มก 6

ลอง เฌา เยซู วี ฮาว ฌัม มืง กอย บรีม อัน

1วาย อัน ตี เฌา เยซู เลห โดง ตึอน, วี ฮาว ฌัม มืง กอย บรีม อัน. บอ เฆ ดีแบ อัน ฮาว โดบ อัน. 2บอ ฌัม ซีแง ดีเหลา, เฌา เยซู วี จูห ดี มาโนว ลอง เฌาพรา แคง โฌง กรึบ เฆ ดูอี อายูดา เฌาพรา. เฆ ดูอี กืน อี โทม โฆรห อัน, เฆ วี อาม. เฆ ต็อห, “ดูอี ตี, เหมา อึณ ปาย ปี นับ อัน ฌึร ตี? อางยาน มาเซ อึณ มูห, ปี ปึอน อัน? เหมา อึณ ปาย ปี นับ อัน ดี โบง อี หมึอม อาม กาเซา แบน โมยว แบน โมยว? 3เอ ทาง, อัน มูห ลักซามา อี มูห ฆอน นาง มารี ตึอน. อายาโกบ, อาโยวเซ, อายูดัด บอ อาซีโมน มูห วา อัน. บอ วา อัน อี มูห ฆอน อีบึณ กอย กาแต เอ นี.” โคว, เฆ ตู โรวเซ อัน.

4เฌา เยซู วี ต็อห ดี ดูอี ฌึร ตี, “เซ อึณ มูห ดูอี อี บยาน โฆรห เฌาพรา, ดอน อี ดี บอ โรวเซ อัน. เซ อัน ยี ตัห มืง กอย บรีม อัน, เฆ ดูอี อี ดึอม กอย รึม โดบ อัน, เฆ วอแว อัน บอ เฆ ดูอี อี กอย แคง กาง อัน, ดูอี เฆ ตี, เฆ ตู โรวเซ อัน.” 5โคว, โดง กอย บรีม อัน ตี, อัน ดาง แด อัน แดง ฆีณ ดูอี เซา มัง อี, แตห เฆ แกน. แดง ตี, อัน ตู ปึอน โบง นา หมึอม อาม มาเซ ปอ อึณ ปัว. 6อัน มืร อาม ปี ตู หณึม เฆ ดี อัน.

ลอง เฌา เยซู ตึย ดีแบ อัน ฮาว แบน โปละ แบน โปละ

วาย อัน ตี เฌา เยซู วี ฮาว แบน โปละ แบน โปละ วี มาโนว ลอง เฌาพรา แคง เรา แบน เรา แบน เรา. 7อัน วี แดะ เฆ ดีแบ อัน ฆึร ดี อา วี, แตห เฆ ตัห โดง กอย อัน. อัน วี จัร เฆ, แตห เฆ ฮาว อู โปละ อา วี อา วี. อัน บอ ดัว ปวน ดี เฆ, แตห เฆ ปึอน ดี อึบ กานัม ฮาย.

8อัน บอ จัร เฆ, ดอ ฮาว เฆ โดบ อึณเตณ, แกวะ แตห เฆ โฆ็ง โกรวกราม มาเซ แดง อึณกรวน เฆ. แกวะ แตห เฆ โฆ็ง คามูน เฆ ฮู. แกวะ แตห เฆ ฮับ อูน รึอน แคง แซะ เฆ. 9อัน บอ จัร เฆ ชึบ คูดีณ เฆ, ยี ตู แตห เฆ ดึห ซีโตว ปอ อู พืน. 10อัน วี ต็อห, “เซ เบ ลึบ แคง กาง อี เฮา, แตห เบ กอย แคง กาง ตี, แตห กอ ฌัม ปัน ดี เลห เบ แคง มืง ตึอน. 11เซ อึณ บอ มึห อู โปละ, เซ เฆ ดูอี ตู รวห เบ, ตู โทม โฆรห เบ, เบ โลว เลห โดง กอย เฆ บอ ดียึห รัห กาปูห ดี เปลา เบ, แตห อึณ บยัะ ดี เฆ ลอง ปี ตู โทม เฆ, อึณ ตู หมึอม.”

