มก 14

ลอง อีบึณ พ็อห นามัน อูห หงูน ดี เฌา เยซู

1วาย อัน ตี อึณ ซี กอย ปอ อา ซีแง, อึณ กอ ดี ฌัม บลอย โหลห เฆ เฌาพรา ดอ กาโลห อัน กาง เฆ. อึณ บอ มูห บลอย โฮม ดูอี คามูน ตู มึห ซีนัม บรัห. ดอ อัน ตี เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา ยูดา, เฆ ลาย ซังคยาง เหมา เฆ ดี ปาย แตห เฆ ปึอน ดี เหมต เฌา เยซู บอ ง็อห แวน อัน. 2เฆ ยี ต็อห, “แกวะ แตห เอ ง็อห อัน ดอ โบง เอ บลอย, โยว เฆ ดูอี ซีนัน ซีนืง.”

3ดอ กอย เฌา เยซู แคง เรา เบทานี อัน กอย โฮม โบม แคง กาง ดูอี อู วี, อี จืร อาซีโมน, อี ดึอม มึห เซา ดูะ.#14:3 ยอด อามาแท 8:2 ดอ กอย อัน แคง กาง ตี, อึณ มึห อีบึณ อู วี, อัน โฆ็ง ตัห กาเปา นามัน อูห หงูน. นามัน อูห หงูน ตี แฮะ ง็อห ตาง กาเซา. อึณ มูห นามัน นาดู ดีโลย อี แฮะ บอด กาเซา. อีบึณ ตึอน บอ ตัห ฌัม โดง กอย เฌา เยซู, อัน วี กาบัก กาเปา ตี, วี โหลว ดี ฆีณ เฌา เยซู.

4เฆ ดูอี อี ยึร ปี โบง อัน ตี, เฆ ตู อึง. เฆ วี ลาย กาลาง ต็อห, “เหมา อึณ ปาย ปี แวน อัน นามัน อูห หงูน ตี, แตห อึณ ชึม ดีโลย ดีลาย? 5เซ อี ย็อง นามัน อูห หงูน ตี, เฆ ตู วัน ดี ปึอน รึอน แฌด โอย มาย็อห โบ็ง.#14:5 อาเซ โบง ฆาน อาดา อู ซีแง แฮะ ปึอน รึอน อู โบ็ง. แฮะ ฮอต, วี ปึอน ดัว รึอน ตี ดี ดูอี ฆีน.” ปาย ตี เฆ วี เอห อีบึณ ตึอน.

6เฌา เยซู วี ต็อห, “แกวะ เอห อัน ปาย ตี. เหมา อึณ ปาย ปี โบง เบ, แตห น็อห อัน ลึร. อัน แฮะ โบง นา หมึอม นา บอด ดี โอว. 7เฆ ดูอี ฆีน, เฆ ดี กอย รึม โดบ เบ เซเซ. เซ เบ บอ มึห น็อห ซี จอย ดูอี ฆีน, เบ ปึอน ดี จอย เฆ เซเซ. อึณ ยี มูห โอว, โอว ตู กอย รึม โดบ เบ เซเซ. 8อีบึณ ตี แฮะ โบง แคะ ปี ปึอน อัน โบง. อัน แฮะ โหลว นามัน อูห หงูน ตี ดี โดว โบ็ง โอว. อัน แฮะ อึณปราย โดว โบ็ง โอว อาต ยัม โอว, แตห เฆ ปึอน ดี ดีบ โอว. 9โอว ต็อห อาคัร ดี เบ, เฆ ดี กาลาง ดารา อี แตห น็อห ดูอี ดาคึย, แตห ดูอี ดอน นา ดอน โปละ กอ นับ. เฆ ดี กาลาง นา เหมา, เฆ ดี บอ แค ลอง แปะ แฮะ โบง อีบึณ ตี, แตห ดอน อี กอ นับ ลอง อัน.”

