ลก 19

ลอง ดูอี แฆบ รึอน จึง

1วาย อัน ตี เฌา เยซู ลึบ แคง มืง เยรีโคว, ฮาว โดบ อึณเตณ กาแต มืง ตึอน. 2ดอ ฮาว อัน โดง ตึอน, อึณ มึห ดา อู วี, อี แฆบ รึอน จึง. อัน จืร อาซาแก. อัน แฮะ ครัม กาเซา. 3อัน ซี ยึร เฌา เยซู. อัน ยี ตู ปึอน ยึร. เฆ ดูอี อี กอย โดง ตึอน แฮะ กืน กาเซา. โดว อัน ยี ดีเตียม. 4โคว, อัน โพ็ง แยต ดี อาต อึณเตณ ฮาว เฌา เยซู. อัน วี โฮะ แดง เฮ ดีปู อู กาดัง, แตห อัน ปึอน ดี ยึร เฌา เยซู.

5ดอ ตัห ฌัม เฌา เยซู โดง กอย อาซาแก, อัน ซากึห ยอด อาซาแก ตึอน. อัน ต็อห, “อึย อาซาแก, แตห แม เลห โลง แฮ แฮ แดง เฮ ตี. อาตึร นี โอว ซี ฮาว ลึบ แคง กาง แม.” 6อัน แฮะ ฮอต กาลาง ปาย ตี, อาซาแก ปีครัน อัน, เลห โลง อู เฌณ, รวห เฌา เยซู ลึบ แคง กาง อัน. น็อห อัน บอ ดาคึย กาเซา.

7เฆ ดูอี เฮา อี ยึร ลอง อัน ตี, เฆ ตู อึง. เฆ จูห ดี ลาย กาลาง, “เหมา อึณ ปาย ปี ฮาว ลึบ อัน แคง กาง ดูอี อี มึห หมาบ?”

8วาย อัน ตี อาซาแก บอ ต็อห ดี เฌา เยซู, “อึย แม เฌา, โกรวกราม แคะ มึห โอว ดอน โมยว, อู กาแต โอว ดี กาซาง ดัว ดี ดูอี ฆีน. แคะ ปี โปห โอว ดี ดูอี เฮา, โอว ดี ดัว วีว ดี เฆ พวน บูน.”

9อัน แฮะ ฮอต ต็อห ปาย ตี, เฌา เยซู วี ต็อห ดี อัน, “ดอ ตี นี บอ แม บอ ดูอี ดอน อี อี กอย แคง กาง แม, เบ แฮะ เลห แคง หมาบ ปี โบง เบ. ดอ ตี นี บอ ดูอี เฆ นี ดอน อี แฮะ หณึม ปี ดา อาบราฮัม. 10อึณ แฮะ มูห, แฮะ หมาน, ดูอี อี แฮะ แบน ฆอน ดูอี, อัน แฮะ ตัห โลง แดง กาดาย นี, แตห อัน เหรต เฆ ดูอี อี แฮะ โบยห, แฮะ หราย, แตห อัน คยอด เฆ ดูอี มึห หมาบ.”

ลอง ดา กาณา ดัว รึอน ดี แดเจณ อัน

11เฌา เยซู บอ วี กาลาง อูพามา ดี เฆ ดูอี อี โทม ปี ต็อห อัน ตึอน. ดอ อัน ตี เฆ แฮะ ตัห ฌัม กาตัด มืง เยรูซาแลม. เฆ ดูอี ตึอน มืร หณึม, อาคราว ดี อึบ เฌาพรา กาดาย แฮะ กาตัด ดี ฌัม. 12โกบ เฆ ดูอี ตี, เฌา เยซู กาลาง อูพามา นี ดี เฆ. อัน ต็อห, “อึณ แฮะ ดึอม มึห ดา กาณา อู วี. อัน โลว ฮาว แคง มืง โต็ง, แตห คูนดีคัม ตาง แคง มืง โต็ง ตึอน โบง แตห บอ อัน แบน คูนดีคัม. วาย อัน ตี อัน ดี บอ วี ตัห อึบ มืง บรีม อัน. 13อาต ฮาว อัน, อัน จัร แดเจณ อัน ฆึร วี แตห เฆ ตัห ฌัม โดง กอย อัน, แตห อัน ดัว รึอน ดี เฆ, อู วี อู แหรณ โบ็ง.#19:13 แคง บับ ดอ โฆว อึณ ต็อห “ฆึร มีนา”. อู มีนา แบน อู มาย็อห โบ็ง. อัน มืร ต็อห ดี เฆ, ‘แตห เบ กาจึห กาย็อง, แตห อึณ กอ ฌัม อาคราว ดี วี ตัห ฌัม โอว.’

