มก 9

1ปัน ตี เฌา เยซู วี ต็อห ดี เฆ, “โอว ต็อห อาคัร ดี เบ. กาแต เบ ดูอี อี โทม โฆรห โอว นี, อึณ มึห มัง อี, เฆ ตู ยัม อาต ยึร เฆ เฌาพรา ดี ตา ปวน ตาง อัน, อึบ โตต แดง กาดาย.”

ลอง อารึบ เฌา เยซู กาบลืง

2วาย อัน ตี บอ โนะ เดา ซีแง, เฌา เยซู วี แดะ อาเปตารู, อายาโกบ บอ อายอฮาน, แตห เฆ ฮาว โดบ อัน โฮะ แดง นอน จา. โดง ตี ตู มึห อี เฮา. ดอ กอย เฆ แดง นอน ตี, อารึบ เฌา เยซู วี กาบลืง. 3ครึง ปี ชึบ อัน วี แบน ครึง ลูย ราว. อาว มึห อาเซ แดง กาดาย, อี แป ดี ลัห ครึง, แตห อึณ ลูย ปี ครึง เฌา เยซู ตี. 4บอ ดา ซารา อาเอลียัะ บอ ดา ซารา อาโมวแซ ตึอน ตัห กาปลูห ดี อาต เฆ, วี โฆรห ดี เฌา เยซู.

5ดอ อัน ตี อาเปตารู วี ต็อห ดี เฌา เยซู, “ซารา, อึณ ดาคึย กอย ดี นี. แตห เย ซัม ทึบ โอย ทึบ. บอ ทึบ แม, บอ ทึบ อาโมวแซ, บอ ทึบ อาเอลียัะ.” 6อัน กาลาง โฆรห ตี โกบ โยว กาเซา อัน. อัน อาว ฮู นับ, มาเซ ปี ดี ต็อห อัน.

7ปัน ตี อึณอูะ บอ ตัห ปลึก เฆ. บอ มึห โฆรห อี เลห แคง อึณอูะ ต็อห, “ดูอี นี มูห ฆอน ปี ร็อก โอว. แตห เบ โทม โฆรห อัน.”

8เฆ แฮะ ฮอต โทม โฆรห ตี, เฆ วี ยอด กอ โรบ เฆ, เฆ อาว ฮู ยึร อาเซ กอย รึม โดบ เฆ. แฮะ ฆีด มี เฌา เยซู ซี กอย ดี ตี.

9ดอ โลง เฆ แดง นอน, เฌา เยซู วี ดัม เฆ, แกวะ แตห เฆ กาลาง ดี อาเซ ลอง แปะ แฮะ ยึร เฆ. วาย แฮะ ฮอต ยัม อัน บอ วาย วี ยีต วี อีม อัน, เฆ วี ปึอน กาลาง ลอง อัน ตี. 10ปาย ตี, เฆ มืร ตู กาลาง ลอง อัน ตี ดี อี เฮา. เฆ ยี ลาย กามวน ลอง ซีเพา ดอ ต็อห เฌา เยซู, วาย ยัม อัน, อัน ดี วี ยีต วี อีม.

11ปัน ตี เฆ วี ดีหมอด เฌา เยซู. เฆ ต็อห, “เฆ ดา ซารา อี มาโนว ดารา, เฆ ต็อห, ดา ซารา อาเอลียัะ โลว วี ตัห โลง แดง กาดาย นี อาต ตัห ดูอี ปี ร็อห ปี ตึย เฌาพรา ตี. โกบ มาเซ ปี ต็อห เฆ ปาย ตี?”