10เฌา เยซู แฮะ ฮอต กาลาง โฆรห ตี, อึณ มูห อายูดัด อี จืร บอ อาซาคารีโอด. อัน บอ บาะ แคง พึง ดีแบ เฌา เยซู ฆึร ดี อา วี. อัน ฮาว โดง กอย เฆ ดา ตาง อี แยต เฆ ดูอี อี หลู ดี เฌาพรา, ต็อห ดี อาบ เฌา เยซู ดี เฆ. 11เฆ ดา ตาง บอ โคย กาเซา ดอ ยึร เฆ โฆรห ปี กาลาง อายูดัด ดี เฆ. เฆ บอ ลาย โพรม ดี ดัว รึอน ดี อัน. แฮะ ฮอต ปัน ตี อายูดัด วี เหรต ปี ดี ปาย อัน ดี อาบ เฌา เยซู ดี เฆ ดา ตาง.

ลอง ปี ดี โฮม แตห อึณ โหลห เฌา เยซู

12อึณ ยี ฌัม ซีแง ดอ โฆว ดอ โฮม เฆ คามูน ตู ฮับ ซีนัม บรัห. ซีแง ตี เฆ โลว ง็อห ฆอน มาบู แตห เฆ โฮม รึม. ดอ อัน ตี เฆ ดีแบ เฌา เยซู วี ดีหมอด เฌา เยซู. เฆ ต็อห, “นา เหมา เย โลว แรน มาบู, แตห เอ ปึอน ดี โฮม รึม?”

13ปัน ตี เฌา เยซู วี จัร ดีแบ อัน อา วี. อัน ต็อห ดี ฆาย, “แตห บาย ฮาว แคง มืง. บาย ดี บอ กาตูณ ดูอี อู วี อี ฆอด กาเปา อึม. บาย โลว โดบ ดูอี วี ตี. 14เซ อัน บอ ลึบ แคง กาง, บาย วี โลว ต็อห ดี ดา กาณา กาง ตี, ‘ดา ซารา ยาย ดีหมอด แม, เหมา โฮง โดง ดี โฮม เย บลอย โหลห เอ เฌาพรา ดอ กาโลห อัน กาง อี? บอ อัน บอ ดีแบ อัน โลว โฮม รึม.’ 15เซ บาย ต็อห ปาย ตี, ดา กาณา กาง ตี ดี วี แหน ดี บาย โฮง ตาง อี กอย คร็อง นา แดง. แคะ ปี โลว เอ แฮะ ฮอต เบลห อูน โตต นา แคง โฮง ตี. แคง โฮง ตี บาย โลว แรน ปี ดี โฮม เอ.”

16ฆาย ดีแบ เฌา เยซู วี ฮาว ลึบ แคง มืง, วี ยึร โตต ดอน โมยว ปี กาลาง เฌา เยซู ดี ฆาย. โคว, ฆาย วี แรน บลอย ตี, แตห เฆ ปึอน ดี โฮม รึม.

17บอ ฌัม บา ดี อับ, เฌา เยซู บอ ดีแบ อัน ฆึร ดี อา วี วี ตัห ฌัม โดง ตึอน. 18ดอ กอย โฮม รึม เฆ, เฌา เยซู วี ต็อห, “โอว ต็อห อาคัร ดี เบ, อึณ มึห ดูอี อู วี กาแต เบ, อัน ดี อาบ โอว ดี รันซู โอว. อัน กอย โฮม โดบ เอ ดอ ตี นี.”

19เฌา เยซู แฮะ ฮอต กาลาง โฆรห ตี, อึณ วี แบน น็อห กลึร ดี เฆ. แบน วี แบน วี วี ต็อห ดี อัน, “อาว มูห โอว.”

20เฌา เยซู วี ต็อห, “อึณ มึห ดูอี อู วี อี กอย กาแต เบ ฆึร ดี อา วี. บอ อัน บอ โอว ฌูด คามูน ยาย แคง ซีลัยะ อู บลัะ. 21อึณ มูห โอว, อี แฮะ แบน ฆอน ดูอี, โอว ดี คัม แตห อึณ โดบ ปี ดึอม แดม แคง บับ เฌาพรา. อึณ ยี มูห ดูอี อี อาบ โอว, อัน ดี ฌัม ดูก ตาง. เซ อัน ตู ฆึอด แบน ดูอี, แฮะ แว หมึอม ดี อัน.”

