มก 13

ลอง อาคราว อี ดี แบน นา อาต ฮาว

1ดอ เลห เฌา เยซู แคง โฮว เฌาพรา, อึณ มึห ดีแบ อัน อู วี, อัน ต็อห, “ซารา, แม ยอด มาว ตาง เฆ นี, ปี ตา เฆ ซัม โฮว เฌาพรา ตี.”

2เฌา เยซู วี ต็อห, “แฮะ มูห. โฮว เฆ ตี แฮะ ตาง บอ ชีด. อึณ ดี ฌัม อาคราว ดอ ตัห อี เฮา, โบง แตห อึณ ลึร โตต. มาว อู โบ็ง มืร อาว ฮู กอย โดง บรีม อัน.”

3ปัน ตี เฌา เยซู แฮะ ฮาว กอย ดี นอน เฮ นามัน, อี กอย ลาย กาซืร ดี โฮว เฌาพรา. ดอ อัน ตี อึณ มูห อาเปตารู, อายาโกบ, อายอฮาน บอ อาอันดารู. เฆ วี ดีหมอด เฌา เยซู แกวะ แตห อี เฮา โทม. 4เฆ ต็อห, “แตห แม กาลาง ดี เย, ดอ เหมา อึณ ดี แบน ปี ต็อห แม ฌึร ตี. แตห เย นับ ลักซานา อัน อี แตห เย นับ, อาคราว ปี ต็อห แม แฮะ กาตัด ดี ตัห.”

5เฌา เยซู วี ต็อห ดี เฆ, “เบ โลว ซาดีก, แกวะ แตห อี ปึอน ดี กาโลว เบ. 6อึณ ดี มึห แบน วี แบน วี, เฆ ดี ตัห ฆาว จืร โอว. เฆ ดี บอ ต็อห, เฆ แฮะ มูห โอว, อัน เฌา ปี ร็อห ปี ตึย เฌาพรา แตห อัน คยอด ดูอี. ปาย ตี เฆ ดูอี กืน ดี กาลึบ ดี หณึม โฆรห ปี กาโลว เฆ. 7เซ เบ บอ โทม ซาดาง ลอง ดูอี ลาย กาโฆห, แกวะ แตห เบ โยว. อึณ โลว แบน ฌึร ตี ดอน โมยว. ดอ อัน ตี ยี หณัม ฌัม อาคราว ดี โตต ดอน โมยว. 8อึณ ดี มึห ดูอี แบน โมยว แบน โมยว, ดี ลาย แบน รันซู. บอ คูนดีคัม อู กาดัง ดี วี กาโฆห ดี คูนดีคัม ปอ อู กาดัง. บอ มาอีม ดีเยณ แบน โปละ แบน โปละ. เฆ ดูอี ดี บอ เอต ปี ดี โฮม. เซ ดูอี กาดูห ดูก ฌึร ตี ดอน โมยว, อึณ ดี ปี อีบึณ เซา ดี มึห ฆอน.

9เบ บอ โลว ซาดีก. เฆ ดี อาบ บอ เบ ดี ดา ตาง อี อึบ มืง. เฆ ดูอี อายูดา ดี บอ มัห กาเซา เบ แคง โฌง เฆ. โกบ หณึม เบ ดี โอว, เบ ดี กอย ดี อาต ดา กาณา บอ คูนดีคัม อี อึบ มืง, แตห เบ ปึอน ดี กาลาง ลอง โอว ดี เฆ. 10อาต อัน ตี, เฆ ดูอี ยี โลว ฮาว ดอน นา ดอน โปละ กาลาง ดารา เฌาพรา อี แตห ดูอี แบน น็อห ดาคึย, แตห ดูอี ดอน โมยว กอ นับ ลอง อัน. 11เซ เฆ ดี เหมต เบ, วี ต็อห ดี ซูงพยาด อามู เบ, เบ แกวะ แตห น็อห เบ กาฮัวะ, แกวะ เฌณฌา ดี อาต โฆรห ปี ดี กาลาง เบ. เซ ฮี ฌัม อาคราว อัน, เบ โลว กาลาง โฆรห อี ลึบ แคง น็อห เบ. อาตี อาว มูห โฆรห เบ. น็อห พึอม เฌาพรา ดี ฮับ โฆรห อัน แคง น็อห เบ.

