Lukas 23

Yesus dopra Pilatus damai dubeipa, upu talenmai upu

1Yahudi yala neng Allah karena tep, ila deiyo neng cap, Musa sekeiamu upu peteremna deiyo neng cap, Yahudi yala neng, yuk deiyo neng, wisi neng cap, sun upu konum pepi dingeda, Yesus dopra, Pilatus damai dubei. Ada Yudea tara taleamu ngebo, ‘Pilatusdi upu lepsikra bokeipkur’ tenen, dubena karepi. 2Aneng yumada, ‘Pilatusdi Yesus poipkuser’ tenen, minina di aupu pepi. “Yesusda, er mali kurya deiki di, nun mutu neitamai kunge nesala epmengedi, sun yuma mali kunkamenge. Erdi mali kudiserure. Tonda, nundi Kaisar co bo kareramep ngeda, ‘Ange men karenkamepe,’ pepra, upu sengdongoserure.

Tonda, Allahdi dokoteprepa, nesala weik lyepredi, talenkamre deiyo ngebo, ‘Mesias ngeboda, ne kunune,’ Yesusdi perure. Mesias ngeboda, ada Raja utopu ngebo kunkamra tep, aupu peserya deiki di, ‘Neda ila nimi deiyo ngebo, Raja utopu ngebo kunune,’ peserura cadi, angeda, pio mali.” Sun anengdi minina upu deiki di pepi.

3Upenmaiya tep, Pilatusdi Yesus tep asipetepu. “Yahudi yala neng sun ila deiyo ngebo, Raja utopu penge ngeboda, kan konum do?” pepra asipetepu. Asipetepupa, Yesusdi tamupra pepu. “Teka apepmaneremtopu kunune,” pepu. 4Upepupa, Pilatusdi abulupra wekmai neng yuma cap, Allah karena tep deiyo neng cap tep pepu. “Nun Roma mutu deiyo nengdi, ‘Ukunkamrume,’ penup upuda, tek sisi mali kupka deiki di yanipmasere ngeda, kapul men pepmaneruma cadi, men gekepmane. Angebo mali kupu deiyo keca kapul men gekepmane,” pepu.

5Upepupa, Allah karena tep deiyo neng yumadi, ‘Pilatus gekepredi teka tenepkamar’ tenen, pio pe deipra puto di ton cap aupu pepi. “Gumde, Yesus er mali kure ngeda, mali-mali peteremya deiki di, Yudea tara kunge Yahudi yala nesala yuma tep, mali kupra deriserure. Galilea mutu di mali-mali kupra yakaramnganen, amutu peda, yana tupa mali kudiserure,” pepra weika di penmai.

6Sun upepipa, Pilatusdi aupu gekepmaua cadi, “Yesusda Galilea tara ngebo kurur do?” pepra asipetepu. 7Asipetepupa, sundi, “Jo, Galilea tara ngebo kurure,” pepipa, gekepra kael kepu dingeda, ila nimi deiyo ngebo Pilatusdi, utenepu. ‘Ange tep nengeda, Galilea talepra ne amutara kurur deiyo ngeboda, Herodes cadi, Herodesdi Yesus tep upu lepsisikra bokeipkamre,’ tenepudi, Herodes Yerusalem mutu keana kunmauai, Yesus dokotepu.

8Pilatusdi peipupa, yuk nengdi Yesus dopra, Herodes damai dubei pangeda, Raja Herodesdi Yesus epudi kange deipu. Kange deipunge ada, dorketeng tamun, “Yesusdi nimi men kupmanto pel dorure,” peramipa, gekeramnga tep, ‘Ne dinmatenyai ton, apel doptupa ne peda eptene’ tenen, putaramnga tep, Yesus epudi kange deipu. 9Utenepka tep, Herodesdi Yesus tep weike asipetepu dinin, Yesusda, upu tenpu pe men pepudi, dimpepnapu kupmau. 10Yesus Herodes damai kunmau taru yumada, sun Musa sekeiamu upu peteremna neng cap, Allah karena tep ila deiyo neng capdi, tulum kupupa, minina upu di, “Yesus er mali kure kecada, adano,” puto di penmai.

