ลก 9

ลอง เฌา เยซู ตึย ดีแบ อัน ฆึร ดี อา วี โบง ฆาน อัน

1วาย อัน ตี เฌา เยซู แดะ ดีแบ อัน ฆึร ดี อา วี ตัห กาฌูะ โดง กอย อัน. อัน มืร ดัว ปวน ดี เฆ แตห เฆ ปึอน ดี ซูต กานัม เลห แคง โดว อี. อัน มืร แตห เฆ แป ปีหราย เซา อี. 2อัน มืร จัร เฆ ฮาว กาลาง ดี อี ลอง เฌาพรา แฮะ กาตัด ดี ตัห อึบ กาดาย. อัน บอ แตห เฆ แป ปีหราย เซา ดูอี เฮา. 3อัน มืร ต็อห ดี เฆ, “เบ แกวะ ดึห ฮาว มาเซ ดอ ฮาว เบ โดบ อึณเตณ เบ. แกวะ โฆ็ง อึณกรวน. บอ ปี ดี โฮม ปี ดี ฮาบ เบ, บอ รึอน ดี จึห โกรว, แกวะ แตห เบ โฆ็ง ฌึร ตี. บอ ซีโตว กาปลูะ เบ, แกวะ แตห เบ โฆ็ง. 4เซ เบ บอ ลึบ แคง กาง อี เหมา, แตห เบ กอย แคง กาง ตี, แตห กอ ฌัม อาคราว ดี เลห เบ แคง มืง ตี. 5เซ อึณ บอ มึห ดูอี อี ตู รวห เบ, ดอ เลห เบ แคง มืง เฆ, แตห เบ ดียึห รัห กาปูห ดี เปลา เบ, แตห เฆ นับ, ปี ตู โทม เฆ, อึณ ตู หมึอม.” เฌา เยซู ต็อห ปาย ตี ดี เฆ. 6ปัน ตี เฆ ดีแบ เฌา เยซู, เฆ มืร ฮาว แบน มืง แบน มืง. เฆ บอ กาลาง ลอง เฌาพรา อี คยอด ดูอี. ดอน โปละ เฆ บอ ปีแกน ดูอี เซา.

7-8ดอ อัน ตี เฆ ดูอี มัง อี แฮะ ทาง, เฌา เยซู มูห ดา ซารา อายอฮาน อี จึบ ดูอี แคง อึม, อี แฮะ วี ยีต วี อีม. บอ มัง อี ต็อห, อาเอลียัะ แฮะ วี ยีต วี อีม, วี แบน เฌา เยซู. บอ มัง อี วี ทาง, ดูอี อี บยาน โฆรห เฌาพรา อู วี แฮะ วี ยีต วี อีม, วี แบน เฌา เยซู. คูนดีคัม อาเฮโรด อี มูห ดา กาณา อี อึบ พวน มืง, อัน บอ โทม ลอง เฌา เยซู, อัน วี เฌณฌา แคง น็อห อัน. 9อัน ต็อห, “โอว แฮะ ฮอต แตห ดูอี แดบ ฆีณ อายอฮาน ตึอน. เฌา เยซู ตี, อัน ยี มูห อาเซ?” โคว อัน ตี อัน บอ เหรต ปี ดี ปาย แตห อัน ปึอน ดี ยึร เฌา เยซู.

ลอง เฌา เยซู แตห ดูอี พัน แหรณ วี โฮม แพ

10วาย อัน ตี เฆ ดูอี ปี ร็อห ปี ตึย เฌา เยซู, เฆ วี ตัห ฌัม โดง กอย เฌา เยซู. เฆ วี กาลาง โตต ลอง แปะ แฮะ โบง เฆ. เฌา เยซู จัร เฆ, แตห เฆ โดบ อัน, ฮาว โดง ตู มึห อี เฮา นา เรต มืง เบดซีดา. 11เฆ ดูอี กืน กอ นับ ลอง อัน. เฆ บอ ฮาว โดบ อัน. เฌา เยซู มืร ดาคึย ดี รวห เฆ. อัน วี จูห ดี กาลาง ดี เฆ ลอง ปัน ดี ตัห เฌาพรา อึบ กาดาย. เฆ ดูอี เซา อี ซี แตห เฌา เยซู จอย เฆ, เฌา เยซู มืร ปีแกน เฆ ดอน อี.

