มก 8

ลอง เฌา เยซู ดัว ปี ดี โฮม ดี ดูอี พวน แหรณ

1ปอ อู เฌณ, อึณ มึห ดูอี กืน แฮะ ตัห กาฌูะ. เฆ มืร ตู มึห ปี ดี โฮม. โคว, เฌา เยซู แดะ ดีแบ อัน, แตห เฆ ตัห โดง กอย อัน. อัน ต็อห, 2“โอว กาเว ดูอี เฆ นี. เฆ แฮะ โดบ โอว อาดา โอย ซีแง, ยี หณัม มึห ดี โฮม มาเซ. 3เซ โอว จัร เฆ วีว ดี กาง เฆ, ตู แตห เฆ โฮม มาเซ, เฆ ดี บอ ดีหลัห เกห ดอ ฮาว เฆ โดบ อึณเตณ. มัง อี โลว ฮาว โต็ง กาเซา.”

4ดีแบ อัน วี ต็อห, “เหมา เอ ดี ปาย ดี เฮียง เฆ โฮม โดง กอย เอ นี? แคง แปร กาฮ็อห นี อาว มึห มาเซ.”

5เฌา เยซู วี ดีหมอด ดีแบ อัน ต็อห, “คามูน หนาง โบ็ง เบ มึห?” เฆ วี ต็อห, “บู โบ็ง.”

6ปัน ตี อัน จัร เฆ ดูอี กืน แตห เฆ ตูต แดง กาดาย. อัน บอ ดึห คามูน บู โบ็ง, วี กาลาง ฆูง เฆฌู ดี เฌาพรา. แฮะ ฮอต, อัน วี กาบัก คามูน, วี ดัว ดี ดีแบ อัน, แตห เฆ วี ดัว ดี ดูอี กืน. เฆ ดีแบ เฌา เยซู วี โบง ปี จัร อัน. 7เฆ มึห บอ มาฆา มัง โดว. โคว, เฌา เยซู วี ดาง ฆูง เฆฌู ดี เฌาพรา, วี จัร เฆ ดีแบ อัน, แตห เฆ กาซาง บอ มาฆา ตี. 8ปาย ตี, เฆ ดูอี กืน วี ปึอน ดี โฮม แพ. เฆ ดอน อี แฮะ ฮอต โฮม, เฆ ดีแบ เฌา เยซู วี กาฌูะ กาโลย โฮม เฆ, กอ โนะ บู คอน. 9อึณ มึห อีมาย พวน แหรณ วี, อี แฮะ กอย รึม โดบ เฌา เยซู ดอ อัน ตี. วาย อัน ตี เฌา เยซู วี จัร เฆ วีว. 10เฆ แฮะ ฮอต วีว, เฌา เยซู บอ ดีแบ อัน วี ลึบ แคง รึร, วี ป็อะ ฮาว ปอ อู โปละ อี จืร ดามานูทา.

11เฆ แฮะ ฮอต ฌัม โดง ตี, อึณ วี มึห เฆ ดูอี พึง พารีแซ มัง อี, เฆ ตัห วี ดีหมอด เฌา เยซู. เฆ ซี เทว ปวน อัน, หมาณ, แตห อัน โบง บยัะ ปวน อัน, แตห เฆ ยึร อี หมึอม อาม กาเซา. 12เฌา เยซู ยี ฮึห พึอม ตาง โกบ แฮะ ดูก ดี น็อห อัน. อัน ต็อห, “ดูอี อี กอย ฌาด นี, เฆ ซี ยึร นา หมึอม อาม กาเซา. โอว ยี ต็อห อาคาคัร. เฆ ตู ปึอน ดี ยึร นา หมึอม อาม มาเซ.” 13อัน แฮะ ฮอต กาลาง โฆรห ตี, อัน วี เลห โดง กอย เฆ, วี ลึบ แคง รึร, วี ป็อะ ฮาว นา ตัะ อึม ดึง ตึอน.

ลอง เฆ ดูอี พึง พารีแซ

14ดอ อัน ตี เฆ ดีแบ เฌา เยซู แฮะ ปีว ดี โฆ็ง คามูน ปี ดี โฮม เฆ. เฆ มึห มี คามูน อู โบ็ง อี กอย แคง รึร เฆ. 15เฌา เยซู วี ต็อห ดี เฆ, “เบ โลว ซาดีก เฆ ดูอี พึง พารีแซ บอ คูนดีคัม อาเฮโรด. ปี โบง เฆ, อึณ ปี ซีนัม บรัห คามูน.”