12เฌา เยซู แฮะ ฮอต กาลาง โฆรห ตี ดี เฆ, เฆ วี ฮาว วี กาลาง ดี ดูอี, แตห เฆ โหลห แวน หมาบ เฆ. 13เฆ ซูต กานัม กืน เลห แคง โดว โบ็ง อี เฮา. เฆ บอ พ็อห นามัน ดี ฆีณ ดูอี กืน, แตห เฆ ปีแกน เซา อี.

ลอง ดา ซารา อายอฮาน แฮะ ยัม

14วาย อัน ตี ดอน อี บอ นับ ลอง เฌา เยซู. บอ คูนดีคัม อาเฮโรด วี ยึร ลอง ปี กาลาง อี เฮา. มัง อี เฆ ต็อห, “อึณ มูห ดา ซารา อายอฮาน ตึอน, อี แฮะ จึบ ดูอี แคง อึม. อัน แฮะ ฮอต ยัม, ยี แฮะ วี ยีต วี อีม, วี แบน เฌา เยซู. โคว, เฌา เยซู วี มึห ปวน อี แตห อัน โบง นา หมึอม อาม กาเซา.”

15บอ มัง อี เฆ ต็อห, “เฌา เยซู มูห ดา อาเอลียัะ ตึอน, อี แฮะ ยัม วี อีม.” บอ มัง อี เฆ ต็อห, “อัน มูห ดูอี อี บยาน โฆรห เฌาพรา อู วี, อี แฮะ ยัม, วี อีม.”

16ดอ ยึร คูนดีคัม อาเฮโรด ซาดาง แบน โมยว แบน โมยว ฌึร ตี, อัน ต็อห, “อึณ มูห ดา ซารา อายอฮาน ตึอน, อี แฮะ จึบ ดูอี แคง อึม. โอว แฮะ ฮอต แตห ดูอี แดบ แวน ฆีณ อัน, แตห อัน ยัม. อัน แยะ แฮะ วี ยีต วี อีม.”

17คูนดีคัม อาเฮโรด ทาง ปาย ตี, โคว, อัน แฮะ โหลห ดอ จัร อัน อี เฮา, แตห เฆ เหมต อายอฮาน, คร็อง อัน แคง กาปึม. อัน แฮะ เหมต อายอฮาน, โกบ โฆรห ปี ดึอม กาลาง อายอฮาน ดี อาเฮโรด ลอง นาง เฮโรวดี, อี มูห อีบึณ วา อาเฮโรด, อี จืร อาพีลีบ. อาเฮโรด แฮะ ฮอต ดึห นาง เฮโรวดี ตึอน, แตห อัน วี แบน อีบึณ อัน. 18ดอ อัน ตี อายอฮาน แฮะ ดึอม กาลาง โฆรห ดี อาเฮโรด. อัน แฮะ ต็อห, “ปี โบง แม, อึณ ตู โดบ ดารา. อาว ปึอน ดึห อีบึณ วา แม, แตห อัน วี แบน อีบึณ แม.” 19โกบ โฆรห อัน ตี, บอ นาง เฮโรวดี อูน น็อห, ตู อึง อายอฮาน. อัน แบน น็อห ซี ง็อห แวน ดา ซารา อายอฮาน. อัน ยี ตู นับ ปี ดี ปาย ดี โบง. 20อึณ มูห อาเฮโรด, อัน โยว อายอฮาน. โคว, อัน วี บัร อายอฮาน. อัน บอ นับ, ดา ซารา อายอฮาน มูห ดูอี บอด, ดูอี หมึอม. ดอ กาลาง อายอฮาน โฆรห ตึอน ดี อาเฮโรด, น็อห อาเฮโรด กอ กาฟัร กาเฟียน กาเซา. อัน ยี อึง ดี โทม โฆรห อายอฮาน.