12ซีแง อัน ตี, บา ดี อับ, เฆ ดีแบ อัน ฆึร ดี อา วี, เฆ ตัห โดง กอย เฌา เยซู. เฆ ต็อห, “แม โลว แตห ดูอี กืน เฆ นี เวณ, แตห เฆ เหรต ปี ดี โฮม บอ โดง ดี ตัม แคง เรา แคง มืง อี กอย กาตัด โดง กอย เอ นี. ดี นี มูห โดง กาฮ็อห กาฮัณ. อาว มึห มาเซ.”

13เฆ แฮะ ฮอต ต็อห ปาย ตี, เฌา เยซู วี ต็อห ดี เฆ, “แตห เบ ดัว ปี ดี โฮม ดี เฆ.”

เฆ ยี วี ต็อห ดี อัน, “เย มึห มี คามูน พัน โบ็ง บอ มาฆา อา โดว. แม ซี แตห เย ฮาว จึห ปี ดี โฮม ดัว ดี ดูอี ดอน อี อี กอย ดี นี?” 14ดูอี อี กอย โดง ตึอน, มึห มี อีมาย กาบัก พัน แหรณ วี. อาว บาะ อีบึณ เฆ ฆอน.

เฌา เยซู วี ต็อห ดี ดีแบ อัน, “แตห เบ แตห ดูอี ตูต แบน พึง แบน พึง, อู พึง กาบัก พัน ฆึร วี.” 15แฮะ ฮอต ปัน ตี เฆ ดีแบ อัน บอ แตห ดูอี ตูต บอกาเฆลียด. 16เฌา เยซู มืร ดึห คามูน พัน โบ็ง บอ มาฆา อา โดว, วี ซากึห ยอด ฆางหราว, กาลาง ฆูง เฆฌู ดี เฌาพรา, บอ กาบัก คามูน เฆ มาฆา, วี ดัว ดี ดีแบ อัน, แตห เฆ วี กาซาง ดี ดูอี กืน. 17เฆ บอกาเฆลียด ปึอน ดี โฮม แพ. วาย แฮะ ฮอต โฮม เฆ, เฆ ดีแบ เฌา เยซู บอ แฆบ กาฌูะ กาโลย โฮม เฆ. กอ วี โนะ ฆึร ดี อา กาแตบ.

ลอง เฌา เยซู มูห อาเซ

18อู ซีแง เฌา เยซู กอย อู วี, ซาคึร ดี เฌาพรา. ดอ อัน ตี เฆ ดีแบ อัน ตัห ฌัม โดง กอย อัน. เฌา เยซู ยี ดีหมอด เฆ ต็อห, “อี เฮา, เฆ ต็อห โอว มูห อาเซ?”

19เฆ วี ต็อห ดี อัน, “มัง อี ต็อห, แม มูห ดา ซารา อายอฮาน ตึอน อี แฮะ วี ยีต วี อีม. มัง อี ต็อห แม มูห อาเอลียัะ ตึอน, อี แฮะ วี ยีต วี อีม. บอ มัง อี ต็อห, แม มูห ดูอี อี บยาน โฆรห เฌาพรา อู วี อี แฮะ วี ยีต วี อีม.”

20เฆ แฮะ ฮอต ต็อห ปาย ตี, เฌา เยซู วี ดีหมอด เฆ. อัน ต็อห, “เซ อึณ มูห เบ, เบ ต็อห โอว มูห อาเซ?”

อัน แฮะ ฮอต กาลาง ปาย ตี, อาเปตารู วี ต็อห ดี อัน, “แม มูห อัน เฌา ปี ร็อห ปี ตึย เฌาพรา แตห อัน คยอด ดูอี.”

21วาย อัน ตี เฌา เยซู วี ดัม เฆ, แกวะ แตห เฆ กาลาง ลอง อัน ตี ดี ดูอี เฮา. 22อัน มืร ต็อห, “ดูอี อี แฮะ แบน ฆอน ดูอี, อัน โลว คัม ดูก แบน โมยว แบน โมยว. เฆ ดา ตาง บอ เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา เฌาพรา, เฆ ตู ซี ยึร อัน, ตู ซี โทม โฆรห อัน. เฆ ดี บอ ง็อห แวน อาซาก อัน. ฮี โนะ โอย ซีแง, เฌาพรา ยี ดี แตห อัน วี ยีต วี อีม.”

