ลก 18

ลอง อีบึณ ตัห หมาณ แบน เฌณ แบน เฌณ

1วาย อัน ตี เฌา เยซู กาลาง อูพามา ดี เฆ ดีแบ อัน ลอง โลว ซาคึร เซเซ, แกวะ แตห เฆ มึห น็อห ลึร. 2อัน ต็อห, “อึณ ดึอม มึห มืง อู มืง. อึณ มึห ดูอี อี ซูงพยาด อามู อี. อัน ตู โยว เฌาพรา, บอ ตู ซี จอย ดูอี. 3แคง มืง ตี อึณ มึห บอ ยา ซีปรัห อู วี, อัน นับ ดี ตัห ฌัม โดง กอย ดูอี อี ซูงพยาด ดารา อี ตู ซูงพยาด หมาน ตึอน. ยา ซีปรัห หมาณ แบน เฌณ แบน เฌณ, แตห อัน ซูงพยาด อามู อัน. อัน ต็อห, ‘โอว หมาณ, แตห แม จอย โอว, แตห แม ซูงพยาด อามู โอว, แกวะ แตห รันซู โอว โบง นา ตู หมึอม ดี โอว.’

4แฮะ เหลณ, ดูอี ซูงพยาด ดารา ตึอน ตู ซี จอย อัน. แฮะ ฮอต ปัน ตี อัน ต็อห แคง น็อห อัน, ‘โอว ตู โยว เฌาพรา, ตู โรวเซ ดูอี, 5โอว ยี โลว ซูงพยาด, โลว จอย อามู ยา ซีปรัห นี. โยว อัน ตัห ดีแล โอว เซเซ, ตู แตห โอว มึห น็อห เฆียด.’”

6เฌา เยซู แฮะ ฮอต กาลาง ปาย ตี, อัน วี ต็อห ดี ดีแบ อัน, “เบ โลว โทม โฆรห ปี กาลาง ดูอี อี ซูงพยาด ดารา อี ตู หมาน. 7เซ ดูอี ตู หมึอม แฮะ นับ ดี โบง ปาย ตี, เฌาพรา ดี บอ นับ ดี ซูงพยาด นา หมาน ดี ดอน อี อี โดบ ซีคยา อัน, อี มูห ดูอี ปี ร็อห อัน เฌา. เซ เฆ ดูอี หมาณ ดี เฌาพรา เซเซ, แตห อัน จอย เฆ, อัน ดี บอ จอย. อัน ตู แตห เฆ หน็อะ เหลณ อาต จอย อัน. อัน ดี บอ จอย เฆ อู เฌณ. 8โอว ต็อห ดี เบ, เฌาพรา ดี ออน ดี ซูงพยาด นา หมาน ดี เฆ อี โดบ ซีคยา อัน. เซ ดูอี อี แฮะ แบน ฆอน ดูอี ยี วี ตัห ฌัม แดง กาดาย นี, โอว ตู นับ, โยว อัน ดี ยึร ดูอี อี หณึม แคง น็อห เฆ ปาย ตี.”

ลอง ดูอี อา วี ซาคึร ดี เฌาพรา

9เฌา เยซู วี กาลาง อูพามา ดี เฆ ดูอี มัง อี อี ทาง เฆ หมึอม. เฆ บอ ปีพูง เฆ หลึอม ดูอี เฮา. 10อัน ต็อห, “แฮะ ดึอม มึห ดูอี อา วี, โฮะ ลึบ แคง โฮว เฌาพรา, ต็อห ดี ซาคึร ดี เฌาพรา. อู วี แฮะ มูห ดูอี แคง พึง พารีแซ. ปอ อู วี, อัน มูห ดูอี แฆบ รึอน จึง. 11ดูอี แคง พึง พารีแซ ตึอน, อัน ยีต ซาคึร, ต็อห ปาย นี, ‘อึย แม เฌาพรา, โอว ดาง ฆูง เฆฌู ดี แม เฌา. โคว, โอว ตู แบน ดูอี ตู หมึอม ปี เฆ ดูอี เฮา แบน โมยว แบน โมยว. โอว ตู ปี เฆ ดูอี กาโลว เซเซ, บอ เฆ ดูอี อี โบง นา ตู หมึอม. โอว มืร ตู ปี ดูอี อี ลูต อีบึณ. โอว ดาง ฆูง เฆฌู แม, แม ตู แตห โอว ปี ดูอี แฆบ รึอน จึง ตึอน. 12บู ซีแง อา เฌณ โอว ยืน ปี ดี โฮม. แคะ ปี มึห โอว ดอน โมยว, โอว มืร ดัว ฆึร บูน อู บูน, หลู ดี แม เฌา.’

