ลก 13

ลอง โลว แวน น็อห บรีม

1ดอ อัน ตี ดูอี มัง อี, อี กอย โดง กอย เฌา เยซู ตึอน, เฆ กาลาง ดี อัน ลอง แปะ แฮะ โบง ดา ตาง อี อึบ อืง ยูดา, อี จืร อาพีลาด. อัน แฮะ ง็อห ยัม เฆ ดูอี มัง อี อี ตัห อืง ฆาลีเล. อัน แฮะ ง็อห ยัม เฆ ดอ หลู เฆ ดี เฌาพรา. ดอ อัน ตี หนาม เฆ บอ ปี ดี หลู เฆ แฮะ กาซู กาวัร. 2เฌา เยซู วี ต็อห ดี เฆ, “เฆ ดูอี ฆาลีเล, อี ปี ง็อห ยัม อัน, เบ ทาง หมาบ เฆ แฮะ ตาง หลึอม ดูอี อาโมยว ฆาลีเล บอกาเฆลียด? 3อาว มูห ปาย ตี. โอว ต็อห ดี เบ, เซ เบ ตู แวน น็อห บรีม เบ, เซ เบ ตู ดึห น็อห กามาย ปี ดัว เฌาพรา ดี เบ, เบ ดี บอ ยัม โตต ดอน วี, แตห อาซาก เบ ชึม. 4เบ มืร ทาง ปาย เหมา ลอง ดูอี ฆึร ดี ดา วี, อี ยัม ดอ เกห โฮว จา อี มูห โดง บัร ดูอี แคง มืง ซีโลวอาม ตึอน? เบ ทาง เฆ มึห หมาบ ตาง หลึอม ดูอี บอกาเฆลียด อี กอย แคง มืง เยรูซาแลม? 5อาว มูห ปาย ตี. โอว ต็อห ดี เบ, เซ เบ ตู แวน น็อห บรีม บอ ดึห น็อห กามาย ปี ดัว เฌาพรา ดี เบ, เบ ดอน อี ดี บอ ยัม. อาซาก เบ ดี บอ ชึม.”

6แฮะ ฮอต กาลาง ปาย ตี, เฌา เยซู วี จูห ดี กาลาง อูพามา ดี เฆ. อัน ต็อห, “ดูอี อู วี มึห เฮ ดีปู อู กาดัง กอย แคง มาน มางูน อัน. อัน ฮาว เหรต เบล ดีปู ดี เฮ ตี. อัน ยี ตู ยึร เบล มาเซ. 7แฮะ ฮอต, อัน ต็อห ดี ดูอี อี บัร มาน อัน, ‘อึย, อึณ แฮะ โนะ โอย ซีนัม โอว แฮะ ตัห โดง กอย เฮ นี. โอว แฮะ ตัห ยอด เบล ดีปู นี. โอว ยี ตู ยึร เบล อัน มาเซ. แตห แม ฆัร แวน เฮ นี. แกวะ แตห อัน กอย ปีเยณ แดง กาดาย นี.’ อัน แฮะ ฮอต กาลาง ปาย ตี, 8ดูอี อี บัร มาน ตึอน วี ต็อห, ‘อึย ดา กาณา, แตห แม แตห อัน กอย ปอ อู ซีนัม. โอว ดี ฆึห กาดาย ดี ดัง เฮ ตี บอ ฮับ พูน.

9ซีนัม ดี ตัห, เซ อัน บอ มึห เบล, แฮะ ดาคึย. เซ อัน ยี ตู มึห เบล, แตห แม ฆัร แวน อัน.’”

ลอง เฌา เยซู ปีแกน อีบึณ ดอ มูห ซีแง ดีเหลา

10อึณ มึห ซีแง ดีเหลา อู ซีแง, เฌา เยซู มาโนว ดูอี แคง โฌง กรึบ เฆ ดูอี อายูดา เฌาพรา. 11แคง โฌง ตี มึห อีบึณ อู วี. กานัม แฮะ ดัว ดูก ดี โดว โบ็ง อัน. อาดา ฆึร ดี ดา ซีนัม อัน แฮะ คัม ดูก ปี ดัว กานัม ดี อัน. กานัม ตี แตห อัน กอย กาโฆะ เซเซ. อัน ตู ปึอน กอย ซืร. 12ดอ ยึร เฌา เยซู อีบึณ ตี, เฌา เยซู มืร แดะ อัน ตัห โดง กอย อัน. อัน ต็อห ดี อัน, “อึย ฆึณ, ดูก แม แฮะ เลห แคง โดว โบ็ง แม.” 13อัน มืร ดาง แด อัน แดง ฆีณ อัน. ดอ อัน ตี อีบึณ ตี วี ปึอน กอย ซืร อู เฌณ. อัน มืร จูห ดี อืบ เฌาพรา ลอง อัน ตี.

