ลก 6

ลอง เฌา เยซู อึบ ซีแง ดีเหลา

1ซีแง ดีเหลา อู ซีแง, เฌา เยซู ฮาว โดบ อึณเตณ แคง มาน. บอ เฆ ดีแบ อัน ฮาว รึม โดบ อัน. ดอ อัน ตี เฆ แฮะ ซีกัด กาโย็ง โหงว, ซีบอด โฮม. 2เฆ พึง พารีแซ มัง อี, เฆ ยี ต็อห ดี เฌา เยซู, “เหมา อึณ ปาย ปี โบง เบ ปี แคร ดารา เอ โบง ดอ มูห ซีแง ดีเหลา?”

3เฌา เยซู วี ต็อห ดี เฆ, “เบ ตู ดึอม ตีห แคง บับ เฌาพรา ลอง อาดาวีด บอ เฆ อี โดบ อัน? ดอ กาปราณ เฆ ปี ดี โฮม, 4อาดาวีด แฮะ ฮาว ลึบ แคง กาง โดง กรึบ เฆ เฌาพรา, ดึห คามูน ปี เบลห เฆ ดี อาต เฌาพรา, วี แตห บอ อัน บอ ฆึก อัน โฮม. เซ อาว มูห ดูอี อี หลู ดี เฌาพรา, ดารา เฌาพรา ตู แตห อี โฮม คามูน ตี. มาแล, เฌาพรา ตู ดัม หมาบ ดี อัน โกบ โบง อัน ปาย ตี.” 5เฌา เยซู บอ วี ต็อห ดี เฆ, “โอว อี แฮะ แบน ฆอน ดูอี, อึณ มูห โอว อี อึบ ซีแง ดีเหลา.”

6อึณ บอ ฌัม ซีแง ดีเหลา ปอ อู ซีแง, เฌา เยซู โฮะ แคง โฌง กรึบ เฆ ดูอี อายูดา เฌาพรา, มาโนว เฆ ดูอี อี กอย แคง โฌง ตึอน. อึณ มืร มึห ดูอี อู วี, แด อัน บลาก อาอัห แฮะ ยัม. 7อึณ บอ มึห เฆ ดา ซารา อี มาโนว ดารา เฌาพรา บอ เฆ พึง พารีแซ มัง อี. เฆ หน็อะ ดี ยอด, โยว เฌา เยซู ดี ปีแกน ตู ปีแกน ดูอี ตึอน ดอ มูห ซีแง ดีเหลา. เฆ ซี เหรต ดัง, แตห เฆ ปึอน ดี พยาก เฌา เยซู. 8เฌา เยซู ยี นับ ลอง ปี คราม เฆ แคง น็อห เฆ. อัน ต็อห ดี ดูอี อี มึห แด อี แฮะ ยัม บลาก, “แตห แม ยีต ตัห กอย นา อาต นี.” แฮะ ฮอต ต็อห ปาย ตี, ดูอี ตึอน บอ ยีต ฮาว ฌัม ดี อาต เฌา เยซู.

9ปัน ตี เฌา เยซู วี ต็อห ดี เฆ ดูอี อี กอย แคง โฌง ตึอน, “โอว ซี ดีหมอด เบ, มาเซ ปี ทาง เบ. เซ อึณ มูห ซีแง ดีเหลา, โลว โบง นา หมึอม, โลว โบง นา ตู หมึอม? โลว คยอด ดูอี? โลว โบง แตห อี ยัม? มาเซ ปี ดัม ดารา เฌาพรา เอ โบง?”

10แฮะ ฮอต, เฌา เยซู ยอด เฆ ดูอี บอกาเฆลียด. อัน วี ต็อห ดี ดูอี ตึอน, “แตห แม โจะ แด แม.” แฮะ ฮอต, ดูอี ตึอน บอ โจะ แด อัน. อึณ บอ แกน อู เฌณ. 11ดูอี เฆ ตึอน บอ รู กาเซา แคง น็อห เฆ. เฆ บอ ลาย ซังคยาง ลอง ปี ดี ปาย เฆ ดี โบง ดี เฌา เยซู.