13ดูอี แฆบ รึอน จึง ตึอน, อัน ยี กอย กาโต็ง. อัน ตู ยัะ ซากึห ฆางหราว. อัน บอ ปา บางน็อห อัน. ต็อห, ‘อึย แม เฌา, โอว แฮะ โบง หมาบ. โอว หมาณ, แตห แม เฌา กาเว โอว.’”

14ปัน ตี เฌา เยซู วี ต็อห, “โอว ต็อห ดี เบ. เฌาพรา โทม โฆรห ดูอี อี แฆบ รึอน จึง ตึอน. เฌาพรา มืร แตห อัน มึห น็อห หมาน, แตห อัน เวณ แคง กาง อัน. ดูอี แคง พึง พารีแซ ตึอน ยี ตู ปาย ตี. เซ อึณ มึห ดูอี อี ปีพูง เฆ, บอ ทาง เฆ แฮะ อาเร ตาง หลึอม อี เฮา, เฌาพรา ดี วี ต็อห, เฆ อาว อัห. เซ ดูอี ยี ตู ปีคึก น็อห อัน, อัน เฌา ดี แตห อัน แบน ดา ตาง.” เฌา เยซู มาโนว เฆ ปาย ตี.

ลอง ฆอน ดีแตด กอย รึม โดบ เฌา เยซู

15อึณ บอ มึห ดูอี, เฆ ตึย ฆอน อางัะ เฆ, แตห เฆ ตัห ฌัม โดง กอย เฌา เยซู, แตห อัน ปา เฆ. เฆ ดีแบ อัน, ดอ ยึร เฆ ปี โบง เฆ ดูอี ตึอน, เฆ จูห ดี เอห เฆ. 16เฌา เยซู ยี บาง เฆ ฆอน ตัห ฌัม โดง กอย อัน. อัน มืร ต็อห ดี ดีแบ อัน, “แตห เบ แตห ฆอน เฆ ตี ตัห ฌัม โดง กอย โอว. แกวะ แคร เฆ. อาเซ ซี กอย แคง มืง ปี อึบ เฌาพรา, อัน โลว แบน ปี ฆอน เฆ นี. 17โอว ต็อห อาคัร ดี เบ, อาเซ ตู หณึม เฌาพรา, อาเซ ตู มึห น็อห ปี ฆอน ดีแตด, อัน ตู ปึอน ดี ลึบ แคง มืง ปี อึบ เฌาพรา ดอ เหมา.”

ลอง ดา กาณา อี ครัม กาเซา

18ปัน ตี อึณ บอ มึห ดูอี อู วี, อี มูห ดา กาณา อี อึบ เฆ ดูอี อายูดา. อัน แฮะ ตัห ดีหมอด เฌา เยซู. อัน ต็อห, “แม ดา ซารา บอด, มาเซ ปี โลว โบง โอว, แตห โอว ปึอน ดี กอย รึม โดบ เฌาพรา เซเซ?”