22ดอ โฮม เฆ บลอย ตึอน, เฌา เยซู บอ ดึห คามูน, วี ดาง ฆูง เฆฌู ดี เฌาพรา. แฮะ ฮอต, อัน กาบัก คามูน ตี, วี ดัว ดี ดีแบ อัน. อัน ต็อห, “ดึห โฮม คามูน นี. อึณ มูห โดว โบ็ง โอว.”

23แฮะ ฮอต ปัน ตี อัน บอ ดึห ซีลัยะ, วี ดาง ฆูง เฆฌู ดี เฌาพรา, ปี วี ดัว เฆ เดียง. เฆ ดอน อี บอ เดียง.

24อัน ต็อห, “อาตี มูห หนาม โอว, อี เลห แคง โดว โบ็ง โอว อาดา เฆ ดูอี กืน. อึณ บยัะ ดี เบ ลอง กาดีก ซัดฌา ปี ดัว เฌาพรา ดี เบ. 25โอว มืร ต็อห อาคัร ดี เบ. อู ซีณ ดอ ตี นี โอว อาว ฮู เดียง อึม มางูน ฌึร ตี. กอ ฌัม ซีแง ดี กอย โอว แคง มืง ปี อึบ เฌาพรา, โอว ดี วี เดียง อี กามาย.”

26ปัน ตี เฆ วี ต็อห โหมว ทัม. แฮะ ฮอต, เฆ บอ เลห แคง มืง, ฮาว แดง นอน เฮ นามัน.

ลอง เฌา เยซู กาลาง โฆรห ดี อาเปตารู

27เฌา เยซู วี ต็อห ดี เฆ, “เบ ดอน อี ดี เตา แวน โอว. โคว, อึณ แฮะ แดม อูน แคง บับ เฌาพรา,

‘ปัน ดี มัห โอว ดูอี อี ปี ดูอี เฮียง มาบู, เฆ มาบู ดี เตา กาย็อห ฮาว แบน โปละ แบน โปละ.’

28โอว ฮี ฮอต ยัม, ฮี วี ยีต วี อีม, โอว ดี แยต ดี อาต เบ ฮาว อืง ฆาลีเล.”

29เฌา เยซู แฮะ ฮอต กาลาง โฆรห ตี, อาเปตารู วี ต็อห, “เซ ดอน อี ดี บอ เตา แวน แม, โอว ตู แวน แม ดอ เหมา.”

30เฌา เยซู วี ต็อห ดี อัน, “โอว ต็อห อาคัร ดี แม. แคง หมึร นี, อาต กาตวน เอียน อา เฌณ แม ดี บอ ต็อห โอย เฌณ, แม ตู นับ โอว.”

31อาเปตารู วี ปีแรณ อัน, วี ต็อห, “เซ โอว บอ โลว ยัม รึม โดบ แม, โอว ตู ต็อห ดอ เหมา, โอว ตู นับ แม.” บอ อาเปตารู บอ เฆ ดีแบ เฌา เยซู ดอน อี ต็อห ปาย ตี.

ลอง เฌา เยซู ซาคึร

32วาย อัน ตี เฆ วี ฮาว ฌัม อู โปละ อี จืร เฆดเซมาเน. เฌา เยซู วี ต็อห ดี ดีแบ อัน, “เบ กอย หน็อะ โอว ดี นี ดอ ฮาว ซาคึร โอว.” 33แฮะ ฮอต ต็อห ปาย ตี, อัน วี แดะ อาเปตารู, อายาโกบ บอ อายอฮาน, แตห เฆ วี กอย รึม โดบ อัน. อึณ แบน น็อห กลึร บอ ดูก กาเซา ดี น็อห อัน. 34อัน วี ต็อห ดี เฆ, “แฮะ ดูก กาเซา ดี น็อห โอว. อึณ แหนน โอว แฮะ รีน ดี ยัม โกบ กลึร น็อห โอว. แตห เบ กอย ดี นี, บัร โอว.”

