มก 16

ลอง เฌา เยซู วี ยีต วี อีม

1ซีแง ดีเหลา แฮะ ฮอต ปวน, นาง มารี อี ตัห มืง มากดาลา บอ นาง มารี อี มูห มา อายาโกบ บอ นาง ซาโลวเม, เฆ ฮาว จึห ซีนัม อูห หงูน, แตห เฆ ปึอน ดี ฮาว พ็อห ดี โดว โบ็ง เฌา เยซู. 2บอ ฌัม ซีแง วาย ซีแง ดีเหลา, เฆ แฮะ เจว ยีต, ฮาว โดง กอย กาเดา บาเรว. 3ดอ ฮาว เฆ, เฆ วี ลาย กาลาง ต็อห, “อาเซ ดี ฌูน แวน มาว ตาง อี กอย ดี อาต มาโลห กาเดา บาเรว?”

4เฆ บอ ยอด ฮาว ดี กาเดา บาเรว, เฆ บอ ยึร มาว ตาง ตึอน แฮะ วี กอย ดี โคบ มาโลห. 5เฆ บอ ลึบ แคง กาเดา บาเรว, เฆ วี ยึร กาโณม อี แฮะ ชึบ ครึง ลูย. อัน กอย บลาก อาอัห. เฆ วี กาจัว อัน.

6ดูอี ตี ต็อห, “แกวะ กาจัว, อาเยซู อี ตัห มืง นาซาเรต ปี ตัห เหรต เบ ตี, อัน แฮะ ยัม แดง ร็อง กาแวะ. อัน แฮะ วี ยีต วี อีม. อัน ตู กอย ดี นี. แตห เบ ยอด โดง ปี ดึอม เบลห อูน เฆ โดว โบ็ง อัน. 7เบ ยี โลว ฮาว, กาลาง ดี ดีแบ อัน, แตห บอ อาเปตารู นับ. เบ โลว ต็อห, ‘เฌา เยซู ดี แยต ดี อาต เบ แคง อืง ฆาลีเล. เซ เบ ฮาว ดี อืง ฆาลีเล, เบ ดี บอ ยึร อัน, แตห อึณ ปี ปี ดึอม กาลาง อัน ดี เบ.’”

8ปัน ตี อีบึณ เฆ ตี มืร ดียูห ดีเยณ, วี เลห เตา แคง กาเดา บาเรว. เฆ ยี ตู ต็อห มาเซ ดี อี เฮา. โคว, เฆ โยว กาเซา.

9ดอ ฌัม ซีแง วาย ซีแง ดีเหลา, เฌา เยซู แฮะ วี ยีต วี อีม. วาย อัน ตี อู ซีณ ดอ โฆว อัน, อัน กาปลูห ดี นาง มารี อี ตัห มืง มากดาลา. เฌา เยซู แฮะ ดึอม ซูต กานัม บู โดว เลห แคง โดว อัน. 10นาง มารี ตี แฮะ ฮอต ยึร เฌา เยซู, อัน วี เลห โดง กอย อัน, วี ฮาว กาลาง ดี ดูอี เฮา, อี แฮะ ดึอม โดบ เฌา เยซู. เฆ แฮะ กลึร บอ ยาม. 11เฆ แฮะ ฮอต ยึร ลอง เฌา เยซู แฮะ วี ยีต วี อีม, เฆ แฮะ นับ บอ ลอง นาง มารี แฮะ ยึร อัน, เฆ ยี ตู หณึม โฆรห นาง มารี ตี.

12วาย อัน ตี เฌา เยซู วี กาปลูห ดี ดีแบ อา วี ดอ ฮาว ฆาย โดบ อึณเตณ นา เรต มืง. อารึบ อัน ยี ตู ปี บรีม. 13ฆาย อา วี แฮะ ฮอต ยึร อัน, ฆาย วี เวณ อู เฌณ กาลาง ดี เฆ อี กอย นา ปัน. บอ โฆรห ฆาย อา วี ตี, เฆ ตู หณึม.

14แฮะ ฮอต ปัน ตี เฌา เยซู วี กาปลูห ดี ดีแบ อัน ฆึร ดี อู วี ตึอน. อัน วี เอห เฆ โกบ ตู หณึม เฆ, โกบ ต็อห เฆ, โฆรห ดูอี เฮา อี แฮะ ยึร อัน, อึณ ตู หมาน.

15อัน วี ต็อห ดี เฆ, “เบ โลว ฮาว ดอน นา ดอน โปละ แดง กาดาย. เบ โลว กาลาง โฆรห แตห น็อห ดูอี ดาคึย, แตห ดอน อี นับ ดี โทม. 16อาเซ หณึม โฆรห ตี บอ คัม ดี จึบ แคง อึม, เฌาพรา ดี คยอด เฆ ดอน อี. เฆ อี ตู หณึม, เฆ ยี โลว คัม หมาบ เฆ. 17เฆ อี หณึม โอว, เฆ ดี ปึอน ดี บยัะ ปวน โอว. เฆ ดี ดึห ปวน โอว วี ซูต กานัม เลห แคง โดว โบ็ง ดูอี. เฆ ดี กาลาง โฆรห ปี ตู ดึอม นับ เฆ. 18เซ เฆ บอ ตา ปา มาฮัณ บอ ตา เดียง ซีนัม กาปู, อึณ ตู ปาย เหมา ดี เฆ. เฆ ดี บอ ดาง แด เฆ แดง โดว ดูอี เซา, แตห เฆ วี แกน.”

19เฌา เยซู แฮะ ฮอต กาลาง โฆรห ตี ดี เฆ ดีแบ อัน, อัน วี โฮะ ฆางหราว, วี กอย บลาก อาอัห เฌาพรา. 20วาย อัน ตี เฆ ดีแบ เฌา เยซู วี ฮาว กาลาง ดอน นา ดอน โปละ ลอง เฌา เยซู. เฌาพรา มืร กอย รึม โดบ เฆ, วี แตห เฆ บยัะ ปวน เฌาพรา, โบง นา หมึอม อาม กาเซา, แตห อี นับ, โฆรห ปี กาลาง เฆ แฮะ หมาน แฮะ มูห.#16:20 บับ ดอ โฆว มัง โมยว อาว มึห กาบัก 9 ฌัม 20.

Currently Selected:

มก 16: pce

Highlight

Copy