ลก 12

ลอง ปี ดี โลว ซาดีก บอ อี ดี แตห น็อห โปลม

1วาย อัน ตี เฆ ดูอี แบน แหรณ แบน แหรณ แฮะ ตัห กาฌูะ. เฆ มืร ลาย กาเซียะ. ดอ อัน ตี เฌา เยซู กาลาง โฆรห ดี เฆ ดีแบ อัน อาต กาลาง อัน ดี ดูอี เฮา. อัน ต็อห, “เบ โลว ซาดีก เฆ ดูอี พึง พารีแซ. เฆ ณึงราง ดี แบน ดูอี บอด. อึณ ยี ตู หมาน. เฆ ปี ซีนัม บรัห คามูน. 2ดูอี ตู ปึอน เครียง มาเซ. แคะ ปี กาบีด ดูอี, แกวะ แตห ดูอี ยึร, อึณ ดี วี ลึห ซีคยา, วี แตห ดอน อี ปึอน ดี ยึร. ปี ซี เครียง ดูอี, แกวะ แตห อี เฮา นับ, อู ซีแง อึณ ดี วี ลึห ซีคยา, แตห ดอน อี กอ นับ. 3แคะ มึห ปี ปรา แม ดี กาลาง ดอ อับ ว็อง, แกวะ แตห อี ยึร, เฆ ดูอี ดี กาลาง ลอง อัน ตี ดอ กาแต ซีแง, แตห ดอน อี กอ ยึร. ปี กาลาง พูพาบ แม แคง โฮง, เฆ ดูอี ดี ดัด ตาง แดง ฆรัห, แตห ดอน อี ปึอน ดี โทม ลอง อัน ตี.

4เบ ดูอี อี แฮะ แบน ฆึก โอว, โอว ต็อห ดี เบ, แกวะ แตห เบ โยว เฆ ดูอี อี ปึอน ง็อห ยัม โดว โบ็ง เบ. แดง ตี, เฆ ยี ตู ปึอน โบง มาเซ. 5โอว ยี กาลาง ดี เบ, อาเซ แฮะ หมึอม โยว. เบ โลว โยว เฌาพรา อี แป ดี แตห ดูอี ยัม. แฮะ ฮอต ยัม, อัน บอ มึห ปวน ดี แตห เบ โจห กาโละ งาราย. อึณ มูห เฌาพรา อี แฮะ หมึอม โยว อาคาคัร. 6เบ บอ นับ, เฆ ดูอี นับ ดี ย็อง มาซีล็อห พัน โดว อู เท. เฌาพรา ยี ตู ปีว มาซีล็อห ตึอน, อาดา อู โดว มืร, อัน ตู ปีว. 7อึณ บอ ปาย ตี. เฌาพรา ลึมลา ซีคยา เบ. บอ ฮึก ฆีณ เบ, อึณ ปี เฌาพรา แฮะ ตีห ดอน ณ็อง. แกวะ แตห เบ โยว มาเซ. ง็อห เบ แฮะ ตาง หลึอม มาซีล็อห เฆ กืน.

8โอว มืร ต็อห ดี เบ, อาเซ กาลาง ดี อี เฮา ลอง หณึม อัน ดี โอว, โอว อี แฮะ แบน ฆอน ดูอี, โอว มืร ดี วี กาลาง ลอง ดูอี ตี ดี อาต เฆ อามู อามาด เฌาพรา. 9เซ ดูอี ยี ต็อห ดี อี เฮา, อัน ตู นับ โอว, โอว มืร ดี ต็อห ดี เฆ อามู อามาด เฌาพรา ลอง ดูอี วี ตี, ‘โอว ตู นับ อัน.’ 10อาเซ ดี กาลาง นา ตู หมึอม ลอง โอว อี แฮะ แบน ฆอน ดูอี, เฌาพรา ดี ฆ็อห แวน หมาบ ปี โบง อัน. อาเซ ยี ต็อห นา จีจีว ลอง น็อห พึอม เฌาพรา, อัน เฌา ยี ตู ฆ็อห แวน หมาบ อัน ตี ดอ เหมา.