35อัน แฮะ ฮอต ต็อห ปาย ตี, อัน อู วี วี ฮาว กาปัว ปอ อี แจก. แฮะ ฮอต อัน วี ครึบเครา แดง กาดาย, ซาคึร ดี เฌาพรา, หมาณ, เซ อึณ ปึอน, แกวะ แตห อัน กาดูห ดูก อี ดี ตัห นา อาต. 36อัน ต็อห, “อึย แม ฆูณ โอว. แม นับ ดี โบง โตต ดอน โมยว. เซ อึณ บอ ปึอน, แกวะ แตห โอว คัม ดูก ตาง อี ดี ตัห. อึณ ปี ซีลัยะ อี มึห โฆง. แกวะ แตห โอว โลว เดียง. โอว ยี ตู หมาณ แม โบง ปี อึง โอว. แตห แม โบง ปี อึง แม.”

37อัน แฮะ ฮอต ซาคึร ปาย ตี, อัน วี ฮาว โดง กอย ดีแบ อัน. เฆ ยี แฮะ อีด ซีคยา. อัน วี ต็อห ดี อาเปตารู, “อึย อาซีโมน, เหมา อึณ ปาย ปี อีด แม? อู นารี มืร, แม ตู ปึอน บัร โอว? 38เบ โลว บัร บอ ซาคึร, แกวะ แตห เบ กาลึบ ดอ กาซูห โบว กานัม เบ โบง หมาบ. น็อห พึอม แฮะ ซี โบง นา หมึอม. อึณ ยี มูห โดว โบ็ง, อัน ตู คัม ดี โบง.”

39เฌา เยซู แฮะ ฮอต กาลาง โฆรห ตี, อัน วี ฮาว ปอ อู เฌณ, วี ซาคึร ปี คา อาต. 40ดอ วี ตัห อัน, เฆ ดีแบ อัน วี อีด ปอ อู เฌณ. โคว, อึณ แบน ซี อีด กาเซา ดี เฆ. เฆ มืร ตู นับ ปี ดี วี ต็อห ดี เฌา เยซู.

41วาย อัน ตี เฌา เยซู ปี วี ฮาว, ปี วี เวณ ปอ อู เฌณ. อัน วี ต็อห ดี เฆ, “เบ ปี ซี แนะ อีด. จู แคะ ตี. อึณ แฮะ ฮอต ฌัม อาคราว ดี ตัห เหมต เฆ ดี โอว. ดอ ตี นี เฆ ดี เหมต โอว, อี แฮะ แบน ฆอน ดูอี. เฆ ดี อาบ โอว ดี ดูอี มึห หมาบ. 42ยีต ดอ ตี นี, แตห เอ ฮาว. ดูอี อี ดี อาบ โอว ดี รันซู โอว, อัน แฮะ ฮอต ตัห.”

ลอง ดี เหมต เฆ เฌา เยซู

43ดอ กาลาง เฌา เยซู โฆรห ตี, อึณ มึห อายูดัด, อี บาะ แคง พึง ดีแบ เฌา เยซู ฆึร ดี อา วี. อัน ตัห ฌัม โดง กอย เฆ. เฆ ดูอี กืน แฮะ ตัห รึม โดบ อัน. เฆ โฆ็ง มาปัวะ ลาง เฆ อึณกรวน. เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา ยูดา, บอ เฆ ดา ตาง อี อึบ มืง, เฆ แฮะ ตึย ดูอี ตี บอ พึง ฮาว โดง กอย เฌา เยซู.

44ดูอี อี ดี อาบ เฌา เยซู ดี ดา ตาง, อัน แฮะ กาลาง อูน ดี เฆ, “ดูอี ปี ดี อูห โอว, เบ โลว เหมต. แฮะ ฮอต, แตห เบ ตึย อัน ฮาว ฌัม ดี อาต ดา ตาง เอ.” 45ปัน ตี อายูดัด ตึอน วี ฮาว ซืร ดี เฌา เยซู ต็อห, “อึย ซารา.” แฮะ ฮอต, อัน วี อูห เฌา เยซู. 46อัน แฮะ ฮอต โบง ปาย ตี, อู เฌณ เฆ วี เหมต ปัก เฌา เยซู. 47ดอ อัน ตี อึณ มึห ดูอี อู วี, อี กอย รึม โดบ เฆ. อัน วี ทอด มาปัวะ ลาง อัน, แดบ แวน โหยะ แดเจณ ดา ตาง อี อึบ โตต ดูอี อี หลู ดี เฌาพรา.