23เฌา เยซู วี กาลาง ดี เฆ ดูอี บอกาเฆลียด อี โทม โฆรห อัน ต็อห, “อาเซ ซี โดบ โอว, แกวะ แตห อัน โบง ปี อึง อัน. ดอน ซีแง, ดอน ซีแง, อัน โลว เบลห น็อห อัน ต็อห, ‘เซ โอว บอ โลว ยัม, โอว ยี ดี โดบ อัน เฌา เซเซ.’ 24อาเซ กาเว อาซาก อัน, อาซาก อัน ดี ชึม. อาเซ ยี ตู โยว ดี ยัม โกบ หณึม อัน ดี โอว, อัน ดี วี ปึอน อาซาก กามาย. 25เซ ดูอี อู วี ปึอน โตต ดอน โมยว อี มึห แดง กาดาย นี, อาซาก อัน ยี ชึม, เหมา อึณ ดี ปาย ดี แบน อาฆยึร ดี อัน? 26เซ ดูอี ซาย ดี ต็อห, อัน หณึม โอว บอ โฆรห โอว, อึณ ดี ฌัม อู ซีแง, โอว มืร ดี ซาย ดี ต็อห, ‘โอว แฮะ นับ ดูอี วี ตี.’ โอว, อี แฮะ แบน ฆอน ดูอี, โอว ดี วี ตัห โลง แดง กาดาย นี. โอว ดี บอ บยัะ อาโรง บลาง โอว, บยัะ บอ อาโรง บลาง ฆูณ โอว บอ เฆ อามู อามาด อัน อี แฮะ บอด กาเซา. ปัน อัน ตี, โอว ดี บอ ซาย ดี ต็อห, โอว แฮะ นับ ดูอี วี ตี. 27โอว ต็อห อาคัร ดี เบ, กาแต เฆ ดูอี อี กอย โดง กอย โอว นี, อึณ มึห มัง อี, เฆ ตู ยัม อาต ยึร เฆ อาคราว ดี อึบ โตต เฌาพรา แดง กาดาย นี.” ปาย ตี เฌา เยซู มาโนว เฆ ดูอี กืน อี โทม โฆรห อัน.

ลอง อารึบ เฌา เยซู กาบลืง

28วาย อัน ตี แฮะ โนะ กาบัก ดา ซีแง, เฌา เยซู แดะ อาเปตารู, อายอฮาน บอ อายาโกบ, แตห เฆ โฮะ ซาคึร แดง นอน อู โปละ. 29ดอ ซาคึร เฌา เยซู, อารึบ อัน กาบลืง. ครึง ปี ชึบ อัน บอ ลูย ราว. 30อึณ บอ มึห ดูอี อา วี ตัห โดง กอย อัน, กาลาง โฆรห ดี อัน. ฆาย มูห ดา อาโมวแซ ฆาย ดา อาเอลียัะ. 31อาโรง ฆาย แฮะ บลาง กาเซา. ฆาย ตัห กาลาง ดี เฌา เยซู ลอง ดี โลว ยัม อัน แคง มืง เยรูซาแลม. 32ดอ อัน ตี อาเปตารู เฆ ฆึก อัน บอ แบน ซี อีด กาเซา. ดอ วี อึณซึห เฆ, เฆ บอ ยึร อาโรง เฌา เยซู แฮะ บลาง, ยึร ฆาย อา วี ตึอน, อี กอย รึม โดบ เฌา เยซู. 33ปัน ตี ดอ เลห เวณ ฆาย โดง กอย เฌา เยซู, อาเปตารู วี ต็อห, “อึย แม ดา ซารา, อึณ แฮะ ดาคึย กอย ดี นี. แตห เย ซัม ทึบ โอย ทึบ. แตห บอ แม บอ อาโมวแซ บอ อาเอลียัะ กอย อู วี อู ทึบ.” อาเปตารู ต็อห ปาย ตี โกบ ตู นับ อัน ปี ดี ต็อห อัน.

34ดอ กาลาง อัน โฆรห ตี, อึณอูะ บอ ตัห ปลึก นา แดง เฆ บอ พึง. เฆ ดีแบ เฌา เยซู บอ โยว โกบ ปลึก อึณอูะ ตี ดี เฆ. 35อึณ มืร มึห โฆรห เลห แคง อึณอูะ ตี ต็อห, “วี นี มูห ฆอน ปี ร็อก โอว. แตห เบ โทม โฆรห อัน.” 36เฆ แฮะ ฮอต โทม โฆรห ตี, เฆ วี ยึร มี เฌา เยซู อู วี กอย รึม โดบ เฆ. เฆ มืร โนว อูน ลอง อัน ตี แคง น็อห เฆ. อาคราว ดอ กอย เฆ ตึอน, เฆ ตู กาลาง ลอง แปะ แฮะ ยึร เฆ ตี. เฆ ตู แตห อาเซ นับ ลอง อัน ตี.

