ลก 8

ลอง ดูอี บรัด ซีมา โหงว

1วาย อัน ตี เฌา เยซู ฮาว แบน โปละ แบน โปละ, กาลาง ลอง เฌาพรา ดี อึบ กาดาย, แตห เฆ โทม ดอน เรา ดอน มืง. บอ เฆ ดีแบ อัน ฆึร ดี อา วี แฮะ ฮาว โดบ อัน. 2บอ มึห บอ เฆ อีบึณ แปะ แฮะ ปีแกน เฌา เยซู เซา เฆ, บอ เฆ อีบึณ แปะ แฮะ ซูต เลห เฌา เยซู กานัม แคง โดว เฆ, บอ เฆ แฮะ โดบ อัน. อีบึณ เฆ ตี, อู วี อัน จืร นาง มารี. อี เฮา บอ ต็อห, อัน จืร นาง มารี อี ตัห มืง มากดาลา. เฌา เยซู แฮะ ดึอม ซูต กานัม บู โดว เลห แคง โดว อัน. 3อึณ บอ มึห บอ นาง โยวฮานา อี มูห อีบึณ อาคูซา. อาคูซา ตี มูห ดา กาณา อี ลึมลา ดอน โมยว แคง โฮว คูนดีคัม อาเฮโรด. อึณ บอ มึห บอ นาง ซูซานา บอ อีบึณ วี เฮา เฆ กืน. อีบึณ เฆ ตี แฮะ ดึห โกรวกราม เฆ, จอย เฌา เยซู เฆ ดีแบ อัน.

4ดูอี แบน มืง แบน มืง ตัห กาฌูะ โดง กอย เฌา เยซู. ดอ อัน ตี เฌา เยซู กาลาง แบน โมยว แบน โมยว ดี เฆ, แตห อึณ แบน อูพามา. 5อัน ต็อห, “อึณ มึห ดูอี อู วี, อัน ฮาว บรัด ซีมา โหงว. ดอ บรัด อัน โหงว ตึอน, ซีมา โหงว มัง โบ็ง โจห ดี โคบ อึณเตณ. ดูอี บอ แณต. มาซีม บอ ตัห โฌะ โฮม. 6ซีมา มัง โบ็ง บอ โจห แดง มาว อี มึห กาดาย ดีเหรว นา แดง. อัน แฮะ ฮอต ลัต, อัน บอ วี เฮียะ กาฮ็อห อู เฌณ, โกบ กาฮ็อห กาดาย โดง กอย อัน. 7ซีมา มัง โบ็ง โจห แดง กาดาย อี มึห เดา มาอาต. เดา มาอาต ยี แกร ดี ตาง, วี ยาบ โหงว, แตห อึณ แกร ดี ยัม. 8ซีมา มัง โบ็ง โจห โดง มูห กาดาย บอด. อึณ บอ แกร ดี ตาง. อู บูน วี มึห เลห อัน อู มาย็อห บูน.”

เฌา เยซู ต็อห ปอ อู จึบ, “อาเซ มึห โหยะ อี นับ ดี โทม, แตห อัน โทม โฆรห โอว ตี.”

9เฆ ดีแบ อัน วี ตัห ดีหมอด เฌา เยซู ลอง อูพามา ปี กาลาง อัน ตี. 10เฌา เยซู วี ต็อห ดี เฆ, “โอว แตห เบ นับ ซีคยา ปี ตู ดึอม นับ อี เฮา ลอง มืง ปี อึบ เฌาพรา. อี มูห ดูอี เฮา, โอว โลว มาโนว ลอง อัน ตี ดี เฆ, แตห อึณ แบน อูพามา อัน, แตห เฆ ปึอน ดี ยึร, ยี ตู ลึห ซีคยา ดี เฆ. แตห เฆ ปึอน ดี โทม โฆรห, ยี ตู นับ ซีเพา อัน.