14อัน แฮะ ฮอต ฮาว, เฆ ดูอี แคง มืง บรีม อัน, เฆ ยี ตู อึง ดา กาณา ตึอน. เฆ บอ ตึย ดูอี มัง อี, แตห เฆ โดบ ดี ปัน อัน, แตห เฆ ต็อห ดี คูนดีคัม ตาง ตึอน, ‘เย ตู โลว ดา กาณา ตี แบน คูนดีคัม อี อึบ เย.’

15วาย อัน ตี ดา กาณา ตึอน แฮะ ฮอต แบน คูนดีคัม, อัน วี วีว มืง อัน. ดอ แฮะ ตัห ฌัม อัน อู เฌณ อัน แดะ เฆ แดเจณ อัน ตึอน, แตห เฆ ตัห ฌัม โดง กอย อัน, แตห อัน นับ เหมา เฆ แฮะ แป ดี โบง แตห รึอน อัน กาปัว.

16ปัน ตี อู วี ตัห ฌัม โดง กอย อัน. อัน ต็อห, ‘อึย แม ดา กาณา, รึอน ปี ดัว แม อู แหรณ ตึอน, โอว แฮะ ปึอน ฆึร บูน.’

17คูนดีคัม ตึอน วี ต็อห, ‘แม แฮะ โบง นา หมึอม. แม แฮะ มูห แดเจณ โอว อี หมึอม. แม แฮะ มึห น็อห หมาน, แตห แม โฆยวฆยา ดอ ปึอน แม อี แจก. โอว ดี แตห แม แบน ดา ตาง อี อึบ มืง ฆึร มืง.’

18วาย อัน ตี ปอ อู วี บอ ตัห. อัน ต็อห, ‘อึย แม ดา กาณา, อู แหรณ ปี ดัว แม ดี โอว, โอว แฮะ ปึอน พัน บูน.’

19อัน แฮะ ฮอต ต็อห ปาย ตี, คูนดีคัม ตึอน วี ต็อห, ‘โอว ดี แตห แม แบน ดา กาณา อี อึบ มืง พัน มืง.’

20แฮะ ฮอต ปัน ตี ดูอี ปอ อู วี วี ตัห. อัน ต็อห, ‘อึย แม คูนดีคัม, นี, รึอน อู แหรณ ปี ดัว แม ดี โอว, โอว ดัว วีว ดี แม. โอว แฮะ กาบัน อูน แคง บีก, แกวะ แตห อึณ โบยห. 21โอว แฮะ โยว แม. แฮะ นับ, แม มูห ดา กาณา อี หมึอม โยว. แม ตู โบง ฆาน มาเซ, แม ยี นับ ดี ปึอน กืน, แม แตห ดูอี เฮา โบง ฆาน แม. แม มืร โซะ โหงว ปี ตู ซัม แม.’

22คูนดีคัม ต็อห ดี อัน, ‘แม มูห แดเจณ อี ตู หมึอม. แฮะ หมาน ปี กาลาง แม. โอว ดี บอ ดัม หมาบ แม โกบ โฆรห แม ตี. แม แฮะ นับ, โอว มูห ดูอี หมึอม โยว. โอว ตู โบง ฆาน มาเซ. โอว ยี นับ ดี ปึอน กืน. โอว แตห อี เฮา โบง ฆาน โอว. โอว บอ โซะ โหงว ปี ตู ซัม โอว. 23เซ แฮะ มูห แฮะ หมาน ปาย ตี, เหมา อึณ ปาย ปี ตู เบลห แม รึอน ตี, แตห อึณ เลห เอียง อัน? เซ แม โบง ปาย ตี, โอว แฮะ ปึอน ดึห เอียง อัน ดอ วี ตัห ฌัม โอว.’

24แฮะ ฮอต, อัน บอ ต็อห ดี เฆ ดูอี อี กอย โดง ตึอน, ‘แตห เบ ดึห รึอน โอว อู แหรณ ปี โฆ็ง อัน, วี ดัว ดี ดูอี อี แฮะ ปึอน ฆึร บูน ตึอน.’