14เฆ ดา ตาง อี กอย แคง โฌง ตึอน, เฆ ยี รู โกบ แฮะ ปีแกน เฌา เยซู อีบึณ ตี ดอ มูห ซีแง ดีเหลา. เฆ บอ กาลาง ดี ดูอี เฮา ต็อห, “แฮะ มึห เดา ซีแง, ดูอี ปึอน โบง ฆาน. กานัร เดา ซีแง ตี, เบ แฮะ ปึอน ตัห แคง โฌง, แตห อี ปีแกน เซา เบ. ฮี ฌัม ซีแง ดีเหลา, แกวะ ตัห แตห อี ปีแกน เซา เบ.”

15เฆ แฮะ ฮอต ต็อห ปาย ตี, เฌา เยซู วี ต็อห ดี เฆ, “เบ มูห ดูอี ณึงราง บอด. เบ ดอน อี, เซ เบ มึห มัก อาโล็ง เฆ มาลา, ซีแง ดีเหลา เบ บอ ฆ็อห วัน ปี ปัก เบ โดว ซัดดาวา เบ แคง ทึบ, แตห เฆ ปึอน ดี เลห ฮาว เดียง อึม. 16อีบึณ นี, อัน ยี มูห หลูกหลาน ดา อาบราฮัม. โบว กานัม ซาตาน แฮะ ดัว ดูก ดี อัน อาดา ฆึร ดี ดา ซีนัม. อึณ ปี กานัม แฮะ ปัก โดว อัน. เหมา อึณ ปาย ปี ตู ซี แตห เบ โอว แตห อัน ลอด ซีแง ดีเหลา?”

17โฆรห เฌา เยซู ตี แตห เฆ อี ตู อึง ปี โบง อัน แบน หมึอม ซาย ดี เฆ. มาแล, เฆ ดูอี กืน, เฆ แฮะ ดาคึย ลอง แปะ แฮะ โบง เฌา เยซู ดอน โมยว อี หมึอม อาม กาเซา.

ลอง กาอาง เดา เซียม ฆาย ซีนัม บรัห คามูน

18วาย อัน ตี เฌา เยซู ต็อห, “มืง ปี อึบ เฌาพรา, อึณ ปาย เหมา? โอว ดี บอ ลาย กาเฆา ดี มาเซ? 19โอว ต็อห, อึณ ปี กาอาง เดา เซียม อู โมยว ปี ซัม ดูอี แคง มาน อัน. อึณ แกร ดี ตาง, กอ แบน ยวน, แตห มาซีม กอ ปึอน โบง กาฮูน ดี รา อัน.”

20ปอ อู เฌณ เฌา เยซู ต็อห, “มืง ปี อึบ เฌาพรา, โอว ดี บอ โลว กาเฆา ดี มาเซ? 21อึณ บอ ปี ซีนัม บรัห คามูน ปี ดึห อีบึณ อู วี, กาวัร แคง กาแปะ เคาคยูง โอย แบล, แตห อึณ กอ ปราง กอ บรัห โตต กาแปะ ตี.”

ลอง มาโลห เตียะ

22ดอ ฮาว เฌา เยซู โดบ อึณเตณ อี โฮะ มืง เยรูซาแลม, อัน บอ ฮาว ลึบ แคง มืง แบน มืง แบน มืง, มาโนว ดูอี. 23อึณ บอ มึห ดูอี อู วี, อัน ดีหมอด เฌา เยซู ต็อห, “อึย ดา ซารา, โอว ตู นับ, ดูอี ปี ดี คยอด แม, โยว มืร อึณ ดี เปรต กาเซา?”

เฌา เยซู วี ต็อห ดี อัน, 24“อึณ ปี เบ โลว โฆยวฆยา ดี ลึบ แคง มาโลห เตียะ. โอว ต็อห ดี เบ, ดูอี แบน วี แบน วี ต็อห ดี ลึบ แคง มาโลห ตี. เฆ ยี ตู แป ดี ลึบ. 25ดอ อัน ตี อึณ ปี ดา กาณา กาง ดี ยีต กาบีด มาโลห แกวะ ฮู แตห อาเซ ปึอน ดี ลึบ. เบ ดี บอ กอย นา เรต. เซ เบ บอ ดอย มาโลห, เบ ดี ต็อห, ‘อึย แม เฌา, แตห แม วึห มาโลห, แตห บอ เย ปึอน ดี ลึบ,’ ดา กาณา กาง ตึอน, อัน ดี วี ต็อห ดี เบ, ‘โอว ตู นับ เบ. โอว ตู นับ, เบ ตัห นา เหมา.’