ลอง ฆอน อีมาย แฮะ มึห กานัม ปลึก อัน

37ปา แคหณา วาย โลง เฆ แดง นอน ตึอน, ดูอี กืน แฮะ หน็อะ, บัร ดี รวห เฌา เยซู. 38แคง พึง ดูอี กืน ตี, อึณ มึห ดูอี อู วี, อัน ดัด ตาง, ต็อห ดี เฌา เยซู, “อึย, ดา ซารา, โอว หมาณ, แตห แม ยอด ฆอน อีมาย โอว นี. โอว มึห ฆอน อู วี นี. 39อัน มึห กานัม ตัห ปลึก อัน, โบง แตห อัน ดัด ตาง, แตห อัน ดีเยณ บอ โดว. ปูห บอ เลห แคง โมต อัน. กานัม บอ ปลึก แตห อัน รูด. กานัม ตี ตู ซี เลห แคง โดว อัน. 40โอว แฮะ หมาณ เฆ ดีแบ แม, แตห เฆ ซูต กานัม เลห แคง โดว อัน. เฆ ยี ตู แป ดี ซูต เลห กานัม ตี.” อัน แฮะ ฮอต กาลาง ปาย ตี,

41เฌา เยซู วี ต็อห, “เบ ดูอี อี กอย ฌาด นี, เบ ตู มึห น็อห หณึม. ปี เฌณฌา เบ, ปี โบง เบ อาว หมึอม. แคะ เหมา อึณ ดี เหลณ, โอว ดี บอ โลว กอย รึม โดบ เบ บอ คัม ฌึร ตี?” อัน บอ ต็อห ดี ฆูณ ตึอน, “แตห ฆอน แม ตัห โดง กอย โอว นี.”

42ดอ ฮาว ฌัม ฆอน ตึอน โดง กอย เฌา เยซู, กานัม แตห อัน เกห อู เฌณ, แตห อัน ดีเยณ. เฌา เยซู จัร กานัม เลห, แตห ฆอน ตี วี แกน. แฮะ ฮอต, เฌา เยซู บอ วี อาบ ดัว ฆอน ตี ดี ฆูณ อัน. 43เฆ ดูอี บอกาเฆลียด อาม กาเซา แคะ ตาง ปวน เฌาพรา.

ดอ ซีงยา อาม เฆ ลอง ปี โบง เฌา เยซู ตี, เฌา เยซู วี ต็อห ดี ดีแบ อัน, 44“ปี ดี กาลาง โอว ดี เบ ดอ ตี นี, เบ โลว โนว อูน แคง น็อห เบ. อึณ มูห โอว อี แฮะ แบน ฆอน ดูอี, เฆ ดี อาบ โอว ดี รันซู โอว.” 45เฆ ดีแบ เฌา เยซู ยี ตู นับ ซีเพา ปี กาลาง อัน. เฌาพรา ตู แตห อึณ ลึห ดี น็อห เฆ, ตู แตห เฆ นับ. เฆ มืร ตู ยัะ ดีหมอด เฌา เยซู ลอง อัน ตี.

ลอง ดูอี อี ตาง หลึอม อี เฮา

46วาย อัน ตี เฆ ดีแบ เฌา เยซู, เฆ ลาย กาแคณ, กาลาง กาแต เฆ, อาเซ อี ดี ตาง หลึอม อาเซ. 47เฌา เยซู ยี นับ ปี เฌณฌา เฆ แคง น็อห เฆ. อัน บอ แดะ ฆอน อู วี, แตห อัน กอย กาแต เฆ. 48อัน บอ ต็อห ดี ดีแบ อัน, “อาเซ รวห ฆอน ดีแตด ปี ฆอน วี นี โกบ หณึม อัน ดี โอว, อึณ ปี, อัน รวห โอว. อาเซ ยี รวห โอว, อัน บอ รวห อัน เฌา อี ตึย โอว ตัห แดง กาดาย นี. เซ อึณ ยี มึห ดูอี อู วี อี กอย กาแต เบ, เซ อาเร อัน อาว ตาง มาเซ, อัน แฮะ มูห ดูอี อี ตาง หลึอม อี เฮา.”

49วาย อัน ตี อายอฮาน ต็อห ดี เฌา เยซู, “อึย แม ดา ซารา, เย แฮะ ยึร ดูอี มัง อี, เฆ แฮะ ฆาว ปวน แม, ซูต กานัม เลห แคง โดว โบ็ง อี. เย ยี แฮะ แคร เฆ, แกวะ แตห เฆ โบง ปาย ตี.”