ลอง เฌา เยซู ร็อห ดีแบ อัน

12ดอ อัน ตี เฌา เยซู โฮะ แดง นอน อู โปละ แตห อัน ซาคึร ดี เฌาพรา. อัน บอ ซาคึร นอง คืน, กอ ฌัม ซีณวัห. 13แปร แฮะ วัห, อัน วี แดะ เฆ ดีแบ อัน ตัห ฌัม โดง กอย อัน. แคะ กอย เฆ ดีแบ อัน, อัน ร็อห ฆึร ดี อา วี, แตห เฆ แบน ดูอี ปี ร็อห ปี ตึย เฌา เยซู. 14ดูอี ปี ร็อห อัน บอ จืร อาซีโมน. เฌา เยซู วี แตห อัน จืร อาเปตารู. อัน บอ ร็อห อาอันดารู อี มูห วา อาซีโมน บอ อายาโกบ ฆาย อายอฮาน, อาพีลีบ ฆาย อาบาโทวโลวโมว 15บอ อามาแท ฆาย อาโทวมาด, อายาโกบ, อี มูห ฆอน อาลาแพ บอ อาซีโมน, อี แฮะ ดึอม แบน ดา โฌน 16บอ อายูดัด, อี มูห ฆอน อายาโกบ บอ อายูดัด อี จืร บอ อาซาคารีโอด, อี อาบ เฌา เยซู ดี รันซู อัน.

ลอง ดูอี อี ดาคึย บอ ดูอี อี ตู ดาคึย

17แฮะ ฮอต เฌา เยซู บอ เฆ ดีแบ อัน เลห โลง แดง นอน. เฆ ตัห ฌัม โดง ฆลัง อู โปละ. บอ เฆ ดีแบ อัน, บอ เฆ ดูอี กืน แฮะ กอย รึม. เฆ อี กอย แคง อืง ยูดา, บอ เฆ อี ตัห แคง มืง เยรูซาแลม บอ มืง ทูโรว ฆาย มืง ซีโดน, บอ เฆ ดูอี อี กอย กาตัด อึม นัมมูกซารา, เฆ บอกาเฆลียด แฮะ ตัห กาฌูะ โดง ตึอน. 18เฆ แฮะ ตัห โทม โฆรห ปี กาลาง เฌา เยซู. เฆ ซี แตห อัน ปีแกน บอ เซา เฆ. เฆ ดูอี อี มึห น็อห ลึร โกบ แฮะ ปลึก กานัม ดี เฆ, เฌา เยซู บอ แตห อึณ หราย โตต ดอน โมยว. 19เฆ ดอน อี เทว ดี ตา ดึร เฌา เยซู. โคว, เฆ แฮะ นับ, ปวน อัน ดี เลห ดี โดว อัน, แตห เซา รอฆา เฆ หราย ดอน อี.

20วาย อัน ตี เฌา เยซู วี ยอด เฆ ดีแบ อัน. อัน วี จูห ดี กาลาง ดี เฆ ต็อห,

“เบ ดูอี ฆีน, อี มึห ดูก หณาบ, แตห น็อห เบ ดาคึย. เฌาพรา ดี แตห เบ กอย แคง มืง ปี อึบ อัน.

21เบ ดูอี อี กาปราณ ปี ดี โฮม ดอ ตี นี, แตห น็อห เบ ดาคึย. เบ ดี บอ แพ. เบ ดูอี อี ยาม ดอ ตี นี, แตห เบ มึห น็อห ดาคึย. เบ ดี บอ โคย กาณัห.

22เซ ดูอี บอ ฌ็อง เบ บอ ซูต เลห เบ, แกวะ แตห เบ กอย รึม โดบ เฆ, เซ เฆ บอ กาลาง นา ตู หมึอม ดี เบ ต็อห, เบ อาว อัห, เซ เฆ โบง ปาย ตี โกบ โดบ เบ ดี โอว อี แฮะ แบน ฆอน ดูอี, แตห น็อห เบ ดาคึย ลอง อัน ตี ดอน โมยว.

23เซ เฆ บอ โบง ปาย ตี ดอน โมยว ดี เบ, เบ โลว ดาง ฆูง เฆฌู ดี เฌาพรา. เบ บอ โลว โคย. โคว, รูห ปี ดี ปึอน เบ แคง มืง ฆางหราว, อึณ ดี กืน. บอ ฆูณ ดา เฆ แฮะ ดึอม โบง นา ตู หมึอม ฌึร ตี ดี เฆ ดูอี อี บยาน โฆรห เฌาพรา ดอ มึอน.

24อึณ ยี มูห เบ ดูอี ครัม, แกวะ แตห เบ ดาคึย. เบ ดี บอ ฌัม ดูก ตาง.

25เบ ดูอี อี แฮะ โฮม แพ ดอ ตี นี, แกวะ แตห เบ ดาคึย. เบ ดี บอ วี เอต ปี ดี โฮม. เบ ดูอี อี โคย กาณัห ดอ ตี นี, แกวะ แตห เบ ดาคึย. เบ ดี บอ ยาม ดี ดูก ปี ดี กาดูห เบ.

