ลก 5

ลอง เฆ ดีแบ เฌา เยซู

1อู ซีแง, เฌา เยซู ตัห ดี โคบ อึม ดึง อี จืร อึม เกเนซาเรด.#5:1 อึม ดึง เกเนซาเรด บอ อึม ฆาลีเล มูห อู โมยว เฆ ดูอี กืน มืร แฮะ ตัห โดง กอย อัน ตี. เฆ บอ ลาย กาเซียะ, แตห เฆ ปึอน ดี โทม โฆรห เฌาพรา. 2เฌา เยซู ยึร รึร อา หลาง กอย ดี โคบ อึม. เฆ ดา อี เหมต มาฆา, แฮะ เลห แคง รึร, ลัห อึณรับ เฆ. 3รึร ตึอน, อึณ มูห รึร อาซีโมน. เฌา เยซู บอ ลึบ กอย แคง รึร อู หลาง, จัร อาซีโมน, แตห อัน ป็อะ รึร, ลึบ ฮาว แคง อึม อี แจก. แฮะ ฮอต, อัน บอ ตูต แคง รึร ตึอน, มาโนว เฆ ดูอี อี กอย ดี โคบ อึม.

4อัน แฮะ ฮอต มาโนว, อัน วี ต็อห ดี อาซีโมน, “แตห แม วี ป็อะ รึร, ฮาว ฌัม โดง ลึก อึม. แฮะ ฮอต, บอ แม บอ ฆึก แม, แตห เบ บยัว อึณรับ เบ, แตห เบ เทว ดี เหมต มาฆา.”

5อาซีโมน วี ต็อห ดี อัน, “อึย แม ดา ซารา, เย แฮะ บยัว อึณรับ เย นอง คืน, เย ยี ตู ปึอน มาเซ. โกบ แฮะ จัร แม เฌา ดี โอว, โอว ดี บอ บยัว อึณรับ เย ปอ อู เฌณ.”

6แฮะ ฮอต ปัน ตี เฆ วี บยัว อึณรับ เฆ, วี ปึอน มาฆา กืน กาเซา, แตห อึณรับ เฆ กอ กาปยาต. 7อาซีโมน บอ เฆ ดูอี อี กอย รึม โดบ อัน, เฆ บอ แดะ ฆึก เฆ อี กอย แคง รึร ปอ อู หลาง, แตห เฆ ตัห จอย เฆ. เฆ บอ วี ตัห จอย, วี ดึห อูน มาฆา แคง รึร, แตห รึร บอ อา หลาง กอ รีน ดี เจต โลง แคง อึม.

8อาซีโมน, อี จืร บอ อาเปตารู, อัน บอ ยึร ลอง อัน ตี, อัน บอ ครึบเครา ดี อาต เฌา เยซู, วี กรึบ อัน ต็อห, “อึย, แม เฌา, โอว หมาณ, แตห แม เลห โดง กอย โอว. โอว มูห ดูอี อี มึห หมาบ.” 9ปัน ตี อาซีโมน เฆ ฆึก อัน, เฆ อาม กาเซา ดี ปึอน เฆ มาฆา กืน แคะ ตี. 10อายาโกบ ฆาย อายอฮาน, อี มูห ฆอน อาเฌเบเด, ฆาย อี โบง รึม ฆาน, บอ อาซีโมน, เฆ บอ อาม กาเซา ลอง อัน ตี.

เฌา เยซู วี ต็อห ดี อาซีโมน, “แกวะ แตห แม โยว. อู ซีณ ดอ ตี นี ฮาว นา อาต, เบ ดี บอ ปึอน ดี แดะ ดูอี ตัห โดบ โอว, แตห อึณ ปี ปี เหมต เบ มาฆา ตี.” 11อัน แฮะ ฮอต กาลาง ปาย ตี, เฆ บอ เบลห อูน รึร เฆ ดี โคบ อึม, เบลห โกรวกราม เฆ ดอน โมยว, วี ฮาว โดบ เฌา เยซู.

ลอง ดูอี เซา

12อู ซีแง ดอ กอย เฌา เยซู แคง มืง อู มืง, อึณ บอ มึห ดูอี อู วี, อัน มึห เซา ดูะ.#5:12 ยอด อามาแท 8:2 ดอ ยึร อัน เฌา เยซู, อัน ครึบเครา ดี อาต เฌา เยซู, หมาณ กาเซา ดี อัน เฌา. อัน ต็อห, “อึย แม เฌา, เซ แม มึห น็อห ซี โบง, แม บอ แป ปีแกน โอว, แตห โอว ซีงา โดบ ปี ดัม ดารา.”

13อัน แฮะ ฮอต ต็อห, เฌา เยซู บอ ดึห แด อัน ฮา ดึร ดูอี เซา ตี. อัน มืร ต็อห, “โอว แฮะ ซี โบง. แตห แม แกน.” อัน แฮะ ฮอต กาลาง โฆรห ตี, เซา ดูะ อัน ตี มืร หราย อู เฌณ.

