JOHON 6

Hajar Phongo Arlengyok Kapacho

(Mot. 14:13-21; Mrk. 6:30-44; Luk. 9:10-17)

1Labang aphel Jisu Galili langpepe, labang Tiberiyas langpepe ta puman, kamprek aga damo. 2Piyok pu tene anang asombhik asal kiso arleng helyok tikilo, labang hel theksi, amokha arleng anang phel-phel duno. 3La-apor Jisu inglong kartulpe yok damo, aro lalong adun hel pen iningo. 4La-amun Jihudi hel Kijoktang-kamai adung wang hlengo. 5Konam anang lang-woro, aro rat ako-ong anang aga kiwang theksi, Philip poyok arjulo, “Lamehel arleng kapacho ayok, ili him daklong nam damsi hlonge?” 6Anang aporman kilang yoksi anangyok pulo, piyok pu tene anang abithang pot tiki nange, anang bithang kithek. 7Philip po anangyok pulo, “Anali abangten yok bek-bekso kipi yok, phoro hini atanga penke him nam yongta dorde ye.” 8Adun hel ihut, Simon Pitor po amusoyok Andriu po puman anang anangyok pulo, 9“Plang phongo thengthe ahim aro ok jon-ni kido, ladi ihut oso holek do. Manta la-an arleng asitem bangpo pot badi pador une?” 10Jisu pulo, “Arleng helyok pang-ningot.” La-amun labang athempo long bap ako-ong kido; lasi kido-kangwe alekhot hajar phongo bak arleng iningo. 11Laparake Jisu labang himhel eno, aro anang Arnam yok kardom pisi, kangning abangyok pathak pono; ladisi kanange ateng ok ta pilo. 12Konam anali ahuwit ta apok ingkrango, anang adun helyok pulo, “Mehel bekso ta panghonhe ayok, him abeng hel pangrum phrot.” 13Lasi lahel labang plang phongo thengthe ahim para kicho agol kido ahim pangrumsi pachik kere-hini paplengo. 14Konam anang kapaklang labang asombhik asin theksi, arleng hel chipulo, “Khanangsi anango pirthepe long kiwang nange kido turkipo.” 15La-apot anangyok recho kapangning ayok, arleng hel wangsi Jisu yok kineppon rondo, pusi Jisu than unsi, ahudet inglongpe yok dam phakngo.

Jisu Lang Athak Kidam

(Mot. 14:22-33; Mrk. 6:45-52)

16Anithu apuno, anang adun hel langpepe akung damo, 17tilong isi athak arlulo, aro Kaparnaum rongpe aga arpatsi damjongo. La-amun ingting rimo, aro Jisu anali dungyok wangwe lang. 18La-apor tomon aghai wangsi, langpepe lang adul chiplango. 19Lalong anali tilong be-besi mayel kithom phili bak akaholo damo, la-amun anali Jisu yok langpepe athak kengkam chijorsi aro tilong adungyok kiwang thekngo, aro anali phere detno. 20Manta Jisu analiyok pulo, “Hane si, phere yek.” 21Laparake anali anangyok tilong athak parlulo, aro anali daklong damsi kido, tilong labang athem hlengo.

Arleng Hel Jisu yok Kabisar

22La aphel arni, langpepe kamprek apar aga kido rat hel thekngo, lalong tilong isi detsi kido. Anali Jisu adun hel pen tilong long arlule yongo, manta adun hel detsi damo. 23Laparake Tiberiyas para prek-prek tilong hel wangsi, ango Hemphu kardom pisi, arleng helyok him kapacho athempo adung ayok wang hlengo. 24Lasi konam Jisu lalong kangwe, adun helta kangwe, ladi theksi rat hel tilong arlusi, Jisu ayok bisar-worsi Kaparnaum longyok wango.