21อึณ บอ ฌัม อู ซีแง, มูห ซีแง ฆยาม นาง ตึอน. ซีแง อัน ตี มูห ซีแง ฆึอด คูนดีคัม. ดอ อัน ตี คูนดีคัม อาเฮโรด วี โบง บลอย, วี บาง อามู อามาด บอ เฆ ดา โบว บอ เฆ ดา ตาง แคง อืง ฆาลีเล, แตห เฆ บอกาเฆลียด ตัห ลึบ บลอย ตี. 22ดอ โบง เฆ บลอย ตี, อึณ มึห ฆอน อีบึณ นาง เฮโรวดี ตึอน. อัน ตัห ลึบ บลอย ตี, บอ ฆา แตห อึณ ล็อะ น็อห อาเฮโรด บอ แคต อัน.

ปัน ตี คูนดีคัม วี ต็อห ดี ฆอน อีบึณ ตี, “แตห แม หมาณ ดี โอว. แคะ ปี ซี ปึอน แม, โอว ดี ดัว ดี แม.” 23ปาย ตี, อัน วี ดืง กาแซณ, วี ต็อห, “เซ อึณ บอ มูห มืง ปี อึบ โอว อู กาแต, โอว ดี ดัว ดี แม แคะ ปี หมาณ แม.”

24อัน แฮะ ฮอต กาลาง ปาย ตี, ฆอน อีบึณ วี เลห โดง กอย เฆ, วี ดีหมอด มา อัน ต็อห, “มา เซ ปี โลว หมาณ โอว?” มา อัน วี ต็อห, “แตห แม หมาณ ฆีณ ดา ซารา อายอฮาน, อี จึบ ดูอี แคง อึม.”

25แฮะ ฮอต ปัน ตี ฆอน อีบึณ ตึอน วี ฮาว อู เฌณ, วี ฌัม ดี อาต คูนดีคัม, แตห อัน วี หมาณ ดี อัน. อัน ต็อห, “โอว โลว แม ดัว ฆีณ ดา ซารา อายอฮาน อี จึบ ดูอี แคง อึม. แตห แม เบลห แดง พาน, ดัว ดี โอว อู เฌณ.”

26อัน แฮะ ฮอต กาลาง โฆรห ตี, คูนดีคัม บอ กลึร. โกบ โฆรห แปะ แฮะ ดืง แฮะ กาแซณ อัน แตห แคต อัน โทม, อัน ตู ซี บยาน วีว โฆรห ปี ต็อห อัน ดี ฆอน อีบึณ ตึอน. 27โคว, อู เฌณ อัน จัร ดา ซึก อัน, ฮาว ดึห ตัห ฆีณ ดา ซารา อายอฮาน. ดา ซึก ตึอน วี ฮาว แคง กาปึม, วี แดบ แวน ฆีณ ดา ซารา อายอฮาน. 28อัน วี ตัห ฌัม ดี อาต คูนดีคัม, โฆ็ง ฆีณ อัน แดง พาน. คูนดีคัม วี ดัว ฆีณ ตี ดี ฆอน อีบึณ ตึอน. แฮะ ฮอต อัน วี ดัว ดี มา อัน. 29เฆ ดีแบ อายอฮาน วี ยึร ซาดาง ลอง อัน ตี, เฆ วี ตัห ดึห โดว โบ็ง อายอฮาน, วี เบลห อูน อัน แคง กาเดา บาเรว.

ลอง เฌา เยซู ดัว ปี ดี โฮม ดี ดูอี พัน แหรณ วี

30วาย อัน ตี เฆ ดูอี ปี ร็อห ปี ตึย เฌา เยซู, เฆ วี ตัห ฌัม โดง กอย เฌา เยซู, วี กาลาง โตต ดอน โมยว ลอง แปะ แฮะ โบง เฆ บอ แปะ แฮะ มาโนว เฆ. 31ดอ อัน ตี อึณ มึห ดูอี กืน อี ตัห ตัห, เวณ เวณ, แกวะ แตห เฆ ปึอน ดี โฮม โบม เฆ. โคว, เฌา เยซู วี แดะ ดีแบ อัน ต็อห, “แตห เบ ตัห โดบ โอว. แตห เอ ฮาว โดง ตู มึห ดูอี เฮา, แตห เอ ปึอน ดี ดีเหลา อี แจก.”