11เซ เฆ ดี บอ กาย็อง เบ, จัร เบ ฮาว กาลาง ลอง อัน แคง โฌง กรึบ เฆ ดูอี อายูดา เฌาพรา บอ ดี อาต เฆ ดา กาณา บอ เฆ ดา ตาง อี อึบ มืง, แกวะ แตห น็อห เบ กาฮัวะ. แกวะ แตห เบ เฌณฌา ดี อาต ลอง ปี ดี โลว กาลาง เบ ดี เฆ ดูอี ฌึร ตี. 12แคะ ปี ดี โลว เบ กาลาง, น็อห พึอม เฌาพรา ดี แตห เบ นับ โตต ดอน โมยว ดอ อัน ตี.” ปาย ตี เฌา เยซู วี มาโนว ดีแบ อัน.

ลอง ดูอี ครัม อี ตู มึห อางยาน

13กาแต เฆ ดูอี กืน ตึอน, อึณ มึห ดูอี อู วี, อัน ต็อห ดี เฌา เยซู, “แม ดา ซารา, แม โลว จัร อีกัด โอว, แตห อัน กาซาง ดัว ดี โอว คาฆูน ปี ดัว ฆูณ ยาย.”

14เฌา เยซู วี ต็อห ดี อัน, “อึย, โอว ตู มูห ดา อี ซูงพยาด ดารา ดี ดูอี เฮา. โอว ตู มูห ดา อี ดี กาย็อห โกรวกราม อี.” 15ปัน ตี เฌา เยซู วี ต็อห ดี ดูอี บอกาเฆลียด, “เบ โลว ซาดีก, เบ โลว แวน น็อห ซี ปึอน ดอน โมยว. โกรวกราม ดอน โมยว ตู ปึอน ปีโต็ง อาซาก ดูอี.”

16แฮะ ฮอต, เฌา เยซู กาลาง อูพามา ดี เฆ. อัน ต็อห, “แฮะ ดึอม มึห ดูอี ครัม อู วี. ปี ซัม ปี ปีด อัน แคง มาน, อึณ แฮะ ออง แฮะ เลห กืน. 17ดูอี ตึอน, อัน วี เฌณฌา แคง น็อห อัน. อัน ต็อห, ‘แคะ ปี ปึอน โอว โหงว, อึณ ตู ปึอน ฮับ โตต แคง อึณเวน โอว. มาเซ ปี ดี โลว โอว โบง?

18โอว ดี โบง ปาย นี. โอว ดี ย็อห แวน อึณเวน โอว. โอว ดี บอ โบง อึณเวน กามาย, อี ตาง หลึอม อี บรีม. วาย อัน ตี โอว ดี ปึอน อูน โหงว โอว. โอว ดี บอ เบลห อูน ซีคยา โกรวกราม โอว ดอน โมยว.’ 19แฮะ ฮอต, โอว ดี บอ ต็อห แคง น็อห โอว, ‘อึย, แม น็อห โอว, แฮะ มึห กืน ดอน โมยว ปี กาฌูะ อูน แม. อึณ ดี ฆลึม โฮม แบน ซีนัม แบน ซีนัม. แตห แม กอย ซีคยา, กอย ดาคึย. แตห แม บอ โฮม แพ. แตห แม มึห น็อห ดาคึย ลอง อัน ตี, แกวะ แตห แม โยว มาเซ.’ อัน แฮะ ฮอต ต็อห ปาย ตี,

20เฌาพรา บอ ต็อห ดี อัน, ‘อึย, แม มูห ดูอี รึร. แคง หมึร นี, โอว ดี ดึห อาซาก แม. ปัน ตี โกรวกราม ดอน โมยว ปี กาฌูะ อูน แม นี, อาเซ ดี วี ปึอน?’

21อึณ บอ ปาย ตี. เซ ดูอี แฮะ มึห ดี แฆบ อูน โกรวกราม แบน โมยว แบน โมยว, เซ อัน ยี ตู มึห โกรว ปี ดัว เฌาพรา, อึณ ตู แบน อาฆยึร ดี อัน.” เฌา เยซู แฮะ มาโนว ปาย ตี.