12เฌา เยซู วี ต็อห, “แฮะ หมาน. แฮะ แดม อูน ลอง อาเอลียัะ ดี ตัห ดี อาต, แตห อัน อึณปราย โตต ดอน โมยว. ปาย ตี อึณ บอ แดม อูน ลอง โอว, อี แฮะ แบน ฆอน ดูอี, โอว โลว กาดูห ดูก ตาง, แตห เฆ กอ ง็อห แวน โอว. 13โอว ยี ต็อห ดี เบ, อาเอลียัะ ตึอน แฮะ ฮอต ตัห, วี แบน ดูอี. เฆ ยี แฮะ โบง โตต ดอน โมยว ปี อึง เฆ ดี อัน. เฆ แฮะ โบง โตต ดอน โมยว, แตห อึณ ปี ปี แดม อูน แคง บับ เฌาพรา.”

ลอง ดูอี มึห กานัม กอย แคง โดว โบ็ง อัน

14เฌา เยซู เฆ ดีแบ อัน โอย วี บอ วี ตัห ฌัม โดง กอย เฆ คา อาต. เฆ วี ยึร ดูอี กืน แฮะ วี ตัห กอย รึม โดบ เฆ ดีแบ อัน อี ซี กอย นา ปัน ตึอน. อึณ มึห เฆ ดา ซารา อี มาโนว ดารา เฌาพรา, เฆ กาแทณ ดี ดีแบ เฌา เยซู. 15เฆ ดูอี กืน, ดอ ยึร เฆ เฌา เยซู, เฆ มืร อาม กาเซา. เฆ ฮาว รวห อัน อู เฌณ.

16เฌา เยซู วี ดีหมอด เฆ. อัน ต็อห, “ลอง มาเซ ปี ลาย กาลาง เบ?”

17ดูอี อู วี วี ต็อห, “ซารา, โอว แฮะ ตัห ตึย ฆอน อีมาย โอว, แตห อัน ตัห ดี แม. อัน มึห กานัม กอย แคง โดว โบ็ง อัน. กานัม ตี ตู แตห อัน กาลาง โฆรห. 18เซ กานัม ตี ปลึก อัน, อัน เกห. อึม อาง อัน มืร ปูห. อัน บอ ซีฆีด หราง อัน. โดว อัน บอ โปลม บอ โดว. โอว แฮะ ฮอต หมาณ ดี ดีแบ แม, แตห เฆ ซูต กานัม เลห. เฆ ยี ตู แป.”

19เฌา เยซู วี ต็อห, “เบ ฌาด นี, เบ ตู หณึม มาเซ. แคะ เหมา อึณ ดี บอ เหลณ, โอว ดี โลว กอย รึม โดบ เบ? แคะ เหมา อึณ ดี บอ เหลณ, โอว ดี โลว คัม เบ ดูอี ฌึร ตี?” แฮะ ฮอต, อัน วี ต็อห, “ตึย ฆอน แม ตัห ดี โอว.”

20ปัน ตี เฆ วี ตึย ฆอน อีมาย ตึอน. กานัม บอ ยึร เฌา เยซู, อัน วี แตห ฆอน อีมาย ตึอน ดีเยณ อู เฌณ. อัน บอ เกห อีด กาหลอย แดง กาดาย, อึม อาง อัน วี ปูห.

21เฌา เยซู ดีหมอด ฆูณ อัน. อัน ต็อห, “ดอ เหมา อึณ แบน ปาย ตี ดี อัน?”

ฆูณ อัน วี ต็อห, “อู ซีณ ดีแตด อัน อึณ ปาย ตี. 22แบน เฌณ แบน เฌณ กานัม แฮะ โบง แตห อัน เกห แคง เงา, โจห แคง อึม, ต็อห ดี ง็อห อาซาก อัน. เซ แม แป ดี โบง, แตห แม เฌา กาเว ยาย.”

23เฌา เยซู วี ต็อห, “แม ต็อห, ‘เซ แม แป ดี โบง.’ โอว ยี ต็อห ดี แม, อาเซ หณึม, อัน แป ดี โบง โตต ดอน โมยว.”

24ปัน ตี ฆูณ ฆอน ตี วี ต็อห, “โอว แฮะ หณึม. เซ อึณ ซี มึห ปี ตู หณึม โอว, แม เฌา จอย โอว.”

