LUK 15
15
Kachingbo Bherabik
(Mot. 18:10-14)
1Minonke kalukdar hel aro papi hel wangsi Jisu adung lam ka-oneyok wango. 2Aro Pharisi hel aro kanong paklang hel chithan jol-jolsi pulo, “Labang arlengpo papi helyok taramsi analipen choman.” 3Lasi Jisu labang athenghlan alampo analiyok thano: 4“Phoro isi bherabik kido arlengpo ijon chingbo det tene, jon kep sirkepne jon sirkep bherabik ingnam long tikangsi kangbopo yok hlonghle lengke kabisarse arleng nalidak ingho do? 5Konam anang bherabikso hlong phak, neng arongsi anangyok hem alongyok aphang long en-neh aro nengronge. 6Aro konam anang hemyok wang, anang khoihel aro adung arel abangyok taram punge, analiyok pu ye, “Ne pen nengrong chipado, piyok pu tene ne kachingbo bherabik aso so hlong phakngo.” 7Bangso long, ne nali thando, neng kachipharleple bang kep sirkepne sirkep dhorom kangthir pen konbak anengrong, neng kachipharlep papi ihut aphan, ethakpe long layok ta nengrong dochot.
Tanga atheng Kachingbo Alam
8“Lale, ingho hemtungpe kep rupa tanga atheng isi chingbo, anang melursi hempo arkoksi, bangpo hlonghle lengke me-at langwor-weye ma? 9Konam anang bangpo hlongphak, anang alok hel aro adung-arel abangyok chitaramsi pu ye, “Ne pen nengrong donang, piyok pu tene kangbo tanga athengpo hlong phakngo.” 10Bangso long, ne nali thando, papi ihut neng chipharlep tene Arnam tharlonhel aphan neng arongman.
Kachingbo Aso Aro Anang Korte
11Laparake Jisu pulo, “Ihut arleng bang-hini aso penso kido. 12Amuso poke anangpa yok pulo, “Pa nebhak lungle phalang nepinot.” Lasi anang bang-hini asitem thaksi pilo. 13Bekso arni aphel amuso po anang ahuwit abhak lungle-phalang jor-phrotno, aro kaholo alongri longyok dam hrolo aro anang nohok hel akangho along akijolsi panghono. 14Aro konam anang kido-kangwe nohok panghon detno, la alongri ongkal chiplango aro kakungthin anat aduk hlongo. 15Lasi anang labang alongri arleng idon ahem sal katikiyok damo aro doduno, aro anangyok anang bitharlong phak-an kipiyok tolo. 16Anang nengrongsi phak hel kicho a-an hel chipangkrang si cho uno hoi, aro ladi kicho yokta kaita anangyok kicho-apot pipe yong ngo. 17Manta konam anang bithang atot wango, anang chipu lo, “Ne pa ke konbak ako-ong murkiya hel yok kicho apot kidor ayok ongchotsi chohlongdo, aro ne holek ingchir lapsi do hlongdo. 18Ne ingthursi ne pa adungyok dame aro puye, “Pa, ne ethakpe pen nang ngo pap tiki hlongo; 19neyok nangso kachipu michangche; neyok nang murkiya hel ihut badi enot.” 20Lasi anang ingthur si anang pa adungyok damo. Manta konam anang ahem para kaholo kido amun anang papo anang yok thekngo aro kachineng-ot wang detno; anang wang katno aro anang arbak ketno aro anangyok mungo. 21Laparake asopo anang yok pulo, “Pa, ne ethakpe aro nang ngot pap tiki hlongo; ne nangso kachipu michangche.” 22Manta anang pa ke murkiya hel yok pulo, “Parjang, kime chot ape-rik wanot— akime chot ape-rik— aro anangyok pa-ik; anang arilong arnan aro akeng long keng-op pa-ik; 23aro kangtub bop adomoraso wanot aro thatnot, aro ili chonang aro neng arong chipado nang; 24piyok pu tene labang nesopo kithi aro yongta hreng phakngo; anang kachingbo aro hlong phakngo!” Aro anali neng arong chipado lo. 25“Minon ke anang akleng asopo bithar long kido; aro anang wango, aro hem adung wanghlengo, cheng muri asi arjulo aro kikan thekngo. 26Anang murkiya ihutyok taramsi arjulo, “Lamehel pot te chiplangdo?” 27Murkiyapo pulo, “nang musopo wang phakngo aro nang pa kangtub bop adomoraso thatno, piyok pu tene apa anang yok kijok aro me-atsi hlong phakngo. 28Laparake anangka po aneng kangsi hem arlo lut dunde yongo. Anang papo-olelo aro anangyok padokngo. 29Manta anang, anangpapo yok pulo, “Oneh, piyok pu tene la-an anengkan ne nangsal tikipilo aro nang mengmeke do pipe yong; yongta nang nelok hel pen cho-jun kapadoyok ijon bik ta nethat pipeyong. 30Manta konam labang nang sopo wang phakngo, ingho nang lungle-phalang panghonsi cholo, chopakner damsi wang phakngo, anang phansi, kipanghreng kangtub bop adomoraso thatpilo!” 31Laparake anang pa anangyok pulo, “Neso po, nangke nepen dojong do, aro nelong pot do ahuwit nang phansi. 32Manta ili neng arong kachipado michangdo aro neng rong pahlong, piyok pu tene nang muso kithi yongta hreng phakngo; anang kachingbo manta hlong phakngo.”
Currently Selected:
LUK 15: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