ลอง ตู โลว มึห น็อห กาฮัวะ

22วาย อัน ตี เฌา เยซู ต็อห ดี เฆ ดีแบ อัน, “โกบ ปี ต็อห โอว ดี อี เฮา ตึอน, โอว วี ต็อห ดี เบ, แกวะ แตห เบ มึห น็อห กาฮัวะ ลอง อาซาก เบ บอ โดว โบ็ง เบ. แกวะ แตห น็อห เบ กาฮัวะ ลอง ปี ดี โฮม ปี ดี ตา เบ. 23อาซาก เบ, อาเร อัน ตาง หลึอม ปี ดี โฮม เบ. บอ โดว โบ็ง เบ, อาเร อัน ตาง หลึอม ครึง ปี ดี ตา เบ. 24แตห เบ ยอด มากาอัะ. เฆ ตู มึห ดี ซัม มาเซ, แฮะ ฮอต, เฆ ตู วี มึห ดี โซะ มาเซ. เฆ มืร ตู มึห ดี อูน ปี ดี โฮม แคง บูะ โหงว. เฌาพรา ยี เฮียง เฆ. อึณ ยี มูห เบ, ง็อห เบ แฮะ ตาง หลึอม ง็อห มาซีม.

25แดง ตี, อาว มึห อาเซ อี ปึอน โบง แตห อาซาก อัน โต็ง ปอ อึณ ปัว โกบ มึห อัน น็อห กาฮัวะ. อาดา อู นารี มืร, อัน ตู แป ดี ปีโต็ง อาซาก อัน. 26เซ อี แจก ตี เบ ตู แป ดี โบง, เหมา อึณ ปาย ปี มึห เบ น็อห กาฮัวะ ลอง แบน โมยว แบน โมยว?

27แตห เบ บอ ยอด โบห คัมซอน, เหมา เฆ ปาย ดี ลัต. เฆ ตู รัณ ตู บัด เซณ เฆ. โอว ยี ต็อห ดี เบ, คูนดีคัม อาซาโลวโมว ตึอน, อัน มึห อาพูง ดังโคว ตาง. ครึง ปี ตา อัน อี แฮะ ชีด กาเซา, ยี ตู ชีด ปี โบห อู โบ็ง ตี. 28เปต บอ กอย อาตึร. แคหณา เฆ วี แตห เงา โฮม เปต ตี. เซ เฌาพรา แตห โบห เฆ เปต ชีด แคะ ตี, แตห เบ บอ นับ ซีคยา, อัน เฌา ดี ดัว ครึง ตา ดี เบ หลึอม เปต ตี. อึย เบ ดูอี, เหมา อึณ ปาย ปี หณึม เบ อี แจก แคง น็อห เบ? 29แกวะ แตห เบ มึห น็อห แหม, แกวะ แตห เบ เฌณฌา เซเซ ลอง ปี ดี โฮม ปี ดี ตา เบ. 30เฆ ดูอี อาโมยว เฮา, เฆ โบง แบน โมยว แบน โมยว แตห เฆ ปึอน ฌึร ตี ดอน โมยว. ฆูณ เบ ยี แฮะ นับ, เบ บอ โลว ฌึร ตี ดอน โมยว. 31เบ ยี โลว โฆยวฆยา ดี โบง ดอน โมยว อี แตห เฌาพรา อึบ กาดาย. เซ เบ โบง ปาย ตี, ปี ดี โลว เบ ดอน โมยว, เบ ดี บอ ปึอน โตต ดอน โมยว.

32เบ ยี ปี พึง มาบู ดีแตด. แกวะ แตห เบ โยว มาเซ. เฌาพรา อี มูห ฆูณ เบ แฮะ อึง ดี แตห บอ เบ อึบ มืง ปี อึบ อัน เฌา. 33เบ โลว ย็อง โกรวกราม เบ. รึอน ปี ปึอน เบ, แตห เบ วี กาซาง ดี ดูอี ฆีน. เซ เบ โบง ปาย ตี, อึณ ปี เบ แฮะ ปึอน ฮู รึอน อี ตู นับ ดี บรีม, ตู นับ ดี กาปยาต. เซ เบ โบง ปาย ตี, อึณ บอ ปี เบ แฮะ อูน โกรวกราม เบ ดอน โมยว แคง มืง ฆางหราว. โดง ตี อาว มึห ดา ปรา ปึอน ลึบ ปรา. อาว มึห มาวัะ อี ปึอน โฮม. 34โคว, โดง อูน เบ โกรวกราม เบ, บอ น็อห เบ ดี บอ นัมโหลห โดง ตี เซเซ.”