11อูพามา ปี กาลาง โอว ลอง ดูอี บรัด ซีมา โหงว, อึณ ปาย นี. ซีมา โหงว, อึณ ปี โฆรห เฌาพรา. 12ซีมา โหงว มัง โบ็ง อี โจห ดี โคบ อึณเตณ, อึณ ปี เฆ ดูอี อี โทม โฆรห เฌาพรา. โบว กานัม ยี ตัห ดึห แวน โฆรห ตี, แกวะ แตห อึณ ลึบ แคง น็อห เฆ, แกวะ แตห เฆ หณึม โฆรห เฌาพรา, แกวะ แตห อึณ คยอด เฆ. 13ซีมา โหงว อี โจห แดง มาว, อึณ ปี เฆ ดูอี อี โทม โฆรห เฌาพรา. แฮะ ฮอต, เฆ มืร หณึม บอ โคย ดาคึย. น็อห ดาคึย ตี ยี ตู กอย เหลณ ดี เฆ. อึณ ปี เฆ ตู แตห เรียห อัน ลึบ แคง น็อห เฆ. เฆ ดี หณึม อู กาจัน. เซ โบว กานัม ตัห กาซูห เฆ โบง นา ตู หมึอม ดอน โมยว, ปี หณึม เฆ, อึณ วี หราย อู เฌณ. 14ซีมา โหงว อี โจห โดง มึห เดา มาอาต, อึณ ปี เฆ ดูอี โทม โฆรห เฌาพรา. แฮะ ฮอต, เฆ วี มึห น็อห กาฮัวะ ลอง แบน โมยว แบน โมยว. เฆ บอ ออน ดี ลึมลา โกรวกราม เฆ. แฮะ ฮอต เฆ บอ เหรต แบน โมยว แบน โมยว อี แตห เฆ มึห น็อห ดาคึย. ปี โบง เฆ ฌึร ตี, อึณ ปี, เดา มาอาต อี ยาบ โหงว. ปาย ตี บอ โฆรห เฌาพรา อี แฮะ ลึบ แคง น็อห เฆ ตู แบน อาฆยึร ดี เฆ. 15ซีมา โหงว อี โจห โดง มึห กาดาย บอด, อึณ ปี เฆ ดูอี อี โทม โฆรห เฌาพรา. เฆ มืร หณึม, แตห อึณ ลึบ แคง น็อห เฆ, แตห อึณ แบน น็อห หมาน น็อห หมึอม ดี เฆ. เฆ บอ แตห โฆรห เฌาพรา กอย แคง น็อห เฆ, แกวะ แตห เฆ ปีว, แตห อึณ มึห อาฆยึร อัน ปี โหงว อี มึห เลห กืน.” ปาย ตี เฌา เยซู มาโนว ดีแบ อัน.

ลอง เงา ออม

16เฌา เยซู วี ต็อห, “อาว มึห อาเซ, อี ปีด็อะ เงา ออม, วี ซีบลึก ตา ซีลัยะ. อึณ มืร ตู มึห อาเซ อี วี เบลห อูน ครึม กาโช็ง อีด. ดอน อี ดี เบลห อูน เงา ออม อี แฮะ ฮอต ปีด็อะ แดง ดัง อัน, แตห อึณ บลาง ดี เฆ ดูอี อี ลึบ แคง กาง. 17ดอน โมยว ปี เครียง ดูอี แคง อับ ว็อง, เฆ ดี วี ดึห บยัะ แคง บลาง แตห อี ยึร. บอ ดอน โมยว ปี ซีบลึก อูน เฆ แกวะ แตห อี นับ, เฆ ดี วี บยัะ, แตห ดอน อี กอ นับ. 18เบ โลว ซาดีก ซีคยา โฆรห เฌาพรา ปี โทม เบ. อาเซ นับ ลอง โฆรห เฌาพรา, อัน ดี แว นับ กาปัว. อาเซ ยี ตู ซาดีก, แคะ ปี ดึอม โทม อัน, อัน ดี ปีว, แกวะ ฮู แตห อัน โหลห มาเซ.” ปาย ตี เฌา เยซู วี มาโนว เฆ ดีแบ อัน.

ลอง วอแว เฌา เยซู

19ดอ อัน ตี มา เฆ วา เฌา เยซู แฮะ ตัห ฌัม โดง กอย อัน. เฆ ยี ตู ปึอน ลึบ โดง กอย อัน, โกบ กาเซียะ กืน ดูอี อี กอย โดบ อัน. 20อึณ ยี มึห ดูอี อี ตัห กาลาง ดี เฌา เยซู, “มา แม เฆ วา แม แฮะ ตัห, ซี ยึร แม. เฆ กอย หน็อะ แม นา เรต.” 21เฌา เยซู วี ต็อห ดี เฆ อี กอย รึม โดบ อัน “เบ ดูอี อี โทม โฆรห เฌาพรา บอ โบง โดบ, เบ มูห มา โอว เฆ วา โอว อาคาคัร.”