26เซ เฆ ดูอี บอกาเฆลียด ดี อืบ เบ, แกวะ แตห น็อห เบ ดาคึย. ปาย ตี บอ เฆ ฆูณ ดา ดูอี เฆ ตี อี กอย ดอ มึอน, เฆ แฮะ ดึอม อืบ ดูอี อี กาโลว ต็อห เฆ มูห ดูอี อี บยาน โฆรห เฌาพรา.

ลอง โลว ร็อก รันซู

27โอว ต็อห ดี เบ ดูอี อี โทม โฆรห โอว นี, เบ โลว ร็อก รันซู เบ. เบ โลว โบง นา หมึอม ดี เฆ ดูอี อี ฌ็อง เบ. 28เบ โลว ม็องการา แตห ดี เฆ ดูอี อี ดืง ดี เบ. เบ โลว ซาคึร ดาง เฆ ดูอี ดี โบง นา จาว ดี เบ. 29เซ อึณ มึห ดูอี ดี กาทัะ กาลา เบ อู บลาก, แตห เบ วี มางัห, แตห อัน กาทัะ ปอ บลาก. เซ อึณ บอ มึห ดูอี อี พาด ดึห ซีโตว ตาง เบ, เบ โลว วี บูต ดัว บอ ซีโตว พืน นา แคง ดี อัน. 30เซ ดูอี หมาณ ดอน โมยว ดี เบ, แตห เบ ดัว ดี อัน. เซ อึณ มึห ดูอี ดึห โกรว เบ ดอน โมยว, แกวะ หมาณ แตห อัน วี ดัว วีว ดี เบ. 31เบ ซี แตห ดูอี เฮา โบง โมยว เหมา ดี เบ, เบ วี โลว โบง โมยว ตี ดี อี เฮา.

32เซ เบ ร็อก มี เฆ ดูอี อี ร็อก เบ, อาว มึห ดีโคว มาเซ. บอ เฆ ดูอี มึห หมาบ กืน, เฆ บอ นับ ดี ร็อก อี ร็อก เฆ. 33เซ เบ บอ โบง นา หมึอม ดี เฆ อี วี โบง นา หมึอม ดี เบ, อาว มึห ดีโคว มาเซ. บอ เฆ ดูอี อี มึห หมาบ กืน, เฆ บอ นับ ดี โบง ปาย ตี. 34เซ เบ แตห ดูอี เฮา วาย โกรว เบ โกบ แฮะ นับ เบ, เฆ มึห โกรว ปี ดี ปึอน เฆ ดี วี เวียะ ดี เบ, อาว มึห ดีโคว มาเซ. บอ เฆ ดูอี มึห หมาบ กืน, เฆ ลาย กาวาย ดอน โมยว, แตห เฆ วี ปึอน แคะ ปี ดัว เฆ คา อาต. 35เบ ยี ตู โลว โบง ปาย ตี. เบ โลว ร็อก รันซู เบ. เบ โลว โบง นา หมึอม ดี เฆ. เบ โลว แตห ดูอี วาย ดอน โมยว ดี เบ, แกวะ แตห เบ หน็อะ อึณด็อะ เฆ ดี วี ดัว วีว ดี เบ. เซ เบ โบง ปาย ตี, เบ ดี ปึอน รูห กืน นา อาต นี ฮาว. อึณ ดี บอ ลึห ซีคยา ลอง มูห เบ ฆอน เฌาพรา อี ตาง หลึอม โตต. โคว, บอ เฌาพรา โบง นา หมึอม ดี เฆ ดูอี ฮาย บอ ดี เฆ ดูอี อี ตู โหลห เฆฌู อัน. 36เบ โลว กาเว ดูอี, แตห อึณ ปี ฆูณ เบ แฮะ กาเว อี เฮา.

ลอง ซูงพยาด ปี ปาย อี เฮา

37แกวะ แตห เบ ซูงพยาด ปี ปาย อี เฮา. ปาย ตี เฌาพรา มืร ตู ซูงพยาด ปี ปาย เบ. แกวะ แตห เบ ดัม หมาบ ดี ดูอี เฮา. ปาย ตี เฌาพรา มืร ตู ดัม หมาบ ดี เบ. เบ ยี โลว ฆ็อห แวน หมาบ ดูอี เฮา. ปาย ตี เฌาพรา มืร ดี ฆ็อห แวน หมาบ เบ. 38เบ โลว ดัว ดอน โมยว ดี ดูอี เฮา. ปาย ตี เฌาพรา ดี บอ ดัว ดอน โมยว ดี เบ. ปี ดี ดัว เฌาพรา ดี เบ, อึณ ยี กาหลึอม ปี ดัว อี เฮา. อึณ ปี เบ มึห แบล ดีฆาว. อัน เฌา ดี กาครูห บอ แดต, แตห อึณ กอ กาดัน. ปี ปึอน เบ อึณ ดี กืน หลึอม ปี ดัว เบ. อึณ ปี, เบ ดี โบง ดี อี โมยว เหมา, เบ ดี วี ปึอน โมยว ตี.” ปาย ตี เฌา เยซู มาโนว ดี เฆ ดีแบ อัน.