ลอง โลว ซาดีก บัร เซเซ

35เฌา เยซู วี ต็อห, “แตห อึณ ปี เบ รีด แซะ ดี ณอย เบ, แตห เบ บอ ปีด็อะ อูน เงา ออม เบ. 36แตห เบ ปี แดเจณ อี หน็อะ ปัน ดี วี ตัห ดา กาณา อัน ดี บลอย คัด ดูอี เฮา. ดา กาณา ฮี ตัห ดอย มาโลห กาง อัน, แดเจณ ตึอน ดี ปึอน ดี วึห มาโลห ดี อัน อู เฌณ. 37เฆ แดเจณ อี กอย บัร ดอ ตัห ดา กาณา เฆ ตึอน, เฆ ดี แบน น็อห ดาคึย. โอว ต็อห อาคัร ดี เบ, ดา กาณา เฆ, อัน ดี บอ ดึห แซะ อัน, ปัก ดี ณอย อัน, วี แตห เฆ แดเจณ อัน วี ตูต ดี โฮม โบม, แตห อัน เฮียง เฆ โฮม. 38ดา กาณา ตึอน ปี บอ ตัห กาแต ซึอม, ปี บอ ตัห อาต วัห แปร, เซ อัน ยึร แดเจณ อัน กอย หน็อะ อัน, อึณ ดี แบน นา หมึอม ดี เฆ. 39โอว วี ต็อห แตห เบ นับ ซีคยา, เซ อึณ มึห ดา กาณา กาง, เซ อัน นับ อาคราว ดี ตัห ลึบ ดา ปรา แคง กาง อัน, อัน ดี บอ แคร ดา ปรา แกวะ แตห อัน ปึอน ดี ลึบ ปรา แคง กาง อัน. 40บอ เบ โลว บัร เซเซ. โคว, บอ โอว อี แฮะ แบน ฆอน ดูอี, โอว ดี วี ตัห อาคราว ปี ตู ทาง เบ.”

41อาเปตารู ยี ต็อห, “อึย แม เฌา, ปี กาลาง แม ตี, เย ตู นับ โยว แม มาโนว อี เย, โยว แม มาโนว บอ เฆ ดูอี เฮา บอกาเฆลียด?”

42เฌา เยซู วี ต็อห ดี อัน, “เซ อึณ มึห แดเจณ ดา กาณา อู วี, เซ ดา กาณา อัน แฮะ จัร อัน แตห อัน ยอด แมน เฆ แดเจณ ดอน วี, เซ อัน มืร ดัว ปี ดี โฮม ดี เฆ ดอ โลว เฆ ปี ดี โฮม, ดูอี ตี แฮะ โบง ซืร ซืร หมาน หมาน เซเซ. 43เซ ดา กาณา อัน บอ ตัห ยึร แดเจณ อัน แฮะ โบง ปี จัร อัน, อึณ ดี แบน นา หมึอม ดี แดเจณ ตี. 44โอว ต็อห อาคัร ดี เบ, ดา กาณา ดี วี ดัว แดเจณ วี ตี, แตห อัน อึบ โตต โกรวกราม อัน. 45เซ แดเจณ ยี ต็อห แคง น็อห อัน, ‘ดา กาณา โอว แหนน ดี กอย เหลณ, อัน หณัม หงึย หงาย ดี วี เวณ,’ แฮะ ฮอต, อัน บอ มัห อีมาย อีบึณ อี มูห แดเจณ ปี อัน, เซ อัน มืร โฮม รึม เดียง รึม โดบ ฆึก อัน บอ ยึต ป็อห, 46เซ ดา กาณา อัน ยี ตัห ดอ ตู ทาง อัน, ดา กาณา อัน ดี บอ ง็อห อาซาก อัน, บอ กาแดบ โดว อัน แบน ปอด แบน ปอด. แฮะ ฮอต, ดา กาณา ดี บอ แวน อัน, แตห อัน กอย รึม โดบ เฆ ดูอี อี ตู หณึม เฌาพรา.

47แดเจณ อี นับ ปี โลว ปี อึง ดา กาณา อัน, เซ อัน ยี ตู โบง ปี อึง ดา กาณา อัน, อัน โลว คัม ดา กาณา อัน มัห อัน แบน เฌณ แบน เฌณ. 48แดเจณ อี ตู นับ ดี อาต ปี อึง ปี โลว ดา กาณา อัน, แฮะ ฮอต อัน มืร โบง อี ตู ล็อะ น็อห ดา กาณา อัน ตี, บอ อัน ดี วี คัม ดา กาณา มัห อัน, ยี ตู มัห กาเซา. อึณ บอ ปาย ตี. อาเซ แฮะ ปึอน กืน โกรวกราม ปี อาบ อูน ดา กาณา อัน, ดา กาณา อัน ดี บอ วี หมาณ กืน ดี อัน. เซ ดูอี อู วี อูน กืน ดี อี เฮา, ปัน ดี วี ตัห อัน, อัน ดี วี หมาณ กืน หลึอม บรีม.