14เฌา เยซู วี ดัม อัน ต็อห, “แกวะ กาลาง มาเซ ดี ดูอี เฮา. แม ยี โลว ฮาว โดง กอย ดูอี อี หลู ดี เฌาพรา, แตห อัน ยอด โดว แม. แฮะ ฮอต, แม โลว หลู แคะ ปี ดัม ดา อาโมวแซ เบ หลู, แตห ดอน อี นับ, แม แฮะ แกน.”

15ลอง ปี โบง เฌา เยซู ตี, อึณ ยี แบร ดอน โปละ หลึอม คา อาต. เฆ อี กืน อี ตัห โทม อัน เฌา, เฆ มืร ซี แตห อัน ปีหราย เซา เฆ ดอน โมยว. 16แบน เฌณ แบน เฌณ เฌา เยซู ยี เลห ฮาว ซาคึร โดง ตู มึห ดูอี.

ลอง เฌา เยซู ปีแกน ดูอี ยัม บลาก

17อู ซีแง เฌา เยซู บอ มาโนว ดูอี. เฆ พึง พารีแซ มัง อี บอ เฆ ดา ซารา อี มาโนว ดารา ยูดา มัง อี, เฆ บอ กอย โทม ปี กาลาง เฌา เยซู. เฆ แฮะ ตัห แคง อืง ฆาลีเล บอ แคง อืง ยูดา ดอน เรา. บอ เฆ ดูอี กอย มืง เยรูซาแลม แฮะ ตัห กาฌูะ. ปวน เฌาพรา กอย รึม โดบ เฌา เยซู แตห อัน แป ดี ปีหราย เซา เฆ. 18ดอ อัน ตี ดูอี มัง อี บอ ตัห ตึย ดูอี อู วี อี แฮะ ยัม บลาก. เฆ ตัห กาฆอด อัน แดง กาโช็ง อีด อัน, ต็อห ดี ตึย อัน ฌัม แคง กาง โดง กอย เฌา เยซู, แตห เฆ เบลห อัน ดี อาต เฌา เยซู. 19อึณ ยี ตู มึห โดง ดี ปึอน ลึบ, โกบ กืน เฆ ดูอี อี กอย ดี กาง ตึอน. เฆ วี กาฆอด อัน โฮะ แดง กาตูะ กาง. เฆ บอ ย็อห กาตูะ กาง, แตห อึณ มึห กาเดา. แฮะ ฮอต, เฆ วี บยัว โลง อัน บอ กาโช็ง อีด อัน, ฌัม ดี อาต เฌา เยซู.#5:19 ยอด อามาแท 24:17

20เฌา เยซู บอ ยึร น็อห หณึม เฆ ดูอี ตึอน, อัน ต็อห ดี ดูอี เซา, “อึย วา, หมาบ ปี โบง แม, โอว แฮะ ฮอต บลัวะ แวน.”

21อัน แฮะ ฮอต กาลาง ปาย ตี, เฆ ดา ซารา อี มาโนว ดารา ยูดา บอ เฆ ดูอี แคง พึง พารีแซ, เฆ กาพา แคง น็อห เฆ, “ดูอี ตี แฮะ แคณ เฌาพรา. อัน มูห ดูอี ปาย เหมา? อาว มึห อาเซ อี แป ดี บลัวะ แวน หมาบ อี. อึณ มึห มี เฌาพรา อู กาดัง อี แป ดี บลัวะ หมาบ อี.”

22เฌา เยซู ยี นับ ปี กาพา เฆ แคง น็อห เฆ. อัน วี ต็อห, “เหมา อึณ ปาย ปี ทาง เบ ปาย ตี แคง น็อห เบ? 23เซ โอว ต็อห ดี ดูอี เซา, ‘หมาบ ปี โบง แม, โอว แฮะ ฮอต ฆ็อห แวน,’ เบ ทาง อึณ หงึย โกบ ตู ปึอน ยึร เบ, โยว อึณ แบน ตู แบน ปี ต็อห โอว. เซ โอว ยี ต็อห ดี อัน, ‘แตห แม ยีต ฮาว,’ เบ ทาง อึณ หณาบ โกบ ปึอน ยึร เบ อึณ ดี แบน ตู แบน ปาย ตี. 24โอว ยี แตห เบ นับ ซีคยา, โอว อี แฮะ แบน ฆอน ดูอี, โอว แฮะ มึห ปวน แดง กาดาย, แตห โอว แป ดี บลัวะ แวน หมาบ อี.” ปัน ตี เฌา เยซู บอ ต็อห ดี ดูอี ยัม บลาก ตึอน, “โอว ต็อห ดี แม, ยีต, แตห แม ดึห โฆ็ง บอ โดง อีด แม, วี เวณ ดี กาง แม.” 25เฌา เยซู แฮะ ฮอต กาลาง ปาย ตี, อัน มืร ยีต อู เฌณ, แตห เฆ ดูอี ยึร. อัน บอ ดึห โดง อีด อัน, เวณ ดี กาง อัน. อัน มืร อืบ เฌาพรา ดอ เวณ อัน. 26เฆ ดูอี กืน มืร อาม กาเซา ลอง อัน ตี. เฆ บอ อืบ เฌาพรา บอ โยว ลอง อัน ตี. เฆ วี ลาย กามวน ต็อห, “ดอ ตี นี เอ แฮะ ยึร อี หมึอม อาม กาเซา.”