48เฌา เยซู วี ต็อห, “เบ แฮะ ตัห เหมต โอว ปี เบ เหมต ดูอี อี แยต ดา โฌน. เบ โฆ็ง มาปัวะ ลาง เฆ อึณกรวน, แตห เบ ปึอน ดี เหมต โอว. 49ดอน ซีแง, ดอน ซีแง โอว แฮะ ดึอม กอย กาแต เบ, มาโนว ดารา เฌาพรา แคง แวง โฮว เฌาพรา. เบ ยี ตู เหมต โอว. ดอ ตี นี อึณ ยี แบน โตต ปี ดึอม แดม อูน แคง บับ เฌาพรา.” 50เฌา เยซู แฮะ ฮอต กาลาง ปาย ตี, ดอน อี อี กอย รึม โดบ อัน วี เตา, อาว ฮู โดบ อัน.

51อึณ ยี มึห กาโณม อู วี อี แฮะ โดบ เฌา เยซู. อัน แฮะ กัน ฮึบ อู พืน, ตู มึห ดี ชึบ ครึง มาเซ นา แคง. 52เฆ ต็อห ดี เหมต บอ อัน. อัน ยี เตา ฮาว โดว ฆลัะ. เฆ บอ ปึอน มี ฮึบ อัน ตี.

ลอง ดา ตาง ซูงพยาด อามู เฌา เยซู

53เฆ แฮะ ฮอต เหมต เฌา เยซู, เฆ วี ตึย อัน ฮาว ฌัม โดง กอย ดา ตาง อี อึบ โตต ดูอี อี หลู ดี เฌาพรา. เฆ ดา ตาง อี แยต เฆ ดูอี อี หลู ดี เฌาพรา บอกาเฆลียด, บอ เฆ ดา ตาง อี อึบ มืง, บอ เฆ ดา ซารา อี มาโนว ดารา ยูดา, เฆ แฮะ ตัห กาฌูะ โดง กอย อัน. 54อาเปตารู ยี กอย กาโต็ง, ฮาว โดบ เฆ, ฌัม แคง แวง โฮว ดา ตาง อี อึบ โตต ดูอี อี หลู ดี เฌาพรา. อัน กอย รึม โดบ เฆ ดูอี อี บัร โฮว ตี, วาด เงา.

55เฆ ดา ตาง อี แยต เฆ ดูอี อี หลู ดี เฌาพรา, บอ เฆ ดูอี เฮา อี ซูงพยาด อามู อี, เฆ วี ลาย ซังคยาง เหมา เฆ ดี ปาย ดี พยาก เฌา เยซู, แตห เฆ ปึอน ดี ง็อห แวน อัน. เฆ ยี ตู นับ ปี ดี ปาย ดี พยาก. 56อึณ ยี มึห ดูอี กืน, เฆ กาโลว ดี กาลาง ซักเซ ลอง เฌา เยซู. ปี กาลาง เฆ แบน โมยว แบน โมยว ยี ตู กาโดบ.

57ปัน ตี อึณ มึห ดูอี มัง อี, เฆ กาโลว ดี ต็อห, 58“เย แฮะ ยึร อัน ต็อห, ‘โฮว เฌาพรา ตี มูห ปี โบง ดูอี. โอว ยี ปยาต แวน โฮว เฌาพรา ตี, แตห อึณ ลึร โตต. โอย ซีแง โอว ดี วี ซัม โฮว เฌาพรา กามาย, ปี ตู โบง ดูอี.’” 59บอ เฆ ดูอี แบน วี แบน วี ต็อห ปาย ตี. เฆ มืร ตู แป ดี กาลาง, แตห ลอง ดาง อัน เลห อู โมยว.

60แฮะ ฮอต, ดา ตาง อี อึบ โตต ดูอี อี หลู ดี เฌาพรา, อัน วี ยีต, วี กอย ดี อาต เฆ ดอน อี. อัน ดีหมอด เฌา เยซู ต็อห, “แม ตู มึห ปี ดี กาลาง โฆรห มาเซ? มาเซ ปี ดี เวียะ แม ดี เฆ ดูอี ตี?”

61อัน แฮะ ฮอต กาลาง ปาย ตี, เฌา เยซู ยี ตู ต็อห มาเซ.