11Ukunmaipane, Herodes cap, er jen talen neng capdi, Yesus tep, nyek-nyek pepra nalemai. Sundi nalenmai taru yumada, sun ila neng kemameng opkal utopu opkal, Yesus nong deiki kenekdeipidi nalemai. Ukupidi, ka tamupra Pilatus damai dokotepi. 12Herodes cap, Pilatus capda, dorkuramrei taru yumada, kange men deipdana kuramrei dinin, Pilatusdi Yesus dopra, Herodes damai dokotepka deiki di, ‘Ne kabo’ tenen, sun kange deipdarei.

13Pilatus damai dokotepipa, Pilatusdi Allah karena tep deiyo neng cap, Yahudi yala neng, sun yuk deiyo neng cap, tonda yuk tali dakunmai neng cap kongpepupa, yai pangeda, aupu pepu. 14“Sundi Yesus dopra ne damai duyanmarumdi, ‘Angeboda er mali kurya deiki di, amutu talenge neng, Roma neng popbisiptepe perure,’ pepmanerum dinin, sun tupa gekenmarum taruda, asipetepmanu dinin, sun pepmarumtopu, er tek sisi mali kure kecada, tenpu pe ton men gekepmanue.

15Tonda, Herodes peda, nimi mali kupmengepa, adeiyo tep poramep kecada, ‘Akeca kupmau do?’ tenen, asipetepmau dinin, er peda aupu men gekepmaua cadi, Herodesdi angebo dopra, nun damai tamupra dokotepmaserada, konum epmarume. 16Ange tep nengeda, nedi pepnepa, ne jen talen nengdi talipu wenepra balana di er nong deiki bongopmengepa, Yesus loptapkune,” Pilatusdi, sun Yahudi yala deiyo neng tep pepu.

17Uda, Yahudi yala neng Kaplemna Kailya Kalemna taru neitamai di, wenemna ati dongorami neng kan-kan dinin, nesala yumadi, ‘Angeboda loptapso,’ pepne ngebopu, tenpu ngebo wepra lortamami. 18Ukuramya cadi, Pilatusdi aupu pepu dinino, er damai nimi weike bulupra wekmai neng yumadi, “Gumde, Barabas erpuda loptapseo, pepkurume,” pepra derinmai. 19Barabasda, ‘Yerusalem mutu talenge neng popbisipkamep’ tenen, podanmai taruda, ‘Nedi ton melipra kwaya dakra popkun’ tenen, nimi tenpu popupa, wenemna ati dongomipa kuramu.

20Pilatusdi, ‘Yesus loptaptene,’ putapka tep, awekmaidi, ‘Yesus poipseo,’ penmai neng tep, “Ne kangeda telep ngeda, Yesus loptapkune,” pepra awekmai neng tep puto di penmau. 21Upenmau dinin, sun awekmai neng yumadi, ila upu dingpenmai. “Kandi pepmempa, Yesus dopra, sengdin co deiki deipra popkunge,” pepra upu ila di penmai.

22Upenmaipa, Pilatusdi u weneringe ton tamupra pepu. “Ware keca deiyo tep popkung do? Nun amutu taleramep nengdi, ‘Ukunkamrume,’ penup keca, dan nge ton yaniserya tep popkung do? Erdi mali kuramtupa poptepe kecada, tek sisinge ton men gekepmana tep, nedi pepnepa tali wenepra balana di popmengopda, loptapkune,” pepu. 23Pilatusdi upepu dinino, sun wekmai neng yumadi, kange di ton cap pe deipra, ila upu di ton cap moronmai. “Kandi pepmempa, sengdin co deiki deipra popkunge,” penmaiya deiki di Pilatus penmau upu seki. 24Pilatus er kangeda, ‘Awekmai neng yumadi, pio pe deiya penmanenga tep, Yesus dopra, aneng dakarepnepa popkunge,’ tenepu.

25Utenepudi, Barabas loptapupa, tali beu. Ada, Barabasdi, ‘Nun Israel mutu yuma talesenung neng, Roma neng popbisiptepe’ tenen, piripteremudi, nimi pomu ngebo kuramu. Ukuramnga tep, wenemna pumbon dongomyai di, Pilatusdi dopra loptapupa, beu. Barabasda tali beu dinin, Yesuspuda, Pilatusdi, ‘Anengda, Yesus dopra poipsetenge,’ tenen, penmanengada, ‘Dakupkunge,’ tenepudi, aneng tep karepu. Karepupa, ‘Jen talen nengdi Yesus dopra sengdin co deiki deribenkung’ tenen, karepi.