ลอง ดูอี ลาย กาย็อห

49โอว แฮะ ตัห แดง กาดาย นี, แตห โอว ซูงพยาด ดารา, แตห อึณ ปี โอว ดี โดะ เงา. โอว ซี โลว กาเซา แตห อึณ กูห แฮณ ฌัม ดอน โปละ. 50โอว ยี โลว คัม ดูก ตาง บอ คัม ดี ยัม. โอว แฮะ อูน น็อห โอว ดี โบง แตห อึณ ฮอต โตต ฌึร ตี. 51มาเซ ปี ทาง เบ โอว ดี ตัห โบง แดง กาดาย นี? เบ ทาง โอว ดี แตห ดูอี กอย รึม, กอย ดาคึย? อาว มูห ปาย ตี. โอว ต็อห ดี เบ, โกบ ตัห โอว แดง กาดาย นี, เฆ ดูอี ดี ลาย กาย็อห, ลาย กาโฆห. 52อู ซีณ ดอ ตี นี, เซ อึณ มึห ดูอี พัน วี แคง กาง อู กาง, เฆ ดี ลาย กาย็อห. ดูอี โอย วี ดี มึห น็อห อู โมยว, บอ อา วี ดี เบลห น็อห ฆาย ปอ โมยว. 53ฆูณ ดี กาย็อห ดี ฆอน เฆ. ฆอน เฆ ดี วี กาย็อห ดี ฆูณ เฆ. มา ดี กาย็อห ดี ฆอน อีบึณ อัน. ฆอน อีบึณ อัน ดี วี กาย็อห ดี มา อัน. บอ ฆึณ ดี กาย็อห ดี เอา อัน. เอา อัน ตี, อัน ดี วี กาย็อห ดี ฆึณ อัน.” ปาย ตี เฌา เยซู กาลาง ดี ดีแบ อัน.

ลอง ดูอี นับ อาคราว อัน

54ปัน ตี เฌา เยซู บอ ต็อห ดี ดูอี กืน, “เซ เบ ยึร อึณอูะ ดี โฮะ แคง ฆางหราว นา เฆต ซีแง, เบ นับ ดี ต็อห อู เฌณ, ‘อึณ ดี ฆลาย.’ แฮะ ฮอต, อึณ ดี บอ แบน ปาย ตี. 55ดอ ยึร เบ คูน อี ตัห นา เตต, เบ วี ต็อห, ‘อึณ ดี กาฮัวะ อาตึร นี.’ แฮะ ฮอต ต็อห ปาย ตี, อึณ ดี บอ กาฮัวะ อาคาคัร. 56เบ ยี มูห ดูอี ณึงราง บอด. ดอ ยึร เบ ดอน โมยว แดง กาดาย บอ แคง ฆางหราว, เบ นับ, อึณ ดี แบน ปาย เหมา. เบ ยี วี ยึร ปี โบง เฌาพรา ดอ ตี นี. อึณ ตู วี ลึห ซีเพา อัน แคง น็อห เบ.

57แคง น็อห เบ, เบ ตู นับ ดี กาย็อห อี หมึอม อี ตู หมึอม ปี โบง ดูอี. 58โคว, เบ นับ ดี ลาย กาย็อง, ฮาว ดี กาง ดา ตาง อี ซูงพยาด ดารา. ดอ ฮาว เบ โดบ อึณเตณ ตี, เบ โลว โฆยวฆยา ดี แตห บอ เบ บอ รันซู เบ วี ลาย ดาคึย. เซ เบ ตู โบง ปาย ตี, รันซู เบ ดี อาบ เบ ดี ดา ตาง อี ซูงพยาด ดารา. แฮะ ฮอต, ดา อี ซูงพยาด ดารา ดี บอ อาบ เบ ดี ดา ซึก. ดา ซึก ตึอน ดี วี ปัก เบ อู เฌณ, คร็อง เบ แคง กาปึม. 59โอว ต็อห ดี เบ, อาต ดัว เบระ เบ รึอน ปี หมาณ รันซู เบ ตี, เบ ตู ปึอน วี เลห แคง กาปึม ตี.” เฌา เยซู แฮะ กาลาง ปาย ตี.

Currently Selected:

ลก 12: pce

Highlight

Copy