ลอง เฌา เยซู แตห คูน เยน

22อู ซีแง, เฌา เยซู เฆ ดีแบ อัน วี ลึบ แคง รึร. อัน บอ ต็อห ดี ดีแบ อัน, “แตห เอ กาโลห อึม ดึง นี, ฮาว ฌัม บลาก นา ตัะ ดอย.” เฆ บอ ฮาว อู เฌณ. 23ดอ กอย เฆ แคง รึร, เฌา เยซู แฮะ อีด. ดอ อัน ตี อึณ มึห คูน ตาง ตัห บูด แคง อึม ตี. อึม บอ ลึบ โนะ แคง รึร เฆ อู เฌณ. เฆ แฮะ รีน ดี เจต แคง อึม.

24เฆ ดีแบ เฌา เยซู บอ บยีต อัน. เฆ ต็อห, “อึย แม ดา ซารา, เอ ดี เจต ยัม แคง อึม.”

เฌา เยซู ยีต, วี จัร คูน บอ มา อึม แตห อึณ เยน. วาย อัน ตี คูน บอ เยน. มา อึม อาว ฮู ซีลอย, บอ เยน ดาคึย อู เฌณ. 25เฌา เยซู วี ต็อห ดี เฆ ดีแบ อัน, “เหมา อึณ ปาย ปี ตู หณึม เบ ดี โอว?”

วาย อัน ตี เฆ บอ อาม บอ โยว กาเซา ลอง อัน ตี. เฆ วี ลาย กามวน ต็อห, “ดูอี นี, อัน มูห อาเซ? บอ คูน บอ มา อึม นับ ดี โทม โฆรห อัน.”

ลอง เฌา เยซู โฮว เลห กานัม ฮาย แคง โดว โบ็ง ดูอี อู วี

26เฆ บอ ป็อะ ฮาว รึร ตัห ฌัม มืง เกซาเรน อี กอย บลาก นา ตัะ อึม ดึง. 27ดอ เลห เฌา เยซู แคง รึร, อัน กาตูณ ดา อู วี อี มึห กานัม แคง โดว โบ็ง อัน. แฮะ เหลณ, อัน ตู ตา ครึง. อัน มืร ตู ซี กอย แคง กาง โดบ ดูอี. อัน ยี กอย แคง บาเรว. 28ดอ ยึร ดูอี ตี ดี เฌา เยซู, อัน วี ดัด ตาง บอ เกห ดี อาต เฌา เยซู อู เฌณ. อัน ต็อห, “อึย แม เฌา เยซู, แม มูห ฆอน เฌาพรา อี ตาง หลึอม โตต. มาเซ ปี โลว แม ดี โอว? โอว หมาณ, แกวะ แตห แม ดัว ดูก ดี โอว.” 29อัน ต็อห ปาย ตี โคว, เฌา เยซู แฮะ ฮอต จัร กานัม ฮาย ตึอน เลห แคง โดว โบ็ง ดูอี ตี. กานัม ยี แฮะ ดึอม ปลึก ดูอี ตี แบน เฌณ แบน เฌณ. เฆ มืร แฮะ ปัก แด อัน. เฆ บอ ปัก วัน ฮีน ดี เปลา อัน, บัร อัน. แบน เฌณ แบน เฌณ อัน ยี แฮะ ปยาต แวน โตต. กานัม ฮาย มืร แฮะ ซูต ดูอี ตึอน ฮาว กอย แคง แปร กาฮ็อห.

30เฌา เยซู ยี ดีหมอด อัน ต็อห, “มาเซ ปี จืร แม?”

อัน วี ต็อห, “โอว จืร อู แหรณ,” อัน ต็อห ปาย ตี โกบ แฮะ กืน เฆ กานัม อี แฮะ ลึบ กอย แคง โดว โบ็ง อัน. 31เฆ กานัม ตึอน บอ หมาณ กาเซา ดี เฌา เยซู, แกวะ แตห อัน ซูต เฆ โลง แคง กาโละ งาราย.