ลอง เฌา เยซู แดะ อาเลวี โดบ อัน

27วาย อัน ตี เฌา เยซู วี เลห แคง กาง ตึอน, วี ฮาว ยึร ดูอี อี แฆบ รึอน จึง อู วี. อัน จืร อาเลวี. อัน ตูต โดง แฆบ เฆ รึอน จึง. เฌา เยซู ต็อห ดี อัน, “ตัห โดบ โอว.” 28แฮะ ฮอต ต็อห ปาย ตี, อาเลวี เบลห โตต โกรว อัน ดอน โมยว, ฮาว โดบ เฌา เยซู.

29วาย อัน ตี อาเลวี บาง เฌา เยซู โฮม โบม แคง กาง อัน. อัน เฮียง บอ เฌา เยซู บอ เฆ ดูอี เฮา. บอ เฆ ดูอี อี แฆบ รึอน จึง, เฆ กืน กอย รึม, โฮม โบม แคง กาง อัน. 30เฆ ดูอี พึง พารีแซ บอ เฆ ดา ซารา อี มาโนว ดารา ยูดา, เฆ ยี กาลาง ดี เฆ ดีแบ เฌา เยซู ลอง ปี โบง อัน. เฆ ต็อห, “เหมา อึณ ปาย ปี โฮม รึม เบ โดบ เฆ ดูอี อี แฆบ รึอน จึง บอ โดบ เฆ ดูอี อี โบง หมาบ ดอน โมยว?”

31เฌา เยซู วี ต็อห, “เซ ดูอี แฮะ โปลม คัะ, อัน ตู โลว ซาราโวน. อาเซ มึห เซา รอฆา, อัน แฮะ โลว ซาราโวน. 32โอว มืร ตู ตัห แตห โอว บาง ดูอี หมึอม ตัห โดบ โอว. โอว แฮะ ตัห แตห โอว บาง เฆ ดูอี อี มึห หมาบ ตัห โดบ โอว, แตห เฆ แวน น็อห บรีม เฆ, วี ดึห น็อห กามาย.”

ลอง โลว ยืน ปี ดี โฮม

33ดอ อัน ตี อึณ มึห มัง อี วี กาลาง ดี เฌา เยซู ต็อห, “แบน เฌณ แบน เฌณ, เฆ ดีแบ อายอฮาน แกม ซีณ, คัม ดี ยืน ปี ดี โฮม เฆ บอ ซาคึร ดี เฌาพรา. บอ ดีแบ เฆ ดูอี พึง พารีแซ บอ โบง ปาย ตี. อี มูห ดีแบ แม, เหมา อึณ ปาย ปี ปึอน เฆ โฮม เซเซ, ตู โบง ปี เฆ?”

34เฆ แฮะ ฮอต ดีหมอด ปาย ตี, เฌา เยซู วี ต็อห ดี เฆ, “เซ อึณ มึห บลอย คัด, ดอ กอย รึม กาโณม โดบ แคต อัน, เบ ทาง เฆ ดูอี อี ลึบ บลอย ดี บอ ยืน ปี โฮม เฆ? เบ แฮะ นับ ซีคยา, อาว ปึอน โบง ปาย ตี. 35อึณ ยี ดี ฌัม อู ซีแง, เฆ ดี ดึห แวน กาโณม ตี. ดอ อัน ตี เฆ อี ลึบ บลอย ตี, เฆ ดี วี ยืน ปี ดี โฮม เฆ.”

36เฌา เยซู วี มาโนว เฆ, แตห อึณ แบน อูพามา. อัน ต็อห, “อาว มึห ดูอี ยาต ซีโตว กามาย วี กาปาง ซีโตว บรีม. เซ อัน โบง ปาย ตี, บอ บีก กามาย ตึอน ดี วี ปยาต ซีโตว บรีม แตห อึณ ลึร. อึณ ตู ลาย กาเฌา. 37อึณ มืร อาว มึห ดูอี อี ฮับ อึม มางูน กามาย แคง กาเปา เบล บรีม. เซ อัน โบง ปาย ตี, อึม มางูน กามาย ตึอน ดี ซีนัม แคง กาเปา เบล บรีม ตี, แตห อึณ กอ กาลาต ลึร, แตห อึณ กอ ชึม. 38โคว, อึม มางูน กามาย โลว ฮับ แคง กาเปา เบล กามาย. 39อาเซ ยี เดียง อึม มางูน บรีม, อัน ตู วี ซี เดียง อึม มางูน กามาย. อัน ดี ต็อห, ‘อี บรีม แฮะ ฮอต ซีแงห.’” เฌา เยซู แฮะ มาโนว ปาย ตี แตห เฆ นับ, ดารา กามาย ปี มาโนว อัน ฆาย ดารา บรีม ปี มาโนว เฆ ดูอี อายูดา, อาว ปึอน กาวัร.

Currently Selected:

ลก 5: pce

Highlight

Copy