16อัน แฮะ ฮอต กาลาง โฆรห ตี, เฆ ดีแบ อัน วี ลาย ซังคยาง ซีเพา โฆรห ตี. เฆ ต็อห, “อัน กาลาง โฆรห ตี ดี เอ โกบ แฮะ ปีว เอ ดี โฆ็ง คามูน.”

17เฌา เยซู กอ นับ, มาเซ ปี ลาย กาลาง เฆ. อัน วี ดีหมอด เฆ. อัน ต็อห, “เหมา อึณ ปาย ปี ลาย กาลาง เบ ลอง ตู มึห เบ คามูน? อึณ ตู ลึห ดี น็อห เบ, ลอง ปี โบง โอว? เหมา อึณ ปาย ปี หณาบ ลึห แคง น็อห เบ? 18อึณ ปี บอ เบ มึห งาย ยี ตู ปึอน ดี ยึร ซีคยา. เบ มึห โหยะ ยี ตู ลึห ซีโบรห ปี โทม เบ. อึณ มืร ปี, เบ ตู โหลห แปะ แฮะ โบง โอว คา อาต. 19ดอ กาบัก โอว คามูน พัน โบ็ง, กาซาง ดี ดูอี พัน แหรณ วี, เบ วี กาฌูะ กาโลย อัน หนาง กาแตบ?” เฆ วี ต็อห, “อึณ มึห ฆึร ดี อา กาแตบ.”

20เฌา เยซู วี ต็อห, “ดอ กาบัก โอว คามูน บู โบ็ง, กาซาง ดี ดูอี พวน แหรณ วี, กาโลย อัน หนาง คอน เบ วี กาฌูะ อูน?”

เฆ วี ต็อห, “บู คอน.”

21แฮะ ฮอต กาลาง โฆรห ตี, เฌา เยซู วี ต็อห ดี เฆ, “เบ แฮะ ฮอต ยึร ฌึร ตี, อึณ ยี ตู ลึห มาเซ ดี น็อห เบ.”

ลอง เฌา เยซู แตห ดูอี งาย อับ วี บลาง

22วาย อัน ตี เฌา เยซู บอ เฆ ดีแบ อัน วี ฮาว ฌัม มืง เบดซีดา. มัง อี ยี ตัห ตึย ดูอี อู วี ดี เฌา เยซู. งาย อัน อับ. เฆ หมาณ แตห เฌา เยซู ปา ดูอี ตี. 23เฌา เยซู วี ปา แด ดูอี ตี, วี ตึย อัน, แตห อัน ฮาว ฌัม นา เรต เรา. แฮะ ฮอต, อัน ปัต งาย ดูอี ตึอน, วี ดาง แด แดง ฆีณ อัน. เฌา เยซู วี ดีหมอด, “แม แฮะ ปึอน ยึร?”

24อัน วี ยอด นา แดง, วี ต็อห, “โอว แฮะ ยึร ดูอี ฮาว วีว ฮาว เวณ. เฆ ยี ปี เฮ.”

25ปอ อู เฌณ เฌา เยซู วี ปา งาย ดูอี ตึอน. ปัน ตี งาย อัน บอ ลึห, อัน วี ปึอน ยึร, บอ วี ลึห ซีคยา.

26ปัน ตี เฌา เยซู วี ตึย อัน เวณ ซืร ดี กาง อัน บอ ดัม อัน ต็อห, “แกวะ ว็อะ นา เตต นา ตัะ แคง มืง. แกวะ แค ดี อาเซ.”

ลอง อาเปตารู นับ เฌา เยซู มูห ดูอี ปี ร็อห ปี ตึย เฌาพรา

27เฌา เยซู เฆ ดีแบ อัน วี ฮาว แคง เรา แบน เรา แบน เรา อี กอย กาตัด มืง เกซาเร พีลีพี. ดอ ฮาว เฆ โดบ อึณเตณ, อัน วี ดีหมอด ดีแบ อัน ต็อห, “เฆ ดูอี เฮา, เฆ ต็อห โอว มูห อาเซ?”

28เฆ วี ต็อห, “มัง อี ต็อห, แม มูห ดา ซารา อายอฮาน อี จึบ ดูอี แคง อึม, อัน แฮะ วี ยีต วี อึม. มัง อี ต็อห, แม มูห ดา ซารา อาเอลียัะ ตึอน, อี แฮะ วี ยีต วี อีม. บอ มัง อี ต็อห, แม มูห ดูอี อี บยาน โฆรห เฌาพรา อู วี, อี กอย ดอ มึอน, อี แฮะ วี ยีต วี อีม.”