32โดง กอย เฆ ตึอน ยี มึห พึง มาเลต. เฆ กูน กาดาย เหรต ปี ดี โฮม บาง นอน. กานัม เฆ หมาณ, แตห เฌา เยซู ควาง เฆ ลึบ แคง มาเลต เฆ ตี. เฌา เยซู บอ ควาง เฆ ลึบ. 33เฆ กานัม บอ เลห เตา แคง โดว โบ็ง ดูอี ตึอน, ฮาว ลึบ แคง พึง มาเลต ตี. มาเลต บอ พึง วี แดน โลง ดี ดาอาง ดาอวห, วี บยัว แคง อึม, แตห เฆ บอ พึง กอ ยัม โตต.

34ดูอี เฮียง มาเลต, ดอ ยึร เฆ ดอน โมยว ฌึร ตี, เฆ บอ เตา, วี เวณ กาลาง ดี ดูอี อี กอย แคง มืง บอ ดี เฆ ดูอี อี กอย นา เรต มืง. 35เฆ ดูอี วี ตัห โดง กอย เฌา เยซู, ต็อห ดี ยอด ลอง อัน ตี. ดอ ตัห ฌัม เฆ ดี อาต เฌา เยซู, เฆ บอ ยึร ดูอี อี แฮะ ดึอม มึห กานัม แคง โดว โบ็ง อัน. อัน ตูต โคบ เฌา เยซู. อัน แฮะ วี ชึบ ครึง อัน บอ แฮะ วี โหลห โดว อัน. แฮะ ฮอต ปัน ตี เฆ ดูอี กืน กอ โยว ลอง อัน ตี. 36เฆ ดูอี อี แฮะ ยึร ดี งาย เฆ, เฆ วี ฮาว กาลาง ลอง เฌา เยซู แฮะ ปีแกน ดูอี ตี. 37ปัน ตี เฆ ดูอี อี กอย แคง มืง เกซาเรน ตึอน บอ เฆ ดูอี อี กอย นา เรต มืง, เฆ บอ หมาณ, แตห เฌา เยซู เลห แคง มืง เฆ. โคว, เฆ ดอน อี โยว กาเซา อัน. ปัน ตี อัน มืร ลึบ แคง รึร, วี ฮาว ปอ อู โปละ.

38ดูอี อี แฮะ ดึอม มึห กานัม ตึอน, อัน หมาณ, แตห เฌา เยซู ควาง อัน ฮาว รึม โดบ เฌา เยซู. เฌา เยซู ยี จัร อัน เวณ โดง กอย อัน. 39เฌา เยซู ต็อห, “แตห แม เวณ ดี กาง แม. แตห แม กาลาง ดี ดูอี ลอง ดอน โมยว แปะ แฮะ โบง เฌาพรา ดี แม.” แฮะ ฮอต, ดูอี ตึอน เวณ แคง มืง อัน, วี กาลาง ลอง แปะ แฮะ โบง เฌา เยซู ดี อัน.

ลอง ฆอน อีบึณ อี แฮะ ยัม บอ อีบึณ อี มึห เซา

40เฌา เยซู แฮะ ฮอต วี ตัห ฌัม บลาก นา นี, เฆ ดูอี กืน บัร ดี รวห อัน. เฆ แฮะ ฮอต หน็อะ อัน. 41-42ดอ อัน ตี อึณ มึห ดา อี อึบ โฌง กรึบ เฆ ดูอี อายูดา เฌาพรา อู วี. อัน จืร อายาอีรูด. อัน มึห มี ฆอน อีบึณ อู วี. อาซาก ฆอน ตี แฮะ โนะ ฆึร ดี อา ซีนัม. อัน มืร แฮะ เซา กาเซา. แฮะ รีน ดี ยัม. ดูอี ตี บอ ตัห อู เฌณ, กรึบ ดี อาต เฌา เยซู. อัน บอ หมาณ, แตห เฌา เยซู เวณ ดี กาง โดบ อัน.