50เฌา เยซู วี ต็อห, “แกวะ แคร เฆ. อาเซ ตู กาโฆห ดี เอ, อัน แฮะ แบน ฆึก เอ.”

ลอง เฆ ดูอี อาโมยว ซามารี

51ดอ แฮะ กาตัด อาคราว ดี แดะ เฌาพรา ดี เฌา เยซู, แตห อัน วี โฮะ ฆางหราว, เฌา เยซู แฮะ อูน น็อห ดี โฮะ มืง เยรูซาแลม. 52อัน มืร แตห ดีแบ อัน มัง อี แยต ดี อาต อัน. เฆ บอ ฮาว ลึบ มืง อี กอย แคง อืง ซามารี. แคง มืง ตี เฆ ต็อห ดี แรน อูน ดอน โมยว ปี ดี โลว เฌา เยซู. 53เฆ ดูอี อี กอย แคง มืง ตึอน, เฆ ยี ตู รวห เฌา เยซู โกบ นับ เฆ, อัน ดี โฮะ มืง เยรูซาแลม. 54อายาโกบ ฆาย อายอฮาน อี มูห ดีแบ เฌา เยซู, ฆาย บอ ยึร ลอง อัน ตี, ฆาย บอ ต็อห ดี เฌา เยซู, “อึย แม เฌา, แม ซี แตห ยาย หมาณ, แตห เงา เลห โลง แคง ฆางหราว, กาซึม ลึร มืง นี, แตห อึณ ปี ปี ดึอม หมาณ ดา ซารา อาเอลียัะ ตึอน?” 55เฌา เยซู ยี มางัห ยอด ฆาย, บอ แคร ฆาย. อัน ต็อห, “บาย ตู นับ ลอง น็อห พึอม โมยว เหมา แฮะ อึบ บาย. 56โอว อี มูห ฆอน ดูอี, โอว ตู ตัห แตห โอว ง็อห อาซาก อี. โอว แฮะ ตัห แตห โอว คยอด อี.” เฌา เยซู แฮะ ฮอต กาลาง โฆรห ตี, บอ อัน บอ พึง อี โดบ อัน, เฆ เลห ฮาว ปอ โปละ.#9:56 บับ ดอ โฆว มัง โมยว ตู ฮับ โตต กาบัก 55 บอ 56

ลอง ดูอี อี ปึอน แบน ดีแบ เฌา เยซู

57ดอ ฮาว เฆ โดบ อึณเตณ, ดูอี อู วี ตัห ฌัม โดง กอย เฌา เยซู. อัน ต็อห, “แม บอ ฮาว นา เหมา, โอว ดี โดบ แม เฌา เซเซ.”

58เฌา เยซู วี ต็อห, “เฆ มาโซว แปร แฮะ มึห กาเดา. บอ เฆ มาซีม แฮะ มึห กาฮูน. อึณ ยี มูห โอว อี แฮะ แบน ฆอน ดูอี, โอว ตู มึห โดง ดี ตัม.”

59วาย อัน ตี เฌา เยซู วี ต็อห ดี ดูอี ปอ อู วี, “แตห แม ตัห โดบ โอว.” ดูอี ตี วี ต็อห, “อึย แม เฌา, โอว หมาณ, แตห โอว เวณ ดีบ ฆูณ โอว ดี อาต. แฮะ ฮอต, โอว ดี โดบ แม.”

60เฌา เยซู วี ต็อห ดี อัน, “แตห เฆ อี ตู นับ ลอง อาซาก กามาย วี ดีบ ดูอี ยัม แคง บาเรว. แม ยี โลว ฮาว กาลาง ลอง มืง ปี อึบ เฌาพรา, แตห เฆ ดูอี เฮา โทม ดอน นา ดอน โปละ.”

61อึณ บอ มึห ดูอี อู วี, อัน ต็อห, “อึย แม เฌา, โอว ดี โดบ แม. โอว ยี หมาณ, แตห แม แตห โอว เวณ แคง กาง ดี อาต, หมาณ, แตห เฆ อี กอย แคง กาง ควาง โอว ฮาว.”

62เฌา เยซู ยี ต็อห ดี อัน, “เซ อึณ มูห ดูอี แท นา, อัน ตู ยอด วีว นา ปัน. เซ อึณ ยี มึห ดูอี อี ยอด วีว นา ปัน, ดูอี วี ตี ตู กาอาบ โบง ฆาน แคง มืง ปี อึบ เฌาพรา.”

Currently Selected:

ลก 9: pce

Highlight

Copy