25เฆ อี เฮา ยี ต็อห ดี อัน, ‘อึย แม ดา กาณา, ดูอี ตึอน, อัน แฮะ ฮอต ปึอน อู แหรณ.’ ดา กาณา วี ต็อห, 26‘โอว ต็อห ดี เบ, อาเซ แฮะ มึห แบน โมยว แบน โมยว, อัน ดี วี ปึอน ปอ อึณ ปัว, แตห อัน มึห หลึอม คา อาต. อาเซ ยี ตู มึห มาเซ, แคะ ปี ทาง อัน, อัน แฮะ มึห, โอว ดี ดึห บอ อาตี, แกวะ ฮู แตห อัน มึห มาเซ.’ 27บอ เฆ ดูอี ตู อึง โอว, ดูอี ตู ซี แตห โอว แบน คูนดีคัม อี อึบ เฆ ตึอน, เบ โลว จัร เฆ ตัห โดง กอย โอว นี, ง็อห ยัม เฆ ดี อาต โอว. คูนดีคัม ตึอน ต็อห ปาย ตี ดี แดเจณ อัน.”

ลอง เฌา เยซู ลึบ แคง มืง เยรูซาแลม

28เฌา เยซู แฮะ ฮอต กาลาง ฌึร ตี ดอน โมยว, อัน แยต ดี อาต เฆ ดีแบ อัน, ฮาว โดบ อึณเตณ อี โฮะ มืง เยรูซาแลม. 29ดอ ตัห ฌัม อัน กาตัด เรา เบดพาเฆ ฆาย เรา เบทานี, อัน ตัห ฌัม ดี ดัง นอน เฮ นามัน. อัน จัร ดีแบ อัน อา วี, 30ต็อห ดี ฆาย, “แตห บาย ฮาว แคง เรา อี กอย กาตัด ดอย. ดอ ลึบ บาย แคง เรา, บาย ดี ยึร ฆอน มาลา แปะ แฮะ ปัก อูน เฆ. ดูอี ตู ดึอม ป็อะ อัน. แตห บาย ฆ็อห วัน อัน, ตึณ อัน ตัห ฌัม โดง กอย โอว นี. 31เซ อึณ มึห ดูอี อี ดีหมอด บาย, เหมา อึณ ปาย ปี ฆ็อห บาย มาลา ตี, บาย โลว ต็อห, ‘อัน เฌา อี โลว อัน อาดา อู กาจัน.’”

32ปัน ตี ฆาย อา วี บอ ฮาว. ฆาย บอ ยึร โตต ปี ดึอม ต็อห เฌา เยซู ดี ฆาย. 33ดอ ฆ็อห ฆาย วัน ฆอน มาลา ตึอน, ดา กาณา อัน ต็อห ดี ฆาย, “เหมา อึณ ปาย ปี ฆ็อห บาย วัน ฆอน มาลา โอว ตี?”

34ฆาย วี ต็อห ดี อัน, “อัน เฌา แฮะ โลว อู กาจัน.”

35แฮะ ฮอต, ฆาย วี ตึณ มาลา ตึอน ตัห ฌัม โดง กอย เฌา เยซู. เฆ ดูอี กืน ดึห ครึง ปี ตา เฆ, เบลห แดง กาตูะ มาลา ตึอน, แตห เฌา เยซู ป็อะ นา แดง. 36ดอ ฮาว อัน โดบ อึณเตณ ตึอน, เฆ ดูอี อี โดบ อัน, เฆ บอ ดึห ครึง ปี ตา เฆ, ดัะ แดง อึณเตณ ดี อาต เฌา เยซู.