29เฌา เยซู วี ต็อห, “เซ อึณ มูห เบ, เบ ต็อห โอว มูห อาเซ?” อาเปตารู วี เวียะ โฆรห ตี. อัน ต็อห, “แม มูห อัน เฌา ปี ร็อห ปี ตึย เฌาพรา แตห แม คยอด ดูอี.”

30อาเปตารู แฮะ ฮอต กาลาง โฆรห ตี, เฌา เยซู วี ดัม เฆ ดีแบ อัน, แกวะ แตห เฆ กาลาง โฆรห ตี ดี อาเซ.

ลอง เฌา เยซู กาลาง ดี อาต ลอง โลว ยัม อัน

31เฌา เยซู แฮะ ฮอต กาลาง โฆรห ตี, อัน วี จูห ดี กาลาง ดี ดีแบ อัน ลอง ปี ดี ปาย อาซาก อัน, อี แฮะ แบน ฆอน ดูอี. อัน ต็อห, ฆอน ดูอี ตี โลว กาดูห ดูก ดอน โมยว. เฆ ดา ตาง ยูดา, เฆ มืร ตู โลว อัน. บอ เฆ ดา ตาง อี แยต เฆ ดูอี อี หลู ดี เฌาพรา, บอ เฆ ดา ซารา อี มาโนว ดารา ยูดา, เฆ ดี ซูงพยาด ดี ง็อห อาซาก อัน. อัน ฮี ฮอต ยัม, วาย โอย ซีแง, อัน ดี วี ยีต วี อีม. 32อัน กาลาง ซืร ลอง ฌึร ตี. อาเปตารู ยี แดะ เฌา เยซู มางัห ปอ บลาก, วี แคร อัน, แกวะ แตห อัน กาลาง โฆรห ฌึร ตี.

33เฌา เยซู ยี วี มางัห ยอด เฆ ดีแบ อัน บอกาเฆลียด, วี ต็อห ดี อาเปตารู, “แม เลห โดง กอย โอว. ปี กาลาง แม อึณ ปี โฆรห โบว กานัม อี จืร ซาตาน. อึณ ตู โดบ อางยาน เฌาพรา. อึณ โดบ อางยาน ดูอี.”

34วาย อัน ตี เฌา เยซู วี แดะ ดีแบ อัน บอ เฆ ดูอี กืน, แตห เฆ วี โทม. อัน ต็อห, “เซ อึณ มึห ดูอี อี ซี โดบ โอว, อัน โลว แวน ปี อึง อัน. อัน โลว เบลห น็อห อัน, ต็อห, ‘เซ โอว ปี บอ โลว ยัม มืร, โอว ยี ดี โดบ อัน เฌา เซเซ.’ อัน โลว โดบ โอว แตห อึณ ปาย ตี. 35โคว, อาเซ กาเว อาซาก อัน, อาซาก อัน ดี ชึม. อาเซ ยี ตู โยว ดี ยัม โกบ หณึม อัน ดี โอว บอ โฆรห โอว, อัน ดี วี ปึอน อาซาก กามาย. 36เซ อึณ ยี มึห ดูอี อู วี, อี แฮะ ปึอน โตต ดอน โมยว แดง กาดาย นี, อาซาก อัน ยี ชึม, ยี โจห กาโละ งาราย, โกรว ปี ปึอน อัน ตี อาว แบน อาฆยึร มาเซ ดี อัน. 37ดูอี มืร ตู ปึอน ดัว มาเซ, แตห เฌาพรา คยอด อัน, แกวะ แตห อาซาก อัน ชึม. 38เฆ ดูอี ฌาด นี, เฆ แฮะ โบง หมาบ ดอน โมยว บอ แวน เฌาพรา. ปี โบง เฆ ดี เฌาพรา, อึณ ปี ปี โบง ดูอี อี ลูต อีบึณ. เฆ ดูอี ฌึร ตี ดี บอ ซาย ดี กาลาง ดี อี เฮา ลอง หณึม เฆ ดี โอว บอ โฆรห โอว. เซ อึณ ปาย ตี, โอว มืร ดี ซาย ดี ต็อห, ‘โอว แฮะ นับ เฆ.’ โอว อี แฮะ แบน ฆอน ดูอี, โอว ดี วี ตัห โลง แดง กาดาย. ดอ อัน ตี โอว ดี บอ บยัะ อาโรง บลาง ฆูณ โอว. โอว ดี บอ แดะ เฆ อามู อามาด เฌาพรา อี บอด กาเซา, แตห เฆ ตัห รึม โดบ โอว. ดอ อัน ตี โอว ดี บอ ซาย ดี เฆ ดูอี อี แฮะ ดึอม ซาย ดี กาลาง ลอง หณึม เฆ ดี โอว.”

Currently Selected:

มก 8: pce

Highlight

Copy