19เฌา เยซู วี ต็อห ดี อัน, “เหมา อึณ ปาย ปี ต็อห แม โอว บอด? อาว มึห ดูอี บอด. มี เฌาพรา อู กาดัง แฮะ บอด. 20แม แฮะ นับ, ดารา ปี แดม อูน แคง บับ เฌาพรา, ‘แกวะ ลูต อีบึณ อี เฮา. แกวะ ง็อห ยัม อาซาก อี. แกวะ ปรา โกรว อี เฮา. แกวะ กาโลว ดอ กาลาง เบ ซักเซ ลอง อี เฮา, โรวเซ ฆูณ มา เบ.’ แม นับ ลอง อัน ตี ดอน โมยว.”

21ดูอี ตึอน วี ต็อห ดี เฌา เยซู, “โอว แฮะ โบง โตต ฌึร ตี ดอน โมยว อู ซีณ ดอ มูห โอว ฆอน ดีแตด.”

22วาย แฮะ โทม เฌา เยซู โฆรห ปี กาลาง ดูอี ตี, อัน วี ต็อห, “อึณ ซี มึห อู โมยว ปี โลว แม. แม โลว ย็อง โตต โกรวกราม แม. แคะ ปี ปึอน แม, แม โลว วี กาซาง ดัว ดี ดูอี ฆีน. เซ แม โบง ปาย ตี, อึณ ปี โกรวกราม ปี ดี ปึอน แม แคง มืง ฆางหราว, อึณ ดี กืน. แม ฮี ฮอต โบง ปาย ตี, แม โลว วี ตัห โดบ โอว.”

23ดูอี ตึอน แฮะ ฮอต โทม โฆรห เฌา เยซู ฌึร ตี ดอน โมยว, อัน บอ วี กลึร กาเซา. โคว, อัน ครัม กาเซา. 24เฌา เยซู ยี ยอด อัน. อัน บอ ต็อห, “เซ อึณ มูห ดูอี ครัม, อึณ หณาบ ดี อัน, แตห อัน ปึอน ดี ลึบ แคง มืง ปี อึบ เฌาพรา. 25เซ ดูอี โลว ฮับ วัน ตาง,#18:25 ยอด อามาแท 19:24 แตห อึณ ลึบ แคง กาเดา โหยะ มาลัต, อึณ ซี หงึย หลึอม ดูอี ครัม อู วี ดี ปึอน ดี ลึบ แคง มืง ปี อึบ เฌาพรา.”

26เฆ ดูอี โทม ปี ต็อห เฌา เยซู ตี, เฆ ดีหมอด อัน ต็อห, “เซ อึณ ปาย ตี, อึณ แหนน ตู มึห อาเซ อี ดี ปึอน ดี ลึบ แคง มืง ปี อึบ เฌาพรา.”

27เฌา เยซู วี ต็อห ดี เฆ, “ปี ตู ปึอน โบง ดูอี, เฌาพรา ยี ปึอน โบง โตต ดอน โมยว.”

28ดอ อัน ตี อาเปตารู วี ต็อห, “อึย แม เฌา, เย แฮะ ฮอต แวน กาง เฆ มาน เย, แตห เย ปึอน ดี โดบ แม.”

29เฌา เยซู วี ต็อห, “โอว ต็อห อาคาคัร ดี แม, เซ ดูอี ดี แวน กาง อัน, เซ อัน บอ แวน อีบึณ อัน เฆ อูกัด อูวา บอ ฆูณ มา เฆ ฆอน อัน, เซ อัน บอ โบง ปาย ตี โกบ ซี แตห เฌาพรา อึบ กาดาย, อัน ดี ปึอน รูห อัน. 30แคะ ปี แวน ดูอี ตี, อัน ดี วี ปึอน โตต ดอ ซี มูห ฌาด นี. อัน ดี บอ ปึอน กาปัว หลึอม บรีม ตี. ฌาด ดี ตัห, อัน ดี บอ ปึอน ดี กอย รึม โดบ เฌาพรา เซเซ, อาว ฮู ยัม ดอ เหมา.” เฌา เยซู แฮะ ต็อห ปาย ตี ดี ดีแบ อัน.