Yesus sengdin co deiki deipra popi upu

26Yesus sengdin co deiki deipkamaiya tep, bisi banmai taruda, tenpu ngebo er si Simon, Kirene mutu ngebo bura kunmauanen, bisi neitamai yakaupane, antapi. Jen talen nengdi Yesus dubanmaipa, Simon cap antapdai dingeda, Yesus er sengdin co ikine kupka tep, sun jen talen neng puto di Simon Kirene mutu ngebo tep upepi. “Kan adipapu asengdin co topra beo,” pepra dipipa, Yesus mepra benmaupa, Simondi aco topra amenda beu. 27Yesus menepra banmaupane, nimi weike ton, amenda banmaiya kan-kan di, nerapu ton banmai. Yesus tep, bicau tenepidi, mali pepra engepbanmai.

28Engepbanmai dinin, Yesusdi tamupra anerapu dipterepudi, aupu pepu.

“Sun Yerusalem kurum nerapuda, ne tep engena gume. Sun pe cap, sun nyapu cap tep, engenkamrume. 29Ada mesum tep men pepsene. Deiyoda ake. Amenda ikin kupkamser taruda, aupu penkamrume. ‘Sun nyapu men derengedi, youpu kunge nerapuda, sunpuda telepe. Tonda, nyapu moum dinimna gum nerapu cap, sunpuda, telep dinin, nun nyapu konum deipmepu nerapuda, men sepdaro betepe cadi, ikin weike kunupe,’ upenkamrume.

30Aupu penkamrum taruda, akeca ton kupkamre. Yahudi yala nesalada, kange mun weik kuprepa, mutu yuma tep, upenkamenge. ‘Mutu dalupmemdi, nun yana taikra popsemempa, adipapu deptepe. (Hosea 10:8) Sun mutu buma yuma pakasingipsetumpa deptepe,’ upepra mali penkamenge,” Yesusdi pepu.

31Upepu dingeda, domona deiki aupu ton pepu. “Co embek#23:31 co embek – Yesusdi ‘Co embek’ pepu ngeda domon upu pepu dinin, deiyo ake. Ada, nedi mali kun keca tenpu pe men kuramsipane, sundi popkunengada, yambul kanam dinino, sun mali kun keca weik akwapmarepapu, balila kupra akeca men tapkameng nesalapuda, amenda taru Allahdi anesala tep wenepra popkamrada, tek sisi pio ikin weik kupkamre ja. Yesusdi ange tenepudi pepu. tupa kupmar taru utopu taru di, ne tep ukupmangada, yambul kanam dinin, amendada, co koulupre taru utopu taru kupkamseng ngeda, pio ikine,” Yesusdi domon upu deiki di pepu.

32‘Yesus sengdin co deiki popkup’ tenen, bisi banmai tarupu, nimi butene mali kuramrei neng ton, Yesus cap wisipra dubanmai. 33Bisi banmaiyanen, mutu si Golgota mutu bei. Golgota perami ngeda, ada amutu urasinda, nimi giso yo utopu kwamu mutu tep aupu perami. Golgota mutu deiki bei dingeda, sengdin co tu deiki deipra, Yesus er nong aco deiki alipra deipidi, buru dana-dana cap, yane tenpai wisipra deipidi, paku daki. Ukupi dingeda, Yesus er nong sengdin co deiki deipmai coda, erepra tu palipmaiya pumbon erepra dokotepidi iki.

Ange utopu ton, sun mali kuramrei neng butene, ton ngeboda dumsisi tara, ton ngeboda wakla tara deipidi, yuk-yuk iki. 34Aneng yumadi, ‘Yesus popkup’ tenen, sengdin co deiki deipmai taruda, Yesusdi er nai Allah tep pepu. “Naio, aponmaneng neng tep, men wenepkamrume. Sunda, moupra men tenepmangdi, kunmanenga cadi, sun tep kaukepkamrume,” pepu. Tonda, sun ajen talen nengdi, Yesus deiki kenekmau opkal, ‘Ware ngebodi dopropkur do?’ tenen, sun esu pen keca, er sida undi, esu penmaiyanen, konum kupne nengpu aopkal doronmai.