Jisu Ethakpe Ahim

25Konam anali langpepe akung Jisu yok thekngo, anali anang yok pulo, “Rabbi, nang holek konam te wango?” 26Jisu analiyok pulo, “Khanangsi ne nali thando, nali asombhik asal katiki kithek anat ke ne bisarse yong, manta him kicho kangkrang aphansi neyok bisar do. 27Kiprel a-an aphanke sal tiki yek, manta ki-or eh jiuli karjap a-an aphan sal tiki, labang a-an Arleng Aso nali piye. Piyok pu tene Apa, lake Arnam anang yok asap pilo.” 28Laparake anali Jisu yok arjulo, “Arnam karwal asal katiki yok hali pot ote nange?” 29Jisu analiyok pulo, “Inghoyok Arnam wang tolo, anangyok krolnot, labang si Arnam karwal asal.” 30Lasi anali anangyok pulo, “Hali nangtheksi, nangyok kikrol ayok, nang pot asin paklange? Pot asal nang tikido? 31Hali sar-larhel ingnam aju long manna kichohlong; labadi kiwi do, “Anali kichoyok, anang ethakpe para kicho ahim wangpilo.” 32Laparake Jisu analiyok pulo, “Khanangsi ne nali thando, naliyok ethakpe para him nali kipipo Mosi po kalek, manta ethakpe para khanang ahim ne Apa si naliyok pilo. 33Piyok pu tene Arnam ahim ke ethakpe para wang sunsi pirthepe long ajiu piman, lalo Arnam abhog.” 34La-apor anali anangyok pulo, “Hemphu, labang ahim haliyok arnita hali pinot.” 35Jisu anali yok pulo, “Ajiu kipi ahim hane lo. Ingho ne dung wange, anang jatsi ingchirche ye, aro inghosi neyok krol, ananli jat lang ik-eh ye. 36Manta ne nali pulo, nali nethekngo, yongta nali nekrolkre yongot. 37Apa neyok kipi hel, ahuwit nedung wange, aro nedung kiwang abangyok ne jat tikangke; 38piyok pu tene neke nebithang angthin ateng kalek, ingho neyok wang kitolpo kar-ih ateng kapachok yok ethakpe para wang sundo. 39Aro neyok wang kitolpo angthin ateng, anang neyok kipi, labang isita pangbobe ye, manta ki-or arni ethakpe yok pabur pone. 40Piyok pu tene ne Apa angthin ateng, inghosi Aso yok theksi, anangyok krol, anang or-eh len jiuli hlonge; aro ki-or arni ke ne anangyok ingthur pone.” 41“Ethakpe para wangkisun ahim hane lo,” pusi anang kithan alam anat Jihudi hel anang lam chithan jol-jolo. 42Anali pulo, “Labang arlengpo Jusep po aso Jisu, anang ai pe anang pa yok ili chinido, anang lalo kalek ma? Tene ethakpe para wangsun do, pusi labang alam minon pot badi pudo?” 43Jisu analiyok pulo, “Nali bithang adak chithan jol-jolek. 44Neyok wangkitol ne Apa arwalwe lengke ihut ne dung wang un-eh; aro ki-or arni ne anangyok ingthur pone. 45‘Anali ahuwit Arnam para chirli ye pusi turki hel alo long kiwi dowendo. Apa para arjusi kachirli, abangten nedung wange.’ 46Inghone bak Apa yok thekngo, puke kalek, inghosi Arnam para wangdo, anang detsi Apa yok thekman. 47Khanangsi ne nali thando, inghosi krol, analike or-eh len ajiuli do. 48Ajiuli kipi ahim hane lo. 49Nali sar-larhel ke Arnam kipi manna a-an chohlong yongta anali thilo. 50Arleng chosi kithithe yok, ethakpe para wangkisun a-an lalo. 51Ethakpe para wangkisun ajiuli ahimpo hane lo. Inghone bak labang ahimpo cho, tene anang mo-moyok doye, aro pot a-an pirthepe long ajiupo aphan ne piye, labangke ne okpo. 52La-amun Jihudi hel ihut para ihut yok chirboksol si pulo, “Hali kichoyok labang arlengpo abithang a-ok iliyok pot badi pi une?” 53Lasi Jisu analiyok pulo, “Khanangsi ne nali thando, Arleng Aso a-ok choche lengke, aro anang awi junje lengke, nali long ajiuli dode; 54inghosi ne ok cho, aro ne wi jun, anangke or-eh len ajiuli do; aro ki-or arni ne anang yok pangthure; 55piyok pu tene ne okpo ke khanang a-an, aro ne wi ke khanang kijun alang. 56Inghosi ne-ok cho, aro ne wi jun, anangsi nelong do, ne ta anang long do. 57Kihreng len Apa si jibadi neyok wangtolo, aro ne Apa anatsi ne hrengdo, ladisi ingho neyok cho, labang ke ne natsi hrenge. 58Labangsi ethakpe para wang kisun ahim, sar-larhel jibadi cho yongta thilo, bangpo badike kalek. Manta ingho labang ahimpo cho, anang ke mo-moyok hrenge.” 59Kaparnaum long kapaklang amun, anang lamehel alam kachirdom ahem long pulo.

Ki-or-eh Ajiu Alam

60Konam anang ako-ong adun hel labang alam arjulo, anali pulo, “Bangpo ke la-an akisum alam; inghote chidenge?” 61Manta Jisu, adun hel ladi kachithan jol-jolmar, angthin long than unsi, analiyok pulo, “Labang alamthesi nali pangho do ma? 62Tene Arleng Aso ango kido athemyok kangthur phak thek tene, nali pot puye? 63Ajiuli posi panghreng do, a-ok poke jat chakchesi do. Ne mehel alam nali thando, labang alam jiuli aro ajiubong do. 64Manta nalidak angkhan kikrolkre abang do.” Piyok pu tene inghosi krolkre, aro ingho anangyok hutur arideng peknge, bangpo Jisu ango para thek krengsi kido. 65Anang aro pulo, “Labang anatsi ne naliyok kithan, Apa para jakong pipe pu tene, kaita nedungyok wang un-eh.” 66Labang aphel adun hel chiru phaksi, anangpen aro dunde yongo. 67Lasi Jisu adun bang kere-hini abangyok pulo, “Nali ta kidam det yok aneng do ma?” 68Simon Pitor po anangyok pulo, “O Hemphu, hali ingho adungyok dam bo? Or-eh len jiuli alam nang pensi do. 69Hali nang krolsi chinido, nang ke Arnam kangthir ihutpo. 70Jisu analiyok pulo, “Ne nali bang kere hiniyok arwaltangsi en-eh yong ma? Manta nali sitem ihutke si-ik hapdo.” 71Anang Judas po aso, Simon Iskariyot po alamsi anang bangpo thano; piyok pu tene bang kere-hini asitem inghosi anangyok hutur arideng pek detne, bangpo ke anango.

Currently Selected:

JOHON 6: AMRI-BSI

Highlight

Copy