25ดอ อัน ตี เฌา เยซู ยึร, อึณ มึห ดูอี กืน, กาแบลบ ตัห โดง กอย อัน. อัน วี จัร กานัม ฮาย ตี ต็อห, “แม กานัม อี โบง แตห โหยะ อี กาดัน บอ ตู แตห อี ปึอน ดี กาลาง โฆรห, โอว จัร แม เลห แคง โดว โบ็ง ดูอี นี, แกวะ ฮู แตห แม วี ลึบ ดอ เหมา.”

26ปัน ตี กานัม วี โบง แตห ฆอน อีมาย ตี วี ดัด, ดีเยณ กาเซา. แฮะ ฮอต, อัน เลห. วาย อัน ตี ฆอน อีมาย ยี ปี ดูอี ยัม. โคว, มัง อี ต็อห, “อัน แฮะ ฮอต ยัม.” 27เฌา เยซู ยี ปา แด อัน, จอย อัน แตห อัน ยีต จ็อง. ปาย ตี, อัน บอ ยีต.

28วาย อัน ตี เฌา เยซู วี ลึบ แคง กาง. เฆ ดีแบ อัน วี ดีหมอด อัน ดอ ตู มึห อี เฮา โทม. เฆ ต็อห, “เหมา อึณ ปาย ปี ตู แป เย ดี ซูต กานัม ตี เลห เตา?”

29อัน วี ต็อห, “เซ เบ ตู ยืน โบม บอ ซาคึร เฌาพรา, กานัม ฌึร ตี ตู เลห.”

30วาย อัน ตี เฆ วี เลห โดง กอย เฆ, วี ฮาว กาโลห อืง ฆาลีเล. เฌา เยซู ตู ซี แตห อี เฮา นับ โดง กอย เฆ. 31โคว, อัน มาโนว ดีแบ อัน. อัน ต็อห ดี เฆ, “อึณ มูห โอว, อี แฮะ แบน ฆอน ดูอี, เฆ ดี อาบ โอว ดี รันซู โอว. เฆ ดี บอ ง็อห อาซาก โอว. วาย แฮะ ฮอต ยัม โอว, ฮี โนะ โอย ซีแง, โอว ดี วี ยีต วี อีม.” 32เฆ ดีแบ อัน, เฆ ยี ตู นับ ซีเพา โฆรห ตี. เฆ มืร ตู ยัะ ดี ดีหมอด เฌา เยซู ลอง อัน ตี.

ลอง อาเซ มูห ดูอี ตาง

33เฆ วี ตัห ฌัม มืง กาเปนารึม, วี ลึบ แคง กาง. ดอ อัน ตี เฌา เยซู วี ดีหมอด ดีแบ อัน ต็อห, “มาเซ ปี ลาย ซังคยาง เบ ดอ ฮาว เอ โดบ อึณเตณ?” 34เฆ ยี ตู กาลาง มาเซ. โคว, เฆ แฮะ ลาย กาแทณ ลอง อาเซ แฮะ ตาง หลึอม อี เฮา.

35ปัน ตี เฌา เยซู วี ตูต, วี แดะ ดีแบ อัน ฆึร ดี อา วี, วี ต็อห, “อาเซ ซี แยต ดี อาต, อัน โลว โดบ ดี ปัน, แบน หมาย ดอน อี.”

36ปัน ตี อัน วี แดะ ฆอน อู วี ตัห กอย กาแต เฆ. อัน วี เงียม ฆอน ตี, วี ต็อห, 37“เซ อึณ มึห ดูอี อู วี อี รวห ฆอน ดีแตด ฌึร นี โกบ หณึม อัน ดี โอว, อึณ ปี อัน รวห โอว. อาเซ ยี รวห โอว, อึณ ปี, อัน ตู รวห มี โอว อู วี. อัน รวห บอ เฌาพรา อี แฮะ ตึย โอว.”