32แฮะ ฮอต กาลาง ปาย ตี, เฆ วี ป็อะ รึร ฮาว โดง ตู มึห ดูอี, แกวะ แตห อี เฮา ปึอน ดี โดบ เฆ. 33อึณ ยี มึห ดูอี กืน, เฆ วี ยึร เฌา เยซู บอ ดีแบ อัน ดอ ลึบ ฮาว เฆ แคง รึร ตึอน. เฆ วี กาแบลบ ฮาว โคบ อึม, ฮาว โรบ อึม ดึง ตึอน. เฆ กืน วี เลห แคง มืง แบน มืง แบน มืง, วี กาแบลบ ฮาว โดง ดี ฮาว เฌา เยซู. เฆ แฮะ วี ฌัม อาต ฌัม เฌา เยซู เฆ ดีแบ อัน. 34ดอ ฌัม เฌา เยซู โดง ตึอน, อัน วี ยึร เฆ ดูอี กืน กอย หน็อะ อัน, อัน วี กาเว เฆ. แคง น็อห อัน, อัน ทาง เฆ ปี มาบู อี ตู มึห ดา อี เฮียง เฆ. โคว, อัน กาเว เฆ. อัน วี จูห ดี มาโนว เฆ ลอง แบน โมยว แบน โมยว.

35ดอ อัน ตี แฮะ ฌัม บา ดี อับ. โคว, ดีแบ เฌา เยซู วี ตัห ดี อัน. เฆ ต็อห, “โดง กอย เอ นี มูห โดง กาโต็ง ดี เรา อี เฮา. อาว เหลณ แปร ดี อับ. 36แตห แม ตึย เฆ ฮาว แคง เรา อี กอย กาตัด ดี นี, แตห เฆ ปึอน ดี ฮาว แบน เรา แบน เรา, จึห ปี ดี โฮม เฆ.”

37เฌา เยซู ยี ต็อห, “แตห เบ ดัว ปี ดี โฮม ดี เฆ.” เฆ วี ต็อห ดี อัน, “แม ซี แตห เย ดึห รึอน อา มาย็อห โบ็ง,#6:37 อาเซ โบง ฆาน อาดา อู ซีแง แฮะ ปึอน รึอน อู โบ็ง ฮาว จึห คามูน, ดัว ดี เฆ?”

38เฌา เยซู วี ต็อห, “แตห เบ ฮาว ยอด, คามูน หนาง โบ็ง เบ มึห?” เฆ แฮะ ฮอต ยอด, เฆ วี ต็อห, “เย มึห คามูน พัน โบ็ง บอ มาฆา อา โดว.”

39ปัน ตี เฌา เยซู วี จัร เฆ, แตห เฆ กาลาง ดี ดูอี กืน, แตห เฆ ตูต แดง เปต แบน พึง แบน พึง. อู พึง กาบัก พัน ฆึร วี, อู มาย็อห วี. 40อัน แฮะ ฮอต ต็อห ปาย ตี, เฆ วี ตูต แบน พึง แบน พึง. มัง พึง กอย อู มาย็อห วี, มัง พึง กอย พัน ฆึร วี. 41เฌา เยซู วี ดึห คามูน พัน โบ็ง บอ มาฆา อา โดว ตึอน, วี ซากึห ยอด ฆางหราว, กาลาง ฆูง เฆฌู ดี เฌาพรา. แฮะ ฮอต, อัน วี กาบัก วี ดัว คามูน ดี ดีแบ อัน, แตห เฆ วี ดัว ดี เฆ ดูอี กืน, แตห เฆ บอกาเฆลียด ปึอน ดี โฮม. อัน บอ ดึห มาฆา วี กาซาง ดี เฆ. 42เฆ บอกาเฆลียด ปึอน ดี โฮม แพ. 43วาย แฮะ ฮอต โฮม, เฆ ดีแบ เฌา เยซู วี แฆบ กาฌูะ กาโลย โฮม แคง กาแตบ. อึณ กอ โนะ ฆึร ดี อา กาแตบ. 44เฆ ตีห มี อีมาย พัน แหรณ วี, อี แฮะ โฮม แพ.