ปอ อู เฌณ ดา ตาง อี อึบ โตต ดูอี อี หลู ดี เฌาพรา, อัน วี ดีหมอด เฌา เยซู. อัน ต็อห, “อึณ หมาน, มูห แม ดูอี ปี ร็อห ปี ตึย เฌาพรา แตห อัน คยอด ดูอี? แฮะ หมาน, มูห แม ฆอน เฌาพรา ปี อืบ เอ?”

62เฌา เยซู ต็อห, “แฮะ หมาน. เบ ดี บอ ยึร ดูอี อี แฮะ แบน ฆอน ดูอี. อัน ดี วี กอย บลาก อาอัห อัน เฌา อี มึห ปวน ตาง. เบ ดี บอ ยึร อัน กอย แคง อึณอูะ, วี ตัห โลง แดง กาดาย.”

63เฌา เยซู แฮะ ฮอต กาลาง โฆรห ตี, ดา ตาง อี อึบ โตต ดูอี อี หลู ดี เฌาพรา บอ รู กาเซา, วี กายาต ซีโตว ตาง อัน. อัน ต็อห, “เอ อาว ฮู มึห ดี โลว อาเซ กาลาง ซักเซ ลอง อัน. 64เอ บอกาเฆลียด แฮะ ฮอต ยึร โฆรห อัน. อึณ มูห โฆรห แคณ เฌาพรา. มาเซ ปี ทาง เบ?” ปัน ตี ดอน อี ต็อห, อัน มึห หมาบ, โลว ง็อห ยัม อัน. 65เฆ แฮะ ฮอต ต็อห ปาย ตี, อึณ มึห ดูอี มัง อี, เฆ จูห ดี ปัต นา อัน. เฆ วี กาบีด งาย อัน, มัห อัน, ตา กาลึม เฆ, วี ต็อห, “แตห เย นับ, อาเซ มัห แม.” บอ เฆ ดูอี บัร อัน วี มัห กาเซา อัน.

ลอง อาเปตารู ต็อห อัน ตู นับ เฌา เยซู

66ดอ กอย อาเปตารู แคง แวง โฮว ตึอน, อึณ มึห อีบึณ อู วี, อี มูห หมาย ดา ตาง อี อึบ โตต ดูอี อี หลู ดี เฌาพรา. 67อัน ตัห ยอด อาเปตารู, อัน บอ ยึร อาเปตารู วาด เงา, อัน วี ยอด ซีคยา ต็อห, “บอ แม แฮะ ดึอม กอย รึม โดบ ดูอี อี ตัห มืง นาซาเรต ตึอน, อี จืร อาเยซู.”

68อัน แฮะ ฮอต ต็อห ปาย ตี, อาเปตารู วี ต็อห, “โอว ตู นับ มาเซ ปี ต็อห แม.” แฮะ ฮอต, อัน วี เลห แคง แวง, วี กอย กาตัด มาโลห แวง. ดอ อัน ตี เอียน มืร กาตวน.

69อีบึณ ตึอน วี ยึร อัน, วี ต็อห, ดี อี เฮา, “บอ อัน กอย แคง พึง เฆ.” 70ปอ อู เฌณ อาเปตารู วี ต็อห, “อึณ ตู หมาน.” อาว เหลณ เฆ ดูอี อี กอย กาตัด อัน วี ต็อห, “แฮะ หมาน, แม มูห ดูอี แคง พึง อัน. แม มืร ตัห อืง ฆาลีเล.”

71วาย อัน ตี อาเปตารู วี ดืง โดว อัน ต็อห, “โอว ตู นับ ดูอี ปี ต็อห เบ.”

72อัน แฮะ ฮอต กาลาง โฆรห ตี, เอียน วี กาตวน ปอ อู เฌณ. ปัน ตี อาเปตารู วี โหลห โฆรห เฌา เยซู ดอ กาลาง อัน, “อาต กาตวน เอียน อา เฌณ, แม แฮะ ฮอต ต็อห โอย เฌณ, แม ตู นับ โอว.” ดอ วี โหลห อัน โฆรห ตี, อัน วี เลห นา เรต, วี ยาม.

Currently Selected:

มก 14: pce

Highlight

Copy