JOHON 12

Bethani long Jisu yok Jangthu Kihel

(Mot. 26:6-13; Mrk. 14:3-9)

1Kijoktang-kamai ni-thorok ango Jisu Bethani yok wango, lalongsi Lajar po ahem kido, anangyok Jisu kithi para kapabur. 2Lalong anali Jisu aphan anithu an asanpo kahonjok pi. Martha pe kibak kili, aro anang pen Lajar po ta kicho ahong long kangning dun. 3Mary pe ador chot nard arong ajangthu eno, Jisu akenglong helo, aro anang chu pen weno. Hempo jangthu angnim chingtang detno. 4Manta anang adun ihut Judas Iskariyot po [anangyok kachobel po] pulo, 5“Piyokte jangthupo phoro kithom rupa tanga atheng pen jorsi nohokso kicho kangwe abangyok pipe yongo?” 6(Anangke kicho kangwe abangyok kilang aphan det ke kalek, manta anang kanghu kido; anang arideng nohok achulpo ki-en aro lalong pot thal, abithang aphansi ki-endet, la-anat ladi alam thano.) 7La-amun Jisu pulo, “Neyok thiri long kibi arni aphan anangyok bangpo pabi minang. 8Piyok pu tene kicho kangwe abang nali pen arniten do, manta ne nali penke arniten dode.”

Lajar poyok Kamariye Alam

9Konam Jisu Bethani long do pusi than unsi Jihudi arat hel, Jisu yokdet kilang kalek manta anang inghoyok kithi para kapabur, la Lajar po yok kilang yokta anali lalong yok damo. 10Lasi bangthe aghai hel Lajar po yokta kamari aphan chirwalo, 11anang parasi Jihudi hel ako-ong chiterekngo aro damsi Jisu yok krolo.

Jisu Halpensi Jerusalem Ayok Kilut Dam

(Mot. 21:1-11; Mrk. 11:1-11; Luk. 19:28-40)

12La-aphel arni kamai long kiwang rat hel, Jisu ta Jerusalem yok wangdo pusi arjulo. 13Lasi anali sini arong arwo eno, aro anangyok kapochak yok hangsolsi pulo, “Pahal nang! pahal nang! ingho Hemphu Arnam amenpen wangdo, lake Israyel rechopo bor-eh pachok nang.” 14Jisu ijon noselmurep hlongo aro labang athak arlulo; labang kiwi alamthe do, 15“O Jayon aso pe, phereyek, langot, nali recho noselmurep ijon athak arlusi wang jongdo.” 16Labang ahuwit alam adun hel ango ke abhu hlonghlesi kido; manta konam Jisu jortang dolo, la-amun, anang phansi lo-kiwi alamthe do pusi, aro analike anangyoksi ladi asal pachokngo, pusi anali anang lam aneng chipurkilo. 17Lasi Lajar poyok kipep ahilik para taramsi kithi para kapabur amun, Jisu pen kido arleng helke, hakhi pisi kido. 18Rat hel anangyok ta kapochak yok kidam; piyok pu tene anang asombhik asal katiki hel anali karju. 19Pharisi hel ihut para ihut chithan no, lake, “Nali thekdo ma, nali katiki hel jatsi chokche ye! Langot, pirthepe dungsi anang phel dun detno.”

Angkhan Grik Arleng Jisu yok Kabisar

20Minon kamai apor Jerusalem long kachirdom yok kiwang, lahel adak angkhan ke Grik arleng hel ta kachirdom yok kiwang. 21Anali Galili alongri Bethsaida long kido Philip po adung yok wangsi pulo, “O sar po, hali Jisu yok kilang aneng do.” 22La amun Philip po damo aro Andriu po yok thano; laparake Andriu po pen Philip po bang-hini damo, aro Jisu yok thano. 23Jisu analiyok pulo, “Arleng Aso jortang kido apor wang hlengo. 24Khanangsi ne nali thando, sok athe imu lungle long jangsi aro thithe lengke, anang imu detsi doman; manta amupo thi tangsi athe ako-ong wangman. 25Inghosi abithang ajiu po anengdok labang chipangboman, aro inghosi bang pirthepe long abithang ajiu kisim abangke, anang ki-or eh ajiu aphan chibiye. 26Inghosi ne sal katikiyok aneng do, anang ne phel-phel wang dunnot; aro ne daklongsi do, ne murkiya pota lalongsi doye. Inghosi ne phan tiki, tene ne Apa anangyok aman piye.”

