มก 7

ลอง ดารา ปี มาโนว ดา ซารา อาโมวแซ

1เฆ ดูอี พึง พารีแซ มัง อี บอ เฆ ดา ซารา อี มาโนว ดารา ยูดา มัง อี, เฆ แฮะ เลห แคง มืง เยรูซาแลม, วี ตัห ฌัม โดง กอย เฌา เยซู. 2ดอ อัน ตี เฆ วี ยึร ดีแบ เฌา เยซู มัง อี โฮม โบม. อาต โฮม เฆ, เฆ ยี ตู บาย แด เฆ แตห อึณ โดบ ฮีด เฆ ดา ตาง อี กอย ดอ มึอน. 3เฆ ดูอี พึง พารีแซ บอ เฆ ดูอี อายูดา ดอน อี, เฆ ยี ตู โฮม มาเซ, อาต บาย เฆ แด เฆ, แตห อึณ โดบ ฮีด ปี ดึอม โบง ดา ตาง เฆ. 4เซ เฆ แฮะ ตัห ดี กาลัห, เซ เฆ ตู บาย แด เฆ, เฆ ตู โฮม. บอ กาโละ ซีลัยะ บอ กีม, เฆ บาย โตต, แตห อึณ โดบ ฮีด เฆ แบน โมยว แบน โมยว.

5เฆ ดูอี พึง พารีแซ บอ เฆ ดา ซารา อี มาโนว ดารา ยูดา ตึอน, เฆ บอ ยึร ดีแบ เฌา เยซู ตู โดบ ฮีด เฆ, เฆ วี ดีหมอด เฌา เยซู. เฆ ต็อห, “เหมา อึณ ปาย ปี ตู โดบ ดีแบ แม ฮีด เอ? เหมา อึณ ปาย ปี ตู โบง โดบ เฆ ปี มาโนว ดา ตาง เอ ดี เอ? เฆ โฮม โบม เฆ, ตา แด อี ตู ซีงา.”

6เฌา เยซู วี ต็อห, “โฆรห ปี ดึอม กาลาง ดูอี อี บยาน โฆรห เฌาพรา อี จืร อาอีซายัะ ตึอน, อึณ แฮะ หมาน, แฮะ มูห. อัน แฮะ ดึอม กาลาง ลอง เบ ดูอี อี ณึงราง บอด. อัน แฮะ แดม อูน แคง บับ อัน ปาย นี. ‘เฆ โรวเซ โอว มี แคะ โฆรห เฆ. น็อห เฆ ยี ตู นัมโหลห โอว.

7เฆ บอ กรึบ โอว ปีเยณ. ปี มาโนว เฆ, อึณ ตู มูห ดารา โอว. อึณ มูห ดารา ปี โบง เฆ ดูอี.’ ปาย ตี อาอีซายัะ ตึอน แฮะ แดม อูน โฆรห เฌาพรา.

8ปาย ตี บอ เบ แฮะ แวน ดารา เฌาพรา, วี โดบ ฮีด ดูอี.” แคะ ตี เฌา เยซู วี กาลาง ดี เฆ.

9แฮะ ฮอต, อัน วี ต็อห, “เบ แฮะ หล็อก ดี แวน ดารา เฌาพรา, แตห เบ ปึอน ดี โดบ ฮีด เบ. 10โอว ดี กาลาง อูพามา ดี เบ. ดา ซารา อาโมวแซ, อัน แฮะ ดึอม ต็อห, แตห เบ โรวเซ ฆูณ มา เบ. อัน บอ ต็อห, อาเซ ดืง ฆูณ มา อัน, อัน โลว คัม ดี ยัม. 11เบ ยี มาโนว ปอ อู โมยว. เซ อึณ มึห ดูอี อู วี, อัน ต็อห ดี ฆูณ มา อัน, ‘ปี ดี โลว ดัว โอว ดี บาย, โอว อาว ฮู มึห ดี ดัว. โอว แฮะ ฮอต หลู ดี เฌาพรา,’ เบ ต็อห, แฮะ หมาน ปี โบง อัน. 12ปาย ตี, เบ มาโนว ดูอี, แกวะ ฮู แตห เฆ จอย ฆูณ มา เฆ. 13ปาย ตี เบ นับ ดี แวน โฆรห เฌาพรา, วี แตห ดอน อี โทม โดบ ฮีด เบ, แปะ แฮะ โดบ บอ ฆูณ ดา เบ อี กอย คา อาต. เบ มืร โบง แบน โมยว แบน โมยว ฌึร ตี.”