35Atali wekmai nengdi tupa dinmaipa, sun Allah tep karena deiyo neng cap, Musa sekeiamu upu peteremna deiyo neng cap, sun anengdi, Yesus tep, nalenmaidi, autunmai. Sun penmai upuda ake. “Yesusdi yuk neng tep makupra lyemamu dinin, erdi er pe tep men lyepdatue. Allahdi wepra dokotemtupa, nesala ban-ban yuma lyepredi talenkamre ngebo, nimi Lyemna Deiyo Ngebo, Mesias ngebo kuramtutoda, sengdin co deiki lyepdatudi, tuai busuktue,” pepra nalenmai.

36-37Anengdi upenmaitopu, sun jen talen nengdi aupu pepi. “Kanda Yahudi yala neng, sun ila nimi deiyo ngebo, Raja ngeboto kuramtumtoda, lyepdatumdi kwereptume,” upepra nalenmai. Nalenmaidi, ‘Pu jeprur’ tenen, pu sengdongona tep, anggur me yunge, Yesus tep karepterepi dinin, Yesusdi men jepu. 38Nimidi, “Yesus er mali kure ngeda ake,” perami ngeda, co lase deiki surat sekra deipidi, Yesus er giso deiki tara deipi. Surat seki ngeda, adano. ‘Yahudi yala neng sun ila nimi deiyo ngebo Raja adano,’ peprapidi, sekra deipi.

39Sun aneng yuma nalemaitopu, Yesus neitamai dana-dana tara sengdin co deiki deipmai neng, tenpu ngebodi, Yesus tep, mali upu weika di penmau. “Kanda Allahdi wepra deiamkeupa, nimi Lyemna Deiyo Ngebo, Mesias ngebo kurum do, gum do? Mesias kutumtoda, kan pedi lyepdatumdi, nun cap lyepsetume. Dinin, ange men kutume,” pepra mali upu penmau. 40Upenmaupa, dana tara deipmai ngebodi, “Sundi er popmangtopu, nun peda popmasenga cadi, Allah tep kware men kunmaker do? 41Nun tek sisi mali kuramnumnga cadi, walito popmaseng dinin, angeboda, mali keca tenpu pe ton, mali men kuramu ngebo popkunge,” pepu.

42Upepu dingeda, apenmau ngebo dipapu Yesus tep pepu. “Yesuso, kandi nesala yuma cap, akeca-keca yuma cap, talepra kunkamremai, wekmem dingeda, ne tep tenipkamnerume,” pepu. 43Upepu pangeda, Yesusdi atelep upu penmau ngebo tep tamupra pepu. “Ne tek sisi pepkene. Atumi dipapu, ne nai kori, pio telepai wekne taruda, kan ne cap tonpa pio kunkamaneme,” Yesusdi pepu.

Yesus depu upu

44Yesus sengdin co deiki deipyada, keteng dukduk ketengto, ipna topne keteng di deipi. Ipna topne keteng deiki di, Yesus sengdin co deiki deipmaipa, dakupmaupane, keteng dukduk pena sisa kupupa, amutu yuma ipudi kunuku. Ukupra kunukmauanen, sintara weneri keteng kupu. Ada, sintara keteng komuni tup kupmau dinin, keteng dirin gum kupupa, kunuknapu kupmau. Ada keteng dirine gum kupmaua cadi, kunuku.#23:44 keteng kunuku – Kira-kira dari jam 12 sampai jam 3 sore amutu yuma kunuku. 45Sintara weneri keteng kupupa, Allah karerbarami ati pumbon wilipra kapkwetemi opkalda, er pedipapu, itara di gwelepra kwerepudi, dana-dana kepudi, butenepu.#23:45 opkal butenepu – Allah tep karerbarami ati pumbonda ati yuk-yuk wilipra domi. Ila mambul ati, er si Pio Telep Lek Atida, Allah karena neng, sun ila deiyo ngebopu akati wekamtue. Akati lelimdongona tep, lyom opkal doprapidi, kapkoteamipa, akati yuk neng men wekmanto kuramu. Dinino, Yesus depu pangeda, aopkal gwelepra butenupu. Deiyoda, ‘Ukutaruda, Yesus depka deiki di, Allah er damai yakana telepe’ tenen, nimi kael kepkamenga tep, Allahdi aopkal gwelepropu. Lap pena upu nomor 15 dinkurume. 46Aopkal butenepu taruda, Yesus upu ila di erepra aupu pepu. “Ne nai Allah, ne sambalada, kan buru deiki deipkene,” pepu dingeda, adipapu isin dakropudi depu.