Jisu Abithang Kithi Alam Kachithan

27“Minon ne jiuli ihik-bihik si dodet do. Aro ne pot pu nange, ‘O Apa, labang apor neral not’, ladi pu nang ma? Ladi kalek, ne labang apor aphansi wango.” 28O Apa nang menyok jortang pido. Laparake suneng para isi asi wango, “Ne labangpo ajortang pido, aro ne jortang wangpi phaknge.” 29Labang arjusi arjap phrongsi kido rat hel arjulo aro pulo, lake suneng kangder. Angkhan ke pulo, “Ihut tharlonsi anangyok lam thano.” 30Jisu pulo, “Labang asi nephan wangwe yong, nali natsi wango. 31Minon labang pirthepe bisar apor chok do; minon labang pirthepe kapangdom poyok ujhare. 32Aro ne, pirthimipe para kangthur pon amun, abangten yok ta nedung wane.” 33Anang pot badi si thiye, labang alam thandaksi pulo. 34Rat hel anangyok puphak ngo, “Hali kanong long arjudo, Khristo ke mo-mo yok do long. Nang pot badi Arleng Aso pangthur pon pen nange pusi pu undo? Labang Arleng Aso ke inghote?” 35Jisu analiyok pulo, “Nalidak aro bekso apor aphansi katha-ang do. Kangting nali kapangwe aphan, nali pen katha-ang kido amunsi nali kengkam chijornot. Inghosi kangting long kengkam chijorman, analike dak aga damdo, chithan un-eh. 36Konam nalipen katha-angpo do, katha-ang poyok krolnot, tangsi nali katha-ang aso-asu chiplang une.”

Arleng hel Kikrolkre

Labang alam thansi, Jisu chikakngo, aro anali para chibutilo. 37Anang anali ngo asombhik asal ako-ong tikine paklang yongta, anali anangyok krolkre yongo. 38Lasi Jisoya turki po potsi kipu alam chok peno, anang kipu: “O Hemphu, hali kithan kime-alamthe ingho krolo? Aro Hemphu ajakong ingho ango chiklango?” 39Aro lasi anali krol un-eh yongo, piyok pu tene Jisoya po ta kipu, 40“Arnam analimek hel pachotokngo, anali angthin parthatno, apot anali mek hel chithek the, aro anali angthin abhu hlonghle, aro aneng chipharleple, aro anali kiso paham hlonghle.” 41Jisoya po labang alam kipu piyok pu tene anang anang ajortang theksi, anang lam paharsi lamehel alam pulo. 42Layongta ako-ong arleng, phu-phang hel asitem ako-ong Jisu yok krolo. Manta Pharisi hel lahel yok kachirdom ahem long palut dam hlonghleye mene, pusi kapheresi lahel hoi choche yongot; 43piyok pu tene anali Arnam yok kaparklam yok ke anali arleng amen kaparklam posi anengdok chotno.

Jisu Kipu Alampen Bisar-Kahonthe

44Jisu hangsi pulo, “Inghosi neyok krol, anang neyok detke kalek, manta neyok wang kitol poyok ta kroldo. 45Aro inghosi neyok thek, anangke neyok wangkitol poyok ta thekdo. 46Inghosi neyok krol, anang kangting long do hlonghle ye, la anat ne pirthepe long katha-ang badi wangdo. 47Inghone bak ne kithan alam onesi mengme, layongta ne anang bisar-honthe dunde, piyok pu tene ne pirthepe yok bisar-kahonthe aphan wangwe yong, manta pirthepe pajok yoksi wangdo. 48Inghosi neyok chidengde, aro ne lamthe en-eh, anangyok bisar kipi ihut do; lake ne kithan alamthe ki-or arni anang yok bisar-hontheye, 49piyok pu tene nebithang ajakong pen lam thanthe yong, manta pot pu nange, aro pot than nange, bangpo neyok wang kitol Apa si neyok thanno. 50Aro anang kithan alam ki-or-eh jiuli, pusi ne than un. Ne pot thano, labang ke ne Apa neyok kapathan tol alam badisi ne thanno.”

Currently Selected:

JOHON 12: AMRI-BSI

Highlight

Copy