14เฌา เยซู แฮะ ฮอต กาลาง โฆรห ตี ดี ดา ซารา ยูดา, อัน วี แดะ เฆ ดูอี กืน, แตห เฆ วี โทม โฆรห อัน. อัน ต็อห, “แตห เบ ดอน อี โทม โฆรห โอว, แตห อึณ บอ ลึห ดี น็อห เบ. 15ปี ดี โฮม อี ลึบ แคง โดว โบ็ง ดูอี, อึณ ตู แตห อัน แบน ดูอี ตู บอด. อึณ ยี มูห ปี โบง อัน บอ ปี กาลาง อัน, อี เลห แคง น็อห อัน, ฌึร ตี อี แตห อึณ แบน หมาบ ดี ดูอี, ตู แตห อัน ซีงา. 16อาเซ มึห โหยะ อี นับ ดี โทม, แตห อัน โทม โฆรห โอว นี.”

17เฌา เยซู แฮะ ฮอต กาลาง โฆรห ตี, อัน วี เลห โดง กอย เฆ ดูอี กืน, วี ฮาว แคง กาง อู กาง. เฆ ดีแบ อัน วี ดีหมอด อัน ลอง อูพามา แปะ แฮะ มาโนว อัน. 18เฌา เยซู วี ต็อห, “เบ ตู มึห อางยาน. เหมา อึณ ปาย ปี ตู ลึห ดี น็อห เบ โฆรห แปะ แฮะ กาลาง โอว? ปี ดี โฮม อาว ปึอน ลึบ แคง น็อห แตห น็อห ตู บอด. 19อึณ ลึบ แคง วัต. แฮะ ฮอต, อึณ วี เลห แคง วัต.” ปี กาลาง อัน ฌึร ตี, อึณ บอ เลห ซีเพา ปอ อู โมยว. อึณ ปี เฌา เยซู ต็อห, แฮะ ปึอน โฮม ปี ดี โฮม ดอน โมยว. อาว มึห ปี ดี โฮม อี บอด ตู บอด.

20อัน วี ต็อห, “อึณ ยี มูห ปี โบง ดูอี, ปี กาลาง อัน, อี เลห แคง น็อห อัน, อึณ แตห ดูอี ตู บอด. 21โคว, นา ตู หมึอม, อึณ เลห แคง น็อห ดูอี. เซ ดูอี บอ มึห อางยาน ตู หมึอม, ลูต อีบึณ อี, ปรา โกรวกราม อี, ซี ง็อห ดูอี, ลาย อีบึณ อี เฮา, 22เซ อัน บอ มึห น็อห ลอพัะ, น็อห ฮาย, กาโลว เซเซ, โบง ปี ตู กาอาบ โบง, มึห น็อห ซี ปึอน แคะ มึห อี เฮา, กาลาง จาว ลอง อี, มึห น็อห ปีคึก บอ น็อห รึร, ตู มึห อางยาน, 23นา ตู หมึอม ฌึร ตี ดอน โมยว, อึณ เลห แคง น็อห ดูอี, แตห อัน ตู บอด.”

ลอง อีบึณ อู วี อี หณึม เฌา เยซู

24วาย อัน ตี เฌา เยซู เลห โดง กอย อัน ตึอน, วี ฮาว ปอ อู โปละ อี กอย กาตัด มืง ทูโรว ฆาย มืง ซีโดน. อัน ลึบ แคง กาง อู กาง, ตู ซี แตห อาเซ นับ. อัน ยี ตู ปึอน เครียง โดง กอย อัน. 25อึณ มึห อีบึณ อู วี, อัน บอ ยึร ลอง เฌา เยซู แฮะ ตัห, อัน ฮาว โดง กอย เฌา เยซู อู เฌณ, วี ครึบเครา ดี อาต อัน. ฆอน อีบึณ อัน มึห กานัม กอย แคง โดว อัน. 26อีบึณ ตี มูห ดูอี อาโมยว ฆรีก. อาว มูห อาโมยว ยูดา. มืง บรีม อัน มูห มืง ซูโรวโพวนีก โพวนีก. อัน วี หมาณ ดี เฌา เยซู, แตห อัน ซูต กานัม เลห แคง โดว ฆอน อัน.