47Yesus depu pangeda, jen neng denge weik, 100 neng taleamu ngebo, Yesus sengdin co deipmaiyai tekmaua cadi, Yesus ila di ngolokudi, er depmau taru kupu keca yuma epudi, aupu pepu. “Uo, angeboda, tek sisi dumsisi ngebo kuramu,” pepu. 48Nesala weik bulupra dinmaipa, Yesus depupa kunmau keca yuma epidi, ila kange mun kupupa, giso talepra ila di engenmaidi, amutu tapra yukai bei. 49Sun tali neng yuma bei dinin, Yesus melipra embarami neng cap, nerapu cap, Yesus sengdin co deiki popmaiya damaida, yambul karenai di tupa dinmai. Ayuma dinmai nesala neitamai di, anerapu yumada, Yesus Galilea mutu di, Yerusalem yakaramu taruda, sun cap melipra embarami.

Yesus nong dopra peipi upu

50Yesus konum depu pangeda, tenpu ngebo er sida Yusup, erda Arimatea mutu ngebodi, ‘Yesus peirbenkune,’ tenepu. Yusup Arimatea mutu ngeboda, Yahudi yala neng, sun upu bongdina deiyo ngebo ton kuramudi, telep kupra dumsisipu kuramu. 51Yusupda, Sandeheren#23:51 Sandeheren nengda, Israel nesala sun teka tenerami keca yuma tep, upu lepsikra bongdina deiyo neng kurami. Tonda lap pena upu nomor 12 dinkurume. neng cap wisipra pel doramu dinin sundi, ‘Yesus popkupe,’ tenepidi kupi ngeda, erdi ton, ‘Telepe dakupkamange,’ men tenepu. Tonda, Yusup er peda, teka tenepra, ‘Allahdi ban-ban yuma neitamai di nesala weik lyepredi, sun dipru talenkamre taru yankamre’ tenen, ketenepra diramu.

52Yahudi yala nengda, nimi depnopda, gel imir pumbon peirami. Sun yuma ukuramya tep, Yusup Amitea mutu ngeboda, ‘Pilatusdi Yesus er nong karepnerepa, gel imir pumbon peirbenkun’ tenen, kwar dangna gum di, Pilatus damai bena moropu. 53Moropu pangeda, Pilatusdi Yusup tep, “Telepe Yesus nong dopra dapeirbeo,” pepu. Upepka tep, Yusupda boun telep opkal kunupudi, sengdin co deiki di Yesus nong dopra, aboun opkal di getepra, gel kumuamya pumbon dongopu. Agel imir pumbonda, yuk neng ton depnepa, men peirami.

54Yusupdi Yesus er nong peirbeu tumida, ada, Yahudi yala neng Allah si eremna tep, ‘Sabat tumi deiki pel men dopkamep’ tenen, beipye peingami tumi kupkamaua tep, sun ketenepra derirami tumi konum kupu. Ketenepra derin tumi konum kupka cadi, ambutumi men pel dopmanto tep, ipropupa, Yusupdi Yesus er nong dopra, atumi dipapu gel imir pumbon dongopu.

55Yusupdi Yesus er nong dopra peirbenmau taruda, Yesus cap Galilea tara di, melipra Yerusalem mutu yanmai nerapudi, Yesus nong dongopra peipmauaida, sundi dinmai. 56Dinmaiyane, sun ati tamupra bei dingeda, ‘Yesus er nong deiki dikeipkamap’ tenen, nintong telep me cap, nintong telep keca bute utopunge cap, ketenepra deipi. Ketenepra deipi dinin, Allahdi peiamupa, Musadi sekeiamutopu kupi. Ada, Yahudi yala nengdi, Allah gispal dona tep, beipye peingne tumi, Sabat tumi konum kupka tep, atumida beipye peingnapu kunmai.

Currently Selected:

Lukas 23: KNTOT

Highlight

Copy