12อึณ ดี บอ มึห อูกัด อูวา, เฆ ดี ลาย อาบ เฆ ดี ดา ตาง, แตห เฆ ดา ตาง ง็อห อาซาก เฆ. บอ ฆูณ ดี อาบ ฆอน อัน. บอ ฆอน ดี แวน โฆรห ฆูณ มา อัน, อาบ ฆาย ดี ดา ตาง, แตห ฆาย ยัม. 13โกบ หณึม เบ ดี โอว, เฆ ดูอี ดอน อี ดี บอ ฌ็อง เบ. อาเซ ยี มึห น็อห มัน บอ คัม โตต ดอน โมยว, แตห อึณ กอ ฌัม ปัน ดี โตต ฌาด ตี, เฌาพรา ดี คยอด อาซาก อัน.

14อึณ ดี บอ มึห โกรว อี หมึอม โยว, อี แตห โตต ดอน โมยว กาปยาต ลึร. เซ เบ ยึร อี เบลห โกรว ตี แคง โดง ตู กาอาบ อัน กอย, เบ โลว เตา ฮาว ปอ โปละ. (อาเซ ตีห ลอง อัน ตี โลว ซาดีก, แตห ซีเพา อัน ลึห). อาเซ กอย แคง อืง ยูดา โลว เตา ฮาว แดง นอน. 15เซ ดูอี กอย นา แดง กาง,#13:15 ยอด อามาแท 24:17 เซ อัน โลง, แกวะ แตห อัน วี ฮาว ลึบ แคง กาง, ดึห โกรว อัน อี กอย แคง กาง. แตห อัน เตา ฮาว อู เฌณ. 16อาเซ กอย แคง มาน อัน, แกวะ แตห อัน ฮาว เวณ แคง กาง ดึห ซีโตว อัน, แตห อัน เตา ฮาว อู เฌณ. 17ดอ อัน ตี เฆ อีบึณ อี ตู อัห, บอ อีบึณ อี มึห ฆอน อางัะ อี หณอด ปู, เฆ ดี ฌัม ดูก ตาง. 18เบ ยี โลว ซาคึร, แกวะ แตห ดูก ตาง ฌึร ตี ตัห ดอ มูห อาคราว ฆัด เฆียด. 19อู ซีณ ดอ โฆว อัน, ดอ โบง เบลห เฌาพรา กาดาย, กอ ฌัม อาตึร นี, อึณ ตู ดึอม มึห ดูก ตาง ฌึร ตี แดง กาดาย. วาย อัน ตี มืร, อึณ ตู วี มึห ดูก ฌึร ตี ดอ เหมา. 20เซ เฌาพรา ตู แตห ดูก ฌึร ตี วี เจว โตต, อึณ ตู วี มึห อาเซ อี ดี ลอด ยัม. โกบ มึห เฆ ดูอี ปี ร็อห เฌาพรา, เฌาพรา ตู แตห ดูก ตาง ตี กอย เหลณ. 21ปัน ดี ฌัม อาคราว ตี, อึณ ดี มึห ดูอี ต็อห ดี เบ, ‘ยอด นา นี, อัน เฌา ปี ร็อห ปี ตึย เฌาพรา แตห อัน คยอด ดูอี แฮะ กอย ดี นี.’ เฆ บอ ต็อห, ‘ยอด นา ดอย, อัน เฌา กอย นา ดอย.’ เซ เบ ยึร ดูอี ต็อห ปาย ตี, แกวะ หณึม โฆรห เฆ. 22อึณ ดี มึห ดูอี, เฆ กาโลว ต็อห, เฆ มูห ดูอี ดี คยอด อาซาก อี. เฆ ดี บอ กาโลว ดี ต็อห, เฆ มูห ดูอี อี บยาน โฆรห เฌาพรา. เฆ ดี บอ โบง นา หมึอม อาม กาเซา แบน โมยว แบน โมยว. เฆ ดี บอ เทว ดี กาโลว ดี ดูอี ปี ร็อห เฌาพรา. เฆ ยี ตู แป ดี โบง แตห เฆ ดูอี ปี ร็อห เฌาพรา หณึม โฆรห ปี กาโลว เฆ ตี. 23โคว, เบ โลว ซาดีก. โอว แฮะ ฮอต กาลาง โตต ดอน โมยว ดี เบ, แตห เบ นับ ดี อาต, อึณ ดี แบน ปาย เหมา.