27เฌา เยซู ยี ต็อห ดี อัน, “ดอน อี โลว แตห ฆอน อัน โฮม แพ ดี อาต. ปี ดี โลว ดัว ฆอน โฮม, อาว กาอาบ แวน, แตห มาโซว โฮม.”#7:27 อึณ ปี เฌา เยซู ต็อห, อัน ตู กาอาบ จอย ดูอี อี ตู มูห อาโมยว อีซาเรลัะ. ยอด บอ อามาแท 15:26

28อีบึณ ตึอน วี ต็อห, “โฆรห ปี กาลาง แม เฌา แฮะ หมาน. อึณ ยี มึห เฆ มาโซว อี กอย ครึม กาง, เฆ วี ปึอน ดี เลียะ โฮม อี รัห ดี โมต ฆอน.”

29อัน แฮะ ฮอต กาลาง ปาย ตี, เฌา เยซู วี ต็อห ดี อัน, “โกบ กาลาง แม โฆรห ตี, แตห แม เวณ ดี กาง แม. กานัม แฮะ ฮอต เลห แคง โดว โบ็ง ฆอน แม.”

30แฮะ ฮอต, อัน วี เวณ ดี กาง อัน. อัน วี ยึร ฆอน อัน กอย อีด แดง กาโช็ง. กานัม แฮะ ฮอต เลห แคง โดว อัน.

ลอง เฌา เยซู ปีแกน ดูอี อี ตู นับ ดี กาลาง โฆรห

31วาย อัน ตี เฌา เยซู วี เลห โดง กอย อัน อี กอย กาตัด มืง ทูโรว. อัน วี กาโลห ฮาว แคง มืง ซีโดน, ฮาว โลง ดี โคบ อึม ดึง ฆาลีเล. อัน ฌัม แคง อืง ฆึร มืง ตึอน. 32ดอ ฌัม อัน โดง ตี อึณ มึห ดูอี มัง อี, เฆ ตึย ดูอี อู วี ดี เฌา เยซู. โหยะ ดูอี ตี กาอาว. อัน กาลาง โฆรห มืร, อาว บรี. เฆ วี หมาณ ดี เฌา เยซู, แตห อัน ดาง แด อัน แดง ฆีณ ดูอี ตี, แตห ดูอี ตี วี แกน.

33เฌา เยซู แตห อัน ฮาว โดง ตู มึห ดูอี กืน. แฮะ ฮอต, เฌา เยซู วี ฮับ กานู อัน แคง โหยะ ดูอี ตี. อัน บอ ปัต แด อัน, วี ปา ซีดัะ ดูอี ตี. 34แฮะ ฮอต, อัน ซากึห ฆางหราว, วี ฮึห พึอม ตาง ต็อห, “เอพาทา.” ลอง ดาง โฆรห ตี มูห, “แตห อึณ ลึห.” 35เฌา เยซู แฮะ ฮอต กาลาง โฆรห ตี, โหยะ ดูอี ตี บอ วี ลึห. ซีดัะ อัน วี ปึอน กาลาง โฆรห, แตห อึณ เลห ซีโบรห.

36เฌา เยซู วี ดัม เฆ, แกวะ แตห เฆ กาลาง ดี อี ลอง อัน ตี. อัน ยี วี กาลาง ดี เฆ แคะ เหมา มืร, เฆ แนะ วี กาลาง ปอ อึณ ปัว. 37เฆ ดูอี กอ อาม กาเซา ลอง อัน ตี. เฆ วี ต็อห, “เฌา เยซู นับ ดี โบง แตห อึณ ซีคยา ดอน โมยว. บอ ดูอี โหยะ กาอาว, อัน นับ ดี ปีแกน, แตห อึณ ลึห. บอ ดูอี ตู นับ ดี กาลาง โฆรห, อัน แป ปีแกน, วี แตห ดูอี ตี ปึอน กาลาง ซีโบรห.”

Currently Selected:

มก 7: pce

Highlight

Copy