม ดี เฌโรบ, วี ลึมลา ดูอี เซา ดอ กอย ฆาย โดง ตึอน. 35ปา แคหณา ซีณวัห, อัน วี ดึห รึอน อัน อา โบ็ง#10:35 อาเซ โบง ฆาน อาดา อู ซีแง แฮะ ปึอน รึอน อู โบ็ง. ดัว ดี ดา กาณา เฌโรบ ตึอน, ต็อห, ‘แตห แม ลึมลา ดูอี นี. เซ แม บอ โตต รึอน กืน หลึอม นี, โอว ดี วี ดัว ดี แม ดอ วี ตัห ฌัม โอว ดี นี.’” เฌา เยซู แฮะ ฮอต กาลาง ลอง อัน ตี, อัน วี ดีหมอด ต็อห,

36“แคง ดูอี โอย วี ตึอน, แม ทาง, อาเซ แฮะ จอย ดูอี อี กาดูห ดูก ดี ดา โฌน ตึอน?”

37ดา อี มาโนว ดารา ตึอน, อัน วี ต็อห, “อึณ มูห ดูอี อี กาเว ดูอี ตึอน.” แฮะ ฮอต ต็อห ปาย ตี, เฌา เยซู วี ต็อห ดี อัน, “แตห บอ แม ฮาว โบง ปาย ตี.”

ลอง นาง มาทา ฆาย นาง มารี

38ดอ ฮาว เฌา เยซู บอ ดีแบ อัน ดอน โปละ, เฆ บอ ตัห ฌัม แคง มืง อู มืง. แคง มืง ตี, อึณ มึห อีบึณ อู วี, อัน บาง เฌา เยซู ฮาว ลึบ แคง กาง อัน. อัน จืร นาง มาทา. 39นาง มาทา ตึอน มึห วา อู วี อี จืร นาง มารี. นาง มารี ตึอน ตูต ดี อาต เฌา เยซู, โทม โฆรห ปี ต็อห อัน ดี เฆ. 40นาง มาทา ยี มึห น็อห แหม ดี แรน ปี ดี โฮม. อัน ลึบ โดง กอย เฌา เยซู, ต็อห ดี อัน, “อึย แม เฌา, วา โอว นี แตห โอว อู วี โบง ฆาน ดอน โมยว. แม ตู กาเว โอว? แตห แม จัร อัน ตัห จอย โอว.”

41เฌา เยซู วี ต็อห ดี อัน, “อึย นาง มาทา, แม คัม ดูก แคง น็อห แม บอ มึห น็อห แหม ลอง แบน โมยว แบน โมยว. 42อี อาเร ตาง ปี โลว แม, อึณ ยี มูห มี อู โมยว. นาง มารี แฮะ ร็อห นา หมึอม ปี โลว ดูอี ดอน อี. แคะ ปี โทม อัน ดี โอว, อาว มึห อาเซ อี ปึอน พาด ดึห ดี อัน.”

Currently Selected:

ลก 10: pce

Highlight

Copy