ลอง เฌา เยซู ฮาว แดง อึม

45วาย อัน ตี อู เฌณ, เฌา เยซู แตห ดีแบ อัน วี ฮาว ลึบ แคง รึร, จัร เฆ แยต ดี อาต, ฮาว ฌัม มืง เบดซีดา. ดอ ฮาว เฆ, อัน ต็อห ดี จัร บอ เฆ ดูอี กืน ฮาว วีว โดง กอย เฆ. 46เฆ ดูอี กืน แฮะ ฮอต ฮาว, บอ อัน ฮาว โฮะ แดง นอน, แตห อัน ปึอน ดี ซาคึร.

47แปร กอ อับ, รึร ซังโพว ตึอน กอย นา กาแต อึม ดึง. เฌา เยซู อู วี ยี กอย แดง กาดาย. 48อัน ยี ปึอน ยึร, ดีแบ อัน ตู โกบ แป ดี วาย รึร. เฆ โลว ฮาว นา ตัห คูน. แคง หมึร ตี, ดอ แฮะ รีน ดี วัห แปร, เฌา เยซู วี เลห โดง ซาคึร อัน, วี ฮาว แดง อึม, แตห อัน ฌัม โดง กอย รึร ปี ป็อะ ดีแบ อัน. อัน ต็อห ดี ฮาว กาโลห เฆ. 49เฆ ดีแบ อัน, เฆ ยี ยึร อัน ฮาว แดง อึม, เฆ ทาง อึณ มูห กาเปรา. เฆ บอ ดัด ตาง. 50เฆ ดอน อี ยึร อัน. โคว, เฆ โยว กาเซา.

เฌา เยซู วี กาลาง โฆรห ดี เฆ อู เฌณ. อัน ต็อห, “แตห เบ ดาคึย, อึณ มูห โอว. แกวะ โยว.”

51แฮะ ฮอต, อัน วี ลึบ แคง รึร เฆ. ดอ อัน ตี คูน บอ เยน. เฆ วี อาม กาเซา ลอง อัน ตี. 52เฆ โยว ปาย ตี โคว, อึณ ตู กาหลูห ดี น็อห เฆ ลอง เฌา เยซู ดัว คามูน ดี เฆ ดูอี กืน. เฆ ตู แตห ฌึร ตี ลึบ แคง น็อห.

53เฆ แฮะ ฮอต ฌัม บลาก นา ตัะ อึม, เฆ วี คยัะ รึร ดี โคบ มืง เกเนซาเรด. 54เฆ แฮะ ฮอต เลห แคง รึร, อู เฌณ, เฆ ดูอี กืน บอ นับ, อึณ มูห เฌา เยซู แฮะ ตัห. 55เฆ วี ฮาว แบน โปละ แบน โปละ, กาลาง แตห ดูอี กอ นับ ลอง เฌา เยซู แฮะ ตัห. เฌา เยซู บอ ฮาว นา เหมา, เฆ บอ ฆอด ดูอี เซา แดง กาแบห, ฮาว ฌัม โดง ปี ต็อห เฆ อัน ดี ว็อะ. 56เฌา เยซู บอ ฮาว นา เหมา, อึณ บอ มูห แคง เรา, แคง มาน แคง มืง, เฆ ดึห เบลห ดูอี เซา ดี ฆลัะ. เฆ วี หมาณ ดี เฌา เยซู, แตห อัน ควาง เฆ ปา ครึง อัน. ดอน อี อี ปา ครึง อัน มืร แกน.

Currently Selected:

มก 6: pce

Highlight

Copy