39เฌา เยซู วี กาลาง อูพามา ดี เฆ. อัน ต็อห ปาย นี. “เซ อึณ มึห ดูอี งาย อับ, อัน ตู แป ดี แยต ดูอี งาย อับ ปอ อู วี, แตห อัน ฮาว โดบ อึณเตณ หมาน. ฆาย บอ อา วี ดี โจห แคง กาเดา. 40เซ อึณ มูห ดีแบ อี, อัน ตู ตาง หลึอม ดา ซารา อัน. เซ เฆ ดีแบ ยี แฮะ ฮอต เฮน โตต, เฆ ดี นับ โตต แคะ ปี นับ ดา ซารา เฆ.

41-42เบ ดูอี ณึงราง บอด, เบ ปี ดูอี อี มึห อึณโฆ็ง กาดัห งาย เบ. เบ ยี ตู นับ ลอง อัน ตี. แฮะ ฮอต, เหมา เบ ดี ปาย ดี ปึอน ยึร กาอัห ดีแตด อี กอย แคง งาย บีนอง เบ. เบ โลว ดึห แวน อึณโฆ็ง อี กาดัห งาย เบ, แตห อึณ เลห ดี อาต. แฮะ ฮอต, เบ ดี บอ ปึอน ยึร แตห อึณ กอ ลึห กาอัห ดีแตด อี กอย แคง งาย บีนอง เบ, แตห เบ แป ดี ดึห แวน, แตห อึณ เลห.

43อึณ ตู มึห เฮ หมึอม, อี มึห เบล ตู หมึอม. อึณ มืร ตู มึห เฮ ตู หมึอม, อี ดี มึห เบล หมึอม. 44เฮ ดอน โมยว, ดูอี นับ อาโมยว อัน, เซ เฆ ยอด เบล อัน. ดอน อี บอ นับ, อาว ปึอน เบต เบล ดีปู ดี เฮ เกรณ. บอ, เบล มางูน อาว ปึอน เบต ดี ยวน มาอาต. 45เซ อึณ มึห ดูอี หมึอม, แคะ กอย นา หมึอม แคง น็อห อัน, อึณ ดี บอ เลห. เซ อึณ ยี มึห ดูอี ตู หมึอม, อึณ ดี บอ เลห แคะ กอย นา ตู หมึอม แคง น็อห อัน. แคะ มึห อี กอย โนะ แคง น็อห ดูอี, โมต อัน มืร นับ ดี กาลาง ลอง อัน ตี.

ลอง ดูอี ซัม กาง อา วี

46เหมา อึณ ปาย ปี แดะ เบ ดี โอว ต็อห, ‘แม เฌา’? เบ ยี ตู โทม, ตู โบง โดบ ปี ต็อห โอว ดี เบ. 47อาเซ ยี ตัห ฌัม โดง กอย โอว, อาเซ บอ โทม โฆรห โอว, โอว ดี วี กาลาง ดี เบ ลอง อัน ตี. อัน ปี ดูอี ปี กาลาง โอว แคง อูพามา นี. 48ดูอี ตี, อัน ปี ดูอี ซัม กาง, ฆึห กาเดา ร็อง แตห อึณ ลึก, แตห อึณ กอย แดง มาว. แฮะ ฮอต ปัน ตี เซ อึม แประ ตาง ตัห ฌูห เจณ ร็อง ตึอน, อึณ ตู แป ดี แตห กาง เกห โกบ แฮะ มัน ซีคยา เจณ ร็อง. 49อาเซ ยี โทม โฆรห ปี กาลาง โอว นี, ตู โบง โดบ ปี ต็อห โอว, อัน ปี ดูอี อี ซัม กาง แดง กาดาย อี ตู มึห โปลม มาเซ. ดอ วี ตัห ฌูห อึม แประ ตาง ดี เจณ ร็อง กาง ตึอน, อึณ ดี เกห กาปยาต ลึร โตต อู เฌณ.” เฌา เยซู แฮะ มาโนว ปาย ตี.

Currently Selected:

ลก 6: pce

Highlight

Copy