24วาย อัน ตี เฆ ดูอี แดง กาดาย ฮี ฮอต คัม ดูก ตาง ฌึร ตี, บอ ซีแง ดี อับ ว็อง. บอ มาเฆียน อาว ฮู มึห บลาง อัน.

25บอ ซีมัณ ดี รัห โจห แคง เบลณ. บอ ปวน อี แตห ซีมัณ กอย แดง เบลณ, อาว ฮู ปี บรีม, แตห อึณ ดียูห โตต.

26เซ อึณ บอ แบน ปาย ตี ดอน โมยว, ดูอี ดี ยึร ดา อี อี แฮะ แบน ฆอน ดูอี. อัน ดี ตัห โลง แคง อึณอูะ. อัน ดี บอ บยัะ แคะ ตาง ปวน อัน บอ อาพูง ดังโคว อัน, แตห ดอน อี ปึอน ดี ยึร. 27อัน ดี บอ ตึย อามู อามาด อัน, แตห เฆ แดะ ดูอี ปี ร็อห เฌาพรา อี กอย ดอน นา ดอน โปละ พวน บลาก. เฆ อี กอย โดง ซืด แดง กาดาย บอ โดง ซืด แคง ฆางหราว, แตห เฆ บอกาเฆลียด ตัห กาฌูะ โตต ดี อาต โอว, อี แฮะ แบน ฆอน ดูอี.

28แตห เฮ ดีปู แบน อูพามา ดี เบ, แตห เบ เฮน ดี อัน. เซ เบ ยึร เฮ ดีปู ดี อึณโลห, เบ บอ นับ, ฆลาย ดี ตัห. 29อึณ บอ ปาย ตี. เซ เบ ยึร อึณ แฮะ แบน ปี ต็อห โอว, เบ บอ นับ, โอว แฮะ กาตัด ดี วี ตัห. อึณ ปี, โอว กอย ดี อาต มาโลห. 30โอว ต็อห อาคัร ดี เบ, ฌาด นี ตู โตต อาต ดี แบน โตต ดอน โมยว ปี ต็อห โอว ดี เบ ดอ ตี นี. 31บอ เบลณ บอ กาดาย ดี หราย โตต. โฆรห ปี กาลาง โอว ยี ตู หราย ดอ เหมา. อึณ ดี กอย เซเซ. 32อาว มึห อาเซ, อี นับ ซีคยา ลอง ซีแง อัน, นารี อัน, ปัน ดี วี ตัห โอว. บอ เฆ อามู อามาด เฌาพรา, อี กอย ฆางหราว, บอ ฆอน เฌาพรา มืร ตู นับ. มี เฌาพรา แฮะ นับ ดอ เหมา อึณ ดี แบน ปี ต็อห โอว. 33แตห เบ ซาดีก, ซาคึร บอ บัร ปัน เหมา อึณ ดี ฌัม อาคราว อัน. โคว, เบ ตู นับ ปัน เหมา อาคราว อัน ดี ตัห. 34อึณ ปี ดูอี อู วี ฮาว ปอ อู โปละ. ดอ เลห อัน แคง กาง อัน, อัน วี ดัว หมาย อัน ดอน อี โบง ฆาน อัน. อัน บอ จัร ดูอี บัร มาโลห, แตห อัน บัร ซีคยา.

35ปาย ตี บอ เบ โลว บัร ซาดีก เซเซ, โกบ ตู นับ เบ ดอ เหมา อัน เฌา ดี ตัห. โยว อัน ดี ตัห บา ดี อับ, โยว อัน ตัห กาแต ซึอม, โยว อัน ดี ตัห ดอ กาตวน เอียน, โยว อัน ดี ตัห บาง ดี วัห, เบ ตู นับ. 36แกวะ แตห เบ อีด ดอ ตัห อัน. 37ปี ต็อห โอว ดี เบ, โอว บอ ต็อห, แตห ดูอี ดอน อี โทม. เบ โลว บัร ซาดีก.” แคะ ตี เฌา เยซู กาลาง ลอง อาคราว ดี ตัห.

Currently Selected:

มก 13: pce

Highlight

Copy