26ดอ อัน ตี เบ ดี บอ ต็อห, ‘เย แฮะ โฮม บอ เดียง รึม โดบ แม. แม แฮะ มาโนว ดูอี แคง มืง เย.’

27ดา กาณา กาง ตึอน ยี วี ต็อห ดี เบ, ‘โอว ตู นับ นา เหมา เบ ตัห. เบ มูห ดูอี อี โบง นา ตู หมึอม, อี ว็อง เอียะ, แตห เบ เลห ฮาว โดง กอย โอว.’

28ดอ อัน ตี เบ ดี ปึอน ยึร ดา อาบราฮัม, อาแซก, อาโกบ, บอ เฆ ดูอี อี บยาน โฆรห เฌาพรา. เฆ ดี กอย โตต ดอน วี แคง มืง ปี อึบ เฌาพรา. เบ ยี ตู ปึอน ลึบ, โลว กอย นา เรต. ดอ อัน ตี เบ ดี บอ ยาม ตาง. กูงกาบ เบ กอ กาดอย โกบ โยว เบ. 29ดูอี แบน วี แบน วี ดี บอ ตัห นา เลห ซีแง, ตัห นา เฆต ซีแง, ตัห นา กัว, นา เตต. เฆ ดี ตัห กาฌูะ, ตูต บอ โฮม รึม ดอ โบง เฆ บลอย แคง มืง ปี อึบ เฌาพรา. 30ดอ อัน ตี เฆ อี ตัห ดี ปัน, เฆ ดี ปึอน กอย นา อาต. เฆ อี ตัห ดี อาต, เฆ ยี โลว กอย นา ปัน.”

ลอง เฌา เยซู มึห น็อห กลึร

31อึณ บอ ฌัม อู ซีแง, เฆ ดูอี แคง พึง พารีแซ ตัห ฌัม โดง กอย เฌา เยซู. เฆ ต็อห, “แตห แม เลห เตา โดง กอย แม นี, ฮาว กอย ปอ โปละ. คูนดีคัม อาเฮโรด, อัน ซี ง็อห ยัม แม.”

32เฌา เยซู ยี ต็อห ดี เฆ, “เบ โลว ฮาว กาลาง ดี ดูอี อี ปี มาโซว แปร อี หล็อก กาเซา ตี. แตห เบ ต็อห, ‘บอ อาตึร, บอ แคหณา โอว ดี ซูต กานัม เลห แคง โดว โบ็ง ดูอี. โอว บอ แตห เซา ดูอี หราย. ฮี ฌัม ตัะ หณา, โอว ดี บอ ฮอต โตต ฆาน ปี โบง โอว.’ 33บอ อาตึร, บอ แคหณา, บอ ตัะ หณา, โอว ยี ดี โบง ฮาว ฌึร ตี ดอน โมยว. โอว บอ โลว เลห ฮาว โดบ อึณเตณ, แกวะ แตห ดูอี อี บยาน โฆรห เฌาพรา ยัม ปอ โปละ. อัน โลว ยัม แคง มืง เยรูซาแลม.

34อึย, เบ ดูอี แคง มืง เยรูซาแลม, เบ มูห ดูอี อี แฮะ ง็อห อาซาก เฆ ดูอี อี บยาน โฆรห เฌาพรา. บอ เฆ ดูอี ปี ร็อห ปี ตึย เฌาพรา, เบ แฮะ ดึห มาว, วึณ เฆ, แตห เฆ ยัม. แบน เฌณ แบน เฌณ โอว แฮะ เทว ดี แดะ เบ ตัห ดี โอว, แตห อึณ ปี มาเอียน แดะ มาหลึม ฆอน อัน. เบ ยี ตู คัม, ตู หณึม โอว. 35แตห เบ โทม โฆรห โอว, อาว เหลณ โฮว เฌาพรา ดี บอ ลึร. อาว ฮู มึห อาเซ กอย นา แคง. โอว บอ ต็อห ดี เบ, เบ ตู ปึอน ดี วี ยึร โอว. ฮี ฌัม อาคราว ดี วี ตัห โอว โดง กอย เบ, เบ ดี บอ รวห โอว ต็อห, ‘อืบ อัน เฌา ปี ตึย เฌาพรา อี อึบ เอ.’” เฌา เยซู แฮะ กาลาง ลอง มืง เยรูซาแลม ปาย ตี.

Currently Selected:

ลก 13: pce

Highlight

Copy