ลอง ดูอี อี อึง เฌา เยซู บอ ดูอี อี ตู อึง อัน

38อายอฮาน วี ต็อห ดี เฌา เยซู, “ซารา, เย แฮะ ยึร ดูอี อู วี, อัน ฆาว ปวน แม, ซูต กานัม เลห แคง โดว โบ็ง อี. โกบ ตู โดบ อัน ดี เอ, เย แฮะ จัร อัน แกวะ โบง ฌึร ตี.”

39เฌา เยซู วี ต็อห, “แกวะ แคร อัน. เซ อึณ มึห ดูอี อู วี อี ฆาว ปวน โอว, วี โบง นา หมึอม อาม กาเซา, อัน ตู นับ ดี วี กาลาง นา ตู หมึอม ลอง โอว. 40โคว, อาเซ ตู โบง นา ตู หมึอม ดี เอ, อัน กอย บลาก เอ. 41โอว ต็อห อาคัร ดี เบ. เซ อึณ มึห ดูอี อู วี อี นับ ลอง โอว, เซ อัน ดัว เบ เดียง อึม อู ซีลัยะ โกบ โดบ เบ ดี โอว, ดูอี ตี ดี ปึอน รูห ปี กาอาบ อัน ปึอน.”

ลอง ดูอี อี กาซูห อี โบง หมาบ

42เฌา เยซู วี ต็อห, “เซ อึณ มึห ฆอน ดีแตด อี หณึม โอว ปี ฆอน นี, เซ ดูอี อู วี วี กาซูห ฆอน ตี โบง หมาบ, อึณ กาอาบ อี ดึห มาว ตาง ปี กรีด อี คามูน, ปัก ดี แมง อัน, วี บยัว บอ อัน บอ มาว ตี แคง อึม. 43-44เซ อึณ มูห แด แม อี แตห แม โบง หมาบ, แดบ แวน แด ตี. โคว, อึณ แตห แม โจห กาโละ งาราย. แคง กาโละ งาราย เงา ตู ยัด ดอ เหมา. เซ แม มึห แด อู บลาก, ยี ปึอน ลึบ กอย แคง มืง ฆางหราว, อึณ หมึอม หลึอม มึห แม แด อา บลาก. 45-46เซ อึณ บอ มูห เปลา แม อี แตห แม โบง หมาบ, แดบ แวน บอ อัน. เซ แม มึห เปลา อู บลาก, ยี ปึอน ลึบ กอย แคง มืง ฆางหราว, อึณ หมึอม หลึอม มึห แม เปลา บอ อา บลาก, ยี โจห กาโละ งาราย. 47เซ อึณ บอ มูห งาย แม อี แตห แม โบง หมาบ, แตห แม วี แฆวะ แวน งาย ตี. เซ แม มึห งาย อู บลาก ยี ปึอน ลึบ แคง มืง ปี อึบ เฌาพรา, อึณ หมึอม หลึอม มึห แม งาย อา บลาก, ยี โจห กาโละ งาราย.

48แคง กาโละ งาราย ตี, มังปรัต อี โฮม ยัง ดูอี ตู ยัม ดอ เหมา. บอ เงา อี แตห ดูอี คัม ดูก ตาง อาว ปึอน บยัด. 49เงา ดี วี กาซึม นา ตู หมึอม แคง น็อห ดอน อี, แตห อึณ ปี ซัยะ อี แตห ปี ดี โฮม ตู อัม.

50เซ ซัยะ แฮะ ซ็อง, อึณ บอด. เซ ยี หราย ซ็อง ซัยะ, อาว ปึอน โบง มาเซ อี แป ดี แตห ซัยะ วี ซ็อง. แตห น็อห เบ ปี ปี ดี โฮม อี ฮับ ซัยะ. แตห เบ บอ ลาย ร็อก กาแต เบ, แกวะ แตห เบ ลาย รู.”

Currently Selected:

มก 9: pce

Highlight

Copy