37ดอ แฮะ ตัห ฌัม เฆ กาตัด มืง เยรูซาแลม, ฮาว โดบ อึณเตณ อี เลห โลง แดง นอน เฮ นามัน, เฆ ดูอี กืน อี โดบ อัน บอ เฆ ดีแบ อัน, เฆ แบน น็อห ซี ดาง ฆูง เฆฌู ดี เฌาพรา. เฆ มืร อืบ อัน เฌา, ต็อห โฆรห ดีตาง, กาลาง ลอง นา หมึอม อาม กาเซา แปะ แฮะ โบง อัน เฌา, แตห เฆ ปึอน ดี ยึร. เฆ บอกาเฆลียด ต็อห,

38“เอ อืบ มยูก คูนดีคัม แปะ แฮะ ตึย ตัห เฌาพรา. แตห เฆ ดูอี กอย แคง มืง ฆางหราว มึห น็อห เฆียด. อาพูง ดังโคว เฌาพรา แฮะ ตาง กาเซา. อัน กอย แคง ฆางหราว, อี มูห โดง ตาง หลึอม โตต.” เฆ ดูอี กืน ต็อห ปาย ตี.

39ดอ อัน ตี เฆ พึง พารีแซ บอ เฆ ดูอี อี กอย โดง ตึอน, เฆ ต็อห ดี เฌา เยซู, “ดา ซารา, แตห แม จัร เฆ ดีแบ แม, แกวะ แตห เฆ ซีนัน ซีนืง ปาย ตี.”

40เฌา เยซู ยี ต็อห, “โอว ต็อห ดี เบ, เซ เฆ ดูอี นี ตู ต็อห มาเซ, อึณ ดี มึห มาว เฆ นี, เฆ ดี ดัด ตาง, อืบ เฌาพรา.”

41เฌา เยซู, ดอ ตัห ฌัม อัน โดง แฮะ ปึอน ยึร มืง เยรูซาแลม, อัน บอ ยาม โกบ โหลห อัน เฆ ดูอี อี กอย แคง มืง ตี. 42อัน ต็อห, “ดอ ตี นี, โอว ซี โลว กาเซา, แตห โอว ดัว น็อห เฆียด ดี เบ. เบ ยี ตู นับ ลอง อัน ตี. อึณ ปี งาย เบ อับ, อาว ปึอน ยึร มาเซ. 43อึณ ดี มึห อู ซีแง, เฆ รันซู เบ ดี ตัห ฌัม ดี อาต มืง. เฆ ดี โบง บล็อะ อึณแตง, แตห เฆ ปึอน ดี ลึบ มืง. เฆ บอ กอย โรบ มืง, แกวะ แตห ดูอี ปึอน เลห ปึอน ลึบ นา เหมา. 44เฆ ดูอี ตึอน, เฆ ดี โบง แตห เบ ชึม, แตห มืง กอ กาปยาต ลึร โตต. บอ เฆ ดูอี ดีตาง บอ เฆ ฆอน อี กอย แคง มืง, เฆ ดี บอ ชึม บอกาเฆลียด. มาว ปี ตา ดูอี ซัม กาง, อู โบ็ง มืร ตู วี กอย โดง บรีม อัน. อึณ ดี แบน ปาย ตี, โกบ ตู นับ เบ ลอง เฌาพรา แฮะ ตัห, ต็อห ดี จอย เบ.” เฌา เยซู ต็อห ปาย ตี ดี มืง เยรูซาแลม.

ลอง เฌา เยซู ลึบ แคง แวง โฮว เฌาพรา

45วาย อัน ตี เฌา เยซู ลึบ แคง แวง โฮว เฌาพรา. อัน บอ โฮว เลห เฆ ดูอี อี ลาย กาจึห กาย็อง แคง แวง โฮว เฌาพรา ตี. 46อัน ต็อห ดี เฆ, “บับ เฌาพรา แฮะ ต็อห ลอง โฮว เฌาพรา, ‘โอว แฮะ โบง แตห กาง โอว แบน โดง ดี ตัห ซาคึร ดูอี ดี เฌาพรา.’ เบ ยี แฮะ แตห อึณ แบน โดง ตัห เครียง ดา โฌน.”

47วาย อัน ตี ดอน ซีแง เฌา เยซู มาโนว ดูอี แคง แวง โฮว เฌาพรา ตึอน. เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา ยูดา, บอ เฆ ดา ตาง อี อึบ ดูอี อายูดา, เฆ ลาย ซังคยาง เหมา เฆ ดี ปาย ดี ง็อห ยัม เฌา เยซู. 48เฆ ยี เฌณฌา ตู เลห มาเซ อี ดี แตห เฆ ปึอน ดี โบง. โคว, เฆ ดูอี กืน บอ โทม บอ โพรม เซเซ ปี ต็อห เฌา เยซู.

Currently Selected:

ลก 19: pce

Highlight

Copy