ดอ เวณ เฌา เยซู โดบ ดูอี ตี, เฆ ดูอี กืน ลาย กาเซียะ กอ โรบ เฌา เยซู. 43อึณ บอ มึห อีบึณ อู วี. อัน มึห เซา หนาม เลห อาดา ฆึร ดี อา ซีนัม. โกรวกราม อัน บอ รึอน อัน, อัน แฮะ ชึม โตต ดี ซาราโวน อี ซีนัม อัน. ยี ตู มึห อี แป ปีหราย เซา อัน. 44อีบึณ ตึอน ฮาว ดี ปัน เฌา เยซู กาแต เฆ ดูอี กืน. อัน บอ ปา โบรว ซีโตว เฌา เยซู. หนาม อัน บอ ฮีด อู เฌณ.

45เฌา เยซู วี ดีหมอด ต็อห, “อาเซ แฮะ ปา โอว?” เฆ ดูอี บอกาเฆลียด วี ต็อห, “อาว มูห โอว, อาว มูห โอว, โอว ตู มึห ดี ปา แม.” อาเปตารู วี ต็อห, “อึย แม ดา ซารา, แฮะ มึห ดูอี กืน อี กอย โรบ แม, แฮะ ลาย กาเซียะ โคบ แม. เฆ ดี บอ ตา ดึร แม.”

46เฌา เยซู วี ต็อห, “แฮะ มึห ดูอี อู วี อี ตา ปา โอว. โอว แฮะ นับ ลอง อัน ตี. โคว, ปวน โอว แฮะ เลห แคง โดว โบ็ง โอว.”

47ยี มูห อีบึณ ตึอน, อัน วี นับ, อาว ปึอน เครียง ปี โบง อัน. อัน บอ ตัห บอ ดีเยณ ดีโยว กาเซา. อัน ตัห กรึบ ดี อาต เฌา เยซู, กาลาง ลอง น็อห ซี ปา เฌา เยซู บอ กาลาง ลอง เซา อัน แฮะ หราย อู เฌณ. อัน กาลาง โตต ดอน โมยว แตห ดูอี บอกาเฆลียด กอ นับ. 48เฌา เยซู ต็อห ดี อัน, “อึย ฆึณ, โกบ หณึม แม, เซา แม แฮะ หราย. แตห แม เวณ, แตห น็อห แม ดาคึย.”

49ดอ กาลาง อัน โฆรห ตี, อึณ มึห ดูอี ตัห ดี กาง ดา ตาง ตึอน. เฆ ต็อห ดี อายาอีรูด, “ฆอน แม แฮะ ฮอต ยัม. อาว ฮู โลว แดะ ดา ซารา ตัห ดี กาง แม.”

50เฌา เยซู แฮะ ฮอต โทม โฆรห ตี, อัน วี ต็อห ดี อายาอีรูด, “แกวะ แตห แม โยว. แตห แม หณึม. ฆอน แม ดี แกน.”

51เฆ แฮะ ฌัม แคง กาง ดา ตาง ตึอน, เฌา เยซู ตู แตห ดูอี เฮา ลึบ. อัน ยี แดะ อาเปตารู, อายอฮาน บอ อายาโกบ บอ ฆูณ มา ฆอน อีบึณ ตึอน, แตห มี เฆ ลึบ โดบ อัน. 52เฆ ดูอี อี กอย โดง ตึอน วี กาโพรม ดี ยาม ซีนัน ซีนืง. เฌา เยซู วี ต็อห ดี เฆ, “แกวะ ยาม, ฆอน ตี ตู ยัม. อัน อีด.”

53เฆ บอ พึง วี กาณัห เฌา เยซู, เฆ แฮะ นับ ซีคยา ฆอน ตี แฮะ ฮอต ยัม. 54เฌา เยซู วี ปา แด ฆอน ตึอน. อัน ต็อห, “อึย ฆอน, ยีต.” 55อัน แฮะ ฮอต ต็อห ปาย ตี, น็อห พึอม ฆอน ตึอน บอ วี ลึบ แคง โดว โบ็ง อัน. อัน บอ ยีต อู เฌณ. เฌา เยซู บอ จัร เฆ, แตห เฆ ดึห ปี ดี โฮม, ดัว ดี อัน. 56ฆูณ มา อัน ยี อาม กาเซา ลอง อัน ตี. เฌา เยซู ยี จัร ฆาย แกวะ แตห ฆาย กาลาง ลอง อัน ตี ดี อาเซ.

Currently Selected:

ลก 8: pce

Highlight

Copy