ลอง เฌา เยซู โลว ยัม

31วาย อัน ตี เฌา เยซู แดะ ดีแบ อัน ฆึร ดี อา วี, ต็อห ดี เฆ, “แตห เบ โทม. เอ ดี โฮะ มืง เยรูซาแลม. แคะ ปี แดม เฆ ดูอี อี บยาน โฆรห เฌาพรา ลอง ฆอน ดูอี ตึอน, อึณ ดี บอ แบน โตต ดอน โมยว, แตห อึณ ปี ปี แดม เฆ. 32เฆ ดูอี ดี อาบ ดัว อัน ดี ดูอี อาโมยว เฮา. ดูอี อาโมยว เฮา, เฆ ดี กาณัห อัน บอ กาลาง นา จาว ดี อัน, ปัต นา อัน. 33เฆ ดี บอ ซีเบรียะ อัน, ง็อห ยัม อัน. วาย อัน ตี โอย ซีแง, อัน ดี วี ยีต วี อีม.”

34เฆ ดีแบ อัน, เฆ ตู นับ มาเซ ปี ต็อห อัน. เฌา เยซู ตู แตห อึณ ลึห ดี เฆ. เฆ ตู นับ มาเซ ปี ต็อห เฌา เยซู ดี เฆ ลอง อัน ตี.

ลอง ดูอี งาย อับ อู วี

35ดอ กาตัด ดี ฌัม เฌา เยซู แคง มืง เยรีโคว ตึอน, อึณ มึห ดูอี งาย อับ อู วี. อัน กอย โคบ อึณเตณ, หมาณ ดี ดูอี. 36ดูอี ตึอน แฮะ ยึร ฆรัณ ดูอี กืน ฮาว โดบ อึณเตณ ตึอน, อัน บอ ดีหมอด มาเซ อึณ มูห ลอง ดูอี กืน เฆ ตี. 37เฆ ดูอี วี ต็อห ดี อัน, “อึณ มูห เฌา เยซู อี ตัห มืง นาซาเรต, อัน ฮาว โดบ อึณเตณ นี.”

38ดูอี งาย อับ ตึอน วี ดัด ตาง ต็อห, “อึย, อาเยซู, อี มูห หลูกหลาน อาดาวีด ตึอน, โอว หมาณ แตห แม กาเว โอว.”

39เฆ ดูอี อี ฮาว ดี อาต พึง เฌา เยซู, เฆ แคร อัน, จัร อัน แกวะ ดัด. ดูอี งาย อับ ตึอน ยี วี ดัด ตาง หลึอม คา อาต “อึย, ดูอี อี มูห หลูกหลาน อาดาวีด, โอว หมาณ, แตห แม กาเว โอว.”

40เฌา เยซู ฆืด อู เฌณ, จัร ดูอี อู วี, แตห อัน แดะ ดูอี งาย อับ ตัห ฌัม โดง กอย อัน. อัน แฮะ ฮอต ฌัม, เฌา เยซู ดีหมอด อัน ต็อห, 41“มาเซ ปี โลว แม โอว โบง?” อัน วี ต็อห, “แม เฌา, โอว หมาณ, แตห แม โบง แตห งาย โอว วี บลาง.”

42เฌา เยซู วี ต็อห, “โอว แตห แม วี ปึอน ดี ยึร โตต ดอน โมยว. โกบ แฮะ หณึม แม แคง น็อห แม, อึณ แตห แม แกน.” 43ดูอี งาย อับ, อัน แฮะ ปึอน วี ยึร อู เฌณ. อัน มืร ฮาว โดบ เฌา เยซู, จูห ดี อืบ เฌาพรา. บอ เฆ ดูอี กืน, ดอ ยึร เฆ ลอง อัน ตี, เฆ มืร อืบ เฌาพรา.

Currently Selected:

ลก 18: pce

Highlight

Copy